👑زواج تقليدي👑

👑الحلقة الثامنة والثلاثون...👑

👑👑

   قعد مخها يهز ويجيب ثنية كاملة وهوما ماشيين للطبيب .. وهو ساكت ..ماتكلم حتى كلمة ..ثنية كاملة مطفيها ..شعل سيقارو وحل الشباك يتكيف وينفخ البرا... خذالها مقرونة بولونياز وقعد يعس عليها حتى لين كملت صحنها الكل ههه...وزيد باقي يتشوحر ماعاجبو شي .. السخطة هذا ماصعب غشو .. خيارو شي رايض ..تبربشو شوية عينيه تظلام وماعاد يفهم شي ... تنهدت وقعدت تحك في يديها على بعضهم وتغزر من الشباك ..تحس في بدنها الكل مهسهس وتاعب .البارح ليلة كاملة مارقدتش وزيد الغش متاع اليوم ماخلاو فيها حتى عظم صحيح ..وزيد اش يسنتى فيها اليوم ؟ هاو يتحلف ويعاود .. ربي يستر واكهو ..سلمت أمرها لربي ..محمود مايغلبو حد ..عنايدي وكيف يحط حاجة في مخو مايبدلو فكرتو حد ... وصلو للكابيني متاع الطبيب هبط وقعد يستنى فيها .. هبطت وراه ودخلو مع بعضهم ...دوبة مادخلت تلقى حياة قاعدة تستنى فيهم ... فرحت كايني درا شرات ..مشاتلها تجري تبوس فيها...وهو حط يديه في مكتوبو وعقد حواجبو قعد يغزرلهم 
-et voila !! المحامية متاعها جات .... هاك ريتها ؟ لاباس عليها مانقص منها شي ..مانكلش انا راهو 
- دا على لونك ( وقامت تضحك وقعدت هي وياها ) عارفتك موش باش تاكلها ..اما انا مانحبش نفلت الايكو ..حتى عندي باي فيه البيبي اللي جاي في الثنية ههه .. وبالأخص كاني طفلة .. عاماتلها بروقرام هايل ههه  وغزرت لخديجة شدتها من ايدها وهي مكبشة فيها كيف البقة ووشوشتلها  -سافا ؟ اشبيك بكلك ترعش ؟ عملك حاجة المجنون ؟  عملتلها براسها لا وهوقاعد يغزرلهم ..مركز معاهم ..واقف من بعيد مكتف يديه ومتكي على الحيط ..الكابيني كان فيها نسا حبالة وكل واحدة معاها راجلها شاددها من ايدها وقاعد كان هي ....شادة يد حياة ..
- ماعملي شي .. هاو يتهدد من قبيلة ..وزيد الكشان والعياط والصياح من الصباح ... والخزانة الكل فرغهالي ..وباقي مابردش قلبو ..
- شنوة الخزانة فرغهالك ؟ 
- قعدت تحكيلها عاللي صار الكل وحياة شادة روحها عالضحك بالسيف وتغزرلو وهو هاز حواجبو وعاقدها ...تحسو واقف بالسيف عليه وفادد .. زادو شوية وعيطتتلهم السكريتيرة ..دخلت معاهم حياة .هي أصلا الطبيب متاعها هي اللي هزتها ليه وزيد تونسي ليه برشة في فرنسا ..دوبة ماراهم فرح بيهم ...يفرح برشة كيف يرا توانسة ..يشم عليهم ريحة البلاد وزيد بيناتهم عشرة طويلة مع بعضهم ..
- اهلا اهلا ... قالهم الدكتور منير ... وقعد يسلم على محمود ..ياولدي وينك ليك وحشة ..الواحد معادش يراك جملة ههه .. غبرت جملة ..
