👑زواج تقليدي👑

👑الحلقة الخامسة و الثلاثون...👑

👑👑

-يصوحب ؟ عينيها وساعت ...ياخي موش يحبها ؟
-ههه هي حبتو ...حبتو عاللخر زادة ... اما هو ...هو نحس علاقتو بيها بين المد والجزر ديما ....مرة يحبها ...مرة يبعد ..مرة يقرب ...( وقلبت شفيايفها ) يمكن نحسو معترفلها بالجميل اكثر منو حب ...اما وقتلي ماتت جاه نفس الإحساس بالذنب اللي جاه تو ..خاتر ماعطاهاش الحب اللي مستحقتو ..قعد وحدو وقتها قداش مسكر على روحو مايحب يكلم حد ...وبعد هبط لتونس ..هز ولدو وخذا كونجي طويل وقتها عداه بحذا ناجية ...الحق ارتاح وارجع كيف العادة ..وقعد مكرس وقتو لولدو ..لين دخلت انت في حياتو .. - أي اش نعمل انا تو ؟ يلزمني نموت باش يحس بيا ويعرف قيمتي ولا كيفاش ؟ (وضربت ايدها على الطاولة بالشوية ) هو مايعرف قيمة العبد كان كيف يمشي عليه ظاهرلي ؟
- محمود يحبك ...موش يحبك برك يموت عليك ... حست بقلبها نقز من الفرحة كيف الطفلة الصغيرة وهي تسمع في كلام حياة ...
- كان جاء يحبني مايعملش معايا هكة ؟ قالتلها بحزن
- عمري ماريتو يغزر لمرا ولا يتعامل مع مرا كيف ما يتعامل معاك انت !!! يمكن اللي عملتو اليوم الصباح انت وكيف وقفتلو ند للند حركو .. فيقو ..يمكن لازم تتعامل معاه بالطريقة هذيكة
- كيفاش ؟ سالتها باهتة
- الصدمة اللي عايش فيها هو تو ماتخرجو منها كان صدمة أخرى ...خليه يحس ..خليه يغير ..خليه يعيط ..خليه يخرج من السكوت والبرود اللي هو فيه ..ماتقعدش كل كلمة يقولها تطاوعو فيها جادلو .. عاود احييه من الأول وجديد ...يمكن السيستام هذاك هو اللي باش يرجعو ليك ويخليه يحس بيك ؟
- زعمة ياحياة ؟ حت .. حتى انا كيف عاندتو اليوم الصباح حسيتو خرج الغل اللي في داخلو الكل ..كاينو كان يستنى فيها باش يعيط ويصيح ..
- ههههه ...قتلكشي ؟ هانا جربنا معاه الحلول الكل ..خلي نشوفو ماه وين باش يصب هالسخطة هذا ؟
- اللطف عليه قالتلها من غير ماتشعر ضحكت حياة وقامت من الكرسي
-هههه وووه على السعدي وعلى ايامي ههه حتى انا مع اشكون نحكي ؟ الطفلة باش تهبل عليه قد ماعمل فيها ...هيا هيا قوم نوصلك امش اقرا ..وتو نجيك بعد نمشيو مع بعضنا للطبيب ...انشالله تطلع بنية برك خلي ندللوها ونشيخوها ههه كيف وقفت الكرهبة بحذا الفاك ..باستها خديجة من خدها وقالتلها
-عيشك يا حياة ..والله كان موش منك انت مانيش عارفة شنية كان باش يصير فيا ..والله حسيت روحي تفرهدت كيف حكيت معاك ... كنت نحس في روحي مخنوقة باش نموت ..
- يابنتى نورمال ههه وشدتها من كتفها ... اختك الكبيرة انا هنا ..حتى انا ماعندي حد ماللي جيت انت لقيت مع شكون نتونس ونحيت الظغط على توفيق اللى كنت خانقتو هههه ..هاني باش ناخذ بقعت ناجية انا تو هههه ضحكوا لزوز وجات هابطة تلفتتلها حياة قبل ماتسكر البا ب قالتلها - اسمع مهما باش يقلك تو طفيه ... عاملو ببرودية دم كيما يعاملك هو .. هو ما ينجمش يقلك شي قدام العباد ..ههه بطبيعتو يخاف على برستيجو ... عملتلها براسها أي وقعدت تغزرلها موش فاهمتها على شنوة تحكي .. !!! دخلت للفاك ...كانت تغلي كيف العادة ..جات بعد ساعتين روتار ..يعني فما حصة مادخلتهاش ....اول مامشات عرضتها امينة من بعيد جات تجري ...
-تي وينك يابنتى ؟ من بكري وانا نستنى فيك ؟ وقعدت تغزرلها باهتة ..يا محلاك اليوم تهبل في الحوايج هاذم وشعرك ..الله احد محلاه شعرك يقتل .. تباركالله !!! وشدتها من يدها ماخلاتهاش حتى تجاوب ... ايجا ايجا هاو جاء الأستاذ الي حكيتلك عليه ..( بدات تجبد فيها للانفي) ..البنات الكل متجندة ...ههه تقول داخلين على حرب ...يابنتى يهبل ..يهبل .. دخلو يلقاو ه معبي والبنات اللي تشوف في روحها واللي تمكيج واللي تحط في بارفان ..ضحكت ..ضاهرلي البنات في العالم الكل عندهم نفس المواصفات هههه ... طلعو قعدو هي وامينة ..كانت عينين برشة ولاد يغزرولها وهي طالعة ...حشمت وطبست راسها ..يمكن عندو الحق محمود ...الرجال في كل بقعة نفس الغزرة ...تحسهم باش ياكلوك ...وبالاخص واحد ابيض ماثبتتش حتى في منظرو ..هوما قعدو وهو طرف جاء لصقها ...
-اهلين ...قالها باللغة العربية ولهجة شرقية ...انا وائل من لبنان وانت ؟ ومدلها يديه ...هزت راسها غزرتلو مدتلو يدها
-انا خديجة من تونس
-تشرفنا ... ياسر حلوة كيما يقولو بالتونسي ... كبست روحها وطبست راسها ...شنوة تو الي جاي يتمجلغ لهنا ؟ ناقصتو انا تو ؟... بعدت عليه شويا ولصقت في امينة وهو قعد يغزرلها ويتبسم ..
- هاو جاء هاو جاء ..قالتلها امينة وضربتها على كتفها ...هزت راسها وغزرتلو ...حست ببدنها الكل سخن واحمار ..وركايبها ولاو يرعشو من الفجعة والخوف وهي ترا فيه داخل ..حست بطنين في وذنيها .. وحست روحها باش الدوخ .....وهو كان يمشي بالشوية ...حط كرتابتو فوق الطاولة وهز راسو
- بونجور تو لموند جاوبوه الكل بحماس وهي تخبات وراء اللي قدامها باش مايشوفهاش ... حست قلبها باش يخرج من بلاصتو من قوة الدقان..ماسمعتش حتى امينة اش تحكي .. تو فهمت جملة حياة اللي قالتهالها وهي هابطة ...كانت تعرف والناس الكل تعرف اللي محمود هو استاذها في الفاك ..الا هي !!!

✴✴✴✴