كحل عرب

الحلقة 43

#كحل_عرب
(الفوضى )

((( بقلم زينب ماجد )))

الحلقة_43
(كتلة فليح )

أجس گلّبي الفضي متعوب حد الويل
وادعيله الصبر عن لايفشلني
(لعريان السيد خلف)

قفل الباب و عافني ... ظليت حاطة ايدي على حلكي : يا  عود صدك سواها لو يلعب علي .

ظليت صافنة و الدمعة غرغرت بعيني ، صخام بعيني من اذكر الزلمة الجان موجود يحيلي يرجف هاذ شوف ما ينشاف ويتعاين بوجهه ارضى بيه شنهي .. يعمي لو هسه تكلب الدنيا هم ما ارضى ، كافي دست على روحي هواي وكلت ابوي و اكسب اخرتي و اكد عليه وارضي ربي بخدمته عكب ما اخوتي ذبوه بالشارع  تالي بخيرهم ما خيروني بشرهم عمو عليه ؟

كمت اجر بالباب واصيحن : بوية افتح رحمة لدين محمد افتح ... بووووية عرس ما اعرس لو ادري اتبرى منك بوية ، شني دفتح هي زور لو كووووة .

ماكو جواب كمت افرك بوجهي احس راسي دخن من حركة كلبي ، ابني كرار واكف يمي ويكلي : يمه شماله جدي ؟ يمه شبيج

انداريت عليه و اتناوشيته : تعااال اصعد فوك السياج

- شسوي ، يمه اخاف اطيحن

- اصعد على كيفك افتحلي الباب من برا ، وعلي ما اظلله .. عود اباله يغصبني ، ما ادنكله ولهنا وبس لا هو ابوي ولا انا اعرفنه ، اصعد

صعدت كرار على السياج اندار وجلب اديه بالحايط ونزل رجليه وطفر ليبرا ، كام وفتح السركي مالت الباب ، دخلت للبيت لميت هدومي وهدوم ابني حطيتهن بعلاكة و عباتي خليتها على راسي وطلعت من البيت كله و هديته .

عبرت الشارع من حيرتي والهوسة البراسي نسيت البسلي شحاطة ، اهفي بعباتي و نعالي سمائي لونه يجيب التايه وشكلي وحدة من ذن من اليبيعن كيمر بالسدة اعلى الهوسة الطلعت بيها ما عرفت شحطيت وشلبست ، اول ما وصلت راس الركن مال فرع بيت اهل امي، لكيت حبوبتي كواغد جاي تدنج اعلى باب المخزن تريد تفجه و زلمه واكف بهالظهرية يريد حصته ، مشيتلها :

- عنج حبوبة انا افكنا

فزت : هلا بيج حبوبة الله جابج ظهري ميبس يبيبي وحيل ما بيه مدري شمالني .

فتحت القفل و جريت الباب ليفوك وفكيت المخزن ، واندرت لحبوبتي ، ردي حبوبة انا امشي الزلمة واجيبلج المفاتيح .

كواغد:- الله يطيج حبوبة
رادت تمشي و الزلمة يتعذر جيف جاي بهالوكت .. اندارت حبوبتي و هي تعاين حالتي بس مت عيمي مريضة هي وفطنت ، نشدتني : نويسة يمه هكو شي شو جاية الظهرية حبوبة وحالج ما يعجب .

- ماكو شي حبوبة اخذي كرار و طبي ارتاحي الدنيا حارة .

- الله يكويج حبوبة
مشت و هي تنشد كرار ابني (شصاير ولك )