👑زواج تقليدي👑

👑الحلقة الثانية والثلاثون...👑

👑👑

مشات غسلت وجهها ومسحتو بالمنشفة وهو باقي يغزرلها يثبت في حوايجها ....يمكن اليوم اول نهار من ثلاثة شهر يثبت فيها ويغزرلها ...موش عارفة تفرح ولا تحزن ...اول ماحكى بدى بالكشان ...كانت لابسة ساليبات دجين ...وبودي في الازرق تحتها وسبادري شعرها خلاتو محلول هابط لخصرها ...كرشها بدات تدور شويا ...في الرابع وداخلة للخامس ...ماحبتش تعاكسو ولا تعمل معاه مشكلة وهو خلاقو في وذنو...حست وجهها اصفر حبت تعمل شوية ماكياج ....كيف هو ماحبش موش لازم منو ...المهم عندها هو .. بعد ماثبت مليح فيها ...كتف يديه ووقف قدامها ...شمت ريحتو ....قداش توحشتو؟ توحشت تعنيقتو ..توحشت بدنو...توحشت الفرش معاه ...مازالت ماتمتعتش بيه وكل مرة تجي حاجة تبعدهم على بعضهم ...شنية ذنبها هي ؟ علاش يعاقب فيها ويعاقب في روحو؟ امو ماتت الله يرحمها !!! حتى هي حست عليها ربي يعلم قداش؟ كانت تحبها وحاسبتها كيف امها ...هي اللي دافعت عليها وجات ضد ولدها على خاترها ....حتى ليلتها حبت تروح لكن هو اللي شد صحيح باش يقعدو غادي ....وتو هي اللي قاعدة تتحمل في نتيجة احساسو هو بالذنب ... هزت راسها جات عينيها في عينيه ...حستهم تاعبين حبت تهز يديها وتحطلو راسو بيناتهم وتعنقو ...ترتحو ...تفرهدو ..تنسيه في همو ...لكن هو كان بعيد ..عينيه تغزر لكن المخ سارح ...اههههه ..!!! راني توحشتو توحشتو توحشتو...توحشت راجلي ...نحبو يرجعلي ...يرجع لحضني ... حستو يبلع في ريقو وهو يغزرلها...غمض عينيه وهز يديه عداههم على وجهو وبعد على شعرو ولحيتو ...بعد ...مشا بحذا الباب حلو ..وعاود تلفتلها
-شعرك زادة لمو ....
-ياخي محمود .....هز يدو قص عليها الحديث 
-ماتناقشنيش ....مانيش ناقصك انا ...الي فيا مكفيني ...!!! اسمع الكلام واهبط معادش بكري .. هو خرج وهي هزت الخلاص وقعدت تمشط فيه بغزول وعصب ولمتو كعكة وخرجت وراه ....يعني سكت سكت مايكلمهاش وقتلي كلمها ..رجع لتحكماتو .اففففففف!! وصلو يوسف للروضة ...هبطت باستو تفقدت كرتابتو ...باسها وغزر لبوه قالو
  - بون ذور ....تلفتلو ضحكلو قالو  - بون جور عيش ولدي الباهي وكملو الثنية ساكتين ....اول نهار باش تمشي للفاك ...محمود حب يعمللها مفاجاة هاك الجمعتين اللي قعدتهم في تونس وحدها بعد هاك العركة المشومة ...مشا هو اتصل بالجامعة متاعها بعثولو اراقها وقيدها هو هنا باش تكمل قرايتها ....حب يفرحها ...ياخي بعد اللي صار قاللها على الموضوع كايني حاجة عادية هي فرحت وقعدت تعنق فيه وتبوس فيه موش مصدقة ...اخيرا باش تحقق حلمها انها تكون مهندسة ...حتى ولو انو ماتجاوبش معاها في فرحتها ...ماعنقهاش وماباسهاش ....اما هي فرحت  وزادت حبتو اكثر وزاد كبر في عينها اكثر واكثر وقف قدام بنية كبيرة في بقعة راقية برشة ...بون هي تعرفها خاتر هزها ليها قبل باش تعرف البقعة وتستانس بيها ...عجبتها برشة الفاك ..وتالمون فرحانة ماهيش مصدقة ..كانت تضحك من عينيها ...تلفتتلو وهو يد في الفولون ويد يشعل بيها في سيقارو
-ماكش هابط معايا؟ 
- لا عندي اجتماع الصباح ديجا وخرت ...برى تو نهار اخر نهبط معاك انشالله ... مانجمتش تقاوم انها تبوسو من خدو ...غرست شفايفها في خدو وغمضت عينيها تطعم في البوسة ...حستو جمد في بقعتو ...رما السيقارو من الشباك تلفتلها ...في لحظة حطلها راسها بين يديه وهبط راسو وحط شفايفو فوق شفايفها ...كلالها شفايفها بالبوس هبط على رقبتها يبوس يبوس يبوس ...لين دوخها...حست بالسخانة طلعتلها في بدنها الكل ....سلمت لاحساسها ...محمود كان يبوس بلهفة وشوق كبير هبلها ...كان يتنفس بالقوي ...تسمع في انفاسو في وذنها ....عنقتو بالقوي ...بدنها الكل تكهرب وزادت قربتلو ...ماتعرفش قداش قعدو هكاكة ...لحظات ...دقايق...ماكنتش حاسة بالدنيا ...كانت بين يديه ..رجعتلها روحها من جديد وهي بين يديه ...حست بصوابعو تحللها في شعرها ...غطس راسو فيه وتنهد ...حست بدقات قلبو القوية في صدرها ....مازال يحبها ..مزال حشتو بيها ..مازال يحنلها ..هزت يديها كبست على راسو لزتو ليها .... محمود ....كانت تتكلم بالسيف الرغبة القوبة اللي حاستها اتجاهو باش تخنقها ....كان مغطس راسو بين رقبتها وشعرها وساكت ....تنهدت بالشوية وزادت كلمتو
