#كحل_عرب
(بيت بيوت )
(((بقلم زينب ماجد )))
الحلقة_27
( عمايل فخرية )
ولو مو عادتي أشچيلك
انه الناي ..
البچه اعله اچفاكـ
والغنَّه بمواويلك
انه الطيف الحدا بـ طرواك ..
والجلمة النست بالك
انه الحاله على حاله يصيح
يالمصّيوب ..
هنيالك
لـ عريان السيد خلف||🖤
اندارتله بطة : بس مأمون ما يحجي هيجي ؟
- يعني شني انا اجذب
- لا مو هيجي بس مأمون عايش ويانا من الزغر يعني تربينا سوا ما فد يوم كال علينه شي مو زين بالعكس يدافعلنا .
- هو واوي كدام الناس شي والبداخله شي اخر .. لا تثقين بيه ولا تكربين منه نهائي ما امن عليج يمه يروح يذب بلوة عليج جيف انا احبنج وياذيج .. وها الحجي الحجيته الج لا تكولينه لاحد عمي سرحان لذا عرف انا حاجي على ابنه يعصب .
- اي ميخالف بس اني لازم اخش جوا ليروح احد يشوفني .
- اي ماشي بس شلون اشوفج بعد ؟
- ما اعرف
- اليوم اجيتي ليجاي وشفتج بس من تروحين لبغداد اتعذب .
- انا هم افكر بيك هواية
- يعني تحبيني ؟
دنكت .. تبسم هو و يكللها : احبج حيل يبطة
ضحكت و مشت عنه و هي سارحة بخيالها ، اول ما طبت لكت مروان كدامها ، نشدها : وين جنتي ؟
- طلعت برا شوية
حجت وعدته للغرفة ، عاين وراها شافها دخلت تنام ، طلع للكراج فارغ ، عاين بالحديقة ياسر موجود ، تقرب منه : ليش جاي تسوي هيج
ياسر : شكو
- جنت تحجي ويا بطة
- لا
- هو شنو لا ياسر ترا عيب عليك و العباس عيب عليك .. مأمون لا كاربك ولا واصل يمك ليش حاطة ابالك
- من كل عقلك هالزعطوط اخليه ابالي ؟
- اسمع انا ادفعلك يم مامون لإن الشاهد الله احسبك مثله اخوي .. بس من تغلط عليه كدامي الحجي يصير غير شكل .
- مروان طب نام يرحم والديك انا اروحن
- اسمع ياسر .. بطة لو كربت منها مو مأمون .. انا المحد يخلصك من شري وعلي .
- جا لا تكول اخوي وخلي خوتك على كد مأمون .. يلا سلام .
مشى وطلع من البيت ومروان يهز بيده .. كعدت وسن طلعتله : شفتك عديت من الحجرة كلت اجي اشوفك
- وانا طلعت حتى انت اتشوفيني ... مشتاقلج ها .
ضحكت و دنكت .. كض ايدها و كال الها : تعاي نطلع للبستان .
أنت تقرأ
كحل عرب
قصص عامةجيل بعد جيل .. يولد حبا جديد يواري خبث العادات و التقاليد بين نهوة و فصلية هدية و دية اولاد ضحية وشيوخ ظالمة لا تجد للإمور حلاً غير السلاح .. من العراق وعلى ارض السماوة اقدم لكم (كحل عرب )
