بركان شاهين

بارت 1

في احدى مدن بغداد داخل السجن  صوت خطوات اقدام تتقدم في مكان يشبه المنفى .. يختفي الصوت ويضهر صوت فتح باب حديد  (سحب السرگي)

دخل الشرطي للزنزانه وصاح..
.....الشرطي.... شاهين فاضل عيسى

....رفعت ايدي ولوحت بيها وحجيت بصوت ثگيل ..
...شاهين...نعم سيدي ..

الشرطي ... كوم وياي

شاهين ...وين لغرفة التعذيب ترى اليوم ماتعاركت ويه احد

صاح عليه بصوت ..
الشرطي .. ..لك گوووم بدون حجي زايد فضهااا

ضحكت ضحكة استهزاء وكلتله..
..شاهين...گايم يابه گايم ..

اخذني من ايدي وطلعنا من الزنزانه واني ايديا مقيده.

وصلنا لغرفة الامانات فتح الكلبچات من ايديا وسلمني المحفضه مالتي والحلقه ..

باوعت عليه مستغرب وكلتله..
....شاهين .. شنو هاي ؟

الشرطي .. افراج يابه افراج شنو متريد تطلع حلتلك الكعده ويانه .

شاهين ...اي والله الكعده حلوه وياكم بيناتنه زاد وكتل صار ..

صار يهز بإيده ماعاجبه الحجي وكال..
... ديله عيني اخذ الامانه واتوكل بالله

اخذت غراضي وطلعت امشي بإتجاه باب الخروج مال السجن واني ممصدك معقوله افراج وخلصت محكوميتي ورح اطلع ..!!

اول ماطلعت من السجن صار ضوء النهار بعيوني غوشت عيوني من قوة الضوء حطيت ايدي على وجهي ثواني ووخرتها سحبت نفس قوي وزفرته ومشيت بخطوات بطيئه ..

.....جان الجو بارد والدنيا ماطره والشارع مغسول غسل بالمطر

امشي بشوارع بغداد في أحد المناطق .. وجنت  لابس قمصله وحاط كليته (كلاو) على راسي ولاف وجهي بلفاف صوف وامشي ومااعرف رجلي وين ماخذتني امشي عليك يالله .. 

...بقيت امشي أكثر من ساعه تقريباً .. لحد مارجلي وكفت يم مطعم وجانت ريحة الفلافل تارسه الشارع واني كلش جوعان بيومها .. وكفت طلعت محفضتي لگيتها فارغه مابيها ولا فلس بس الجنسيه مالتي  ..

كمت احجي ويه نفسي..

...شاهين....شسوي هسه اروح لبيت اهلي لو اخابر ابو محمد .. اخابر ابو محمد يجي عليه وبعدين اروح لبيت اهلي احسن .

.بنص صفنتي اجتي عيوني على الحلقه باوعت وجريت حسره وتمتمت بكلمات..

...شاهين...وين صفى بيج الدهر ليالي وشلونج هسه .. ؟

..طبيت للمطعم وطلبت من ابو المطعم استخدم موبايل بس اسوي بي مكالمه وحده وارجعه وأبو المطعم اول مره تردد لان شكلي ومنظر ملابسي ووجهي مريب لحيتي طويله وحاجبي الأيمن بي طبره .. بس بعدين انطاني الموبايل ...