👑زواج تقليدي👑

👑ﺍﻟﺤﻠﻘﺔ ﺍﻟﺨﺎﻣﺴﺔ...👑

👑👑

ﻣﺸﺎﻭ ﻟﻠﺒﻠﺪﻳﺔ ﻭﺍﻟﻜﺮﺍﻫﺐ ﻓﻲ ﺟﺮﺓ ﺑﻌﻀﻬﻢ ﺣﺎﺳﺔ ﺭﻭﺣﻬﺎ ﻓﻲ ﺣﻠﻤﺔ .. ﻛﻞ ﺷﻲ ﺗﻌﺪﻯ ﻓﻴﺴﻊ .. ﺍﻳﺪﻫﺎ ﺗﺮﻋﺶ ﻭﻫﻲ ﺗﺼﺤﺢ ﻋﻠﻰ ﺻﺪﺍﻗﻬﺎ .. ﺣﺎﺟﺔ ﻣﺎﺗﺘﻮﺻﻔﺶ ﺍﻧﻚ ﺗﻮﻟﻲ ﻣﺮﺕ ﺭﺍﺟﻞ .. ﺭﺍﺟﻞ ﻣﺎ ﺗﻌﺮﻓﻮﺵ .. ﻣﺎ ﺗﻌﺮﻓﺶ ﻃﺒﻴﻌﺘﻮ .. ﻣﺎﺗﻌﺮﻓﺶ ﺣﺘﻰ ﺧﺪﻣﺘﻮ ﺷﻨﻴﺔ .. ﺣﺴﺖ ﺑﺎﻟﻨﺪﻡ .. ﺑﺎﻟﺨﻮﻑ .. ﺑﺎﻟﺮﻋﺐ .. ﻭﻫﻮ ﻳﺼﺤﺢ ﻏﺰﺭﻟﻬﺎ .. ﻣﻮﺵ ﻋﺎﺭﻑ ﺍﺵ ﻋﻤﻞ .. ﺷﻜﻮﻧﻲ ﻫﺎﺫﻱ ﺍﻟﻠﻲ ﻭﻻﺕ ﻣﺮﺗﻮ ؟ ﻭﺣﺪﺓ ﺧﺘﺎﺭﺗﻬﺎﻟﻮ ﺍﻣﻮ ... ﺷﺎﻓﺘﻬﺎ ﻓﻲ ﺍﻟﺤﻤﺎﻡ .. ﻫﻮ ﺍﻟﻠﻲ ﻋﺎﺵ ﻣﻌﻀﻢ ﺣﻴﺎﺗﻮ ﻓﻲ ﺑﻼﺩ ﺃﻭﺭﻭﺑﻴﺔ .. ﻫﻮ ﺍﻟﻠﻲ ﺷﺮﺏ ﻣﻨﻬﻢ ﻭﺧﺬﺍ ﻣﻨﻬﻢ ﻭﺍﻟﻄﺒﻊ ﻋﻠﻰ ﻃﺒﻌﻬﻢ .. ﻓﻲ ﺍﻟﻠﺨﺮ ﻳﺮﺿﺦ ﻻﻣﻮ .. ﻭﻳﺎﺧﺬ ﻭﺣﺪﺓ ﻣﺎﻋﻨﺪﻭ ﺑﻴﻬﺎ ﺣﺘﻰ ﻋﻼﻗﺔ ... ﻭﺣﺪﺓ ﺭﻳﻔﻴﺔ ﺟﺎﻫﻠﺔ .. ﻣﺎﻫﻴﺶ ﻣﻦ ﻣﺴﺘﻮﺍﻩ ﻻ ﺍﻻﺟﺘﻤﺎﻋﻲ ﻭﻻ ﺍﻟﺜﻘﺎﻓﻲ .. ﺍﻣﺎ ﻭﻟﺪﻭ ﺣﺒﻬﺎ ﻭﻫﻲ ﺣﺒﺘﻮ ... ﺯﻋﻤﺔ ﻫﻮ ﺧﻴﺮ ﻣﺼﻠﺤﺔ ﻭﻟﺪﻭ ﻋﻠﻰ ﺣﺴﺎﺏ ﺣﻴﺎﺗﻮ ؟.. ﻭﺍﻟﻠﻲ ﺣﺴﻮ ﻗﺒﻴﻠﺔ ﻭﻗﺘﻠﻲ ﺷﺎﻓﻬﺎ ﺧﺎﺭﺟﺔ ﻣﻦ ﺍﻟﺤﺠﺎﻣﺔ ؟ ﻭﻗﺘﻠﻲ ﺟﺎﺕ ﻳﺪﻭ ﻓﻲ ﻳﺪﻫﺎ ﻭﻫﻮﻣﺎ ﻳﻠﻌﺒﻮ ﻣﻊ ﻳﻮﺳﻒ؟ .. ﻫﻲ ﻣﺰﻳﺎﻧﺔ ﻫﺬﺍ ﻣﺎﻳﻨﻜﺮﻭﺵ .. ﺑﻮﻥ ﻣﻮﺵ ﻣﺰﻳﺎﻧﺔ ﺑﺮﺷﺔ .. ﻋﺎﺩﻳﺔ .. ﻭﺯﺍﺩﺗﻬﺎ ﺍﻟﺤﺠﺎﻣﺔ ﺷﻮﻳﺔ ﺯﻳﻦ ... ﺍﻣﺎ ﻫﻮ ﻣﺎﺗﺴﻬﻮﻳﺶ ﺍﻟﻨﺴﺎﺀ ﺍﻟﻠﻲ ﻣﻦ ﻧﻮﻋﻴﺘﻬﺎ .. ﻫﻮ ﻳﺤﺐ ﺍﻟﻤﺮﺍﺀ ﺍﻟﻠﻲ ﻋﻨﺪﻫﺎ ﺷﺨﺼﻴﺔ .. ﺍﻟﻤﺮﺍ ﺍﻟﻠﻲ ﺗﺒﻨﻲ ﺭﻭﺣﻬﺎ ﻭﺗﻜﺎﻓﺢ .. ﺍﻟﻤﺮﺍ ﺍﻟﻠﻲ ﺗﻜﻮﻥ ﻧﺪ ﻟﻴﻪ .. ﻣﺮﺍ ﺯﺍﺩﺓ ﺗﻜﻮﻥ ﺷﻘﺮﺍﺀ ﻭﻋﻴﻨﻴﻬﺎ ﻣﻠﻮﻧﺔ .. ﻛﻴﻤﺎ ﻛﺮﻳﺴﺘﻴﻦ .. ﺍﺍﺍﻩ ﻛﺮﻳﺴﺘﻴﻦ .. ﻗﺪﺍﺵ ﺗﻮﺣﺸﺘﻚ .. ﺣﺘﻰ ﻣﺮﺍ ﻣﺎ ﺗﻨﺠﻢ ﺗﺄﺧﺬ ﺑﻘﻌﺘﻚ ﻳﺎ ﻋﺰﻳﺰﺗﻲ ...
