#كحل_عرب
(بيت بيوت )
((( بقلم زينب ماجد )))
الحلقة _22
(انتكاسة حاكم )
طاحت اوفوك الفشل
بمصابها الشامت تشمت
اخ ياروحي الكّبــل
جانت عزيزة شلــون ذلت
لعريان السيد خلف||🖤
سرحان : رديت للبيت و انا النار تلهب بفادي، حطوا الزاد جدامي ، روحي ما اشتهت الزاد عبن اعزاز كلبي بنار ولدي واخوي ... كمت اندب وادعي .
دارت علي فخرية : هكو شي
- شمالج
- اشوفنك تلوب عدالي بيك شي
- وشنهو الشي الأكبر من سواية خنجر بيه ما يطخ الساني بلسانه بعد ولا هو اخوي .
-عليش تلومه لوم البت الما ستحت وخذت الزلمه وشردت ويا ولو بنات حويكم هاذ طبعهن يلعبن بعكول الزلم و يشردن بيهن مثل ما خذتك لبغداد و خلتك غاد
- من تشوفيني متزوهر اتزوهريني وتزيدين علي بجلماتج ذن ليش ، تحلالج الشتيمة لو شتمت، عفية مرة شكثر يحلالها الذل .
- وانا شكلت يو كل كلمة بيها هديوة الزركة تغثك .
- والله كل مجان بيه انت يغثني اكوم اخيرلي ولو تبعتيني للغرفة الا وعلي هالبيت اهجمه فوك روسكم .
كام من مكانه و مشى ، ووسن وبطة كاعدات على صفحة جانن يسولفن من صار صياح ، انتبهن وظلن يعاينن ، حجت بطة : هي ليش دا تحجي على هدوة شمسويتلها ؟
وسن : هي عمتي هاي ما تحبلها واحد ، انا تمنيت اجي اعيشن ابيت عمي غاد ابغداد بس ما رضت .
- اكلج بس مو تزعلين اهلج وين
- ابوي يكولون شهيد ، بس امي ما اعرفها بس عمتي تصيحلي بت الكاولية .
- هي امج كاولية
- محد حاجيلي عنها بس يعيروني بيها وانا ما اتذكر شايفتها بحياتي يكولون هدتني وانا زغيرة .
- وليش بطلتي من المدرسة
- مو انا بطلت عمتي فخرية من هدتني امي راديون واجيت ليجاي عشت ، خلتني ابطل وما رضت اكل لعمي ومن نشدها كالتله كسوله وبطلت ، بس انا جنت شاطرة والله .
- اني هم راح يبطلني من ورة اختي جمارة والسوته .
- جا ما تعرسين
- يا بعدني اريد ادرس
- والله انا اتمنى بس اعرس شني عيشتي بس اخدم بعمتي فخرية وبناتها واطبخ وانظف جني خدامه، على اقل اعرس اخدم رجلي وجهالي .
- شكد عمرج
- ١٤ ، وانت ؟
- اني هم راح اطب ب١٤
ظلينا نسولف انا وياها ، ومر شاب دخل ليجوا ، اكثر من مرة شفته بس ما سألت هو منو هاذ، كلما يمر احسه يركز عليه من يباوع .
أنت تقرأ
كحل عرب
General Fictionجيل بعد جيل .. يولد حبا جديد يواري خبث العادات و التقاليد بين نهوة و فصلية هدية و دية اولاد ضحية وشيوخ ظالمة لا تجد للإمور حلاً غير السلاح .. من العراق وعلى ارض السماوة اقدم لكم (كحل عرب )
