👑زواج تقليدي👑

👑الحلقة الثالثة والثلاثون...👑

👑👑

حطت العشاء فوق الطاولة وقالت ليوسف باش يمشي يعيط البوه في بيروه غاطس من اللي جاء .. كانت تغزل على اعصابها... من وقت اللي ركبت معاه في الكرهبة لين وصلو للدار وهو كلمتين وقص .. دوبة مادخلو مشاء لبيروه قالها عندي خدمة .. وهي بدلت ليوسف ودخلت طول للكوجينة تندب على ايامها ... كاينو لا صار بيناتهم شي الصباح .... ولات تتشحت في بوسة منو بعد ماكان باش يهبل عليها ... تو هي اللي باش تهبل .. شافتو دخل للكوجينة وهو محمل ولدو ويضحك هو وياه ... قلبها رعش... وبدنها سخن وهي تتذكر في بوستو .. كان مشمر سوريتو وحاللها شوية ..صدرو عريان شوية ..عينيها علقت فيه وهو قاعد في الكرسي ...تعمدت تقربلو وهي تحطلو في العشاء ..جاء صدرها في خدو ...راتو يغمض في عينيه ودور وجهو .. يقاوم ؟؟ باهي ياسي محمود يا انا يا انت في هاالليلة الكلبة ؟ قعدت تحطلو بالشوية وطولت في الوقفة وهو كل مرة يدور وجهو لشيرة الا ليها هي ...
- مازلت برشة ؟ حستو متوتر .. بدا يطرشق في صوابع يديه بعصب 
- هاني نحطلك في العشاء .قاتلو بالشوية ..اشبيك فديت ؟ هز عينيه جات في عينيها .... العذاب راتو فيهم .. كانو ذابلين وتاعبين وفيهم لمعة شوق ووحش ...بعد هبط يغزر لصدرها ..حستو يحبس في انفاسو بالسيف .. وقعد مركز معاه ..غمض عينيه وتنهد وبدا يعض في شفايفو .. وعاود طبس راسو .. نار تاكل فيه من داخل حاستها ...
  -خ...خديجة ؟ باش تحطلي العشاء ولا نمشي ؟ صوتو يرعش ..ماحبتش تزيد تكمل عليه ...كملت عباتلو الصحن ومشات قعدت بحذا يوسف توكل فيه ... عشاء كامل وهو ياكل ومطبس راسو ..ولا تحريكة ولا نفس... باهي يا سي محمود ؟ مازال الليل طويل .كان مانهبلكش اليوم مانتسماش انا خديجة ؟ 
-ماسالتنيش اليوم على نهاري لول في الفاك ؟ 
- امممم ؟ اش عملت سافا تعدى النهار ؟ كان يتكلم مزروب ويمضغ في السكالوب
- أي محلاه تعدى تعرفت على برشة طلبة وعملت صحبة مع وحدة تونسية غادي اسمها امنة من نابل ..  هز راسو يغزرلها ..
- فيسع عملت صحبة؟ وباهية الطفلة هذي ؟ كيفاش حكايتها ؟  تو وذنيه ولات منتبهة كيف دخلت فيها صحبة ؟ مالا كيف نحكيلو على الأستاذ اللي مضروبين فيه البنات ؟ 
-معرسة ..وتقرى هوني ...