- والله الوقت هاك تشوف ...نهار الكل نجريو ومش خالطين ههه
- أي عندك الحق حتى انت تبارك الله رئيس مدير عام واستاذ جامعي ..معادش فاضي جملة ههه ..وتلفت لخديجة سلم عليها وضحكلها ...مرحبا بيك مادام ..تحب تعرف السكس متاع البيبي ؟ ههه أيا اطلع اطلع .. وطلعها وبدا يحط في الجال على كرشها ويصور في البيبي والانظار الكل متجهة للايكرون وهو يمشي ويجي ومحمود حس برعشة في قلبو وولا يدق بالقوي ..كاينو يستنى في نتيجة تعادل نتيجة الباك .... إحساس مايتوصفش وهو يرا في ولدو ولا بنتو قاعد يتحرك في كرشها ..يسمع في دقات قلبو ... كان باش يحرم روحو من اللحظة هاذي ...جاب ربي جاء معاها باش يشوفو ....غزرلها يلقاها مركزة مع الطبيب ..عينيها واسعة ..حلاوتها تفوق الوصف ...حياة كانت شادتلها يدها وكابسة عليها وتتبسملها كايني اطمن فيها ...قربلها غزر لحياة وعمللها براسو باش تبعد ووقف بحذاها هو شدها من ايدها وطلعها حطها فوق قلبو ..تلفتتلو وقعدت تغزرلو باهتة ..تبسملها ..شاف وجهها كيفاش احمار كايني ماهيش مصدقة ..اما هو في اللحظة هذي نسا كل شي ... نسا المشاكل والعرك والعصب اللي ركبتهولو نهار كامل ...اللحظات هذي كانت خاصة ..خاصة بيها وبيه هو برك ... يحب يشوف عينيها وقتلي يقولها الطبيب على نوع الساكس ..يحب يشاركها الفرحة ..فرحتهم وحدهم ... كمل الطبيب وغزرلهم وهو يتبسم 
-ايامبروك ..جايتكم بنوتة في الثنية .. حياة ولات تنقز من الفرحة ...وهي ...ماللي شدلها ايدها وهي حاسة روحها في عالم اخر ..غزرتلو تشوف في ردة فعلو ...ضحكلها وشدها من كتافها ...قعدها وعنقها ...قعد يعنق فيها وهي الدموع ماحستش بيها كيفاش هبطت .. من فرحتها بسمعان خبر الطبيب ولا من تعنيقة محمود ليها .. محلا حضنو ومدفاه .. غرست راسها في كرشو ونسات كل شي .. كيف الطفل الصغير اللي يلوج على حضن بوه ..هي كانت تلوج على حضنو .. تلوج على حنيتو .. على ريحتو ...على دفا حضنو .
- مبروك علينا ..قاللها بالشوية ... وهو مطبس راسو بحذا وذنيها ... انشالله ماتطلعش راسها صحيح كيف أمها وتخرجني من ترف العقل الي بقالي معاك ههه
- انا راسي صحيح ؟ وهزت راسها تغزرلو كيف الطفلة الصغيرة وعينيها تلمع بالدموع وفيهم برشا لوم ..  هبل ...عينيه باش ياكلوها ..قعد يغزرلها ..موش عارف اش باش يعمل معاها ....يهبط راسو يبوسها ولا يشد روحو قدام الطبيب وحياة ... تنفس بالقوي وزاد شدلها راسها عنقها ... قام الطبيب يضحك وغزر لحياة وبعد غزرلهم  - أيا سي محمود خاللي نعديو على المدام ..ههه تنجم تسيبهانها دقيقة ؟هههه وغمزو  حياة قامت تضحك وهي وجهها احمار من الحشمة وعاودت غطست راسها ...تبسم وبعد عليها شوية ..اما قعد شادلها يديها ...عدى عليها الطبيب وهو شايخ عليها ..
