အပြာရောင်ဆေးခြယ်ထားတဲ့Cafeအတွင်း သူတိတ်ဆိတ်စွာထိုင်နေရသည်မှာတစ်နာရီပင်ကျော်တော့မည်။ ချိန်းဆိုထားသောအမျိုးသမီးသည်ကား ရောက်မလာသေး။ စိတ်ပျက်စွာဖြင့် ဘယ်လက်တွင်ပတ်ထားသောငွေရောင်နာရီကလေးအားငုံ့ကြည့်လိုက်စဉ် သူ့စားပွဲနားသို့ ဖြူဖွေးရှင်းသန့်နေသောခြေဖမိုးတစ်စုံသည် လာရပ်၏။ နာရီထံမှအကြည့်များ ထိုခြေဖမိုးဆီသို့ကျရောက်သွားခိုက်...။
"နောက်ကျသွားလို့တောင်းပန်ပါတယ်။"
လေသံအေးအေးချိုချိုသည် သူ့နားစည်ဝသို့ပွတ်တိုက်ဖြတ်သန်းသွားသည်။ သူမရောက်လာခဲ့ပြီဖြစ်၏။ သူခေါင်းကိုအသာမော့၍ ထိုအမျိုးသမီးအားနွေးထွေးစွာပြုံးပြမိသည်။ လကြာပြီဖြစ်၍ အနည်းငယ်ဆူထွက်လာသောဗိုက်လုံးလုံးကလေးသည် အစိမ်းနုရောင်ဂါဝန်ဖားဖားကလေးအောက်အထင်းသား...။
"ထိုင်ပါ။ ဘာကြိုက်တတ်လဲမသိတော့မမှာထားလိုက်ဘူး။ ကြိုက်တာမှာပါ။"
မီနူးကဒ်ကလေးအား မင်ဆူရီဘက်တိုးပေးရင်း သူပြုံးကာဆိုလိုက်ပါသည်။ နှုတ်ခမ်းထက်မှအပြုံးနုနုကိုတော့ သူထိုအမျိုးသမီးရှေ့တွင်အချိန်တိုင်းဆင်မြဲထားဖြစ်မည်ပင်။ မင်ဆူရီသည်အနားသို့ဝိတ်တာကလေးရောက်လာသည်နှင့် Cheese cakeတစ်ခုအားမှာသည်။ သို့ထက်တော့ ပိုမမှာပေ။
"တစ်ခုခုသောက်ပါဦးလား။"
"ဟင့်အင်း ကျွန်မမှာအချိန်အချိန်သိပ်မရဘူး။ လိုရင်းကိုပဲပြောကြတာပေါ့..."
အမှန်တကယ်ကိုအလျင်လိုနေသောပုံစံကြောင့် သူခပ်သွက်သွက်သာခေါင်းငြိမ့်ပြလိုက်ပါသည်။
"ဒါဆိုလည်း လိုရင်းကိုပဲပြောကြတာပေါ့...မင်းရဲ့ကိုယ်ဝန်ကမောင်နဲ့ရတယ်ဆိုတာ အမှန်ပဲလား။"
"လိမ်ခဲ့တာ..."
"ဒါဆိုမောင်နဲ့မအိပ်ဖြစ်ခဲ့ဘူးပေါ့..."
"အင်း မအိပ်ခဲ့ပါဘူး။ မောင်ကသိပ်ကိုစည်းစောင့်တတ်တဲ့လူတစ်ယောက်မို့ ဘယ်လိုမှသိမ်းသွင်းမရခဲ့တာဆိုပိုမှန်ပါတယ်။"
သူခေါင်းကိုလေးပင်စွာဖြင့် တစ်ချက်ချင်းငြိမ့်လိုက်မိသည်။ တည်ငြိမ်စွာပြောပြနေသည့်မင်ဆူရီဟာ လိမ်ညာခဲ့ရခြင်းအတွက်တောင်းပန်လိုစိတ်ကင်းပုံပင်။ သူသက်ပြင်းတစ်ချက်ခိုးရှိုက်လိုက်စဉ် အနားသို့ဝိတ်တာကလေးပြန်ရောက်လာသည်။ မှာထားသည့်ကိတ်ကလေးချပေးပြီးသည်နှင့် ဝိတ်တာကလေးသည်ခါးတစ်ချက်ညွတ်ကာ ကောင်တာသို့ပြန်ထွက်သွား၏။ ထိုတော့မှ...။
YOU ARE READING
Sad But True (Toxic Love) [Completed]
Fanfictionအမုန်းတွေအား အတိတ်မှာချန်ရစ်လို့ မြတ်နိုးကြင်နာခြင်းများဖြင့် အနာဂတ်အား အတူတကွဖန်တီးမည်။ ချစ်ခြင်းမေတ္တာများဖြင့် ပစ္စုပ္ပန်အားလျှောက်လှမ်းလို့ ရာသီတိုင်း အပြုံးတို့ေဝစေသား။ Start date_11.1.2021 End date _30.3.2022
![Sad But True (Toxic Love) [Completed]](https://img.wattpad.com/cover/290152147-64-k250536.jpg)