- قولي لابن عمك يقول لأحمد يعمل أكونت على الآسك بقى علشان اشتغله
- ايه !
- علشان اشقطه
- بتقولي ايه !
- قصدي علشان.. يوه، ماتقوليله يقوله يتهبب يعمل
- ايوة وبعد مايعمل ؟
- ياأسماء انا بحبه
- دا لو عرف انك بتحبيه قلبه هيقف
- يقف ياستي وانا هشغله تاني والله
- بفكر افضحك واقول للدفعة كلها
- ماهو لو معملش انا اللي هفضح نفسي واقول
- والله لو عمل ماهتبعتيله برضو
- ليه بقى !
- هتيجي تقوليلي ابعتيله انتي ياأسماء.
ماهو لو مش عارف اني بحبه هيبقى غبي اوي يعني، ولو عارف هيبقى ذكي اوي يعني، يوه بقى !
- ها قولتيله ؟
- قاله انا مش تافه علشان اعمل الحاجات دي
- ياسلام ! طب قوليله يقوله بيفرقوا هناك شاورما
- حلف انه مش هيعمل معرفش ليه، تفتكري فهم
- لأ مبيفهمش، بس حلف ليه، يعني لا عنده صراحة ولا عنده آسك، اشقطه ازاي دلوقت !
- طب بلاش اشقطه دي علشان برستيجك بس
المصيبة انه لو عمل مش هبعتله فعلاً معرفش اتضايقت ليه، بس اعتقد كده احسن، علشان لو عنده وانا كنت متضايقة مثلا كنت هدخل اشتكيله
حد كان باعتلي دي هناك " ثُمَّ تغرَقِين برجل يُنسيكِ قوانين أفكارك، تتشكلين من جديد كأنثى، أنثى بأفكار تناسب خطواته "
مين القمرز اللي كاتبة دي ؟ انا طبعاً دا سؤال
رديت بقلب على اللي بعت او بعتت، شوية وجه سؤال كمان " احنا بنتغير لما بنحب بجد ؟
لاقتني برد بتلقائية - بنحلو
- ونعرف ازاي اننا بنحب ؟
- اللي بيحب مش بيسأل السؤال ده
- اقصد الاحساس نفسه عامل ازاي ؟
- حد كان بيقولي انها شبه الزغزغة كده، حاجة بتزغزغ قلبك
- وده احساس حلو ؟
- بيفرح
- يعني مش بيحلي ؟
- الفرحة بتحلي
هو فعلاً الحب حلو ؟ ولا انا اللي برسم وهم وبوهم اللي حواليا بيه ؟ انا اوقات كتير مش بكون مرتاحة، اوقات كتير بكون عاوزة اعيط واوقات اكتر بكون ضعيفة ومحتاجة لوجوده، بس دا ميمنعش ان الاحساس نفسه حلو، وان مفيش شيء في الدنيا ممكن يعيبه
- والناس اللي بتتوجع ؟
- حبوا غلط
- ونعرف الحب الصح ازاي ؟
- مااحنا قولنا، الحب الصح بيحلي، بيريح، بيجي كإجابة
لقيتني بكتب " كأن تَعبُرنِي أنتَ ولا يبقَى مِني إلاك " ، مش باقي فيا غيره !
- عارفة ياأسماء ؟ هو شبهي اوي، لأ هو أحلى و..
- اول مرة تقولي على حد أحلى منك
معرفش ليه اتخضيت - بس هو أحلى
- وبتحبيه علشان حلو ؟
- انتي عارفة ان كلمة حلو دي اقصد بيها حاجات كتير، صفة مجمعة لكل حاجة حلوة، هو حلو، واكتر وصف ممكن اوصفه بيه انه حلو، بس أقولك ؟ مش ده السبب.
