وانا في درب الهلاك ظهرت لي يا ملاك

1

البارت الاول
...
في ساحه القصاص الناس متجمعين يشهدون هذا المشهد العظيم دخل المحكوم عليه واهله يبكون بيأس ،نظرات الشفقه بعيون الناس ...

واحد من حضور هذا القصاص يمازح اخوه :تخيل تكون مكانه ويشيلون راسك كذا
واشار بيده تقليد لحركة السيف اذا قصوا فيه
وافي :اعوذ بالله من فالك تكلم زين ولا لا تنطق
ابو وافي:ما يضحك وراك تطقطق على حكم مجرم قتل واحد من جماعتنا
نايف:وراكم نفستوا كنت ابمزح معاكم
ابو وافي :خلاص اسكتوا الحين بيقصون فيه وانت يا وافي اذا خلص القصاص روح لعمك جابر قال انه يبيك
وافي :على خشمي
ابو وافي:وسلم لي عليه
...
بعد ما خلص القصاص راح وافي لعمه جابر ودار بينهم هذا الحوار
جابر :يا هلا يا هلا بولد متعب يا هلا زارتنا البركه تفضل اقلط
وافي:هلابك عمي أمر وش بغيت
جابر تغير وجهه البشوش  وصار كأنه يخفي مشاعر اشمئزاز وشفقه وصوته خافت قال:تقهو اول وبعدين اعلمك
وافي ضحك: شكله موضوع كبير يالعسكري
جابر ضحك مع وافي وقال :وراك معلق على العسكريه انا تقاعدت
وقبل ما يكمل كلامه قال وافي يقلد صوت عمه :بس اساعد اخوياي
وشوي الا جا سطام وبيده صينيه فيها انواع تمر ودله قهوه وفناجين وهو يحيّي ولد عمه ويقول : يا مرحبا بولد عمي يا مرحبا
وافي:يامرحبا فيك ...اي صح بغيت انسى ابوي يسلم عليكم
جابر : وصل ...تبي اي نوع تمر
سطام :يووه يا وافي ترا ابوي مدمن تمر إن كان الناس يدمنون الخمر هو يدمن ذا التمر مشتري كل الانواع واحسنهم عنده عجوه المدينه
جابر يحاول يخفي ضحكته بجديه :ولد وراك تحكي كذا عن ابوك التمر طيب اطيب من الخمر وذي البلاوي الله يكفينا اياها
وافي وسطام بصوت واطي :امين
تقهوو وبعد شوي قال جابر :سطام اطلع ابي اكلم وافي بموضوع خاص
سطام : افااا يا يبه تبيعني عشان ذا المروح ...ولا لا يكون تبي تزوجه اختي تراها قشره ما تصلح له
جابر بعصبيه شال فص تمر من الصحن ورمى فيه سطام وقال :ولد وش ذا الخرابيط تهين ضيفي ببيتي وتسبه انقلع لا تشوفك عيني قلت لك موضوع خاص يعني موضوع خاص وش عليك فينا
سطام بأبتسامه :ابشر
وراح سطام وقال جابر :لا تلتفت لكلام ذا المخفوف وخل نحكي بموضوع شخصي
وافي بكل فضول : وشو
جابر انقلب وجهه واستسلم ولا حاول يخفي ذا التغير قال :يا وليدي ابوك اخوي المقرب ما بيننا الا ثلاث سنين تربينا سوا على يد جدك الله يرحمه ...
