👑زواج تقليدي👑

👑الحلقة الواحدة والاربعون...👑

👑👑

  بعد الفطور ماخلهاش تمس شي كمل لم الدنيا وجابلها البوماضة ...حطها قدامو وبدا يعدي على شفافيها بالشوية وهي تتشوكع 
- امان بالشوية والله توجع !!
- هاني نسايس فيك قالها بالشوية وهو مركز ...وبعد زاد قالها . ..حياة الصباح كلمتني مستعيتنا على مشوى في دارها ..نفطرو ونمشيو نعملو دورة بيوسف ونروحو ...كمل...قعد يستوي فيها بالشوية
- كيفاش باش نخرج وفمي هكة انا ؟ 
- اشبيه فمك ؟ وضحك ...هاوكة تو يرتاح ...وغمزها ...اما ماترزيت كان انا .هههه ساعة شريت برشة قلاص !! - كرهتو لقلاص ماعادش ماكلتو ...ياريتني ماشتهيتو !
- هههه كيف تاكل حاجة قدامي تحمل مسؤوليتك ..هههه راني مانرحمش هههه وجهها احمار وضحكت 
-ماعادش ناكل حتى شي السماح ...وغزرتلو تدلل..تو باش باش نخرج انا ...ماعندي حتى لبسة !!! -ماعندك حتى لبسة ؟ وعقد حواجبو وكتف يديه ...هايكة الخزانة معبية ..
-كانت ...كاااااانت معبية ...قصت عليه ...قبل ماتفرغها انت ...وقربتلو شدتو من كتفو ...امان محمود امان جيبلي الروب الطوال اكهو ...!! الروبة تفرهدني كيف نلبسها ..السراول يبدى مكبوس عليا ...!! عمللها براسو لا وعض على شفتو 
- الروب لا ...كيما تفاهمنا ...وهز يدو ينبه عليها ...وماتزيدش تعاود نفس الحديث ...راهو موش كيف تسامحنا معنتها باش تعمل على كيفك !!!برة البس ساليبات هوكة مفرهدة ...وقص الحديث تو ..
- حست صوتو بدا يعلى ولات سكتت ماحبتش تكبرها ..  قعدو ثنية المشي ساكتين ...ساعة ساعة يغزرلها يلقاها مطبسة راسها وساكتة ...لابسة ساليبات وسامعة الكلام ...ماحبش يزيد يكبرها ...حب يرضيها ..تبسملها ...مارجعتش التبسيمة 
-باش تقعد متغششة ؟
  -مانيش متغششة !!قاتلو بصوت فيه لوم 
-لا متغششة !!وشدلها يدها باسهاللها بالشوية وقعد يسوق ...ياخي نغير عليك باش تفهم ؟ وتنهد وحطلها ايدها فوق قلبو اللي يدق بالقوي ...وهي هزت راسها وحس عينيها لمعت اما ماغزرتلوش هههه (خلي يزيد يهبلها)
-كان ماجبتش نحبك ونغير عليك ..مايهمنيش اش تلبس ...تخرج حتى عريانة ...علاش نحرق في اعصابي انا ؟اه ؟ علاش ستراس ومشاكل مركبها في مخي ؟ مانحب يشوفك حد غيري انا اي حد يغزرلك نشعل . .ماعادش نكنترولي روحي !!! تحبني نهبل عقاب عمري من جرتك ؟ اه ؟ تكلم ؟ وقعد يغزر لردة فعلها ...حسها ذابت ...وجها باش يطرشق بالحمورية ..غزرتلو بحب  - لا ...وتنهدت ...اما ...اما ياسر كابس عليا راهو ؟ انا ماتمتعتش بحياتي ...ماشفت شي من الدنيا وماعشتش كيما اندادي ..لا نمكيج ...لا نقد ..لا نخرج ...كبس وضرب وتهنتيل ...لين دخلت انت في حياتى وقلبتهالي سافيها على عاليها...( وكبستلو على يدو ) ..نحب كيف نبدى معاك ...نلبس بالقدا ....نزين . نحل شعري ..نحس بانوثتي ...ساعات …ساعات كيف نخرج معاك ونشوف النساء كيفاش تغزرلك وبعد ...يغزرولي ...يبداو باش ياكلوك بعينيهم ...وانا معاك مانحس بحتى قيمة 