لما اي بنت بتحكيلي حاجة، اول حاجة بتيجي في بالي، ليه هو ؟ ليه الشخص ده بالذات اللي اتعلقت بيه ؟ ماحنا بنقابل ألف ولد يومياً، ليه ده اللي اتخلق بينهم موقف، وليه ده اللي قلبها دق واختاره واوقات كمان بيكون مختلف تماماً عن الشخص اللي بنرسم صفاته
أسأل ؟ ليه أحمد ؟ ليه رغم ان مفيش موقف جمعنا ؟ ورغم اني معرفش نغمة صوته أصلاً، ورغم اني معرفش عنه حاجة غير ملامحه ورغم اني مش هبلة ورافضة الموضوع ورغم اني فاهمة ان كل ده آخره وجع قلب ورغم اني .. ليه هو ؟
- أقولك ياماما ؟ بس سر
هزت راسها - سر ياستي
ابتسمت - عنيه واسعة اوي
شهقت - بتبصي لعنيه ياسعدية !
- والله أبداً، أنا بس بطرف عيني بشوفه
- بطرف عينك ووصلتي لعينه !
- يوه مش بغض بصري !
- ولما تغضي بصرك تبصي لعينه ؟
وقفت - مش هحكيلك حاجة تاني
- هو انا ربيت ؟ والله ماربيت.
" ظلت تقول ' ليس هناك مايدعى حب ' إلى أن آتاها كبرق فشق قلبها "
الموضوع بدأ بهدوء وانا اصريت أكمله، كان ممكن من الاول اوقف احساسي ده وانا قدها والله، بحبه ؟ مش عارفة بس مش لاقية وصف اكتر من كلمة قلبي بينكمش في بعضه لما بشوفه
- أحمد جاي على فكرة
- بصي في الأرض بالله ومتتكلميش ومتبصيش ومتعمليش حركاتك الغبية دي ومش عاوزة اسمع صوتك وبصي في الكتاب واس..
- عدى خلاص على فكرة
- لا بجد !
- والله عدى وخلاص
- يابنت التيت ملحقتش ابص.
تبصي فين ؟ حنان فوقي، بناتنا مبيبصوش لحد، عينك في الأرض، كتابك في ايدك وعلى البيت
- انتي بتحبيه علشان اسمه أحمد صح ؟
- عارفة ياقلبي، انتي اكتر كائن بيندمني اني حكيتله حاجة
- ليه بس ياألبي
- ألبي !! ماعلينا، علشان غبية.
انا ايوة بحب اسم أحمد جداً، تقريبا خلاص الاسم ارتبط باسمي بعد القصة اللي بنزلها دي، بس الموضوع أكبر من كده، انا مش متخيلة اسم غيره اصلا، يعني المرة اللي نزلت فيها قصة بإسم عُمر كنت كل شوية كنت بكتب أحمد بالغلط وبعدين اغير الأسم
- هتجي محاضرة بكرة ؟
- أحمد جاي ؟
- ياولي الصابرين وانا هعرف منين
- يابنتي انتي مش ابن عمك صاحبه وبيقعد معاه، بصي هاتي رقم ابن عمك وانا هتصرف
- نعم !
- قصدي هاتي رقم أحمد وانا هتصرف.
بقى كده، طب والله ماهروح الكلية، مبسوطين كده ؟ والله ماهروح
اتبعتلي على الآسك جزء من قصيدة لابن الرومي
- نَظرتْ فأقصدت الفؤاد بِسهمها .. ثُمَّ انثنتْ نحوي فكِدتُ أهِيمُ
ويلاهُ إنْ نَظرتْ وإنْ هِي أعْرضَتْ .. وَقْعُ السهَام ونزعُهُنَّ ألِيمُ
وحاجة آخر يالهوي بقى !
شوية وأسماء بعتتلي رسالة - أحمد عمل أكونت على الآسك على فكرة
وبعتتلي اللينك
مردتش عليها بس ابتسمت، انا مش عارفة اذا كان عارفني ولا لأ، اذا كان بيحبني ولا لأ، بس انا لاقيت في احساس حلو ومشيت وخلاص، سيبت نفسي رغم اني عارفة ان محدش هيتوجع غيري لو ملاقتش صدى لكل ده، كل يوم بليل بقرر اني خلاص هنسى الموضوع وبشوفه الصبح بنسى اني قررت انسى، هو، وقفته، ابتسامته، الساعة اللي بيلبسها في ايده، هو مختلف وغريب بس يتحب، لأ هو يتحب علشان مختلف وغريب
ام كلثوم كانت بتغني جوايا فبعتله على الآسك اللي بتقوله
" صالحت بيك ايامي، سامحت بيك الزمن "
انا مفوقتش غير بعد ماتبعتت، المشكلة اني عارفة ان عقلي مبيشتغلش في اوقات، عملتله بلوك على الآسك !
