👑زواج تقليدي👑

👑الحلقة الثلاثون و الواحدة و الثلاثون...👑

👑👑

- مالا اش قتلي شاهية ؟ كان يضحك ويغزرلها بتخوبيث ..عين مغمضة وعين محلولة .... بدا يحل في السورية المحنونة ههه .. دخلت تجري للبيت وقلبها باش ينقز من بقعتو وشدها كريز تاع ضحك ...ماصدق للربي كمل كل شي ...ركب امو في الكرهبة ووصى عليها ولد عمتو باش يباتو بحذاها هي ويوسف ..كان كل شي يعمل فيه بالزربة ..تقول باش تهرب عليه ...اول ما مشاو ..مشا عمل ريزارفاسيون لبيت الوتيل ... شدها من يدها وكبس عليها وطلع يجري بيها ... ملي هوما في اللاسونسور وهو ينحي ههه ... قعدت عالفرش وبدات تنحي في سباطها وباقي تضحك -اش يضحك فيك باللاهي ؟ رما السورية فوق الفرش وقربلها ...قعد بحذاها وشدها من شعرها بالشوية قربها ليه ..حست بانفاسو في وجهها ....غزرلها في عينيها ... وقفت الضحك وقعدت تغزرلو ... بدنها لكل رعش ... كل مايحط ايدو عليها ..تحسها اول مرّة ... نفس الإحساس ...نفس الرغبة ... نفس مشاعر الشوق ... نفس النار الشاعلة ... طبس راسو بالشوية ....وهي غمضت عينيها ..وسرحت معاه في احاسيسها الحلوة ... بدا ينحيلها في الشكاكل من شعرها وساعة ساعة يخطف بوسة من شفايفها ويتبسم ...عدا يديه بكل رقة عليه وبدا يفرت فيه فوق ضهرها ... هزو بين صوابعو وعداه على خشمو ..غمض عينيه يشم فيه وتنهد
-محلا ريحتو ..نعشقو شعرك نعشقو ..نعشق كل خصلة فيه ..كان يوشوش فوق وذنها ويعدي في صوابعو بالشوية على ضهرها ...ذوبها بسخانة انفاسو وسخانة يديه ... ذوبها بشفايفو على رقبتها ...ذوبها بريحة بدنو البنينة ..تنهدت وعنقتو ...لزتو ليها لين بدنو ولا لاصق في بدنها ...عدات صوابعها بالشوية على خصلات شعرو المشبشبة وباستو من خدو بالشوية ... وهبطت لكتفو ..عدات شفايفها على كتفو وعضتو ...عضتو عضة قوية لين توجع ههه
-أي أي أي يا متوحشة ؟ وهزلها راسها يضحك ...ملا سنّين عندك يا معلم ؟
- موش قتلك شاهية نعض كتفك ؟ وماتت بالحشمة غطست راسها في صدرو وهو باقي يضحك.. مس بقعة العضة كانت حمرا وبقعة سنيها ظاهرة .. محلاه التراس اللي خلاتهالو ... كان يلقى يخليه عمرو كامل ..ويوريه لولادو كيف يكبرو .. يقلهم هاي امكم اش تشتهي في الوحم متاعها هههه ...
-ماكش شاهية حاجة أخرى ؟ قالها بالشوية وبصوت فيه برشة اغراء ... شدها من دقنونتها وعدا صوابعو على خدها .. ملمس حرير صوابعو على خدها ... الحنية والحب الكل حستهم فيهم ... شدتلو يدو وحطت شفايفها على كفو باستها وغزرتلو اك الغزرة الحنينة ... اتكات على الفرش بالشوية وجبدتو ليها ...قربلها وعينيه تلمع ...تنهد وحط راسو على كرشها وغمض عينيه ... محلاها الرقدة على كرشها ..حس روحو كيف الطفل الصغير اللي يفركس على الدفاء في حضن امو .. حس بحنيتها ، بامومتها ، بأنوثتها ، بقوتها ، وحس بضعفو قدامها ... وهي تعدي بصوابعها على شعرو بالشوية ...حس بضعفو ..قد مايحس برجوليتو معاها ..قد ما يحس بضعفو .. قوة محبتو ليها ..غيرتو الزايدة عليها ...الجمعتين الي عداهم بعيد عليها وكان يسخايل كل شي وفا بيناتهم ..العذاب اللي حسو وقتها ...روحو اللي يحسها رجعتلو كيف تبدا هي بين يديه ... عمرو ماكان يسخايل في حياتو باش يحب مرا قد ماحبها هي ... عاود تنهد بقوة وهز راسو باسلها كرشها ...وزاد طلع الفوق ..جات عينيه في عينيها المعبية بالمحبة والشوق والرغبة ...
-باش تقعد برشة تغزرلي ؟قاتلو بالشوية وصوتها مليان رعشة
-نحب نقعد نغزرلهم عينيك (وعدى صبعو بالشوية على شوافرها ...طبس راسو بالشوية باسهم)...اممم عينيك يدوخو ....يسحرو...عينيك قتلوني ...كان يشوشلها وانفاسو السخونة هبلتها .. كبستلو على ضهرو وعنقتو وهو ماكانش من العاكسين ...طفالها نارها ونارو وغطسها في عشقو ..وعدالها احلى ليلة في حياتها .... قامت الصباح كيف حست الشمس صاطعة في عينيها ....حلتهم بالسيف وبدات تتكسل بالشوية ....تلفتت تلقاه راقد ..غارس راسو وراء ضهرها ومتلكمت كيف الطفل الصغير ....تبسمت وهي تغزرلو ....كل ليلة معاه تقول هذي احلى ليلة ....وكل ليلة يفاجءها باسلوب احلى وحركات تزيد تذوبها وتقتلها بالرغبة والعشق ...قداش تحبو ...كلمة تحبو شوية وما تعبرش عاللي داخلها ....تموت فيه ...تفنى فيه ...محلاه ياربي محلاه !!!محلاه وهو عاشق ومحلاه هو كي الطفل الصغير راقد بجنبها ....قعدت تغزرلو وتتبسم ...تحفر في وجهو في قلبها ...حستو بدا يتململ باش يقوم ...بدا يحل في عينيه ..كيف راها تبسم ...مازالت عينيه بالنوم ...حك لحيتو
- صباح الخير يا احلى ضحكة في حياتي ...
- صباح الخير..هههه وباستو من خدو ..في بالك تو قريب نص نهار ...باش يجيو يخرجونا من البيت .هههه هز روحو شوية وقعد ...شد تليفونو حلو وشاف الوقت ...كانت عينيها باش تاكلو وهو شعرو منكوش وصدرو عريان وعينيه مازالت بالنوم ....غزرت لبقعة العضة متاع البارح ...تلقى مازال فما شوية حمورية ...ضحكت ....غزرلها..
.- اشبيك ماهو لاباس؟ - تفكرت عضت البارح ههههه
- اي ياميمتي هههه !! طلعت متوحشة قريب باش تنحيلي لحمة !!ههه
- الله غالب موش منى والله !!بنتك لزتني..
قربلها وعنقها بالقوي وهو يضحك
-خوذ راحتك عزيزتي ...اعمل فيا اللي تحب ...البدن متاعك وانت حرة فيه ...عضو ..كولو ...مشمشو ...تحبشي نحطلك فوقو مايوناز باش يجيك بنين ؟ ههههه ضربتو على كتفو بالشوية ووجها حمار
-يزيتشي تو مالبلادة؟ وهزت راسها غزرتلو ..اش باش نعملو تو في الحوايج ؟ انت تنجم تخرج بحوايجك متاع البارح ..اما انا باش نخرج بهاك الروبة ؟
-انا روبة ؟هذيكة القصيرة ؟والله لا صارها ...تو نخرج نشوفلك حاجة من اي بوتيك يعرضني ونجيبهالك تلبسها
- باهي !!وانا جيعانة تو ..وبنتك زادة وشدت كرشها وغزرتلو بدلال ....نحبو ناكلو الزوز !! ضحك وقربلها باسها على شفتها بوسة خفيفة ...وعينيه تلمع..
- تو نهبط نجيبلك فطوركم انت وياها وبعد نمشي نشريلك حوايج !! بعد ساعة كانو قاعدين على تراس ...ويغزرو للبحر ...شرالها سروال دجين وبودي احمر ...حتى من الصباط شرالها ههه يستاهل موش هو اللي بيتها هوني ...يتحمل مالا .....كان لابس سروال متاع البارح والسورية مشمرلها يديها للمرفق ...الطقس كان سخون والنسمة محلاها .. حطت راسها على كتفو وهو دور يديه علاها معنقها ...محسوب الوتيل كان فارغ فيه كعبتين وكعبة ...وفي ماي مفماش برشة توريست ...اما الكعبات النساء  التورييست ولا حتى العرب اللي تتعدى تقعد تغزرلو ...تهز راسها تلقاه ماعلى بالو بحد تتبسم ...الحاجة الباهية في راجلها انو مضروب في روحو برشة ...هههه هي باهية وخايبة ...خاتر عانات منها هي زادة وقتلي كان مايغزرلهاش حتى بشطر عين ...اما كيف يحب ...يعطي كل ماعندو ...زادت دورت يديها عليه باش توري للنساء اللي هو ملكية خاصة ..حتى وحدة ماعندها الحق باش تغزرلو ...
-كلمت امي ناجية ؟ -
امم كلمتها الصباح كيف خرجت...بحذاها جوجمة ونساء ماحكيتش معاها برشة
-وسناء؟
-بربي؟وغزرلها يضحك ..باش نقوم نكلمها زادة هي الصباح ؟ الله اعلم فاش تعمل هي وراجلها ههه
- هههه ...وتفكرت كلام سناء البارح زادت شدتها الضحكة .. هزت راسها وحطت دقنونتها على صدرو
-اما انت ليلة حفالي عملتها البارح !!! عمري ماكنت نتصورها في حياتي ..حسيت روحي انا العروسة موش اختك طبس راسو وضحكلها
- حتى انا عمتلك ليلة عرس على قاعدة ههه .(زاد حشمها وباقي يضحك ويدكك عليها).قعدت جمعتين وانا نحفضلك في هاك الكلمتين باش نغنيهوملك فماش ما ترضى عليا ههه
- احلى كلمتين سمعتهم في حياتي ...نسمع فيها كل ديما اما عمري ما حسيتها كان كيف غنيتها انت ...محلاها من صوتك ... وزادت عنقتو وكبست عليه ...هههه هو صحيح صوتك كيما شعبان عبد الرحيم ...اما في وذنيا نسمع فيه كاينو العندليب ههه
- مانعرفش ...وعض على شفتو ...وشدها من خدودها ...حاسة كاينها سبة هذي !!!شكونو شعبان عبد الرحيم هذا ؟ بعدت وجهها تضحك
-خير كيف متعرفوش خير هههه!! لا حبي صوتك احلى واحسن صوت سمعتو في حياتي....يا احلى راجل في حياتي ... بدا يقرب باش يبوسها وتليفونو نوقز ...نفخ بغش وهزو ..قعد يسمع وحست وجهو تبدل وعينيه وساعت ...تفجعت وهي تغزرلو يعيط
- اشبيها ناجية ؟ ..داخت؟ ...شنية داخت اش صار؟.
✅
✴✴✴✴
✅