- محم..محمود توحشتك ...توحشتك...باستو من وذنو ورجعت عنقتو ....توحشت ريحتك يا روحي ...توحشتك ....ماكانتش تنجم تعبر عاللي حاستو في اللحظة هذيكة غير كلمة توحشتك...الامان هو حضنو والدنيا هي حضنو ...عالمها الكل في حضنو ....تحب تقعد في حضنو وتنسى كل شي .بعد شوية ...غزرها بهاك العينين المزغللة والتاعبة ....كانت حاسة فيهم الرغبة والحب ...كانت حاستو يقاوم ...يقاوم في احساسو بالذنب من ناحية وفي رغبتو وحبو ليها من ناحية اخرى ...عدات صوابعها على خدو ولحيتو وتبسمتلو بكل حنية ....تنفس بالقوي ودور وجهو ....حط راسو فوق الفلون وقعد ساكت ومطبس راسو ...قعدت مكبشة في اللحظة اللي عاطاتها الامل ...زادت عدات صوابعها على شعرو .... -محمود؟....محمود نحبك ...نحبك ...امان احكي معايا !! ..شنوة ذنبي انا ...؟؟ محمود ؟  كايني الكلمة هذيكة فيقتو على روحو ...هز راسو وغزرلها ....وفي عينيه رجع محمود الجديد اللي ماتعرفوش ... 
- اهبط ماعادش بكري عليا خديجة ! عنا دار نحكيو فيها في المواضيع هذي !!! موش وقتو ... رجع كلامو الجامد ....في لحظة رجعلها محمود القديم في لحظة فقدتو ....طبست راسها وجات هابطة ...حلت الباب وهو جبدها من ايدها وهي تلفتت ملهوفة  -شد لم شعرك ...ماني قتلك ماتحلوش كان كيف تبدى معايا ...وعطاها الشكال اللي نحاهولها هو ...ياربي باش يجلطني !! بعد اللي صار الكل ومازال يخمم في شعرها ملموم ولا محلول ؟  عدات النهار لول في الفاك تتعرف على الطلبة والاساتذة ....كانو فما برشة طلبة عرب مغاربة ودزيرية وتوانسة وفلسطينيين ..وعرب اخرين ...حست براحة ومتعة في الجو اللي لقاتو ...الاساتذة كانو فرنسين معضمهم ...قالو فما واحد عربي يقري فيهم اما ماجاش اول نهار ...والمشكلة انو البنات الكل قاعدة تستنى فيه هههه...تسمع فيهم يحكيو عليه بانبهار ...ظاهرين الكل مضروبين فيه ويحبوه وظاهر اللي هو فارض احترامو على الطلبة الكل لدرجة انهم شوقوها باش تتعرف عليه .... قابلت طفلة اسمها امينة غادي ....تونسية من نابل ...حتى هي معرسة ليها ثلاثة سنين ..راجلها يخدم في شركة بين تونس وفرنسا وهي تكمل في قرايتها عجبتها طبيعتها كانت شهلولة وضحاكة ...ارتاحتلها برشة ...محسوب الوقت الكل عداوه مع بعضهم ...قعدت تحكيلها على الجامعة والاساتذة ...كانت الكل تعرفهم خاتر عندها ثلاث سنين تقرى هوني .. وقعدت تحكيلها على الاستاذ البوقوس اللي مضروبين فيه بنات الفاك الكل....
-ههههه ...يابنتي هبلنا والله هبلنا ...تي انا نحب راجلي رامي وماخذتو عن حب ووين نراه عينيا تولي لكلها نجوم ههههه
- مانضنش كان باش يجي احلى من محمود قالت في قلبها ....تنهدت مالا كان يشوفو اللي عندي اش يعملو ؟ تعدى الوقت بين الحديث والقراية والضحك وجات العشية.. تليفونها نوقز وهي قاعدة بحذى امينة تستنى في محمود.وهو كلمها
– هاني قدام الفاك اخرج ماعادش بكري على يوسف فيسع ....لمت دبشها فيسع وتلفتت لامينة قالتلها ايا نخليك تو راجلي جاني وزيد باش نروحو بولدنا من الروضة !!!  خزرتلها امينة باهتة ..
  - معرسة ؟ موش باين عليك والله ههه وزيد وجهك مغسول بالماء الصابون ..تي حتى انا مبهمني نهار كامل نحكي على روحي ومسالتكش على روحك جملة ...وخزرت لكرشها انتبهت للنفاخ اللي فيها وضحكت
- ماتقليش زادة حبلة؟
- امممم .كانت تلم في صاكها وتجاوب فيها ....ههههه مازالت الايامات تو نحكيو وقالتلها باي ييدها وخرجت تجري ساقيها اعلى من راسها باش تشوف السخطة الي توحشتو

✴✴✴✴