بركان شاهين

بارت 15

كمت امشي وأيدي ساندتها عالحايط بالكوه وصلت للباب فتحته ... شفتهم كدامي ... وبعدها صارت الدنيا ضلمه وماحسيت بشي بعد ...

.....فتحت عيني لكيت مامه كاعده يمي بلكاع تضرب بيه على خدي تحاول تصحيني

.. وشاهين واكف يم راسي اسمعهم يحجون بس صوتهم مو واضح ..
 
وره شويه يله صحيت وفتحت عيني زين بس جسمي أحسه بي نحول .. كمت امشي بالكوه شايله نفسي رحت للجربايه مددت وتغطيت وضليت ابجي واشهك بصوت عالي ..

.....شاهين واكف قريب عليه وكال ..
....شاهين ..ناره ليش تبجين شبيج ؟

....بلقيس ...عوفها يمعود دلع بنات

....شاهين ..شنو اعوفها متشوفين حالتها .. كومي بدلي ملابسها نأخذها للمستشفى .

....بلقيس ..لا ماكو داعي روح انته هسه واني احجي وياهه واجي ..

....شاهين ...لا مااروح إله اشوفها زينه يله ..كومي نأخذها للمستشفى نشوف شبيها ..

....نيران ...جنت ضايجه من شاهين ..عبالي نسه بنت خاله وميجيبها بعد .. من سمعته يحجي ويه مامه حجيت وياه بحده وكتله ..

.....نيران ..مابيه شي عوفني بحالي رجاءا ..

.....شاهين ..باوع عليه بنضره كلها استغراب ... وعافنه وطلع . .

....بلقيس ...شبيج عيني وصلت بيج مرحله تعوفين الاكل يومين على موده مو جنج مصختيها شويه

.....نيران ... مو على مود أحد مامه عوفيني الله يخليج تعبانه ومابيه حيل احجي ..

.....بلقيس ... ولج ياثوله اسمعي كلامي وكافي عاد تعاندين .. ولج اني مااكره شاهين الله شاهد عليه احبه .. بس صعبه تصيرين إله ..

الناس تعرف بي خالج ادري انتي عفتي الدنيا كلها وشباب الكليه الي تشوفيهم كل يوم وحبيتي شاهين .

ولج يمه لتشلعين كلبي واسمعي كلام امج ...

.....نيران...من سمعت الحجي مال مامه نزلت دموعي وحسيت بحرگه بكلبي .. وكمت اصرخ وابجي بصوت وكلتلها ..

....نيران ...هالدرجه الي اريده صعب وميتحقق ليش هيج حضي اني .. امي ماشفتها وابويه مات واني طفله وعمي عايفني وملتهي بحياته .. والإنسان الوحيد الي احبه كلكم حاربتوني حته ابتعد عنه يعني شلون شسوي فهميني شسوي ...

تقربت مني مامه وهيه فاتحه أيدها جرتني وضمتني لصدرها وكالت
.....بلقيس ...مامه حبيبتي اسمعيني ..

ولج يمه هذه حب مراهقه هسه يجي يوم تنسينه وتكومين تتذكرين هاي الايام وتضحكين على نفسج والله وكولي امي كالت ..

....نيران ... ماانساه مامه والله ماانساه لو انسه جان نسيته من راح للسجن ..

.....بلقيس... اوووف منج نيران . ولج عذبتيني كافي عاد رح تخليني احارب اخويه من وراج كافي ..