وافي: الله يرحمه
جابر :يعني انا اعرف ابوك مثل ما اعرف نفسي وانا اشهد انه رجّال ما يربي الا رجال
وافي:اسلم
جابر التفت شوي وعيونه دمعت ورجع يناظر بوافي: ليه يا وليدي ؟ ليه تخون كلمه ابوك وتروح لذا البلاوي وش مقصر عليك فيه اذا مقصر ابوك قولي واروح اكلمه
وافي بأستغراب وخوف :اي بلاوي يا عمي وش تحكي انت ؟
جابر :لا تسوي نفسك ما تدري انت رحت اهلكت نفسك وتعاطيت مخدرات
وافي يوم ادرك ان عمه قفطه بتوتر : ابوي درى ؟...ولا هو علمك عشان تنصحني صح ؟
جابر :لا يا وليدي ابوك ما يدري ولاني ناوي اعلمه ...انا دريت من خويي العسكري يوم كان يراقب خليه فاسده شاف بالتسجيل انك انت كنت المشتري وكانت حالتك واضحه انه توك ببدايه الدرب ...يمدينا نوقف ذا الشي بس ابيك تساعدني وتقومني واقومك لين تبعد عن ذا الدرب الي اخره ما ترضيك
وافي : مدري يا عم بفكر
جابر : وش تحس اذا تعاطيت ؟ وش مشاعرك
وافي: احس اني سعيد مابي افقد سعادتي
جابر : صاحي انت ؟ لا يكون تعاطيت قبل تدخل عندي
وافي : لا يا عم اخر مره كانت قبل اسبوع
جابر : كويس توك بالبدايه ودامك صملت اسبوع حلك عندي
وافي : يا عم ما ابي خلاص
جابر : تبي ولا ما تبي غصب عنك ولا ولله مثل ما مسكت غيرك وسلمتهم للدوله بسلمك لهم وتدخل مستشفيات علاجهم صعب ،واعتقد انك قد سمعت قصص العلاج الي كنت اقولها لكم وكيف انها صعبه دام ببدايه الدرب بتتركها بسهوله ان شاء الله
وافي اخذ نفس عميق وقال : طيب يا عم طيب بس كيف اتركها بدون ما يدري ابوي ؟
جابر :عندي الحل بدون ما يدري ابوك
وافي :طيب كم بقعد لين اتركها ؟
جابر :كم لك تتعاطى
وافي : شهرين
جابر : تقريبا ست شهور
وافي : كيف ! ليه ست شهور
جابر : هذي اول عواقب التعاطي العلاج ياخذ وقت اكثر
وافي : لا حول ولا قوه الا بالله
...
في الجهه الثانيه من البيت
ام سطام : وين ابوك ؟
الجازيه :مدري
سطام : بالمجلس عنده ضيف يتكلم معاه بشكل خاص ولا يبيني اسمع
ام سطام : اجل واحد من زملاه بالعمل
سطام بعد نفس عميق بحسره :ليته خويه من العمل لكنه واحد ثاني
ام سطام : مين ؟ عسى يبي يتزوج علي ؟
سطام يضحك : يتزوج عليتك وافي المروح وانتي بذا الجمال عيب عليه ولله
الجازيه : يمه وش ذا العقليه كيف ابوي بيتزوج عليتك ببيتك وبمجلس الرجال
ام سطام : يا الله حيه وافي بروح اسلم عليه
سطام : قال لحد يجيني بنتكلم بشي خاص
ضحك سطام وطالع بالجازيه وقال : شكله يبي يزوجه الجازيه
الجازيه استحت وحاولت تدرك الموقف قالت :بتفكيرك الغير منطقي ذا واضح انك ولد حصه
ام سطام : عيب عليك تحكين على امك كذا روحي قومي اختك قولي لها تقوم تعشى معانا وتصلي الي فاتها لا صلاه ولا عباده مغير دوام ونوم وسهر اخر الليل
الجازيه : اعذريها يمه عندها فاينلز وتقوم تذاكر اخر الليل
ام سطام : والصلاه ؟
الجازيه :ما عليها صلاه ذا الاسبوع
ام سطام : والاكل ؟
الجازيه : يمه بمنطقيه يعني اكيد بتصحى تاكل ماهي رجل آلي
...
