مغرب الجمعة..7:13م
جالس بالصالة انتظر فهد يجي عشان استلمه اسئلة، مدري متى ناوي يتذكر ان في شيء اسمه صالة عاد صار لي ساعة احتريه!
"ياسر روح شوف فهد شقاعد يسوي؟"
تنهد وطالع لي
"عندك رجول؟"
سأل، اجبت
"ايوه"
اعطاني ظهره وهو يقول
"الحمدلله قم انت"
وجع!! ضربته على راسه ورجعت منسدح عالكنبة واخيرا طلع فهد وهو بعده لابس الثوب صلينا الجمعة بالمسجد تحت، اظن هذي اول مرة اشوفه بالثوب! يمكن ما يبي يخسر فلوس على تفصيل اثواب نفس طوله، جلس قدامي متكي بظهره منسدح وقال
"جوعانين؟"
رديت ببرود
"لا"
رد اخوي بعدي بذات برودي
"لا"
كلنا كنا نتفرج للتلفزيون رغم ان القناة خايسة! طرا على بالي هالسؤال وطالعت لفهد وقلت
"فهد قل الصدق! ليه امي قتلت آمال؟"
طالع لي لفترة يتأمل عيوني ووجهي مدري شقاعد يفكر فيه، ثم تحمحم وكمل فصفصه وعينه عالتلفزيون
"ما سمعت كلام ابوي"
اعتدلت بجلستي متربع وجسمي كامل ملتفت لفهد
"فهد صدق"
طالع لي وقال
"علمتك قبل فترة"
قلت وانا احرك راسي يمين وشمال
"لا! ماني غبي عشان اصدق شي زي كذا! آمال ما ماتت لأنها ما سمعت كلام ابوها!"
ضحك فهد وهو ياخذ الفصفص المأكول من حضنه ويحطه عالطاولة ويجلس
"صح بس مالي خلق اقولك السالفة كاملة"
قلت برجاء وانا اقوم واجلس جنبه
"تكفى فهد قول لي وش السالفة؟"
تنهد وتربع وطالع لي، وقال
"ابوي قال لها هي وآمال اسرقوا جماعة ادريس واي احد يعترض لكم اقتلوه دون ادنى تردد! لأن ادريس كان عنده جيش شغال معه زينا بس يوم مات ابوي استولى عالجماعة، المهم راحت لينا مع آمال والأمور طيبة لكن بالنص صادوهم"
والله لو تقولي حاولوا يذبحونهم برمي نفسي من الدرج! بعدين آمال صغيرة شلون يخلونها تروح تسرق!
"قالوا لو ما تسلمون لنا بالسعودي 70 ألف ريال بنقتلهم وحنا ما عندنا هالمبلغ! وفعلا نفذوها وقاموا بالسكاكين لكن أمك قدرت تهرب منهم وراحت تاركه آمال تصارخ بأسمها وتقولها ارجعي ساعديني!"