ﺑﻌﺪ ﺍﻟﺒﻠﺪﻳﺔ ﺭﻭﺣﻮ ﻟﻠﺪﺍﺭ ﻭﻛﻤﻠﻮ ﺍﻟﻌﺸﻮﻳﺔ ﻏﺎﺩﻱ ... ﺗﻌﺪﺍﺕ ﻋﺸﻮﻳﺔ ﺣﻠﻮﺓ .. ﺷﻄﻴﺢ ﻭﺭﺩﻳﺢ ﻭﺟﻮ .. ﺳﻨﺎﺀ ﺑﺪﻋﺖ ﻫﻲ ﻭﺧﻄﻴﺒﻬﺎ .. ﻭﺍﻣﻬﺎ ﺗﺮﺱ ﻓﻴﻬﺎ ... ﺳﻨﺎﺀ ﺑﻨﻴﺔ ﺗﺤﻔﻮﻧﺔ .. ﻣﺤﺎﻣﻴﺔ ﺗﺨﺪﻡ ﻭﺧﻄﻴﺒﻬﺎ ﺯﺍﺩﺓ ﻃﺎﺭﻕ ﻛﻴﻔﻬﺎ .. ﻃﻔﻞ ﺗﺤﻔﻮﻥ .. ﻋﺎﻗﻞ ﻭﻣﻦ ﻋﺎﻳﻠﺔ ﻣﻴﺴﻮﺭﺓ ﻛﻴﻔﻬﻢ ... ﻗﺮﻭﺍﻭ ﻣﻊ ﺑﻌﻀﻬﻢ ﻭﺣﺒﻮ ﺑﻌﻀﻬﻢ .. ﻋﺮﺳﻬﻢ ﻓﻲ ﺍﻟﺼﻴﻒ ﺍﻧﺸﺎﻟﻠﻪ ... ﻣﺮﺕ ﺑﻮﻫﺎ ﺑﺎﺵ ﺗﻤﻮﺕ ﻣﻦ ﺍﻟﻘﻬﺮﺓ ﻭﻫﻲ ﺗﺮﺍ ﻓﻲ ﺩﺍﺭ ﺣﻤﺎﺗﻬﺎ ﻭﺍﻟﻬﻴﻠﻤﺎﻥ ﻭﺍﻟﻨﺎﺱ ﺍﻻﻛﺎﺑﺮ .. ﻋﻴﺸﺘﻬﺎ ﻓﻲ ﺍﻟﻐﻢ ﻭﺍﻟﻬﻢ ﻣﻦ ﺻﻐﺮﺗﻬﺎ .. ﺗﺤﺮﺵ ﻋﻠﻴﻬﺎ ﺑﻮﻫﺎ ﺍﻟﻠﻲ ﺷﺨﺼﻴﺘﻮ ﺿﻌﻴﻔﺔ ﻗﺪﺍﻣﻬﺎ .. ﻳﺸﺪﻫﺎ ﺣﻴﺔ ﻳﺴﻴﺒﻬﺎ ﻣﻴﺘﺔ .. ﺍﻧﺸﺎﻟﻠﻪ ﺭﺑﻲ ﻳﺎﺧﺬﻟﻬﺎ ﺣﻘﻬﺎ ﻣﻨﻬﻢ .. ﺗﻌﺒﻮﻫﺎ ﻭﺣﻄﻤﻮﻫﺎ .. ﻣﺎﺧﻼﻭﻫﺎﺵ ﺣﺘﻰ ﺗﻜﻤﻞ ﻗﺮﺍﻳﺘﻬﺎ ﺍﻟﻠﻲ ﺗﺤﺒﻬﺎ ﺑﺮﺷﺔ ..
ﻃﺒﺴﺖ ﻋﻠﻴﻬﺎ ﺳﻨﺎﺀ ﻭﻫﻲ ﻗﺎﻋﺪﺓ ﻋﻠﻰ ﺍﻟﻜﺮﺳﻲ
ﻫﻴﺎ ﻋﺮﻭﺳﺔ .. ﻭﻗﻴﺖ ﺗﺒﺪﻝ ﺣﻮﺍﻳﺠﻚ ﻭﺗﻤﺸﻲ ﺍﻧﺖ ﻭﺭﺍﺟﻠﻚ .. ( ﻭﺿﺤﻜﺖ ) ﺻﺤﺔ ﻋﻠﻴﻚ ..
