كيان فريدة (الجزء الثالث من روح الزين)

بارت¹⁸ لِـ «كيـان فريـدة».

ملحقتش اراجع لو فيه أخطاء كيبورد اعذروني 🙂💔.
بارت¹⁸
لِـ «كيـان فريـدة»
بقلم منارجمال"شجن".

«في مستشفي زين».

حازم واقف مع زين وسليم وبيراقب شرحهم ليه ولباقي الفريق علي المريض الل قدامهم، عيونه جت علي روح وهي واقفة جمب سليم ومركزة جدًا معاهم وابتسم بحب ورجع كمل تركيز مع الشرح، بعد حوالي نص ساعه خرجوا من المكان الل كانوا فيه وروح خرجت مع حازم وبصت ليه: حازم هو أنا ينفع أدخل معاكم واشوف العميلة هتتم إزاي الل هيعملها عمو زين وسليم.

حازم بجدية: هينفع بس لو إنتِ قدها العملية صعبة شوية وعرفت إنك بتخافي من الجراحة أصلا.

روح بقلق: دي حقيقة فعلًا أنا ممكن يغمي عليا لو شوفت عمو زين فاتح قلب واحد وبيعمل عملية خطيرة زي دي.

حازم ابتسم: عمي زين دكتور عالمي وعنده خبرة في المجال، دا بقالوا سنين فيه وغير البحث الل شغال عليه بخصوص مرض حديث وبيحاول يلاقي ليه علاج وبيعمل دراسات عليه.

روح بطموح: نفسي أكون ناجحة كدا تعرف أنه قدوة ليا ودخلت طب عشان أكون دكتوره شاطرة ومشهورة زيه.

حازم بهدوء وتشجيع ليها: يبقي لازم تتعبي زيه وتجمدي قلبك عشان تنجحي.

روح هزت دماغها وبصت للخاتم الل في إيدها ورجعت بصت ليه باستغراب: هو أنا عايزة اسأل سؤال.

حازم قعد علي كرسي في طرقة في المستشفي وقعدت روح جمبه وكلمها: إسألي.

روح وهي عيونها ع الخاتم: ليه رفضت تلبسني الخاتم وطلبت من مامتك تلبسهولي.

حازم بص ليها: عشان دا الصح مينفعش امسك إيدك أو المسك لأنه لسه مفيش بينا حاجه.

روح كشرت: إزاي مفيش بينا حاجه إنت مش دلوقتي خطيبي.

حازم بتوضيح: لأ لسه معملناش حاجه وأعلنّا دا وكمان حتي لو خطيبك مش هينفع المسك.

روح بصت ليه وضمت حواجبها باستغراب: برضوا ليه.

حازم: روح إحنا دلوقتي مجرد اتفقنا علي اننا نتجوز زي كدا ما أكون وعدتك بحاجة ممكن اكون قدها واوفي بيها وممكن أكون مش قدها واخلف الوعد دا وعشان انا لسه معرفش ربنا كاتبلي إنك تكوني حلالي ولا لأ فـ لازم الزم حدودي ومقربش منك.

روح: بس الل اعرفه إنك بتحبني زي ما قولت ومتقدرش تتخلي عني ووعدتني بكدا فـ عادي تمسك إيدي.

حازم ابتسم: مانا عشان بحبك بعمل كل دا بخاف من ربنا يعاقبني عشان عملت حاجه هو منعني منها ويبعدك عني فلازم وواجب عليا احافظ عليكِ.

روح ابتسمت: إنت غريب الل اعرفه ان البنت أول ما حبيبها يتقدملها تقوم متصورة معاه وتحضنه وتنزل صورهم ع السوشيال ميديا كلها وتقول الحمدلله الذي تتم بنعمته الصالحات اتخطبت لحبيب عمري وقرة عيني وفشتي وكليتي وهي لسه عارفاه امبارح أصلا.