مقولتش لأسماء، طبعا اول سؤال هتسأله - انتي غبية، بقالك شهر عاوزة الأكونت بتاعه ودلوقت بتعملي بلوك !
محدش هيفهمني لاني انا كمان مش فاهمة نفسي ومعرفش بلوم على الناس ليه !
بعدت عن الكل الفترة دي، حتى أسماء، انا كنت عارفة ان المرحلة دي هتيجي، بعد مرحلة الفرحة بالاحساس الجديد هتيجي مرحلة الوجع دي، وكنت مستنياها
بقيت أغلب وقت المحاضرات بقعد كافيه قريب من الكلية، بقرأ او بكتب او سرحانة او بعيط
طبعاً لو نزلت بوست وقولت "الحب مش حلو متحبوش" هيبقى شكلي وحش اوي، ماهو انا بالذات مينفعش اقول ان الحب وحش، بعد مابنيت عالم كامل بيه مينفعش اقول انه وحش ومينفعش اقول متحبوش، بس ممكن اقول متتغابوش، ممكن اقول بلاش قلوبكم تلعبوا بيها وتحطوها في رهان
- طب رسايل ومبترديش ومش مشكلة، لما بتصل بيكي تقولي مش قاردة اتكلم وهعديها، البيت وبتقولي عاوزة ابقى لوحدي وحقك، انما الكلية كمان هتغيبي منها !
- سيبيني لوحدي ياأسماء معلش
- وايه القهوة اللي بقيتي تشربيها دي، اصلا بيعملوها هنا مش حلوة
- أسماء سيبني لوحدي
- حصل النهاردة موقف، انما..
- ياأسماء
- والله ماهقوم
- أقوم انا ؟
- لا استني هنشرب قهوة
اتنهدت - علشان خاطري سيبيني
مسكت ايدي - عاوزة اعرف ايه اللي حصل بس
- محصلش حاجة والله، انا غبية وبتعاقب دلوقت اهوه، هو في حد عاقل يعمل اللي انا عملته ده ! أسماء انا حبيته قصد والله، انتي فاهمة ؟ انا قصدت احبه وكنت فاكرة نفسي شاطرة هوقف كل ده في لحظة، انا حاسة اني ماشية في تيار ومعنديش قدرة اوقفه، مش قادرة اطلع
- انا هعرف اذا كان..
- بالله ماتعملي حاجة، لا تسألي حد ولا تتكلمي، مش عاوزة اعرف اي حاجة
أخدتني علشان نجيب الكتب من الكلية ونروح، قلبي وقع ولمس الأرض اول ماشوفته، والله نسيت اني من ساعة واحدة كنت بعيط بسببه، كنت حابة جدا اوقفه واقوله " بص، انا كنت بهزر مع نفسي اني احبك وكده وبعدين حبيتك فعلا" او اقوله مثلا " انا تعبانة بسببك، بس انت ملكش ذنب، انا كنت بتغابى مع قلبي، لا تقدر تقول كنت بلعب يعني ومعرفش ايه السبب والله، بس انا حالياً تعبانة ومعرفش برضو بقولك كده ليه، بس كان لازم تعرف "
لما روحت كتبت " الشهقة التي تحدث بقلبي كلما آراك، ستودي بي يوماً ما"
فكيت البلوك وبعتله " توقف عن مداعبة قلبي بأظافرك " وعملت بلوك تاني، انا بخاف مني اوي لما بوصل للمرحلة دي، بكون غبية ومش مفهومة، يمكن للسبب ده ببعد عن الناس كلها، رغم انها بتكون اكتر فترة بحتاج فيها حد جمبي
تفتكر لما تيجي ممكن تستحمل كل ده، أقصد تتحملني لما اوصل للمرحلة دي، هتلاقي فيا اللي يغفرلي عصبيتي وزعلي اللي بيطول وخوفي اللي ملهوش مبرر او سبب !
