👑زواج تقليدي👑

👑حلقة السابعة والثلاثون...👑

👑👑

   قعد يغزرلها وهي تاكل في القلاص بلهفة ...تبسم وحدو ..مسحت فمها كيف الطفل الصغير وغاطسة فيه تقول عمرها ماكلات قلاص ...مازال قلبو مغلل عليها ... مازال مابردش ...اللي عملتو الصباح ماهوش ساهل باش يخرج من مخو ... والطفل اللي حط عليها يدو مازال وجهو وغزرتو ليها محفورة في عينيه .. وفي قلبو اللي تعبى بالغيرة ...ماينجمش يسامحها ماينجمش ...خديجة اللي شافها الصباح ماعادش يحب يشوفها ...حس بالنفس ضياق عليه وبفوارة في بدنو وهو يتخيل في نظرة الرجال ليها ... اذا كان هو راجلها اللي يشوف فيها كل يوم قدامو واثارتو بلبستها هذي مالا كيفاش حال الرجال لخرين ؟ عاود غزرلها يلقاها مطبسة راسها وشعرها هابط على جنب مغطيلها شطر راسها ....ملي قعدت وهي لابدة فرد بقعة ماتحركتش ..عارفة روحها عاملة عملة ..ههه كيف الطفل الصغير اللي يبدى خايف من بوه ...اما هي موش صغيرة ..هي مرا ...انثى مثيرة ...تنجم تخرج أي راجل من عقلو ...ضرب الفولون بالشوية ...وغمض عينيه ...هزت راسها وغزرتلو باهتة ...تنهد بالشوية وهو يشوف في القلاص دايرعلى فمها ...حس ببدنو تقشعر وباثارة كبيرة ..كان يتمنى يهبط على هاك القلاص يلحسهولها بلسانو ...يشدلها راسها بين يديه ويشبع فيها بوس ...كان يحب اكثر من هكة ...اكثر واكثر واكثر ....حاس روحو باش يهبل ...مخو باش يطرشق ... من شيرة يتحلف فيها علي عملتو ومن شيرة يحب ينسى كل شي ويحطها في حضنو ويطفي النار اللي شاعلة فيه بحلاوة بدنها .....كبس على الفولون بيديه ....ودور وجهو باش ما يزيدش يضعف ....
- كملت ؟ قالها بصوت بارد موش عارف كيفاش خرج مع انو من داخل لاهب 
- اممم ...
- تحب نزيدك ؟ 
- لا... قاتلو بالشوية شبعت يعيشك
  - ماكش شاهية حاجة أخرى ؟ 
- لا قاتلو براسها ..وباقي تلعب بصوابع يديها فوق حجرها ...ومطبسة راسها ... ماصدق لربي وصلو للدار ...سكر الكرهبة وتلفتلها سإلها 
-وقتاش رونديفو متاع الطبيب ؟  غزرتلو باهتة من سآلو مازال القلاص داير بفمها ومازال يحب يلحسو ...افففف المرا هذي باش تهبلو !!.. ربي يرحمك ياناجية على هالبلوة اللي جبتهالي ..طبس راسو وهز بابي من الكرهبة وحطهولها في يدها 
-امسح فمك .. شدتو وبدات تمسح بالشوية وهو باش ياكلها بعينيه ...على قد ماركبو العصب منها على قد ماهو شاهيها تو ...فماش تناقض اكثر من هكة ؟  وقتاش الرونديفو قتلك ؟ 
- ماذيثلاثة ...باش تجيني حياة تمشي معايا ..قاتلو بالشوية وهي التبع فيه داخلين للدار .. - لا تو نمشي معاك انا ..تو نكلمها حياة من غير ماتجي  حل الدار يلقاها نظيفة ومنظمة تلفتلها يسال فيها بعينيه 
-حياة جابت المرا اللي تخدم عندها في الدار .
- اممم
خلاها واقفة وسط الصالة ومشا لبيروه يشوف فيه ..حست روحها تحب تضحك ..حطت ايدها على فمها وشدت روحها على الضحك ...حتى هو بيروه مايتشافش الصباح ..هذاكة علاش تصدم وطلعلها يجري ..ماخلات فيه حتى حاجة مارماتهاش في القاعة ...طل عليه وبعد رجع قحرلها ومشا للكوجينة وهي باقي واقفة تغزرلو وتبع فيه ..طل عليها من باب الكوجينة وقالها
-برا نحي المسخرة اللي لابستها وبدل حاجة أخرى خلى نخرجو نفطرو البرا وبعد نمشيو للطبيب ..
-و..وحياة ؟ سالتو وهي من داخل باش تموت بالفرحة ..ههه على الأقل وصلت عملت حاجة ..باش تخليه يمشي معاها بالسيف عليه ههه -
ماهو قلنا تو نكلمها ..برا نحي الجرود اللي لابستهم هاني جاي .وعاود دخل للكوجينة درا فاش يبربش .. طلعت وتحس في روحها طايرة بالفرحة .. قد ماسطكلها وعطاها على راسها تحبو تحبو تحبو ..تكذب كيف تقول تكرهو تكذب .... نحات الروبة ولبست سروال واسع شوية مفرهد وبودي اخضر... قعدت فوق الفرش تلبس في سباطها وهو دخل ...عينيها وساعت وهي تغزرلو ...كان هاز في يدو ساشي كحلة كبيرة ومن غير مايغزرلها مشا حل الخزانة وبدا يبربش فيها .. -فاش تعمل ؟ سالتو باهتة 
