သူ့ရဲ့မျက်လုံးကို ဖွင့်ချီပိတ်ချီနှစ်ကြိမ်မျှပြုလုပ်ပြီးနောက် သရီသည်မြင်နေရသည့်မျက်နှာအဖြူရောင်ကြောင့် အံသြသင့်သလိုပင်ဖြစ်သွား၏ ။ ချက်ချင်းထမထိုင်မှီ ဦးခေါင်းကိုအရင်လှည့်ကြည့်လိုက်ရာ သူ့အားပြူးကြောင်ကာကြည့်နေသည့် တံခွန်ကြောင့် အခြေအနေကိုနားလည်ဖို့ခက်နေသည် ။ ဟန့်ကိုအရေးပေါ်ခန်းပို့လိုက်ပြီးနောက် သူလဲကျသွားသည့်အထိပင် မှတ်မိတာကြောင့် ဟန့်အခြေအနေကို အခုထိမသိရသေး ။
" ဟန်ကော ....... ဟန် အဆင်ပြေရဲ့လား "
လဲအိပ်နေရာမှ သရီသည်ချက်ချင်းထဖို့ကြံလိုက်သည် ။ သို့သော်သူ့ခြေနှစ်ဖက်က အလွန်အမင်းနာကျင်တာကြောင့် ရုတ်တရက်ထအော်မိလေသည် ။
" အား ... ငါ့ခြေ ... ငါ့ရဲ့ခြေထောက် ..."
" အရမ်းအရမ်း မထနဲ့လေ ... သရီ ၊ မင်းရဲ့ခြေထောက်တွေ ထိခိုက်မိထားတယ် ။ အခုချက်ချင်းလှုပ်ရှားလို့မရသေးဘူးလို့ ဆရာဝန်ကပြောထားတယ် "
" ငါကအကောင်းကြီးမဟုတ်လား ... ငါဘာမှမထိခိုက်ခဲ့ဘူးလေ ။ ဒါနဲ့ ဟန်ကော .... သူဘယ်လိုနေလဲ ၊ သူဘာဖြစ်သွားသေးလဲဟင် ..."
" သူဘာဖြစ်ရမှာလဲ ၊ အပြင်မှာ ငုတ်တုတ်ကြီး မင်းကိုစောင့်နေတယ် ။ တခြားတစ်ယောက်သာဆိုရင် အခုချိန်အချုပ်ခန်းထဲမှာ ပဲဟင်းစားနေရလောက်ပြီ "
" သူ့ဆီငါ့ကိုခေါ်သွားပေး ၊ သူအန္တာရာယ်ကင်းမကင်း ငါ့မျက်လုံးနဲ့အတည်ပြုနိုင်မှ ယုံမယ် "
သရီ၏စိုးရိမ်တကြီးပြုမူနေပုံကို တံခွန်ကနားမလည်စွာဖြင့်ကြည့်ရင်း အပြင်မှာရှိနေသောတစ်ယောက်ယောက်ကြားရန် အသံမြှင့်ပြောလိုက်သည် ။
" အပြင်မှာတစ်ယောက်ယောက်ရှိလား ... သူခေါင်းထိသွားတယ်ထင်တယ် "
ဆေးရုံအခန်းတံခါးသည် ချက်ချင်းပွင့်လာသော်လည်း ဝင်လာသူက ဆေးရုံဝန်ထမ်းများမဟုတ်ဘဲ ဟန်ဖြစ်နေလေ၏ ။ ဟန်ကသရီရှေ့ မဝံ့မရဖြင့်ဝင်လာပြီး တံခွန်ကိုလည်း ဘာဖြစ်နေတာလဲဆိုသည့်ပုံစံဖြင့် ကြည့်လိုက်သည် ။ တံခွန်ကလည်း ပုခုံးကိုသာ တွန့်ပြလေ၏ ။
YOU ARE READING
ချစ်မိခဲ့တဲ့ ၉ နှစ်တာ
Romanceလူတော်တော်များများက အတိတ်ကိုပြန်ပြင်ချင်တဲ့ စိတ်ဆန္ဒရှိကြမယ်လို့ ကျွန်တော်ယုံတယ် ။ မတော်တဆ အဲ့ဒီအခွင့်အရေးက ကျွန်တော့်မှာသာ ရှိလာခဲ့ရင်တော့.... cover credit to the owners of the original drawings လူေတာ္ေတာ္မ်ားမ်ားက အတိတ္ကိုျပန္ျပင္ခ်င္တဲ့ စိတ္ဆႏၵရွ...