اليوم الثاني
صحي وافي على ريحه بخور عود فز من نومه وقال : وراك يمه تبخرين الحين
ام وافي : اليوم الجمعه ببخر بيتي وبكيفي
وافي : يمه بعدك زعلانه علي ؟ سامحيني الله يخليك
ام وافي : ليتك بتسمع كلامي وتتزوج صار عمرك ٣٠ وانت ما تزوجت
وافي : يمه للحين عمري ٢٨كبرتيني سنتين ليه ؟
ام وافي :٢٧ كبير ابوك يوم كان بعمرك عنده ثلاث عيال ... المهم اذا تبيني ارضى عليك قوم تسبح ورح صل الجمعه
قام وافي من فراشه مبتسم وباس راس امه وقال :الله لا يحرمني منك
ام وافي تضحك : يلا بسرعه معد باقي الا ربع ساعه على الصلاه
قام وافي يركض بالبيت ونزل الدرج  بسرعه لحد ما وصل عند الحمام ولقي اخته الهنوف تبي تدخل ودخل قبلها
الهنوف : وافيييييي حيوان انت من الصباح ادرس واكرف بالبيت ويوم قمت ابي اتروش تجي انت معزز مكرم تتدخل قبلي
غاليه من الصاله :اششش وطي صوتك العنود نايمه
الهنوف : ذا الحيوان جا دخل قبلي
نايف وهو يمر من عند الهنوف ويدخل الصاله : اكيد بيدخل قبلتس باقي ربع ساعه على الصلاه اعذري اخوتس يا المدلعه
غاليه : خمسين مره قلت لك يا نايف لا تتكلم مع المؤنث بحرف السين هذا شي ماله وجود باللغه العربيه
نايف : خفي علينا يا استاذه اللغتي انتي
غاليه : ما فيها شي لو بحثت باللغه العربيه الجميله وقريت شعر وتعلمت اللغه احسن منك ما عندك سالفه طول الوقت فاضي
دخل ابو وافي : للحين يا نايف ما تجهزت يلا قم البس ثوبك خل نلحق على الصلاه وقول لأخوك الدلخ يطلع بسرعه
نايف : ابشر
العنود : بابا متعب جيب لي حلاو
ابو وافي : اوووه هلا بالحفيده الاوله هلا بالغاليه بنت الغاليه هلا بالسميه
ام وافي : لا تعيش الجو هذي سميتي
ابو وافي :سميه حبيبتي
وافي طلع من الحمام ودخل الصاله: اوخس الوالد طلع رومنسيات وحركات
العنود بصوت طفولي عصبي : خلصني يا بابا متعب بتجيب حلاو ولا اقول لخالو وافي
ابو وافي : فديت المعصبين انا ابشري من عيوني هذي قبل هذي اجيب لك الحلاو الي تبغينه
العنود : اييوه احسن ماما ما تخليني اكل حلاو لأني تعبانه
ام وافي :لأن مامتك تحبك وتبي مصلحة والحلاو فيها مضره لك ،لازم تسمعين كلامها
العنود : طيب واذا ما سمعت كلامها وش يصير
ابو وافي :ما تصيرين حلوه زي مامتك
الهنوف : يبه اشفيك صرت رومنسي مع الكل الا معاي ترا اغار
وراحت حضنت ابوها وسط ضحكات العايله قالت :كنت اخر العنقود لين جت ذي العنود وسرقت مكاني
نايف :كذابه انا اخر العنقود
الهنوف :انا اخر عنقود البنات
وزاد ضحكهم ما قطعه الا الاذان الاول لصلاه الجمعه
ودع ابو وافي بناته وطلع للصلاه ...
