كحل عرب

الحلقة 39

#كحل_عرب
(بيت بيوت)

((( بقلم زينب ماجد )))

الحلقة_39
( غيض مأمون )

محد كــالي الـيلكوك بـالصفنات چذابيـن
لـ عريان السيد||🖤

حركت سيارتي بقوة و دستلها حيل ، وتبعته ... هو داس بالسيارة واني وراه ، وعلي من اكضك الا بجفن الفك ... انا تلعب ويااااااااي ...

تبعته و هو يسوق و الشارع فارغ .. قرابة الساعة ٩ ... تذكرت بطة وحدها بالبيت .. فات بفرع ، فتت وراه لاف ... لفت ما لكيته الفرع يطل على شارعين

افتريت بالشارع رديت للشارع الثاني احترك دمي ججاي يلعب علي عالخنثة لو شني ، لك لو زلمه اوكف كدامي لا اشرد ، بس الا البسك ملابس نسوان و انعل والديك ..

لفيت السيارة بعصبية ورديت للبيت ، لكيت الكهرباء جاية .. و بطة فاتحة التلفزيون و حاطتله صينية طماطة تكلاه و جاي وكاعدة تاكل ، طبيت عليها بعصبية وتقربت منها بقوة شلتها من اردانها : ياسر شعده رد للبيت هنا ... شعدددددددده وياج

- ما اجا والله شبيك

- ولج تجذبين علي ..  اني شفت سيارته بالباب لا تسودنيني

- جاي اكلك ما اجا ولا شفته

- وتجذبين

- والله ما مجذبة ما شفته

- انا شسوي هسه  كليلي راح اتخبل وعلي ... بس ريحي افادي عليج العباس .. فكيتيله الباب

- الصبح اي بس هسه والله ما اجه ولا شفته  

راح للتليفون دك ، ردت فخرية : الو

- ابوي وين

- توه دش نام

- اندعي اليه بساع

- جاي اكلك نام شنهي اندهنه غير يوذرنا

- اكلج عمة واصلة وياي لمخي تندهي لا اجي ههسه اكلب الكم البيت فوك جوا .

- شني تهدد انت ولك

-جاي اكلج ندهييييييييي

قفلت الخط بوجهه ، كام يصرخ و يغلط لوحدة و يدفر شكو شي يجي كدامه ، رد دك التليفون .. بساع فزله ، اتناوش السماعة : الووو

سرحان : شمالك بوية

سولف اله الصار كله و كاله بويه شيرني وين الاكي هالجلب هاذ انا راح اتسودن ، اهدومي ما جاي احملنها

سرحان : اكعد بأمجينك بويه ولا تتحرك وانا من غبشة عدك ونحلها

- شحلن وانا روحي محتركة ؟ بويه راح اتسودن تفهمني لو لا

- التسرع موش بصالحك يبني ، كض روحك وانا عدك غبشة ، ومرتك لا تخليها تروح لاهلها .

سد التليفون من أمون واندار لفخرية : الحاضر يعلم الغايب مامش بت عدي للزواج و العرس ملغي .