مساء العافيه على عيونكم الحلوه
البارت الثاني
في منتصف الرجوله
بقلمي حنين العلي
روز....... اخت العريس بعد مارفضتها امي راحت اني انشغلت اخيط جراجف للمعسكر بكميات كلش جبيره جنه اني واخواتي نتناوب على مكينه الخياطه كل وحده الها وقت محدد تكعد تخيط حتى باليل اهلي ينامون بالسطح اكعد شبعانه نوم قبل الصلاه اخيط كميه واصلي وارجع انام
نطلع مصروفنه نشتري بيهن شامبو جواريب حجاب اساور ملابس داخليه سوالف بنات كرزات وحلويات نسهر باليل اني واخواتي بذات من يجن رهف ونرمين نفرح بجيتهن ونجتمع نضل للفجر كاعدين ضحك وسوالف احاول اسوي كيكه قبل لا يجن واضمها الهن وهيج مخلصه ايامي.
وره كم يوم كاعده اخيط واندك الباب اخت العريس هم اجتي طببتها امي لصاله وبعد السلام كعدت تتوسل بأمي علمود تخطب حور قفلت عليها كلش امي كلتلها
هيله...... والله اسفه ابوهم مقبل وبناتي صغار مو مال زواج حور بس الطول ماخذها عمرها 14ترى وتريد تدرس ونور هماتين 16 ماكدر اذبهن بهيج عمر الزواج مسؤاليه وانتو عائله
روز.... اني كاعده ممهتمه للموضوع لان اعرف اني العانس المحد يريدني اني مو المواصفات الي يريدها اي رجال من كلامهم عليه سمره وسمينه مندمجه اخيط جراجف اجت عمتي غمتني بثنين اديها وكالت
سماح..... امداج يالعوبه شفتي كلهن ازوجن فلانه وفلانه وانتي ضليتي محد يكلبج ضلي خيطي جراجف يالعانس عجوز البين الف مره كتلج عدلي روحج غسلي، حطي مبيض لوجهج المصخم هاي المراه تشوفينها قافله تريد حور وانتي راح تحمظين على كلوبنه
روز..... شمرت القماش من ايدي و كمت اضرب على وجهي وابجي انهاريت كتلها كااااااافي كاااااااافي كرهتيني بحيااااتي انتي من جهه وابويه من جهه ساعة السوده الخلقني بيها الله وعشت بين ناس مترحم ولاتخاف الله شنو ذنبي ماتزوجت لسه هااااا شنو ذنبي الله خلقني سمره هاااا كاااافي كرهتوني بحياتي الله ياااااخذني وارتاح منكم ومن كلامكم السم اشو كل عمري 19 كل ماحجيتي وكلتي عاااانس واخوج يصيح بنات وبنات من كون الله ياخذنه وترتاحون
سماح.....ولج عرمه نصي حسج المراه عدنه شتكول علينه هااي فوك ما احجي لمصلحتج طبج مرض ضلي عانس طول عمرج عساج لاعرستي
روز ...... شتكووول خل تكووول ذبحتيني منو كلج اريد اتزوج عساني لا تزوجت ارتاااااحيتي
سماح..... خل تروح المراه واني الي حجي ثاني وي ابوج ولو مسكين ماعايز قهر ضهره انكسر على عيشتجن درزن بنات
اطلعن خل يرتاح يشوف دربه قميص مالحگه من وراجن.
روز....... كاعده وره المكينه وابجي دموعي تنزل وارجع امسحهن عيوني تهل دمع بكثره عبالك مال سنين مجمع جسمي كله كام يرجف الله ياخذني وارتاح منكم سحبت القماش بحرگه وضغطت على ماطور خيط بسرعه خربت الجرجف شمرته بلكااع وكعدت ابجي انقهرت من كلام عمتي
