..
ليل الأثنين..12:23م
فهد كان بالحديقة لأن احمد قال له اجل! من قبل مخطط يجمعنا بعد تصوير اب ابراهيم، وقفت بالحديقة وشفت أب ابراهيم اللي يمسك الجدران عشان لا يطيح وكله دم! طالعت لفهد ولقيته جالس على الكراسي وبيده قهوة بنص الليل ذا ومريح! الله يرزقني شوي من قوتك الجسدية ادافع عن نفسي!
"الموضوع صعب! انا خويكم الأثنين ومادري اوقف مع مين واخلي مين؟"
قالها احمد وهو يوقف قدام فهد المتربع وانا جنبه ماسك يدي بقوة شوي ويكسرها
"الآن قدامي تنهونها! خلوا عنكم الحقد! ترا والله ما يفيدكم لا بدنياكم ولا بآخرتهم كلكم ضحايا!"
فك يدي وقال محاول يدخل المعلومة بعقولنا وينقل بصره لي ولفهد
"خالد انا ادري وش صار لك ادري! لكن ترا ابوك ضرب فهد لأنه قال له يبي اخته! قال له ابي اشوف اختي لينا لأنه داري ان لينا اذا شافته بتاخذه معها وهو ما يبي هالشي ويكره فهد لأنه كان بباله انه حاقد على لينا ما درى انه كان اصغر من انه يفكر بهالموضوع! ابوك بكل شي تمام! الا بذا الشي! فهد كان ضحية الإهمال وانت بلعتها!"
الله يسامحك يبه! شف وش جبت لي! تعبت ادافع عن اهلي وبكل مرة يصدموني عن اللي سووه! تعبت من الصدمات! تعبت من الاخبار اللي كانت تتردد بمسمعي زي الصدى! مو قادر! احس دقة ويغمى علي حرفيًا! ابي انام اسبوع كامل عقب هالتعب اللي جاي احس فيه! ابي اروح البيت واسكر على نفسي شهر كامل واطلع! احس بكون بعدها طبيعي! لأني هالأيام اشوفني متبلد! واشوفني كأني مستسلم! بكون بخير بعد الشهر ذا
"ورع! نمت زين؟"
قالها فهد بإهتمام قاطع تفكيري، اومأت بتسليك لأني مو فاهم السؤال وليه قاله، وقلت وانا انفش شعري بقوة واطالع لأحمد بتوتر ونبره ثابتة
"انا ارفضه! لكن بطلب طلب غريب نوعًا ما!"
قلت اخر كلمه وانا اطالع لفهد متناسي وجود احمد، وفهد يطالع لي منتظر مني اكمل
"انا تعبان هالفترة..ابي كم يوم بس تكون هادية وطبيعية! مهما كنت حاقد علي اصب.."
قاطعني بذات هدوءه وبروده الغريب
"خالد! طابت نفسي حاليًا"
عم لحظة هدوء، واكملت..
"انا ابي اردها اضعاف اللي جاني! وللأسف انا اعترف انك مو سهل حتى اهزمك بسهولة لذلك انا بحاول انسى اللي سويته لأن لا قانون ولا يدي تقدر تاخذ حقي منك"
تنهد احمد براحة، وقال فهد
"الله العالم! يعني الحين ما بيننا عداوة صح؟"
تقريبًا، هي مجرد كره!
"كره عميق"
ومليانه حقد، لكن بعد ما فكرت فيها! انا مين؟ ما اقدر على فهد! ابدا ما اقدر عليه! انا مالي الا اتحسب عليه وانسى اللي صار..انساه مثل ما نسيته امي! انساه واشيل فكرة الإنتقام من راسي لأني ماقدر اوقف اكثر في أرض المعركة هذي! يستحسن انسحب قبل اطيح ومعد اقوم! انا ادري! انا توي حسيت بتعبي ونفسي! انا توي انتبهت لمخي اللي ما يوقف تفكير!
