👑زواج تقليدي👑

👑الحلقة الرابعة والثلاثون...👑

👑👑

  قامت الصباح وراسها باش يطرشق بالوجيعة والغل ...مارقدتش ليل كامل وهي تتقلب كل مرة على جنب ... وزيد مع البكاء اللي بكاتو ماعادش تنجم تهز راسها ...نحات الغطاء وهزت تشوف الوقت تلقاه الستة ونص ... كرركرت روحها غسلت وجهها ولبست الروب وهبطت للكوجينة باش تحضر الفطور ....كان راقد في الصالة كيما خلاتو البارح في الليل ...زاد ركبها العصب ...دخلت للكوجينة وبدات تعمل في الحس بلعاني ...راقد سيادتو شايخ بالنوم وهي مخلاها تغزل ...بعد ماتسخايل سايي باش يطلع معاها وسايي رجعلها وباش ترقد في حضنو .. هز روحو وخرج يجري ... هرب .. تسمع في تسكيرة باب الدار وهي واقفة مصدومة في وسط بيروه موش مصدقة ...ولات تبكي ومن الغش والعصب شدت فرتتلو الأوراق اللي في البيرو الكل.... وزادت طيحت الفايوز واللي تلقاه قدامها وبعد طلعت لبيتها تغفص في دموعها ..ترمات على الفرش تحس في بدنها الكل موجوع من الوحش ليه ..حست بالنار تغلي في داخلها ..نار ماينجم يطفيهالها كان هو ...ليل كامل فايقة تستنى فيه ...وبعد تسمع في الباب تحل وتسمع في حس ساقيه يمشيو ويجيو اللوطة وبعد سكت .. هبطت بالشوية تشوف فيه تلقاه مرمي على الكانابي و ظاهر سكران ميت ملوح روحو ... حتى الوقتاش باش يقعد هكة ؟ موش عارفة !!!جابت غطاء ونحاتلو الفاست وهو دايخ ونحاتلو سباطو وحطتلو مخدة تحت راسو وهو موش واعي بشي ..غطاتو وقعدت تغزرلو كيفاش راقد محلاه ومحلى شفايفو دايرة بيهم لحيتو قعدت تمسحلو على وجهو ..على شفايفو ..على شعرو ..وحطت راسها في صدرو وغمضت عينيها وقعدت تبكي لين حست النفس باش يتقطع عليها ... مللي بدات تتوحم وهي باش تهبل عليه ..الوحم الكل جاء فيه هو ..وعلى زهرها المشاكل الكل جات في الفترة هذي ..باش يقتلها ببرودية دمو وقلة اهتمامو .. تنهدت وهزت راسها وقامت مشات لبيت نومها وخلاتو وحدو في الصالة .. الحس و ريحة القهوة فيقتو ... كانت عينيه ثقيلة ماينجمش يحلها وراسو يوجع يوجع باش يخرج مخو يحسو من الوجيعة... كانت في الكوجينة يسمع فيها ..غزر للوقت يلقاها السبعة ...موش عارف كيفاش باش يخدم اليوم .. ماعينوش باش يعمل شي .... حاس بالتعب في بدنو .. حاسس روحو فارغ من داخل ...هز تليفونو وقعد يبربش فيه ... حط نومرو ناجية ونزل .. قعد يطلب ...يطلب ويستنى ..ههه الوقت هذا مستانسة تبدى قاعدة في الفيراندة تشرب في قهوتها ...مستانسة تهز عليه التليفون وتحكي معاه وتفدلك وتضحك ...مستانس يقوم يكلمها يصبح عليها قبل مايبدى نهارو ...رمى التليفون بحذاه وحط راسو بين يديه ...مايحبش يبكي ...مايحبش...توحشها ..وتوحش تنبيرها وتمقعيرها .. توحش كلامها ونصايحها ..توحش حضنها .... احساسو بالذنب حطمو ..كرهو في حياتو ..قتلو .دمرو ..حتى حياتو مع مرتو ولات مهددة ... حسها فدت من عيشتها معاه .. موش عارفة اللي هو يعاقب في روحو بيها ... بمجرد انو يشوفها قدامو ومايمسهاش ..مايعنقهاش ..مايبوسهاش ..مايرقدش معاها ..هذاك في حد ذاتو عقاب .. انو يشوفها قداش مغرية وقداش يحب يغطس راسو في صدرها ومايخرجش منو ..في حد ذاتو عذاب ليه ... يحب يتعذب .. يحب يعاقب روحو خاتر كان اناني ...اناني ..محسش بيها ناجية وهي تتعذب ...مافهمهاش .. تعبها بمشاكلو ..ماخلاهاش تتهنى ..من الأول خذالها مرا هي ماحبتهاش وماكانتش راضية علاها وماكانتش راضية على عيشتو معاها في الحرام ...واللي اختارتها هي وحبها هو تعبها زادة ...ضربها قريب لا قتلها هي وصغيرها اللي فرحانة بيه تو ... خرجت من الكوجينة وكاس القهوة في يديها ....تلفتت تلقاه حاط راسو بين يديه وقاعد ..حطت الكاس فوق الطاولة وغزرتلو 