بعد الصلاه رجع ابو وافي ومعاه اخوانه جابر وسعود وعيالهم سطام وخالد وبدر
لأن لازم عندهم غدا الجمعه يكون ببيت كبيرهم وهو متعب
دخل ابو وافي مجلسه وهو يحيي اخونه : يا هلا يا هلا تفضلوا زارتنا البركه يا مرحبا تراحيب المطر اقلطوا حياكم اقلطوا اقلطوا
دخلوا اخوانه وسعود يقول : ماشاء الله غيرت مجلسك يابو وافي
ابو وافي وهو يمزح :كل ما طفشت منه غيرته
ابو سطام يضحك :مين وين لك الفلوس لا يكون فلوس حرام منا ولا منا علمنا من الحين ان كان تغير مجلسك بفلوس حرام مالنا قعده فيه مانبيه ينهد على روسنا
وافي كان يضحك وانقلب وجهه يوم عمه تكلم كذا وتذكر كل الي صار امس
قال خالد ولد سعود :لالا يا عم عمي ابو وافي ماهو راعي حرام اعرفه انا
سطام :شف بالله من يعزز لنسيبه
بدر : على طاري النسابه وين العنود
قال ابو وافي : قوم يا نايف جيبها لعمامها يشوفونها
قام نايف وقال : ابشر
شوي الا دخلت العنود المجلس ويرحبون فيها كلهم : يا هلا بالعنود
وافي : توها تزين الجلسه
ابو خالد : افااا ما تعجبك جلستنا
وافي : الا تعجبني بس العنود جلستها غير
دخل نايف ورا العنود وقال: يلا مين تختارين من اعمامك
وصارو يغرونها كل واحد بشي تحبه عشان تروح عنده اخر شي اختارت جدها متعب
قال جدها ابو خالد : افااا يالعنود تبيعيني عشانه ؟
قالت : لأنه قال بيجيب لي حلاو بعد الصلاه
متعب : يعني تحبيني عشان مصلحتك ؟زعلتيني
العنود باست خده وقالت :لا احبك عشانك بابا
خالد :وانا مو ابوك
العنود :انت بابا الثاني
...
في الجهه الثانيه من البيت جو سلايف ام وافي وهم ام سطام وام خالد
وبناتهم الجازيه واختها وجدان وبنات ام خالد ريم وديم وريوف
جلسوا امهاتهم بالمطبخ عشان يسوون الغدا
والبنات ساعدوهم شوي ثم طلعوا يسولفون بالصاله طلعت غاليه اخر وحده من المطبخ ودورت على العنود ما لقيتها قالت :وين العنود ؟
قالت ريوف :نايف جا واخذها
غاليه اخذت جوالها وفتحته وقالت : اي شوفيه ارسل لي انه اخذها لعمامها
ويوم ريم سمعتهم يتكلمون كذا قالت :ريوف وش دراك انه جا لها ؟
ديم : لا يكون تكشفين عليه يا الغبيه ؟
ريوف :لااا
ريم : اجل تكلمينه
ريوف : وش ذا الخوات يشكون فيني مستحيل اكلمه بس نادى من عند الباب وقال فيه احد قلت له ايه بنت عمك ريوف وقال اجل قولي للعنود تجي وطلعتها بطلوا شكوك بزياده مستحيل اكلم او اقابل نايف من زين وجهه عاد
نايف كان ورا الباب وسمعها وقال بصوت عالي :هييي انتي ما طالعتي نفسك اخر مره اذكرك كنتي بدون سنون وشوشتس طايره لا تتكلمين على اساس انك ملكه جمال
الهنوف :وهي صادقه من الاخر وجهك قبيييح
الجازيه :مو منجدكم للحين تحسبون انفسكم بزران بطلوا هوشه
غاليه : صدق بلا حركات بزران ... نايف وش جابك ؟
نايف : ابوي ارسلني للغدا اشوفه جهز ولا باقي
جت امه وقالت : اي جهز يا وليدي بس جيب من يعاونك ويشيل معاك
نايف : بروح انادي وافي ولا اجي الا انتم جهزتوه يالبزرات
وجدان :هييي انت لا تنافخ وش ذا التفكير القديم ترا الحين احنا بعصر المرأه ولو اقولك الغرامات والسجن الي يجي على اهانه المرأه ما رح اخلص الا المغرب
نايف : الهنوف مين ذي الي مسويه محاميه على روسنا
الهنوف وهي تضحك : هذي بنت عمك المحاميه وجدان وأي شي تقوله صحيح
نايف بخوف : اسف يا حضره المحاميه
جلسوا البنات يضحكون على نايف وقطع ضحكهم صوت امهاتهم من المطبخ ينادونهم يساعدون
...
