" تَـبَـدُّدْ "

16

..
فجر السبت..4:56ص

"شكلك انت الكذاب مو هي صح؟"

"لا"

كتب لا وباقي يكتب..جلست بالسيارة انتظره

"انا اعرف كل شي بالحياة"

تنهدت وكتبت بسرعه

"اخلص يبوي!"

كمل يكتب وانا اطالع لياسر..نايم ثم للإشارة وللجوال

"تدري؟"
"اكشتفت انك غبي"
"لا صدق صدق انت صدمتني"
"يعني الكذبة انتشرت واخوياك كلهم يعرفونها تتوقع مني ما اعرفها؟"
"يعني ولا كلمة توصف فهاوتك امس يوم قلت لي وش عرفك بكذبه امي قلت ذا تو خارج من حادث نعذره"
"وطلعت من بيتك احسبك بتعرف وحدك وصدمت اهلي يوم قلت فهد انت كذاب صح؟"
"والله العظيم انك فضيحه"

الكلام ذا دفعه وحده..والبواري تطق من وراي وانا منصدم من رده وعيني عالمحادثة، مشيت بسرعه وكملت الطريق وانا افكر، وين مخي؟ يعني العيال يعرفون ومو بس انا اللي انكذب عليه واكيد في اشاعات تقول نفس الكذبه اكييد سمع فيها اكيد!

"شف"
"ماني غبي احسبك تو جاي من بغداد"

ولله اني كذاب لكن عشان ارقع لنفسي

..
الظهر..2:13م

صحيت من نومي واكلت وياسر صاحي جالس يلعب معي ويسولف وحنا قاعدين بالصالة متكين والتلفزيون شغال بس حاطين له ميوت، طالعت لياسر وقلت

"يسوري تعال خل اعلمك اسامي اصحابي، لأني بعد كذا بظل ارميك عندهم اذا عندي شغله ولازم تتذكر اساميهم طيب؟ وبعد اذا نسيتها تذكرني عيب عليك يا ولد لازم تساعدني!"

اومأ كأنه فاهم كل شي وقال

"اسائدك في وس؟"

اساعدك في وش؟ قلت له وانا مطلع جوالي

"اخوك ينسى كثير..ولازم تذكرني بأسمائهم"

"انت الحين ما نثيت اثماء اثحابك؟"

قالها لي وهو يأشر عالجوال وانا قلت

"الا الحين اتذكرهم بس يمكن بعدين انساهم"

اومأ وقرب لي..فتحت على الاستديو وحصلت صور للعيال، فتحت صورة واحد منهم عشوائي وطلع سالم وقلت

"هذا اسمه الطعس اذا شفته قل ارحب يالطعس طيب؟"

طالع لي ياسر واومأ قال

"يفحت؟"

وش يقصد؟

"وش يعني؟"