-شكون قالك ماعندك حتى قيمة ؟ سالها باهت ...يكفي انا كيفاش نغزرلك ...ياخي اش يهمك في النسا اللي يغزرولي ؟ ماعادش نحبك تركز مع حد كان معايا انا ...خاتر اللي يهمك هو انا ...وانا معاك وليك ...وانت معايا ولا ماكش معايا انا مانغزر لحتى وحدة بخلافك ...وما تحلى في عيني حتى وحدة بخلافك !!!يلزمك تحط هذا فيئ مخك الصغير وماتنحيهش ..ماعادش نحب نسمعو الكلام هذا خديجة . ..راك مرتي !!! تعرف اش معنتها مرتي ؟ معنتها شريكة حياتي ...معنتها حبي وروحي وجواجية من داخل (وضحك كيف راها ضحكت ) ايا حمدالله عليك كيف ضحكت !! وطبس باسها من خدها ...وشد الشكال متاع شعرها نحاه وخلاه مسيب وقعد يلعب بيه بصوابعو
-هاني حلليتلك شعرك يالالا !!!مدامك معايا حلو ...وميسالش تحب تعمل شوية ماكياج اعمل كيف تبدى معايا ...تفرهدتش تو؟ 
-والروب ؟ سالتو بلهفة وهي تغزرلو هازة حواجبها  قحرلها ...وصفق بيديه  -زايد كان نحكي للصباح !! وتلفتلها فادد ..لا ...الروب لا ...الروب ...لا 
تعدات عشوية حلوة ...ضحكو برشة وتفرهدو وشاخو بالمشوي الا هي كانت متقلقة من تالة فمها...الكلهم بهتو كيف شافوه ...حياة سالتها باهتة
-اشبيه فمك ؟ وه ؟ ماني خليتك لاباس البارح ؟ طبست راسها ووجها احمار ...اش باش تجاوب؟ شي يحشم ...وزيد لقات توفيق يغزرلها مبهم والراجل تحشم منو وماهيش خارطة عليه ...يمكن هوما يسخايلو اللي هو عمللها حاجة ...اما كيف لقاوهم امورهم هانية بهتو عاللى صارلها...كانك منو هو كان يتبسم وقاعد الاز مامقلقو شي ...كل اللي عملو هز صاحبو ومشاو قعدو بعيد ...وقعدت حياة تسال وتعاود لين جاوبتها باش تموت بالحشمة ....ضحكت لين ماعادش فيها ...
-ز..زعمة مايحكيش لخويا توفيق ؟ نحشم منو انا راجلك!!!
- لا مايحكيش تهنى ههههه .ً.حاجة بينو وبين مرتو مايحكيهاش ....احنا النساء نسالو على العلة وبنت العلة ..الرجال موش كيفنا هههه مايحكيوش على نساهم ..على صاحباتهم يمكن اما على نساهم لا ههه اما ملا محمود ؟ سكت سكت وبعد جابها قد قد ... عداو نهار الاحد في ديزناي لاند ...حوصو بيوسف وتفرهدو ....نهار الاثنين وصلها للفاك ...كانت لابسة روبة طويلة هههههه ( النساء مايقوى عليهم كان ربي ...مرجتو نهارين ليل ونهار واستغلت السلاح الي عندها الكل لين رضخ هههه) كان وجهو مكشبر وهو يغزرلها هابطة 
- عاجبك تو منظرك هكا ؟ مابرد على داك الا ماعملت اللي في مخك ؟ 
- امان حبي (قاتلو بدلال وباستو من خدو ...فمها بدا يبرى ) تي هاي طويلة للكعبة ومافيها حتى فصالة ...والله والله تفرهدني ...كرشي بدات تكبر وبديت نتقلق ...
- باهي باهي ..قص عليها باش تزيد تكسرلي راسي تو ؟ يزي مازنيت علي راسي النهارين هاذم !!!