- اممم ..ايا باهي ... مالا عجبتك الفاك ؟ 
- وي ..ياسر فيها جو ( كانت متحمسة وهي تحكي ) قابلنا الأساتذة الكل ..الكل محلاهم ...تحسهم اليقون برشة ...( وسكتت وقعدت تغزرلو ) ..فما ...فما كان واحد ماجاش ..ههه البنات الكل يستناو فيه ...قالتلي امينة اللي هوما لكل مضروبين فيه ههه .. قالو يهبل بالزين ...وزيد عربي زادة ههه ..  قعدت تغزرلو من تحت لتحت وهي تتكلم .. شرق هز كاس ماء شربو وهز راسو غزرلها .. يوسف وقتها كمل عشاه قالها 
-ماما ديذة نمشي نتفرذ في التلفزة ؟ مسحتلو فمو وهبطتو باستو من خدو وقاتلو برة ...مشا يجري للصالة وهي قعدت وحدها معاه ...نحى الفرقيطة من يديه وحط يديه تحت دقنونتو فوق الطاولة وقعد يغزرلها ..يهز فيها ويحط  - اممم قالها بتسوميم .. وصاحبتك موش قتلي معرسة ؟ حتى هي مضروبة فيه زادة ؟ ياخي انتوما ماشيين تقراو ولا ماشيين تبزنسو على الأساتذة ؟  تربثت وهبطت راسها .. حطت القدمة في فمها باش تتلهى بيها من عينيه الثاقبة 
- ههه ... كانك علي انا ماشية نقرا .. ماصدقت لربي رجعت ... نحكيلك عاللي قالوه هوما راهو ؟ 
- أمم أيا باهي ؟ انشالله تتلهى في قرايتك برك .. الحكايات الفارغة ماعادش نحب نسمعها ... تخرّج السنا بعد يعمل الله دليل  ومسح فمو وقام ماخلالهاش الفرصة باش تكمل تحكي ..قام باش يخرج ... تلفتلها كيف وصل للباب وقالها 
- رويق البنات اللي في الفاك مانحبش نشوفو .. وزيد هالطفلة اللي مضروبة في استاذها وهي معرسة ماذابيك ماتخالطهاش ...مفهوم ؟ جات باش تتكلم قص عليها 
- طيبلي قهوة تعمل مزية وجيبهالي للبيرو ...وخرج .. تبسمت ... وهاك التبسيمة ولات ضحكة ..ضحكة كبيرة كبيرة ... حبت تخلط وراه تعنقو وتبوسو .. محلاه محلاه وهو غاير ..ههه شلق على روحو ... بدات تنقز ..تنقز حتى لين وجعتها كرشها ههه .... نسات اللي هي حبلة بالعمل !!! حطتلو القهوة فوق بيروه وهو غاطس في اوراقو حتى راسو ماهزوش عمللها براسو يعطيك الصحة وكمل يكتب ....خرجت مقهورة وماشافتش عينيه اللي قعدت تتبع فيها لين سكرت الباب ... كملت دوشت ليوسف ورقدتو ومشات دوشت هي ... خرجت من الدوش حاسة بالنشاط ... حلت الخزانة وهي تغني ..تبسمت بتخوبيث وجبدت نويزات في لون الشمبانية كان صدرها لكلو دانتال وبعد تهبط ساتان قصيرة ..معاها روب متاعها لبستها وحطت فوقها روب د شومبر ..حلت شعرها مشطتو وحطت قلوس في فمها وغرقت روحها بالبارفان وخرجت .... دقت باب بيروه بالشوية ودخلت ...تلقاه متكي على كرسيه لتالي ..مكتف يديه ومطلع راسو الفوق سارح بافكارو..ساقيه فوق البيرو ..دوبة ماشافها هبط ساقيه وعينيه وساعت وهو يغزر لبستها ... حستو تربث وتمهمش ... عينيه تعدات على بدنها الكل باش تاكلها ... تبسمت ووقفت قدام البيرو تغزرلو وريحة بارفانها دخل لخناخشو ....تكى يديه على البيرو وعقد حواجبو وساله
-اش فما خديجة لاباس ؟ 
- لاباس .. وقعدت على الكرسي ... جيت ..جيت باش نسالك ..غدوة باش تمشي معايا للطبيب ؟ 
-علاش ؟ لاباس ماشية للطبيب ؟ متقلقة ؟ 
-هههه لا بالعكس .... اما ..اما غدوة باش يشوفلي ساكس متاع البابي ... وذبلت عينيها بدلال .. في بالي تحب تعرف اش باش نجيبو بنوتة ولا وليد ؟  قعد يغزرلها ..بلع ريقو وهي زادت حطت الساق على الساق تعراو فخاضها وهو النفس يمش ويجي ... حط صوابعو على فمو وبدا ينفخ ...