- يلزمك تاكل مدام خديجة ... ودمك طايح شوية ..تلهى شوية بصحتك وبالبنوتة .... وغزر لمحمود أيا سي محمود مانوصيكش عليها ... تلها بيها ..العمدة عليك انت تو ...  - تهنى دكتور منير...وتلفتلها يتبسم  بعد ماكملو من عند الطبيب ..ركبها في الكرهبة ..وحياة تضحك مشات طلت عليها من الشباك 
- يالفعة بعتني فيسع ههه؟ موش قبيلة كنت لاصقة فيا ؟ دوبة ماعنقك سايي رجعتلو تجري ؟ ههه اما زايد !! حشمت وطبست راسها وغزرتلو .. مهما يعمل فيها ما تنجم كان تسامحو ...  - اش توتوت يا حياة غادي؟ سالها محمود وجاء وقف بحذاها ...شدتو حياة من يدو وبعدتو شوية وقعدت تحكي معاه 
- على شنوة ناوي تو ؟ 
- باش نروح لداري نرتاح ؟ عندك مانع الا حياة ؟ قالها بتمقعير 
- باهي هاك سمعت الطبيب اش قال ؟ بربي يا محمود برحمة طاطا ناجية لا تزيد تغششها ..الطفلة قبيلة دخلت ترعش كيف الفروج وخايفة ...سخفتني والله 
- يا بنتي اش عندي نعمللها ؟ ياخي باش تخاف عليها اكثر مني ؟ غزلتني الصباح وركبتلي العصب ..وتعرفني انا مربط معاها ومانفهم شي وهي اليوم ظهرلها باش تعمل الحاجات اللي انا نكرههم الكل ..لمتهم مع بعضهم وسطعتني بيهم فرد نهار ..وزادت ختمتها في الفاك عاد ...( وهز شعل سيقارو وغزرلها وهي قاعدة في الكرسي متكية على البلار ) ..
- تلها بيها انت شوية راك مهملها قداش ليك ..ماعندها حد هوني غيرك ..انت اللي تتكى عليه وانت السند متاعها ..تحبك الطفلة باش تهبل عليك ..ماتستغلش حبها باش تكسرلها خاطرها ...
- تعرفني حياة متاع هذا انا ؟ ( ونفخ سيقاروه وتنهد )..نحبها حتى انا ..نفسيتي تعبت وانت تعرف علاش؟ وتعرفني كيف نتعب مانحب نكلم حد وماندور بحد ..
- أي هذاك وقتلي كنت وحدك !!اما انت عندك شكون معاك يلزمك تقرالو حسابو زادة ...هي شنية ذنبها في هذا الكل ..؟ هي تحب راجلها يبدا معاها ..وخاصة تو في حبالتها مستحقتلك برشة ...( وشدتو من كتفو ) عيش خويا وسع بالك معاها ...حاول تفهمها ... عندها الحق تخاف منك ..ياخي نسيت الطريحة اللي عطيتهالها ..نسيت ؟ واليوم الصباح تتهدد عليها باش تضربها زادة ؟ 
- وماضربتهاش ..قص عليها ..ومانيش باش نضربها ..(وشد يديه بعصب) ... اما كيما تحكي معايا انا تو ..احكي معاها هي زادة ... باش ماتستفزنيش وماتعملش حاجات انا مانحبهمش وحديث مع ولاد ممنوع زادة منعا باتا ...وهز يدو كاينو ينبه 
- باهي باهي ..ماصح اك الراس ..تو نزيد نحكي معاها .. المهم سايس عليها انت برك !!!
- ماتسفزنيش تعيش احسن عيشة معايا ...تعارضني وتصعصع ..ماتشوف كان الخايب اللي فيا .. الحاصل ..كيما وصيتك ..بره روح بيوسف ..وبيتو عندك كيما قتلك .. خاليني انا معاها اليوم وحدنا .. نكسرو روس بعضنا وتو نخرجو بنتيجة .... وضحك ..  قعدو ثنية كاملة ساكتين .. كانت تسخايلو باش يرجع يحكي معاها بعد اللي عملو في الكابيني متاع الطبيب ..ياخي رجع سكت 
- باش نروحو بيوسف ؟
- لا قالها بالسياسة وهو يغزر قدامو ..باش تهزو حياة عندها ..وتلفتلها ..باش نقعد راس راس انا وياك الليلة وضحك  بدنها وقلبها ولاو يرعشو ..حست بفوارة كبيرة خارجة من بدنها ... موش عارفة هذي حاجة تفرحها ولا تخوفها ؟ 
- نشريلك قلاص ؟ سالها بالشوية .. - ماعينيش .. قاتلو بالشوية  عض على شفايفو وتبسملها وعينيه لمعت 
- انا عيني ... نتعداو نشريو قلاص ونروحو .. وتعدى للحانوت متاع القلاص وضحك وفي مخو برشة أفكار....ههههه

✴✴✴✴