👑زواج تقليدي👑

👑الحلقة التاسعة والثلاثون...👑

👑👑

  -اش تحب نطيبلك عشاء؟ سالها وهو واقف قدام الفريجيدار يحط في القلاص غزرتلو باهتة ...مش مصدقة وذنيها 
-باش تطيبلي انت ؟ تعرف تطيب ؟ هههه عمري ما ريتك تطيب !!! بصراحة بهتني !
-مالا شكون كان يطيب قبل ماتجي انت .؟ قالها من غير مايغزرلها كان حال الفريجيدار يجبد في القضية ... حط القضية فوق الطاولة وهي تغزرلو وعينيها مزغللة بالفرحة ....محلاه وهو يحرك في الكوجية ...كان هاز يدين السورية مشمرهم و حايس يشوف في الماعون اللي باش يطيب فيه ...قعدت تنقر بصوابعها على الطاولة ...قاعدة على الكرسي تتفرج فيه وعينيها ذابلة تقول تتفرج في فيلم حب ...ههههه.. -محمود ؟ سالتو بصوت ضعيف 
-امممم ؟ سالها وهو يقص في الطماطم للسلاطة 
-ما ...( وبلعت ريقها) مازلت متغشش؟  هز عينيه غزرلها وعاود هبطهم يكمل في القصان 
-حسب رايك ؟
-مانعرفش ؟ وقعدت تتدق على الطاولة بتوتر ...باش تقعد متغشش ؟زادت سالتو وعقدت جبينها وتغزرلو ببراءة  ضحك ...هز الطماطم وحطها في الصحن وزاد جبد الفلفل يقص فيه ويحكي 
- شوف ..العصب اللي طلعتعولي اليوم والعمايل اللي عملتهم مايتنساوش !!سيبت تفوريخك حتى لين قلت يزي !!! نبهت عليك باش ماتكلمش الطفلة اللي مضروبة في استاذها وماسمعتش كلامي ...
- استاذها اللي هو انت !!! قصت عليه بغزول ..مافيباليش اللي انت الاستاذ اللي انا قاعدة نحكي عليه البارح وانت ساكت ماجاوبتنيش؟ علاش ماقتليش كيف حكيتلك ؟  قص على قصان الفلفل وقعد يغزرلها 
-خاتر كنت نحب نعملهالك مفاجاة !!! - مفاجاة ؟ مفاجاة اني نعرف اللي بنات الفاك الكل مضروبين في راجلي ؟ قاتلو بغزول وصوت فيه برشة غيرة ....تعرف اش حسيت وقتها ؟ تعرف اش حسيت؟ داخلة نلقى البنات الكل تزين وتمكيج وتستوي في روحها وفي اللاخر طلع لكل ليك انت !!! حسيت روحي باش نهبل !!!
  - علاش تهبل ؟ قص عليها ...كان يتكلم بصوت عادي كاينو ماعندوش مشكل انهم يتضربو فيه البنات ورجع يقص في الفلفل مبرد دمو !!  المهم انا مع اشكون ؟ ....انا عندي عشرة سنين نقرى ...موش عام ولا اثنين .. وكل عام نتعرض لنفس المواقف...مايعنونيش...تفهم اش مهنتها نا يعنيونيش ؟ ...معنتها نقري ونخرج على روحي ...ونزيد نقلك اللي موش كان في الفاك نتعرض للمواقف هذي ...في الخدمة وفي كل بقعة .. - يعني تحب تغزلني تو ؟ قصت عليه وهي ترحي من داخل
- مانحبش نغزلك !نحب نفهمك اللي انا ماعلى بالي بحد ...مسح يديه بالمنديلة ومشا قعد مقابلها يضحك ...كان جاء عيني نشاور لاي وحدة تجيني ...وترشق صوابعو في بعضهم
- صحيتك ..وتنطرت من الكرسي بغزول والغيرة كلاتها ماكلة ...جات باش تخرج ..شدها من ايدها وهو يضحك رجع قعدها ...
- سيبني ..قاتلو بغزول ...ماك تنجم تشاور لاي وحدة تجيك ؟ برة امشي مالا ؟ برة امشي للوحدة اللي تستنى فيك ...وبدات دموعها هابطة ....جبدها ليه وعنقها ...قعدت حاطة يديها بين بدنها وبدنو .. ما تحبش تضيع في تعنيقتو ...قداش وجعها كلامو ؟ تعرف اللي قالو الكل صحيح ..اما ما تحبش تسمعو ...تنهد وباسلها شعرها ...ريحة يديه كانت بالفلفل ...شدلها كتافها وهزلها راسها غزلها في عينيها ...في وجهو تبسيمة تقتل... 
- هاني السنا باش نخالف الي عملتو قبل ...وباش نحب تلميذة من تلامذتي ...مع اني ماندخلش الخدمة في حياتي الشخصية ...اما الله غالب ..هبلتني ها التلميذة ...ماخلاتش فيا عقل ...ومن اول نهار دخلت فيه عملتلي مشكلة ...شواتلي قلبي وخلاتني نغير عليها وقريب نتضارب انا وواحد من الطلاب على خاطرها ...  ياميمتي!!كلامو العسل ....في لحظة شعللها نارها وفي لحظة طفاها ...
- محمود ؟ قاتلو بدلال وهي تغزرلو وتتمعشق في غزرة عينيه من تحت lunette
- اشنوة زادة ؟ قالها بالشوية وهو باقي معنقها ..
- انا ...انا ماحكيتش معاه الطفل هذاكة و...واصلا والله لا ثبتت في وجهو ...
- باهي قص على الموضوع تو...قالها بغزول وبعد رجع يقص في الخضرة  زادت قربتلو ووقفت بحذاه شدتو من ذراعو ولصقت راسها في كتفو وكبشت  - محمود ...وتنهدت ...اي مرا تحبك انت ماتنجمش تغزر لواحد اخر