- قول لحياة تمشي معاك ..هاك تشوف ماعنديش وقت 
- أي اما حياة ماهيش بوه ؟ قاتلو بعصب ..انت بوه .. انت اللي لازمك تمشي معايا !!! 
- ماعنديش وقت ... قالها متوتر وهو يلعب بيديه ووقف مشا شيرة الشباك حلو وشعل سيقارو ..
- حتى الوقتاش وانتي ماعندكش وقت لعايلتك ؟  مشات وقفت بحذاه.. غزرلها بشطر عين وعاود تلفت للشباك 
- ابعد الدخان موش باهيلك ريحتو !!
- مالا نحي الدخان واحكي معايا !! حتى الوقتاش باش تقعد مطفيني ؟ وبدات تصيح بالشوية ... فديت راني فديت محمود .. باش تفهم؟ امي ..امي خديجة ماتت الله يرحمها .. علاش انا نخلّص ؟ علاش نخلّص بعدك عليا .؟؟ حستو تحجر كيف سمعها تحكي على امو ..لكن مانجمتش تاقف .. كملت تحكي ومشات شدتو من يدو وبدات تتكلم بالشوية وهي تعدي بيدها على ايدو بحنان
- توحشتك ... توحشتك محمود .... توحشتك باش تفهم ؟ علاش تعاقب في روحك وتعاقب فيا ؟ (وزادت قربتلو تدحنس عليه) نحبك .. نحبك نحبك نحبك ..ومحتاجتلك .. وانت زادة محتاجلي ..نشوف هذا في عينيك وفي تصرفاتك ... نحى السيقارو بعصب وبعد عليها ... هرب ... حط راسو بين يديه وقعد واقف بعيد ..
-مانيش محتاج لحد ومانحب حد يحتاجلي !!! خديجة برة امشي ارقد خلي هالليلة تعدي على خير ..
  - مانيش ماشية !!ومشات وقفت مقابلتو ..لصقتو .حطت راسها على صدرو وعنقتو وتنهدت 
- مانيش متحركة من هنا الا مانهز راجلي معايا وهزت راسها تغزرلو وهو واقف مبهم ..عينيه ضايعة ومزغللة... في نظراتو حرب كبيرة ..ويلزمها هي تربح .... حتى كان انت ماكش محتاجنا احنا محتاجينك .. انا ويوسف والبيبي اللي في كرشي نحبوك .. نحبوك ترجعنا ...نحبو محمود الحنين .(.وهزتلو يدو حطتها على كرشها وبدات تعدي فيها بالشوية عليها وتبسمت) ..تسمع حبي ؟ تسمع فيه يتحرك ههه ..كل يوم نسمعو وكل يوم نمسو وكل يوم نتشوق باش نشوفو خاترو قطعة منك .. قعد يعدي في يديه بالشوية على كرشها كيف المسحور ... وهي حست بالدفاء في بدنها الكل... وشعلت فيه النار ...حلت الروب وقربتلو
  - محمود ؟ ن..نطلعو نرقدو ؟ قاتلو بالشوية  غزرلها وعينيه لاهبة ترشقت في صدرها ...يديه ولات ترعش ..غمض عينيه والنفس حسو تقطع عليه ... حس بالضعف ... بدنو ضعف قدام انوثتها .. دور وجهو للحيط جات عينيه في عينين ناجية ... ورجعلو الكابوس ... رجعتلو الوجيعة ...تذكر كيفاش هي عام كامل تتوجع وهو مافيبالوش بيها .... عام كامل ماحسش بيها ..وهي تحس بيه ... خممت فيه وهو ماخممش فيها ..خلاها تعاني في مرضها ... وقعد يتمعشق مع مرتو .. داخت وطاحت وهو موش معاها .. هو وقتها مع مرتو ... عايش حياتو .. وخلاها هي تموت وحدها ....

✴✴✴✴