ﻭﻗﺘﺎﺵ ﺍﻧﺎ ﻭﻃﺎﺭﻕ ﻳﺴﻬﻞ ﻋﻠﻴﻨﺎ ﺭﺑﻲ ﻫﻬﻪ ؟
ﺣﺸﻤﺖ ﻭﻫﻲ ﺗﻐﺰﺭﻟﻮ .. ﺗﻠﻘﺎﻩ ﻭﺍﻗﻒ ﻣﻊ ﻃﺎﺭﻕ .. ﻣﺎﻋﻠﻰ ﺑﺎﻟﻮ ﺑﺸﻲ ... ﺣﺎﻁ ﻳﺪﻭ ﻓﻲ ﻣﻜﺘﻮﺑﻮ ﻭﻳﺸﺮﺏ ﻓﻲ ﻛﺎﺱ .. ﺍﻟﻠﻪ ﺍﻋﻠﻢ ﺍﺷﻔﻴﻪ ﻫﺎﻙ ﺍﻟﻜﺎﺱ؟ ﻫﻪ ﻣﺎﻧﻈﻨﺶ ﻛﺎﻥ ﺍﻟﺮﻭﺯﺍﻃﺔ ﻣﺘﺎﻋﻨﺎ .. ﻃﻠﻌﺖ ﻟﺒﻴﺖ ﻧﻮﻣﻬﺎ ﻫﻲ ﻭﺳﻨﺎﺀ .. ﺳﺎﻗﻴﻬﺎ ﺗﺮﻋﺶ .. ﺣﺎﺳﺔ ﺭﻭﺣﻬﺎ ﺭﺯﻳﻨﺔ ﺑﺎﻟﺮﻭﺑﺔ .. ﺧﻠﻄﺖ ﻋﻠﻴﻬﺎ ﺍﻣﻮ ﻭﻣﺮﺕ ﺑﻮﻫﺎ ﻳﺰﻏﺮﻃﻮ ... ﻭﺣﺪﺓ ﻓﺮﺣﺎﻧﺔ ﻭﻭﺣﺪﺓ ﺑﺎﻟﻐﺰﻭﻝ .. ﺑﺎﺳﺘﻬﺎ ﺍﻣﻮ ﻣﻦ ﺟﺒﻴﻨﻬﺎ ﻭﻗﻌﺪﺕ ﺑﺤﺬﺍﻫﺎ
- ﺍﻧﺖ ﻣﻦ ﻟﻴﻮﻡ ﺑﻨﺘﻲ ﻣﻮﺵ ﻛﻨﺘﻲ .. ﻭﺍﻟﻠﻪ ﺍﻟﺤﻤﺪﺍﻟﻠﻪ ﺍﻟﻠﻲ ﺗﻤﻨﻴﺘﻮ ﻟﻘﻴﺘﻮ .. ﻣﻠﻲ ﺭﻳﺘﻚ ﻭﺍﻧﺎ ﻧﻘﻮﻝ ﻣﺼﺎﺑﻬﺎ ﻟﻮﻟﺪﻱ ﻣﺼﺎﺑﻬﺎ ﻟﻮﻟﻴﺪﻯ . ﺍﻟﺤﻤﺪﺍﻟﻠﻪ ﻳﺎﺭﺑﻲ .. ﺍﻧﺸﺎﻟﻠﻪ ﺭﺑﻲ ﻳﻬﻨﻴﻚ ﻣﻌﺎﻩ .. ﻭﻟﺪﻱ ﺭﺍﻫﻮ ﺑﺎﻫﻲ ﺑﺮﺷﺔ ﻭﺣﻨﻴﻦ ﺑﺮﺷﺔ .. ﺍﻋﺮﻓﻲ ﺍﻧﺖ ﺑﺮﻙ ﻛﻴﻔﺎﺵ ﺗﺘﻌﺎﻣﻠﻲ ﻣﻌﺎﻩ .. ﺗﻜﺴﺒﻴﻪ .. ﻭﺗﺤﻄﻴﻪ ﻓﻲ ﻣﻜﺘﻮﺑﻚ .. ﺍﻟﺮﺟﺎﻝ ﺭﺍﻫﻢ ﻛﻴﻒ ﻟﻮﻻﺩ ﺍﻟﺼﻐﺎﺭ ... ﻳﺤﺒﻮ ﻛﻠﻤﺘﻬﻢ ﻫﻲ ﺍﻟﻠﻲ ﺗﻤﺸﻲ .. ﻳﺤﺒﻮ ﻟﻤﺮﺍ ﺗﺪﻟﻠﻬﻢ ﻭﺗﺠﺮﻱ ﻓﻲ ﺣﻀﻮﺿﻬﻢ ... ﺍﻋﻤﻠﻲ ﺍﻟﻠﻲ ﻳﻘﻠﻚ ﻋﻠﻴﻪ ﻳﺤﻄﻚ ﻓﻲ ﻋﻴﻨﻴﻪ ﻭﺍﻛﺜﺮ ...
