" تَـبَـدُّدْ "

26

..
الأربعاء..10:13م

"فهددد جب لي معك ديوو!"

"اللهم طوولك يا روحح!"

ناديت ورد فهد وهو طالع من الشقة، طالعت لياسر اللي جالس يلعب بالألعاب بس اول ما تكلمت ناظرني والواضح انه منصدم ومستغرب

"خير؟"

قلتها بحدة وانا اتكي بظهري وارفع رجولي على الكنب وبيدي الريموت والثانية شبس، ما رد علي وكمل لعبه وانا ضحكت بسخرية! يارب يرجع فهد بسرعة لأن قدني سرقت اللابتوب حقه وجميع المفرحات موجودة! بس ناقصها الديو والحمدلله بيجيب لي فهد الحين، هذا اللي اقدر اقول عليه خال مو الأولاني الله لا يبلانا!

اسحب كلامي..

اثنينهم كلاب! وللآن اكره فهد! كره ما ينوصف لكن بعد اللي صار مجبر اني اقعد معه لفترة من الزمن وبعدها اخذ ياسر واهج الرياض مرة ثانية ولا ارجع هنا! دقيقة انا خبيت اللاب؟ قمت بسرعة متجاهل رجفة ياسر من حركتي المفاجئة ورحت غرفتي مخبي اللاب تحت المخدة زين..

ثم رجعت مرتاح!

مسكت ظهر الكنبة اللي قدام التلفزيون ونطيت منسدح بقوة، اعتبرها رشاقة بس الكنب مكسر الأصوات اللي طلعت مو مني! حمدت الله ان فهد مو هنا لأنه لو هنا بيستلمني طقطقة للصبح، كنت مشغل التلفزيون على ناشيول جيوغرافيك عشان اول ما تطلع صورة قطوة اقول لياسر هذا انت، بس الكلاب ما عرضوا فصيلة القطاوي ولا شي!

قناتهم ببلاش بعد كذا!

مر وقت ودخل فهد وبيده كيسة فيها ديو وايسكريمات وحلويات لياسر او له ما تفرق لأن كلهم بزران! قال وهو يصارخ ولتوي انتبه انه شايل اكثر من شيء

"خااللدد تعالل ساعدنيي بتطييح!"

تجاهلته وانا اكل بدم بارد ونظراتي ناعسة تبين له عدم اهتمامي واصلا واضح اني قاعد اقول احسن داخليا

"جوالليي يولدد! هيييهه! جوالللييههييء!"

انا مادري وش قال آخر كلامه لما طاح جواله بقوة عالأرض! ضحكت بقوة وهو نزل الكيس حق البقالة على الطاولة والكرتون اللي فوق ظهره طاح بقوة والكيستين اللي كانت بيده طاحت بعد وتناثر التفاح والبرتقال اللي جوتها في البيت والحليب برضوا طاح بس ما انكب وعلبة السفن انفكت بقوة وطلع الغاز كله!

دقيقة هذي كيف انفكت؟

هو طالع للفوضى الحاصلة موسع عيونه وفاتح فمه، انا رفعت رجلي للكنبة وضحكت بالغلط، والله بالغلط!

"خخخاللد!"

قالها بيأس وحسرة وهو يرخي يدينه اللي رجعت لوضعها الطبيعي، وانا ضحكت وقلت

"مالي دخل!"

غمض عيونه بقوة، وجمع البرتقال والتفاح ورفع السفن اللي واضح انه بالطريق شرب منه، اخذ جواله ومسحه في بنطلونه وحطه على طاولة المطبخ اللي يفتح عالصالة ماخذ اقرب منشفة قدامه ورماها على البلاط ومسح برجله وانا طول الوقت اطالعه مبتسم بسخرية وياسر اخذ العابه وراح غرفة فهد يلعب هناك! نفسية! كلهم نفسيات