- صباح الخير ..شد اشرب القهوة فماش ماتفيق ..ماعادش بكري عليا وانا ويوسف باش توصلنا .. ماجابوهاش قعد مطبس راسو وهي تنطرت بغش هزت روحها وطلعت فيقت يوسف بدلتلو وقاتلو اهبط ومشات تبدل لروحها ... من اليوم ماعادش باش تعملو حتى حساب ...خليه يحس اللي نحس في انا تو ... لبست حوايجها كيما تحب هي ..عملت مكياج وحلت شعرها ..وبدات تمشط فيه ...تسمع في حس ساقيه جاي بالزربة وتنطر حل الباب 
- شنوة اللي عملتو في البيرو ؟ وغزرلها مازال ماكملش كلامو قعد باهت وشنوة اللي لابستو هذا ؟ كانت لابسة روب في الروج قصيرة شوية مع كولون خشين في النوار وبوط في النوار ...قربلها وعينيه تتشاعل وجاء وقف وراها جات عينيه مقابلة عينيها في المراية 
- شنيا اللي عاملتو في روحك ؟ لاباس انت عاللصباح ؟ اش نبهت عليك انا البارح ؟ موش قلنا الماكياج لا واللبسة هذي لا !!! شنوة ناوية على المشاكل هالصباح
نحات الخلاص من يديها الي بدات ترعش من الخوف ..حست عينيه باش تخرج من بقعتها وعروقو من الغش باش تتطرشق..اما لازم تبرد اعصابها ...يزيه ما يعامل فيها كيف الروبو 
- ماو قتلك ماشية للطبيب اليوم .....ووقفت مشات للخزانة تجبد في الفازت متاعها .. باش نمشيلو بالساليبات ..؟؟ 
- أي عاد شبيه ؟ شنوة المشكل كان مشيتلو بالساليبات ولا بالهم الأزرق ..ياخي يدبر عليك اش باش تلبس هو ؟ اسمع برا نحي هذا الكل وامسح ماكياجك ..
- لا ..قاتلو ببرودة دم وهي من داخل مرعوبة ..مانيش منحية وباش نمشي هكة .. حست بالصدمة في وجهو كيفاش جاوبتو بالطريقة هذيكة ...عقد جبينو وقحرلها قحرة متاع موت .. بدا يقربلها ويديه يحرك فيها بعصب
  - طلعت قريناتك للا خديجة ووليت تجاوب فيا ؟ باهي مالا مافماش مشي ..واقعد لهنا اليوم في الدار وشوف شكون اللي تمشي كلمتو لهنا ؟  - مانيش خديمة عندك انا راني.وبدات تصيح ..انا مرتك ..مرتك ..وبدات تقربلو وقفت قدامو وهو باهت من صياحها ..العلاقة بين المرا والراجل راهي موش حاكم ومحكوم راهي؟ .العلاقة بيناتهم لازم تكون مبنية على الاحترام والثقة المتبادلة.. 
- كيف هي مبنية على الاحترام (قص عليها وولا يصيح هو زادة ) مالا احترمني كيف تخرج ..والبس حاجة مستورة موش عريانة
  - ياخي وين عايش انت وين ؟ رانا في فرنسا !!تي حتى في تونس معادش يخممو هكة !!
- انشالله نعيشو في المريخ .. كيف نرا فخاذك عريانة هكة وانت خارجة نعرف اش باش يقولو الرجال ..والرجال راهم في كل بلاد يخممو كيف كيف .. كان تسخايلهم نضرتهم مختلفة هوني للنساء تكون غالطة ..يمكن اتعس من تونس اللي تحكي عليها ... وتنفس بالقوي ..حستو بدا يغلي من داخل وركبتو الشواطن ... حك لحيتو ..وهز يديه عداها على شعرو وتنهد
-تو برا نحي اللي عاملتو في روحك الكل واخرج ماعادش بكري ... واللي عملتو في البيرو مانيش ساكتلك عليه تو بعد نتفاهمو عليه !!!!
- باقي تهدد؟ فديت راني فديت .. مشات تجري واللي فوق الكوافوز طيحتو الكل في القاعة وبدات تصيح  مانيش منحية شي كان نعرف تقتلني تو ..  قعد يغزرلها حال فمو من الصدمة ..اول مرا يراها تتصرف بالطريقة هذي ...حس بالدم طلعلو لراسو وهز يدو جاء باش يضربها ..غطات وجهها بيديها وشهقت ...
-باش تضربني ؟  عينيها وساعت من الخوف ويديها ترعش وهي حاطتهم قدامو تحمي في روحها منو ... تفكر كلام ناجية ووعدانو ليها باش ماعادش يحط عليها يدو ويضربها .. طربق سنيه على بعضهم من العصب ..تلفت يلقى دبوزة بارفان مازالت فوق الكوافوز هزها ورماها فوق الحيط مشات قزاز .. ولا يتنفس بالقوي .. زاد هز يدو ضربها عالحيط وخرج ... مشات رمات روحها فوق الفرش وبدات تبكي من الغل ... مازال يحب يهز يدو عليها ومازال يحب يضربها ... ماشعفش من المرة لخرى ماشعفش وماتبدلش ..قداش كرهتو ..كرهتو كرهتو... بعد نص ساعو سمعتو خرج هو ويوسف .. قامت حاسة بالتعب ... مدقدقة وحزينة عاللخر ..حاسة علاقتهم ماشية وتتدهور ..كل يوم قاعدة تتحطم ...

✴✴✴✴