" تَـبَـدُّدْ "

15

..
عصر الجمعة..5:23م

نزلت من الدرج اليوم وما حصلت فهد، ولد الكلب والله كنت ابيه يقولي وش عرفه بكذبه امي..صحيت وافطرت وقومت ياسر وقضيت يومي كله منبطح من ورا هالحادث، ياسر كان مزعج بعض الشيء لكن لفيت فمه بشطرطور من الصبح يتكلم بلغة الإشارة، طبعا اليوم ذا كنت اتفرج فيه بفلم بايخ وتمنيت اني ما شفته
كان يوم طبيعي جدا، لين ما اتصل منصور وقال

"خالد فاضي الليلة؟"

انسدحت على ظهري وقلت

"ايهه بس مافيني حيل اسوي شي تصدق سوينا حادث انا وواحد وطلعنا سالمين"

قال منصدم

"حادث! متى؟"

"أمس يوم رجعت من المدرسة مرني واحد واخذني وصدمنا قرب الخط العام ولا احد درى عنا لين اذن العشاء الساعه تسعه صحيت"

دقيقة..انا ما صليت! قفلت الجوال بوجهه وقمت بسرعه اتوضأ وصليت كل الصلوات اللي فاتتني أمس..ثم رجعت لمنصور لقيته مرسل بالقروب وممنشني ولا دريت حاط كتم

"خاااالد عادل حجز استراحة لازم تجييي فضي نفسكك"

ما قال للعيال كذا لأني قد وقلت لهم ماني قادر اجيهم كثير، من زمان عن الاستراحات ودي اروح لكن مستحيل اترك ياسر.. وبما ان العيال كانوا معي وقت ما انجلدت في زواج سعد اكيد سمعوا ان امي كانت متزوجة فبجيب ياسر وبشرح لهم شوي عشان ما ياخذون فكره سيئة عن امي وبكيفه الي يصدق يصدق واللي ما يصدق يقلب وجهه..

"بجي وبجيب معي مفاجأة صغيرة"

الفضول كان ذابحهم..بس التزمت الصمت، بجيب ياسر معاي هالمرة عشان اذا تورطت فيه معي شله يساعدوني..طالعت ياسر جنبي..نسيت اللّزق بفمه! جيت بسرعه وانا اضحك وفكيتها بشويش عشان ما تعوره! مسكين يا ياسر اعذرني لازم تتحمل اخوك مريض الزهايمر ذا! كيف نسيته؟

فكيتها من فمه، اول ما فكيتها صرخ بألم وصفقني كف..

ما عليه استاهل..

..
العشاء..9:14م

لبست جنز اسود وبلوفر جيشي بما انه برد مره، وفتحت الزبالة حقت ياسر ادور لملابس مناسبة، للان ما حطيت ملابسه في دولاب، طالعت لياسر وقلت وانا اقلب ملابسه

"لازم اسوي لك غرفة، في غرفة فاضية جنب غرفتي بسويها لك اذا صار عمرك ست سنين، وبعد..دقيقة ملابسك كثيرة لازم ارتبها في دولاب"

كنت اقول هالكلام وانا ادور لملابس حقت برد، وياسر واقف وراي جالس اسمع نفسه يراقبني، حصلت سروال رمادي فاتح وجاكيت اخظر حق برد، دقيقة ذا حق برد مره!

"ياسر قد سافرت؟"

احسه قد سافر، ياسر طالع لي وقال

"هذا حق تيارة!"