كحل عرب

الحلقة 23

#كحل_عرب
(بيت بيوت )

(((بقلم زينب ماجد )))

الحلقة_23
(رفحاء والجريمة)

حتى أعز الناس
من شاف الوكَت مجفي
أبتعد
ماجنه منه
لعريان السيد خلف||🖤

ليلة من احد ليالي اذار
ظلمة و بس الخوف منتشر بكل ارجاء القلوب .
طلع جاسم و هو يجر عائلته ونسوانه للمجهول اثر خروج ابنه مصطفى في الأنتفاضة الشعبانية سنة ١٩٩١ .

ركبهم بسيارة حمل شايلة صناديك بتيته و طماطة ، كعدهم وكعد وياهم و ذب الصناديك فوكاهم خاطر بس يتعدون الديرة ويطلعون منها .

وصلهم السايق عبنه يعرف ابن الشيخ سلطان وابوه اله مواقف وياه و يحترمه ، بس لمكان غاد عن الديرة كاله : شيخ تعذرني انا زلمه صاحب عايلة واخافن الامن يكضوني واروحن انا وعايلتي بالرجلين .

جاسم : جزاك الله الف خير لا هاي هي رحم الله والديك انا هم ما ارضى ليك الاذية .
اطاه فلوس الزلمه ما خذها و كاله : صدك جذب ابو مصطفى احنا ولد ديرة وحدة وابوك افضاله علينا جثيرة .. امش ومودع بالله .

- رحم الله والديك
جر جهاله و هو يمشي وولده و بناته و نسوانه يمشون وراه ، العيون مدمع و ادور بالدرب و الخوف مرسوم بيهم رسم واضح .

وكل واحد بيهم يتندب ويتنخى خاطر يعكب ويطلع من العراق سالم و ما اطوله ايد الحزبية وتدفنه هو واطفاله .

راديون : امشي وراه وانا كاضه بدين احمد و هدى ، الجهال تعبوا واحنا نمشي بسد البساتين ، ظلت تشكي هدى : تعبت يمه بس ما اريدن اروح

جاسم : استعجلوا امشوا

راديون : الجهال تعبوا

- شناطرتهم يتذبحون امشي

- بس كلي شنهو الصار انا ما فهمت كلشي

- صدام رجع سيطر على المحافظات وكل واحد اشترك بالانتفاضه يجتله هو اهله و عايلته ... بزود هالما يستحي الاغم ، كلت الك ابني اكعد ولج كضي ابنج و استري علينا .. من ساعة السودة اللفيتكم عدي و تورطت بيكم ... امشوا .

راديون : شلت هدى كعدتها على جتافي و احمد يمشي وياي .. انهدت رجلينا بالمشي ، ليما وصلنا بر مامش لا بساتين ولا بيوت .. واحنا نمشي .
ليغاد لاكتنا سيارة تريلة .. حجه وياه جاسم و صعدانا ... مشى بينا شوي ليغاد و تعذر يوصل اكثر .
الضوا بدا يطلع و احنا بنص الهيمة ، التعب هلكنا واجتافي الشايلة اعليهن هدى انهد حيلهن .
كمت امشي والدموع تتجارى و التربان مالية ثيابنا .

طلعت الشمس و صكعت بروسنا واحنا نمشي .. وين احنا نمشي ما اعرف ، جاسم يمشي واحنا نمش وراه اليصيح تعبت ما يلاكي غير التزمخ و الغلط اعلى كثر ما النفوس و الهدم وصل بيها التعب حده .