" تَـبَـدُّدْ "

29

..
مغرب الأثنين..6:30م

صحيت من نومي وانا تعبان! احس بكسل وخمول حتى بالغصب صليت المغرب والعصر، المشكلة اني مصلي العصر من قبل وما تذكرت الا بعد ما سلمت، رجعت على فراشي وانسدحت فاتح جوالي اشوف في شيء فاتني ولا اكملها نومة

"يعيال بكرة لازم تداومون في حفل تخرج"

قريت ذي ورجعت خمدتها..

..
فجر الثلاثاء..4:13ص

توي صاحي وطالب اكل من البيك، الله عليك يا خالد صحي بشكل يخوف! نزلت بعدها وصليت الفجر بالمسجد ورجعت اتروش والبس ثوبي واتعطر بعطر امي، ودي البس بشت! والله ما تقعد بخاطري! فتحت دولابي وانا اصلا ما معي بشت بس 99,99% امي قد اشترت لي ولا دريت عنه، حصلته فعلا لونه اسود وذهبي! اخذ الاسود والذهبي ولا اخذ حق ابوي البيج والبني! حق ابوي فخم القماش نفسه فيه زخارف احس اذا لبسته بلوثه وأصلا كبير علي! اخذت حقي ورحت لأقرب مغسلة قلت له يكويه عالسريع

بعد صراخ كواه..

لأن يقول ما نقدر في ناس قبلك لازم اخلصهم، زدته خمسة ريال وانبسط، اخذت البشت وركبت السيارة وفي طريقي حصلت واحد يبيع شاهي جمر اخذت منه اثنين عارف ان ابو سن يحبه، وما جت الساعة ستة الا وانا عند البوابة، اول ما دخلت وبيدي بشت وشاهي جمر ضحك الحارس وقال

"المدير بيشوتك لبرا مع هالبشت!"

ضحكت وانا امد يدي له بمعنى كفك، وضرب يدي وكملت لداخل لعند العيال الحمدلله ابو سن موجود شاهيه كان بيبرد، اعطيته وقال

"يعطيك العافية حبي"

يعافيك، جلست وانا شايف يامن ميت ضحك

"شنو ياي ببشت رايح تتزوج انت؟"

قلت بحقد

"وش جابك انت ترا الحفل لنا مب لك!"

شمق بعيونه لي، وشوي واكتملوا العيال وقلت لهم

"ياروحي عادل ما يقد.."

ما كملت الا ويقاطعني صوته

"حبيبي"

ضحكت منصدم وهو مسك يدي وضحك معي وضمينا بعض عالسريع

"يعيال بالله عليكم جيبوا البشت باقي على بداية الحفل ساعة ونص"

قالها ابو سن وقاموا العيال واحمد قال

"جيبوا حقي مالي نفس اوقف!"

سالم قال مبتسم

"انا جايب سيارتي تعالوا"

قال يامن لأحمد

"بجيب حقك بس شقول؟"

"طق الجرس وقلهم احمد يبي البشت حقه"