#كحل_عرب
(بيت بيوت )
((( بقلم زينب ماجد )))
الحلقة_18
(الخطيئة )
عيوني غرب ... وجفوف اديه اوداع
واسمي ... ابغير معنى
وميل كحلك غاب ...
وتنشدني اعلى گلبي ؟
گلبي حب و ذاب
يا گلبي حلك تنور لو سرداب ؟
لـِ عريان السيد خلف||🖤
جمارة : يا حسافة المحبة اللي حبيتها الك كل هالسنين و جاي تخيرني لو تشهرني لو تغصبني على زواج بلايا علم اهلي !
- هذا اللي جبروني عليه اهلج
- وانا شذنبي بذنب اهلي .. مثل ما ظلموك ظلموني
- انت ما مظلومة عبن المظلومة ما ترضى تصعد بسيارة الغاصبينها عليه وتتسرسح وياه .. امشي
- ما امشي و شتريد تسوي سوي
- تحطين راسج براسي
- لا احطن ولا هم يحزنون الجاي تسوي وياي نذالة وما ارضى بيها
- جا رضاج بقسمتج بعد ما خليتيني انطر ١٢ سنة من عمري ليما شيبت هاي شيسمونها ؟ عليش جرجريتيني ليج و خليتيني معلك بيج ، جلمة الاحنه ما نصير لبعض ما فد يوم كلتيها كل عمرج تكليلي ما ارضى بغيرك لو اموت ، بس رضيتي وما متي بس انا مستعد اموت وما يهمني الجتلوني و الخلوني عمري ضاع بعشكج خلني اموتن اعليه و اكتفي بعمري ليجاي .
دمعت عيونه و هو يحجي هالجلمات ، بجيت و درت وجهي عنه ، جر ايدي بعصبيه : لا اديرين عني حاجيني واطيني جواب
- اي جواب خنجر وعلي حيل ما ظل بيه ، شسوي واهلي الضيعوني واطوني لواحد لا راضيه بيه ولا اريدنه .
- والما راضيه بيه تصعدين وياه سوالفج هاي علي يو على غيري
- تظن بيه ؟
- واظن بامي هم ، دامج رضيتي بقسمتج وما حطيتي سنين عمري بين عيونج اظن و اهجم عمرج ولا تعتقدين اخليج تتهنين .
- هذا مو عشك .. هذا انتقام
سرحان شكثر عشك هدوة وساعة الرضت بقسمتها ما اذاها ونطر رب العالمين سنين خاطر يردها ليه .
- انا مو سرحان ، عايني علي وشوفيني زين انا خنجر الخذوا منه عشكه الاول جتل ابنهم وحرك مضيفهم وبساتينهم .
- بس ما اذيتها الها ولا اطاك كلبك بأذيتها ، جا ليش جاي تأذيني
- جمرة عشكج بكلبي تسعر .. وما مبالي حتى بروحي يو تأذت ووجرت واليجرى علي يجرى عليج .
سحب ايدي ، ومشى ظليت اجر بروحي : مو هيج هد ايدي خنجر منا الناس ، ميييييل .
سحبت ايدي من عنده وركضت للشارع لحكني : تريدينها هيج يعني ، جا خوش دتعااااي
- هد ايدي وخر عني ، غصب هي ما اريدك
اخذ ايدي و كام يمشي ، الناس تعاين لا اكدر اصيح ولا اكدر اشهر بروحي كدام الناس ، ظليت احاول اسحب بيدي ، واحجي : خنجر عوفني جاي اكلك ... خنجر اووووكف
أنت تقرأ
كحل عرب
General Fictionجيل بعد جيل .. يولد حبا جديد يواري خبث العادات و التقاليد بين نهوة و فصلية هدية و دية اولاد ضحية وشيوخ ظالمة لا تجد للإمور حلاً غير السلاح .. من العراق وعلى ارض السماوة اقدم لكم (كحل عرب )
