" تَـبَـدُّدْ "

25

..
عصر السبت..5:12م

"شف يابوي! اذا ما فهمت من بيفهم مثلًا! اقرأ وركز زين! الورع ذا عنده ثلاث ثوانين مدري اربعة..لا اكثر! الله يلعنك يا استاذ عزام ما شرحت هالجزئية!!"

انا متأكد انه شرحها بس قاعد ارقع لنفسي

"الحين ليه هو كذا مريض؟ طاحت تفاحة فوق راسه وش فيها؟ ليتها سببت له خلل بمخه بدل يجيب لنا هالخرابيط!"

بعد ما تأملت بقصته، هو حلو العلم وحلو انه فكر بالموضوع بس لو درى وش بتسبب هذي النظرية له من دعاوي له بالمستقبل بطلها من بدري! انا جالس بالصالة وحولي الكتب، رياضيات ختمته واصلا انا شاطر فيه فما يحتاج اكل الكتاب اكل! الفيزياء اللي ما كنت اسمع الشرح بسبب الأستاذ الملعون!

"ياسر انت ليه ما تدخل الروضة؟"

انا مستغرب انه ما دخل الروضة، طالع لي وهو ياكل وقال مبتسم

"عشان بابا علمني في البيت!"

والله؟ اومأت..ما توقعتني بقولها لكن مشتاق لنواف! مو لأني احبه لكن تمنيته باقي حي عشان ياخذ ولده وعشان اكفخه! احب ياسر ايه لكن تعبني! غمضت عيوني بقوة وعصبية! ليش انت كذا خالد؟ لا تنصاع لمشاعرك وانك تعبت يا دراما يا ضعيف اهتم لأخوك! لا نواف ولا غيره بياخذه مني بعطيه كامل وقتي وبكون له الأخ الصالح اللي بس ينذكر اسمه على مسامع ياسر يرفع راسه من الفخر!

طالعت لظهره وهو ياكل ويحرك راسه مع أغنية البداية في سبيستون، طبعًا انا دخلت سبيستون له لأن لو ما ربيته انا بتربيه سبيستون طفولتي كلها على سبيستون وجزيرة الأطفال اللي صار اسمها جيم وبراعم! دخلتها كلها له وحتى اللي بفلوس دفعت اهم شيء طفولته ما تكون مثل طفولة عيال اليوم! وللأمانة دخلتها عشان اتفرج معه بعد لكن قاعد اقنع نفسي انها عشانه فقط!

أحب ياسر!

واذا انا احبه ما بقصر معه في اي شيء! يبغى ملاهي بوديه الملاهي يبي المول بوديه يبي الحديقة بوديه يبي مطعم بوديه بعد بتعلم الطبخ عشانه وبنظف البيت عشانه لأنه يحب التنظيف من صغره! بضحي براحتي عشانه! صحيح بتعب لكن فداه يا امي فداه! ابتسمت بفخر! ايه يا خالد سو كل شيء عشانه هذا يستاهل تعطيه عيونك ببلاش هو الباقي من امك ياحبيبي! ابتسمت حتى بانت انيابي..

"ياسر؟"

رد وهو مركز مع ريمي اللي تصارخ تقول عم فيتالس لا تتركني

"هممم"

اذكر يوم كان عمري ثمانية سنوات كنت اتابعها وفي ذي اللقطة امي ضحكت، وقتها عصبت واخذت الصحن جنبي وكسرته قدامها عشان تعرف تضحك على مصائب الناس! طبعًا مسكت اذني انظفه بنفسي وانا اصارخ ليه تضحكين تقول تذكرت شيء مو من التلفزيون! وعقبها حلفت ما اسوي نفسي انساني بعد كذا ورحت حطيت حرتي في جهاد الله يسامحني! من الصغر اكفخه بس هو بعد كان يضارب ما يقصر لكنه نحيف وبس انفخ عليه يطير!