بركان شاهين

بارت 2

طلعت وياهم والكلبجات بإيدي والناس ترست الشارع وكلهم شافوني  شفت اخويه بركان  يباوع عليه من بعيد  وماسوه شي ولا تحرك .... بس ردت احجي وياه ومحد خلاني ...

.....شاهين...وصلت للمركز  كلما احجي ويه الشرطي اريد ادافع عن نفسي ..

.. يمعودين اني ماسويت شي اني طبيت لكيته امدد بالمحل 

محد يسمعني ذبوني بالسجن ومانطوني فرصه ادافع عن نفسي ...

.....طبيت للسجن كلت اخويه بركان  ميعوفني  اكيد يحطلي محامي لأن اني بريء ماسويت شي ..

  بقوا عشر ايام يحققون وياي واني اقوالي نفسهن ماغيرتهن ...

اخذوني لغرفة التحقيق وصاروا يحققون وياي ..

...دخلوني للغرفه واني ايديا بيها كلبچات كعدت على الكرسي وجانت غرفه تقريباً ضلمه بيها ضوء خفيف .. والضابط يحجي ويفتر على راسي بحيث توترت من طريقة كلامه وياي .. 

...
....صائب ... اي شاهين احجي اسمعك.

....شاهين ..شحجي سيدي

... صرخ بصوت عالي وكال...
..صائب ... ولك احجججييي لتخليني أتجاوز عليك احجيلي شلون قتلت المجني عليه خلدون ..

....شاهين.. سيدي والله وروح امي وابويا ماقتلت أحد ليش مصر تسويني قتلت بالكوه...

فرك وجهه بنفاذ صبر وكال ..
...صائب.. طيب شاهين ميخالف رح اجي وياك ..

احجيلي وين جنت اثناء وقوع الجريمه ..
اني وصلتني معلومات انت ماجنت موجود لا ابيتك ولا بيت اخوك ولا بالكليه وحتى جماعتك محد شافك منهم وين جنت لعد ...؟

....شاهين .. سيدي مارحت لاحد اني بعد التخرج من الكليه جنت فرحان بنفسي كلت اطلع اتمشى واخلص من ضغط الدراسه الي جنت عايش بي واخلص وارجع للمحل

بقيت اتمشى ورجعت للمحل وشفت الي صار والله سيدي صدكني مواني الي قتلت خلدون .. اصلا خلدون صديقي وأحبه ليش اقتله شعندي وياه مثلاً ..

.....صائب....يعني وين رحت تمشي احجيلي بالتفصيل ..

....شاهين ..سيدي رحت اتمشى بالشوارع ابغداد ورجعت ... يعني قريب على منطقتنه مارحت بعيد ..

.....صفن بوجهي شويه ولعق شفته العليا .. وكال ...

...صائب...طيب شاهين رح ارجعك للحبس واستمر بالتحقيق ..بس ياويلك وسواد ليلك اذا ثبتلي كلامك بي مراوغه لو جذب بوقتها رح اشوفك نجوم الليل بعز الظهر.....

.شاهين...رجعت للحبس وهناك بقيت عازل نفسي صفنه تجيبني وصفنه توديني ..

  سبحان الله شنو هذه القدر الغريب بيوم واحد انرفعت للسما من السعاده وصرت صاحب أملاك وفلوس وعقارات وبنفس اليوم نزلت لاسفل السافلين وصرت مجرم وقاتل ...