- ربي يخليك ليا يا ربي ... تلفت يلقى ام شعر اصفر جايتهم كيف راتهم واقفين ..طبس راسو وخدم الكرهبة قالها قبل ما يمشي 
- انشالله تسمع كلامي في هذي ؟ وعمللها براسو لامينة ...لعشية انا نقري ...كيف نجي نحب نلقا كل شي وفا ..اوك ؟  عملتلو براسها اوك وتلفتت تلقاها في وجهها قد قد ...ماكانتش تغزرلها ...كانت تغزر للكرهبة اللي مشات تجري ..
-ياااااا خسارة حبيت نصبح عليه ..!! قعدت تغزرلها باهتة ...الطفلة لا صباح الخير لا شي ...طول دخلت في الموضوع ...
-صباح الخير قالتلها ببرود وقعدت تمشي 
-صباح الخير خدوج ....وخلطت في جرتها ...تعرف نهار الجمعة البنات الكل باش يهبلو ههه (اولهم انت قالت في قلبها)...يابنتي داخو كيف شافوه كيفاش يصيح وهازك بين يديه ....ووقفت تحكيلها وتعبر بيديها ...وكان تشوف الصدمة . .كان تشوف الصدمة وقتلي رجعت وقلتلهم اللي انت مرتو ....ياميمتي يا ميمتي ماعندك ماريت !!! اف !! ماتسكتش هذي ؟ قعدت تحكي تحكي ...ماسكتتش ...وطول ماهي ماشية كانت العينين باش تاكلها .. الكلهم يغزرولها ...االي تتبسم واللي تغزل واللي تحسد ..وه ؟ مافماش راجل يعجب هوني غير محمود ؟ اشبيهم هاذم ؟ قعدت تمشي ولخرى وراها باقي تحكي ...هي بطيعتها ثرثارة ..ماتسكتش ..  عدات الصبحية وهي تتجنب فيها وين تمشي لخرى البقعة تمشي هي عكسها ...وهي لصقت ...عارفة اللي موش على خاطرها !! تحب تتقرب لراجلها وتحكي معاه باش تتفوخر قدام البنات !!! ازح ماتفهها !!! عندو الحق محمود !! ..
-ماقتليش حقا؟ لاباس نهارتها كيف مشيت دايخة ..؟ والله تفجعت على محمود كيف ريت وجهو !! محمود؟؟؟ اشبيها هذي هبلت ( اللعب ولا بعشانا ههه؟) 
-امينة ؟ قالتلها بالشوية . ..سا..سامحني ...اما انا مانجمش نواصل علاقة الصداقة معاك ... قعدت تغزرلها باهتة ...الحمدالله كيف سكتت ..
- علاش خديجة ؟ فما حاجة قلقتك مني ؟ (تتسكبن) 
- لا ..ما فما شي !! انا مانحب نحكي مع حد .. .مح..مود بصراحة مايحبش !!! ( دزتها فيه هو خير ههه) 
-علاش؟
  - والله امور تخصنا احنا الزوز امينة .!!! هذي حاجة بيني وبين راجلي ...نتمنى تفهم وتو سامحني ..  مشات من بحذاها وحست كاينو هم وانزاح على قلبها ..افففف تعدات الصبحية بين القراية والبيفات ...لين جاء الظهر وجاب معاه محمود ...دوبة مادخل للانفي الناس لكل تلفتولها ههه ...كانت قاعدة وحدها في اخر تركينة ...منبوذة هههه ...حتى هذاك البناني ماعاودش كلمها ...وامينة من قبيلة تتشوحر وتغزرلها وتحكي مع البنات ..