كنت بفك البلوك أقرأ اجاباته واعمل بلوك تاني، بعمل ليه رغم اني ببعت ورغم اني بقرأ، معرفش !
بعتله - انت ليه مش بتضحك ؟ صورك كلها بتبتسم فيها بس، مش بتضحك ليه ؟
- لأ عادي بضحك
قلبي انكمش اول مارد، سألته - مش بشوفك بتضحك، حتى لما بتكون مع صحابك
- ابقى تعالى اقف معانا وهنضحك سوا.
ماهو أنا لو جيت، هاجي أمسكك من ياقة القميص بتاعك وأبعدك عن الكل، تقف معايا انا، وتضحك معايا أنا، تبقى بتاعي انا.
تاني ياحنان ؟ هنغلط تاني ؟ طبعاً عملت بلوك تاني
كل ده كان لازم يقف، قلبي بقى يوجعني لما ببعتله، معرفش احساس بالذنب ولا زعل على نفسي اني مش كده، ولا علشان شكلي هيبقى وحش لو عرف انا مين، او ممكن علشان بكلمه وانا مستخبية ورا ابليكيشن بيخفي هوية اصلا !
صاحبت اغلب اللي بيشتغلوا في الكافية من كتر مابروح، بقى معروف اروح هناك واطلب قهوة فرنساوي، لو أسماء هنا، كنا هنطلب أكل وكنا هنضحك كتير اوي، كانت هتحكيلي عن اللي بتكراش عليهم، وكانت كمان بعد كل جملة هتقولي " مش هنتهبب نذاكر بقى ! "
وقتها بس قررت ارجع لحياتي تاني، اللي معرفش ليه بخرج منها لما بزعل
اتصلت بأسماء واتكلمنا كتير اوي، عملت جدول مذاكرة طبعاً مش هنمشى عليه بس هو لازم يتعمل، بقيت اتجنب اشوفه في الكلية
- خلاص يعني شيلتي الموضوع من دماغك ؟
- تخيلي ياأسماء انه بيحب مثلا ؟ او انه اختار بنت وقرر يتقدملها، تخيلي انا حالتي هتبقى عاملة ازاي ؟
- علشان كده قررتي تنسي يعني ؟
- علشان دلوقت القرار في ايدي، انسى او اكمل، بعدين لو طلع بيحب فعلاً هكون مجبرة انسى، وانتي عارفة اني مبحبش اتجبر على حاجة.
- من بكرة اجبلك صف كراشات وتختاري
- صاحبي اللي كتفه في كتفي
نودع القهوة بقى ؟ انا مبحبهاش، بس هي اكتر مشروب لايق للحزن، روحت الكافية لوحدي، كانت آخر مرة وقررت بعدها اني مش هدخله لوحدي تاني، كنت مقررة أشرب عصير علشان قررت ابطل قهوة خالص
بس جابلي قهوة فرنساوي يمكن علشان اتعود على كده، رفعت المنديل لاقيت ورقة مكتوب فيها " توقفي عن مداعبة قلبي بأظافرك " بصيت حواليا من الصدمة، لاقيته قاعد قصادي وبيبتسم
شهقت والورقة وقعت من ايدي، كنت حاسة اني عاوزة اعيط اوي، ومعرفش ايه علاقة العياط بالخضة، جسمي وقتها كان بيتنفض، مسكت الشنطة معرفش علشان اقوم امشى ولا كنت بتحامى فيها
سبتها تاني لما لاقيته بيبصلي وبيضحك، وطلع في شموس بتضحك زي ماكنا بنرسم في كراسة الرسم زمان اهوه
ام كلثوم غنت فجأة " صالحت بيك أيامي، سامحت بيك الزمن "
" حتى قبل أن التقيك، لم نكن أغراباً "
#أسميته_أحمد
#حنان_سعيد