- ﻋﻴﺸﻚ ﺍﻣﻲ ﻧﺎﺟﻴﺔ ( ﻃﺒﺴﺖ ﺭﺍﺳﻬﺎ ﺣﺎﺷﻤﺔ ) ﺍﻧﺸﺎﻟﻠﻪ ﺭﺑﻲ ﻳﻘﺪﺭﻧﺎ ﺍﻟﺰﻭﺯ .. ﺍﻧﺸﺎﻟﻠﻪ ﻣﺎ ﺗﺮﺍ ﻣﻨﻲ ﻛﺎﻥ ﺍﻟﺨﻴﺮ
ﺿﺤﺖ ﻣﺮﺕ ﺑﻮﻫﺎ ﺿﺤﻜﺔ ﺻﻔﺮﺍﻭﻳﺔ
- ﺗﻬﻨﻲ ﺍﻻ ﻧﺎﺟﻴﺔ ﺑﻨﺘﻲ ﻣﺘﺮﺑﻴﺔ ﻭﻋﺎﻗﻠﺔ . ﻫﺎﻣﺎﻻ ﻭﺍﺷﻲ ﺍﻧﺎ ﺭﺍﻧﻲ ﺍﻟﻠﻲ ﻣﺮﺑﻴﺘﻬﺎ .. ﺍﻧﺸﺎﻟﻠﻪ ﻣﺎﺗﻬﻨﻴﻚ ﻛﺎﻥ ﻫﻲ ﻋﻠﻰ ﻭﻟﺪﻙ ﻭﻭﻟﺪﻩ ﺯﺍﺩﺓ
ﻏﺰﻟﺖ ﻭﻫﻲ ﺗﺴﻤﻊ ﻓﻴﻬﺎ . ﺗﻠﻔﺘﺖ ﻭﺑﺎﺳﺖ ﺧﺪ ﺣﻤﺎﺗﻬﺎ ﻭﻋﻨﻘﺘﻬﺎ .. ﻗﺪﺍﺵ ﺣﻀﻨﻬﺎ ﺣﻨﻴﻦ .. ﻭﻣﺤﻼﻫﺎ .. ﺗﻔﻜﺮﺕ ﺣﻀﻦ ﺃﻣﻬﺎ ﻭﺑﺪﺍﺕ ﺗﺒﻜﻲ ... ﺷﺪﺗﻬﺎ ﺣﻤﺎﺗﻬﺎ ﻭﺳﻨﺎﺀ ﻭﻋﻨﻘﻮﻫﺎ ﺍﻟﺰﻭﺯ
ﻳﺰﻱ ﻣﻦ ﺍﻟﺒﻜﺎﺀ ﻋﻴﺶ ﺑﻨﺘﻲ ﻣﻮﺵ ﺑﺎﻫﻲ .. ﺭﺑﻲ ﻳﻬﻨﻴﻚ ﻭﻳﻔﺮﺣﻚ .. ﻭﻏﺰﺭﺕ ﻟﻤﺮﺕ ﺑﻮﻫﺎ ﻏﺰﺭﺓ ﻣﺘﺎﻉ ﻭﺣﺪﺓ ﻓﻲ ﺑﺎﻟﻬﺎ ﺑﻜﻞ ﺷﻲ
ﻫﻴﺎ ﻧﺨﺮﺟﻮ ﺍﺣﻨﺎ ﺍﻻ ﻓﺎﻃﻤﺔ ﺧﻠﻲ ﺗﺒﺪﻝ ﺣﻮﺍﻳﺠﻬﺎ ﻟﻌﺮﻭﺳﺔ