...موش ماتنجمش مستحيل!!! 
- نعرف ...قالها بصوت عادي ( غزلها السخطة قداش مضروب في روحو هههه) انا اللي غزلني وفددني كيف حط ايدو عليك وتلفتلها هز ايدو وحشاها تحتها ...مانحب حتى راجل يحط ايدو عليك غيري انا ...كيما انا زادة مانيش مستعد نمس حتى مرا غيرك انت ...مفهوم ؟ 
- اممم قاتلو بصوت فيه دلال وفرحة ...مفهوم ...سامحني ...!! ماعادش نكلم حد ...حت..حتى امينة ماعادش نكلمها ....
- Et surtout هذيكة ...قالها وحط الروز في الكوكت ...مانحبكش تحكي معاها جملة  عملتلو براسها اي ورجعت قعدت فوق الكرسي ..حطت راسها بين يديها واتكات على الطاولة تتفرج فيه ....
-اممممم ما بنو الروز ...تاكل وتتبنن وهو يضحك عليها شايخ ... كمل لعشاء وحل ام كلثوم وقعدو يتعشاو ويسمعو وساعات يغنيو معاها ....كانت باش تطير بالفرحة ...محمود رجعلها ....محمود الحنين رجعلها ..غزرة عينيه الحلويين والحب اللي تحسو فيهم ...روحها حست رجعت فيها ...كانت جهامة بلا روح ...تو طايرة طايرة طايرة ...كل كلمة تخرج من فمو كل ضحكة ..كل تبسيمة ...ترجع فيها الروح ...مابنو ومابن ضحكتو ...ربي يخليهولها ...تحب تقعد تغزرلو العمر الكل ...قد ماتغزرلو ماتشبعش ..
-خلي نلم الطاولة قاتلو بعد ماكملو العشاء ....يزيك انت اللي عملتو ... شدلها يدها ونحالها الصحن حطو في لافابو وقالها .
- مانحبك تمس شي اليوم ...نحبك ترتاح ...برى امشي دوش ...وبدل حوايجك ...تو نلم انا الطاولة ...وبعد عندي شوية خدمة باش نكملها ...
- قعدت تغزرلو باهتة...يعني اللي صار هذا الكل وبعد يقلها عندي خدمة ؟ ...نطرت يدها بغزول وخرجت طلعت لبيتها ...وهو يغزرلها وشادو الضحك من الصدمة اللي شافها في عينيها ...
- دخل لبيروه ...قعد يشوف في الوراق ...كانت داخلة بعضها بعد ما فرتتهم اك المجنونة اللي عندو ههه..قعد ينضم فيهم بالشوية ....بعد ماكمل هز التليفون سال على ولدو ..قاتلو حياة اللي هو قاعد يلعب شايخ مع هشام وتوفيق قعدت تسال فيه على خديجة  - -سافا ...هههه امورها مريقلة...طيبتلها العشاء ودللتها ...وهانا باش نزيدو شوية وناكلو قلاص ونرقدو .ههه اش تحب اخر تو ؟ 
-يعطيك الصحة ...زايد معاك يا ولدي ... وحدك كيف تعبر وتولي حنين ..هههه 
- علق التليفون وقعد يضحك وحدو ...هز عينيه جات في عينين ناجية ....مشا وقف بحذا التصويرة ...قعد يعدي بصوابعو عليها ...كانت تضحك ...كيما عادتها وكيما اخر نهار فارقتهم فيه ...عمرها ما ضهرت ضعفها لحد ...عمرها ما بكات ...عمرها ما شكات .. القوة والشموخ في عينيها .. تنهد وغمض عينيه ... عينيها اللي تشبه لعينيه ....اول مرة من ثلاثة شهر ما يتوجعش كيف يراها ...اول مرة يغزر لتصويرتها ويثبت فيها ...اول مرة يحس روحو متفرهد ..قلبو ماعادش يوجع فيه ...يرحم عليها من غير غش في قلبو ...ناجية هي اللي ختارت انها ماتقلوش ...ختارت تخبي ...هو ما قصرش معاها ...الناس لكل تغلط ...وهو كيما اي ولد يغلط ...وهي كاي ام تسامح ...كانت تحبو ..وخايفة عليه هذاكة علاش اختارت انها تخبي عليه ....حتى وقتلي سال الطبيب عليها بعد ما ماتت قالو الي هي اصلا مولودة بيه المرض وكان يتفرع في بدنها عام بعد عام ...يعني حتى كان سمع قبل ماكانش ينجم يعمل شي ...يحبها ناجية وعمرو ماباش ينساها ....كانت امو واختو وكاتمة اسرارو ...كانت صاحبتو ..اما تو لازم يغزر لقدام ...يزيه ماخبى راسو .. عايلتو تستنى فيه ...تستنى باش يقوم ويحي ويهز روحو من اول وجديد ...مرتو ..ولدو ...بنتو اللي قاعدة تتكون ...حياتو ..حياتو اللي باش يبنيها مع مرتو ....ناجية ديما في القلب ...وديما نصايحها في بالو ...ناجية باش تعيش معاه ديما ...باش تعيش معاه في ضحكة مرتو ...مرتو اللي اختارتها هي وكانت فرحانة بيها ..مرتو اللي حبتها كيف بنتها ودافعت عليها ضدو هو ..مرتو اللي حبلت وفرحتها في اخر اياماتها خاتر ماتت وهي متهنية عليه ....متهنية انو باش يكون عايلة ويعيش حياتو ....موش باش يغطس راسو كيف النعامة

✴✴✴✴✅