وفات الصحبة وبدا التقطيع والترييش .... عيينه دوب مادخل كانت تلوج عليها ...ماراهاش ...واحد من الطلبة فرنسي ..ظاهر بليد قالو 
- اهيكة مسيو !!! ووراهالو بصبعو  الكلهم ضحكو ...وبداو يهيجو ...ضحك وطبس راسو . ..عينيه كانت فاضحتو ...الحب فيهم كان يتشاف من بعيد ..حك شعرو ولحيتو وهز راسو غزرلها ...كان وجهها احمر بالحشمة ...قاعدة وحدها .. مسكينة هاربة من المشاكل طلع بالشوية ...وهي ولا قلبها يدق ...تقول اول مرة تشوفو ...اول مرة تغزر في عينيه ..وقف بحذاها ...تبسم ..شدها من ايدها وبدا يهبط فيها ..وهي تغزرلو باهتة ...ماكانش مركز مع الطلبة ...اما هوما مركزين معاه ...يسمع في التزفير بالشوية ...هبط شاددها وقف بحذا الصبورة...غزر للطلبة متاعو بعد غزرلها بكل الحنية اللي في عينيه ...كانت مربوثة حاشمة ..في عينيها سؤالات علاش جابها بحذاه؟ كبسلها على يدها وتبسم
- بونجور يا جماعة ....يمكن ..يمكن التعارف الاول ماكانش باهي بييناتنا ...بالنسبة للطلبة متاعي القدم يعرفوني ...بالنسبة للجدد مرحبا بيهم ...نحب نعرفكم الكل على مرتي ...وغزرلها يضحك وهي ترعش وتغزرلو اش باش يقول ( تعرفو مغروم بالسبكتاكل ههه) ماصارتليش الفرصة باش نعرفكم بيها المرة اللي فاتت ... كانو ساكتين يستناو باش يكمل 
-بالنسبة للي اعجبو بيها نحب نقلهم اللي هي غير متاحة ...وغزر لواءل اللي كلمها المرة لخرى ...يمكن اول مرة تدخلو في حياتي الشخصية ...اما هذي المرا اللي نحبها نغير عليها ...وكاي راجل شرقي ما يحبش مرتو يكلمها رجل اخر ...يحبها ليه هو برك...لذا سامحوني كان طولت عليكم ...اما اللي صار نهار الجمعة مانحبوش يتعاود ...مرتي ملزومة مني انا ...وماذبيكم تغزرولها باحترام ...وتحسبوها اخت ليكم...ومرسي كيف سمعتوني ...وضحك هبلت في مخها وهي تسمع فيه ... بعمرها لا حبت ولا باش تحب انسان قد ما حبت محمود ...بعيوبو بالعصب متاعو ...بصياحو بعياطو ...بعنادو ..بحنيتو ...بروحو الخفيفة ...بقوة حبو ليها ..بخوفو عليها ...راجلها...بو اولادها ...قداش فخورة انها مرتو!!!! تعرف روحها محسودة من برشة نساء وبنات ...خاتر الحب اللي يحبهولها محمود ممكن مايلقاوه كان في الكتب..يحلمو بيه حياتهم كاملة ..ممكن مايعيشوهش جملة ..اما هي عاشتوو حستو ...موش حلمة . محمود في حياتها حقيقة ...حبهم اقوى دليل ...باش يعيشو مشاكل كيما اي كوبل ....باش يشوفو مصاعب ...باش يتعاركو ....ويتسامحو ...اما حبهم ...ولادهم ...باش يقوي علاقتهم ... تنهدت ...غزرت للطلبة اللي كانو يضحكولهم ...فيهم اللي غاير وفيهم اللي فرحان ... ماكانش يهمها في هذا الكل ...اللي يهمها هو اللي واقف قدامها ...اللي شادلها ايدها وما سيبهاش ...
- نحبك ...قاتلو بالشوية ...نحبك برشة . ...
-كان تشوف انا ؟ وتبسملها ...حطت راسها في حضنو وعنقتو ...غمضت عينيها وماهمهاش الي يشوفو فيها ...حضنو هو اللي يحسسها بالامان ...يحسسها بالراحة ...ينزع منها الخوف ...حضنو هو الي يعطيها القوة . ...هو اللي يفرحها...حضنو ....وااااه من حضنو ...قداش مدفاه!!! .

انشالله عجبتكم الحلقة الاخيرة وتكون كيما حبيتوها ...اعطيوني انطباعاتكم على القصة خاتر تو باش نخرجو من قصة محمود وخديجة ونخليوهم يعيشو حيااتهم💕💕❤😘🍯

✴✴✴✴
حبايبي.. تحبواا نزيدكم كرونيك اخرى.. ولا نخليكم تتلهاو.. في قضياات القراياا.. و اعطيوني اقتراحات ..ولا اسامي كرونيكات تحبواا نحطهملكم ..
ن

حبببببكممممم❤❤😘😘🍯🍯🌻💃💕💕