ﺧﺮﺟﻮ ﻟﻜﻞ ﻭﻗﻌﺪﺕ ﻭﺣﺪﻫﺎ .. ﺷﺎﻓﺖ ﺭﻭﺣﻬﺎ ﻓﻲ ﺍﻟﻤﺮﺍﻳﺔ .. ﺗﻠﻘﻰ ﺍﻻﻛﺤﻞ ﻟﻜﻞ ﻫﺒﻂ ﻋﻠﻰ ﻋﻴﻨﻴﻬﺎ .. ﻫﻬﻪ ﻭﻻﺕ ﻋﺒﻴﺜﺔ .. ﻗﻌﺪﺕ ﻗﺪﺍﻡ ﺍﻟﻤﺮﺍﻳﺔ ﻭﺑﺪﺍﺕ ﺗﻤﺴﺢ ﻓﻲ ﺍﻟﻤﻜﻴﺎﺝ ..
ﻟﻘﺎﺕ ﺣﻮﺍﻳﺠﻬﺎ ﻣﺤﻄﻮﻃﻴﻦ ﻓﻲ ﺍﻟﻔﻠﻴﺠﺔ ﺧﻤﻠﺘﻬﻤﻠﻬﺎ ﺳﻨﺎﺀ .. ﻭﺣﻄﺘﻠﻬﺎ ﻓﻮﻕ ﺍﻟﻔﺮﺵ ﺳﺮﻭﺍﻝ ﺍﻛﺤﻞ ﻭﺳﻮﺭﻳﺔ bleu ﺗﻬﺒﻞ .. ﻧﺤﺎﺕ ﺭﻭﺑﺘﻬﺎ ﻭﺑﺪﺍﺕ ﺗﻠﺒﺲ ﻓﻲ ﺣﻮﺍﻳﺠﻬﺎ .. ﺗﺴﻤﻊ ﻓﻲ ﺣﺲ ﻗﺪﺍﻡ ﺍﻟﻠﺒﻴﺖ ﻣﺸﺎﺕ ﺗﺠﺮﻱ ﺳﻜﺮﺕ ﺍﻟﺒﺎﺏ ﺑﺎﻟﻤﻔﺘﺎﺡ ﻻ ﻳﺪﺧﻞ ﻋﻠﻴﻬﺎ ﻭﻫﻲ ﻋﺮﻳﺎﻧﺔ .. ﺗﺴﻤﻊ ﻓﻴﻪ ﻳﺤﻜﻲ ﺑﺎﻟﺘﻠﻴﻔﻮﻥ en français ﻳﻤﻜﻦ ﻣﻊ ﺟﻤﺎﻋﺔ ﺧﺪﻣﺘﻮ .. ﻭﺑﻌﺪ ﺗﺴﻤﻊ ﻓﻴﻪ ﻳﻀﺤﻚ ﻭﻳﺤﻜﻲ ﻣﻊ ﻭﺍﺣﺪ ﺑﺎﻟﻌﺮﺑﻲ
- ﻫﻬﻪ ﻳﺎﻭﻟﺪﻱ ﻭﺣﻠﺔ ﻛﻠﺒﺔ ﻭﺣﻠﺘﻬﺎ .. ﻫﺎﻛﺎ ﻧﺎﺟﻴﺔ ﻣﺎﻟﻘﺎﺕ ﻣﺎﺗﻌﻤﻞ ... ( ﺑﻌﺪ ﺳﻜﺖ ﺷﻮﻳﺔ ﻳﺴﻤﻊ ) ﺍﺵ ﻳﻬﻤﻨﻲ ﻓﻴﻬﺎ ﻳﺎﺧﻲ ﻫﻲ ﻛﺎﻧﺖ ﺗﺤﻠﻢ ﺃﺻﻼ ﺑﻮﺍﺣﺪ ﻛﻴﻔﻲ .. ﻭﺣﺪﺓ ﺟﺎﻫﻠﺔ .. ﻧﻬﺎﻳﺘﻬﺎ ﻭﺍﺻﻠﺔ ﻟﻠﺜﺎﻟﺜﺔ ﺛﺎﻧﻮﻱ ﻛﺎﻥ ﻣﻮﺵ ﺍﻗﻞ ... ﺗﻲ ﻣﺎﻫﻮ ﺟﻮ ﺣﺒﻬﺎ .. ﻣﺎﻧﻌﺮﻓﺶ ﻋﻼﺵ ﻫﻬﻪ ﺩﺭﺍ ﺷﻨﻮﺓ ﺍﻟﻠﻲ ﺭﺍ ﻓﻴﻬﺎ ... ( ﺳﻜﺖ ﻳﺴﻤﻊ ) ﻭﻱ ﻭﻱ ﻫﺎﻳﻜﺔ ﺗﺘﻠﻬﻰ ﺑﻴﻪ ﻋﺒﺎﺭﺓ ﺟﺒﺖ ﻣﺮﺑﻴﺔ ﻟﺠﻮ .. ﻫﻬﻬﻪ ﺍﻣﺎ ﺗﻜﻠﻔﺘﻠﻲ ﺻﺪﺍﻕ .... ﻭﺑﻌﺪ ﺑﻌﺪ ﺷﻮﻳﺔ ﻭﻛﻤﻞ ﻳﺤﻜﻲ ... ﻭﻫﻲ ﻓﺸﻠﺖ ... ﻗﻌﺪﺕ ﻓﻮﻕ ﺍﻟﻔﺮﺵ ﻭﺷﺪﺗﻬﺎ ﻏﺼﺔ ﺍﻟﺒﻜﺎﺀ ... ﺍﻣﺎ ﻣﺎﺑﻜﺎﺗﺶ .. ﻳﺰﻳﻬﺎ ﻣﻦ ﺍﻟﺪﻣﻮﻉ .. ﻳﺰﻳﻬﺎ ﻣﻦ ﺍﻟﻮﺟﻴﻌﺔ .. ﻫﻮ ﺣﺐ ﻣﺮﺑﻴﺔ ﻟﻴﻮﺳﻒ ؟ ﻋﻨﺪﻭ ﺍﻟﺤﻖ .. ﻫﻲ ﺟﺎﻫﻠﺔ ؟ ﺍﻟﻐﻠﻄﺔ ﻣﻨﻮ ﻫﻮ ﺍﻟﻠﻲ ﻣﺎﺣﺎﻭﻟﺶ ﻳﻌﺮﻓﻬﺎ .. ﺍﻣﺎ ﺑﺎﺵ ﻳﺘﻤﻨﻴﻚ ﻋﻠﻴﻬﺎ ﻭﻳﻀﺤﻚ ﻋﻠﻴﻬﺎ ﻣﻊ ﺻﺤﺎﺑﻮ؟ ... ﻫﺬﺍ ﺍﻟﻠﻲ ﻭﺟﻌﻬﺎ .. ﻭﺑﻌﻤﺮﻫﺎ ﻣﺎﻫﻲ ﺑﺎﺵ ﺗﺴﺎﻣﺤﻮ ﻋﻠﻴﻬﺎ ... ﻭﺗﻮ ﻳﺸﻮﻑ ﺍﻟﺘﻘﻮﻋﻴﺮ ﻭﺍﻟﺠﻬﻞ ﻋﻠﻰ ﻗﺎﻋﺪﺓ ...

✴✴✴✴