-فاش نعمل ؟ وبدا يجبد في الروب اللي موجودة لكل على بعضو ويحط في الساشي ...هاك تشوف فاش نعمل !! ...وغزرلها وجبينو معقود ...ورجع يبربش ويجبد ...هاو تو نرزيك فيهم انا الروب الي باش تقعد كل مرة تهددني بيهم ...باش نقعد انا كل مرة راكبني لعصب جرتك ..هاتو نحيهم فرد المرة ونرتاحو .. قعدت تغزرلو مصدومة ..فمها محلول ..موش مستوعبة من الأول ...الخزانة الكل محسوب حطها في هاك الساشي الكحلة ...مشاتلو تجري وقفت قدامو ..شدتو من يدو توقف فيه 
-يامحمود بجاه ربي لا ..امان ..موش لكلهم قصار ...فما برشة طوال امان ..
- لا طوال لاقصار ..جد والدين روبة ماعادش تحطها على لحمك ..وغزرلها عينيه تقدح من العصب ..ماك تصحح في راسك معايا ؟ تو تشوف صحة الراس وين توصلك ؟ باش منو هكة كيف نقلك على حاجة لا تسمع لكلام وفمك ساكت ..وتلفت شيرة الفرش يلقى الروبة لحمرا اللي نحاتها ..زاد حطها معاهم وسكر على الساشي وهزها وخرج .. 
-وين تحب نمشيو نفطرو ؟ سالها وهوما في الكرهبة ...كان العصب يهز فيها ويحط ... وين تشوف معاه ترف ضو ..يسكرو ..ماخلالها حتى شي في الخزانة كل شي هزو ...وزيد يتشوحر عليها من الفوق .. 
-ماعينيش .. قاتلو بغزول وصدرها يتهز ويتحط 
- لا باش تاكل . ...قالها بالشوية
  - شنوة ؟ قاتلو بعصب ..حتى الماكلة باش تغصبها عليا بالسيف .. (وبدات تصيح ) ما عينيش ..ماعينيش ..مانيش ماكلة نحب نموت ...نموت ونرتاح من وجهك ..
- شوف تصيح تعيط ..تطلع لربي ..كلامي هو اللي يمشي ..مفهوم ؟ ..مالا تسخايل باش نعديهولك بالساهل اللي صار ؟ انا المنظر متاع الطفل وهو يغزرلك وكيفاش شدك مازلت مانسيتوش راهو ؟ مازال مابين عينيا ... ولبست *** اللي لبستها باش تخلص عليها حق العصب والمشاكل اللي عملتهوملي الكل.. وكان مازلت ماكش واعية باللي عملتو ..تو نوعيك ..ونوعيك بالقدا زادة ( ووقف الكرهبة ).. وتو اهبط باش نفطرو ونمشيو للطبيب .. هبطت تحس في روحها مخنوقة ..كان يمشي قدامها ساكت ..هادي ..كاينو ماكانش يعيط ويصيح في الكرهبة تو ..وهي العصب يخض في بدنها الكل ..بالعمل تعثرت ...تلفت شدها من يدها باش ما تطيحش ..وقعد شاددها ..لين قعدو على الطاولة ... طلب الماكلة من غير حتى مايشاورها ...قعدت تغزرلو بغزول ...و..ووو ..بحب ... وتنهدت ...حطت ايدها على خدها واتكات على الطاولة ... موش عارفة شنوة اللي صارلها ؟ موش عارفة التناقض اللي فيها ؟ باش يخرجها من عقلها بصياحو وبعياطو ..اما تحبو ..تحبو ..كيف شدها من ايدها حست بحنيتو وحست بالأمان ... قص على افكارها صوت التليفون متاعو ..راتو يغزر للنومرو وبعد هزو
- وي توفيق فما حاجة ؟ 
- ....
- لا تو نهزها انا ..قلها تعمل مزية تمشي تروح بيوسف تو نكلم انا الروضة متاعو نقلهم الي هي جايتو ..وبيتوه بحذاكم اليوم ..تو غدوة نروح بيه .. هي تسمع فيه يقلو بيتوه بحذاكم وقلبها ولا يرعش ...خافت ...على اقل قدام يوسف ماينجمش يكلمها ولا يصيح عليها ..اما هو مادام قالو هكاكة معنتها ناوي على حاجة ...ركايبها ترخفو من الفجعة وقعدت تغزرلو وتاكل في ضوافرها بتوتر..
- شوف عيش خوية ماتتدخلش لا انت لا مرتك اموري هذي ..ندخل فيكم انا وفي حياتكم ..خليني نتصرف ..وغزرلها بغزول وهي باش تموت بالفجعة .. قول للمحامية متاعها تسكت من غير ماتدافع عليها .. خاتر اللي عملتو مايتعداش بالساهل ... نعدي برشة حاجات اما هاذي لا .. قعد يحكي وهي دخلت في سينة أخرى .. ماعاد تسمع في شي ..على شنوة ناوي زعمة محمود الليلة ؟

✴✴✴✴