كحل عرب

الحلقة 32

#كحل_عرب
(بيت بيوت )

((( بقلم زينب ماجد )))

الحلقة_32
(مكتوب )

طولك العريس يا بعد امهاتي
- عريان السيد خلف

هند :- موافقة نتزوج

بلعت ريكي .. الدمع و الضحكة التمن بعيني و بينن .. ضاع للساني وضيعت الحجي كله ما اشوف روحي الا وانا كايل الها : خوش زين .

ودخلت بسكوت انا وياها كلش كرهته .. بس ردت انطق كلمه وابين الها شكثر انا فرحان بس ما عرف شني اسوي .. كلت الها : طبي جوا هسه والله كريم .

- توقعتك تفرح .

- اي طبعا فرحان ليش ما افرح

هدتني وفاتت جوا .. ظليت ادير بوجهي وانا ما مصدك السمعته ( عود صدك هي كالتلي موافقة نتزوج ) فكيت الباب و انا من الفرحة ضايع ما اعرف شعبر عنها .

مر مروان : طايح الحظ غير تنتظرني ليش رديت .

ضحكت بصوت عالي ومشيت .. استغرب ضحكتي ، مشى وراي : تسودنت انت ؟

- امش اصعدك عازمك على اللي يشتهيه كلبك

-هو غير اعرف شبيك

- مروان هند وافقت على الخطبة

- عليك العباس ؟

- والقران شبيك

- يبوووووووووووي

- وسم الحسن شبيك هو هيج جنك حرمه تصرخ امشي

- فرحنا واليحبنا يفرح ويانا ... فرحنا واليحبنا
وكام يهوس بنص الشارع وانا اضحك بصوت عالي .

- دمشي اصعد عازمك بهالمناسبة .. روح عيش ما دام خالك طيب .

- الله يكثر افراحك خوية .. فرحنا واليحبنا هلا هلا
ويهز بجتافه وصعد للسيارة وهو يصيح (وهذا اول فرح شفناه بدنيانا فرحنا واليودنااااااا هي هي هي هي)
الا صدك على شنو راح تعزمني ؟

- ههههههههه شمشتهي كلبك اجيبلك بوييييه

- والله تريد الصدك مشتهي مرة .

انا اضحك و اشغل بالسيارة .. انلمت ملامحي ساعة الحجاها : انت يمتى يصير براسك خير ، مشتهي مرة شني ؟

- جا غير انت السألتني شمشتهي وانا توني ماكل ... كلتلك مشتهي مرة وانت وعدتني .. المشتهي تعزمني علييي

- اكول خوية انزل من السيارة لا البگكك بجلاق اشكك شك .. انزل .

- هاي شبيك غير اخيك و افرح وياك

- افرح لوحدي بويه .. انزل شو انزل ... انزززززل .

- مرة هي مرة تره ما طلبنه اثنين

- ويريد اثنين
نزع شحاطته من رجليه الاثنين : ابن الاوادم عندي خوش اثنين .
وكطفهن عليه