بركان شاهين

مشهد بين رياحين &بركان ♥️

...رياحين ..حضرت الچاي واخذته لغرفة بركان كلت اشوفه خاف محتاج شي ..

...طبيت للغرفه لگيته كاعد عالجربايه ويدخن جكاير بسرعه حطيت الصينيه مال چاي عالطبله وأخذت الجگاره من ايده واني اكعد بصفه وكلتله .. 

....رياحين ..الدكتور مو منعك من التدخين هاي شنو بركان منين جبتها الجگاره هاي .. ؟

....باوع عليه وعينه راحت عالجگاره وكال ..

....بركان ..جيبيها بس هاي اخلصها وبعد ماادخن ..

....رياحين ..لا بركان والله موزين عليك انته سويت قسطره ثانيه تعرف شنو؟

يعني شرايين گلبك كلها مسدوده ومعرض للجلطه بأي وقت .. ديربالك على صحتك فدوه لتسوي هيج...

.....ابتسم نص ابتسامه وكال ..
....بركان ..هه خايفه عليه ؟

نزلت راسي وكتله ..
....رياحين ...لعد ليش مااخاف غير انته زوجي وأبو ابني ...؟

....رجع باوع عليه بنضره حاده وعيونه تلمع عبالك بيها دموع .. وكال ..

....بركان ..وليييش تخافين انتي عليه إذا امي ماحبتني وعافتني واني عمري 12 سنه وراحت تزوجت وعاشت حياتها بدون متفكر بيه

.. وزوجتي الي حبيتها وعشت وياهه عالحلوه والمره وحاربت اخواني لخاطرها ودخلت كلية الشرطه لخاطرها حته اكون من مستواها رغم اني مااحب كلية شرطه

..بس درستها لخاطرها هيه .. اخذت كلشي مني وحرضت ابني وقرت براسه عليه لحد ماحرمتني منه ووصلت للموت بسببها وجانت تدري هاي الادويه ممكن بسببها گلبي يوكف واموت وماهمها شيصير بيه حطتهن اليه بدون ميرف الها جفن..

. وأخذت كل املاكي هم زين بيتي مسجل بإسم شاهين جان هم اخذته وراح مني هم زين بعده باسم شاهين وماكدرت تأخذه .

. سوت هذه كله لان تزوجتج عليها شوفي الحقد شلون عمى عيونها نست العشره والحب والسنين البيني وبينها ومافكرت غير بلانتقام ...وراحت ..

تجين تكليلي انتي تخافين عليه .. ليش تخافين ..يعني لازم هسه اصدك بيج لو شنو مثلا .. ؟؟؟

.نزلت عيني وكتله.
..رياحين ..اعرف بيك متصدكني لو تصدك حبي الك جان حسيت بيه من زمان .. وإذا زمن غدرت بيك هذه مومعنى كل النسوان موزينه لو كلهن يغدرن ..

.نزل راسه وكال.
...بركان ..موكلهن بس كل العرفتهن بحياتي غدرن بيه ..

....باوعت عليه وكتله ..
....رياحين ..حته اني مثلهن ؟

....باوع عليه وكال ..
....بركان ..سامعه بالمثل اليگول ..رب ضارة نافعة ؟

.... رياحين ..اي سامعه ..
....بركان ..هوه انتي .. انتي الضاره النافعه ..

....رياحين ...شلون يعني مافهمت ؟!

....بركان .. زواجي منج سوالي هواي مشاكل .. بسببج .. زمن عافتني ..بسببج شاهين انتصر عليه وأخذ حقه مني ..بسببج صار عندي طفل اني ماجنت رايده رغم هوه ماله ذنب بكلشي .. بسببج انفرضت عليه زوجه اني مارايدها ..