في المجلس
نايف: قم وافي امي تبيك تعاوني
ابو سطام : قوم ساعد اخوك قومٍ تعاونوا ما ذلوا
وافي يضحك : ياعم وش الي قوم احنا اثنين بس
سعود : اييه هذي كلمه ابوي الله يرحمه لنا يوم يبينا نتعاون كان يقول لنا ذا المثل ذكرتني فيه يابو سطام الله يرحمه
قالوا كلهم بصوت واحد : الله يرحمه
ابو سطام يبي يلطف الجو : وش رايكم بعد اختبارات العيال نروح الديره
ابو وافي : ولله انه الشور الزين
ابو خالد:اي ولله ومنها نشوف اخونا ونسلم عليه من زمان ما شفناه
ابو وافي :اي ولله ياسر له وحشه
ابو سطام: اجل خلاص يوم الاربعاء نمشي ان شاء الله
ابو خالد :ان شاء الله
وافي ونايف : يلا اقلطوا الغدا
بعد الغدا وعلى المغاسل وقف ابو سطام يغسل وجنبه بالمغسله الثانيه وافي
وقال له : كيفك اليوم
وافي التفت يمين وشمال :تمام ما اكلت اليوم شي
ابو سطام :قالوا لك اننا بنروح الديره ذا الاسبوع ؟
وافي : ايه قال لي سطام
ابو سطام:قالوا لك مين اقترح ذا القرار
وافي : انت
ابو سطام : بالضبط ذا علاجك بنقعد بالديره لين تشفى
وافي: كيف الاجازه بتخلص بشهرين
ابو سطام :تجلس لحالك عند عمك ياسر اربع شهور وترجع
وافي : وش تعذر لبوي ؟
ابو سطام :قول له انك تبي تغير جو وهو بيوافق لأنه يحب الديره
وافي : ان شاء الله
جا سطام وقال :ها معاكم كلام خاص اروح واخليكم
ضحك وافي وقال : مشخصنها انت مره كان يقول لي اننا بنروح الديره  ولا يدري انك علمتني
رجعوا المجلس وجابوا شاهي وجلسوا يسولفون عن الديره وعن اهلها والناس الي فيها قال ابو خالد :اخبر ان ياسر عنده بنت اسمها ملاك هي وحيدته بين ولدين واحد منهم مات الله يرحمه وكانت تبي تخش الجامعه وما قبلوها مع ان معدلها بالثانوي ٩٨٪؜
سطام :كم عمرها ؟
ابو سطام :عمرها ٢٤
نايف : ياحرام كان يمديها تتخرج ذي السنه لو قبلوها
ابو وافي:نصيب
ابو خالد:بس سمعت انها تحب الكتب وأخذت كتب ابوي الله يرحمه وجمعتها وزادت عليها
...
في الجهه الثانيه من البيت
وجدان :باقي لي يوم الثلاثاء واخلص الاختبارات واتخرج اخيرًا
ريوف:يعني وقت الصياعه جاي
الهنوف : ترا تعلمت السواقه اقدر اسرق سياره وافي ونطلع فيها نحتفل فيك يالمحاميه
وجدان :تراني نذرت قبل شهرين ان تخرجت اغديكم واعشيكم واقهويكم انتم الثمان على حسابي يوم كامل
الهنوف : مين الثامنه ؟
غاليه : نسيتي بنت اختك يالهنوف
الهنوف :وايي عنودي نسيتها
ديم :بنات امهاتنا ناموا والرجال بالمجلس وش رايكم نطلع نتقهوى ونغير جو بس ساعه ولا ساعتين بالكثير
الهنوف :يلا
وجدان :احتاج ذي الطلعه عشان اغير جو من نكد الاختبارات
ريم :لازم نعلم امي فيها ضغط بيرتفع ضغطها لو صحيت ما لقيتنا
الجازيه :تكفين يا ريم بلا غباء ارسلي لها بالجوال واذا صحيت بتشوفها
غاليه : مدري خالد يمكن ما يسمح لي
طالعوا كلهم فيها وقالوا :منجدك
غاليه قالت :امزح ياخي محد يمزح معاكم انا مو زي المتزوجات القديمات انا متزوجه كوول امشي كلامي عليه غصبًا عنه
ريوف :صادقه وربي محد عدل خالد الا انتي كان متحجر حتى سناب مو مخليني احمله من بعد ما تزوجك تغير اشكرك يا بنت العم على جهودك في اصلاح فرد فاسد في المجتمع
غاليه :لا شكر على واجب
ديم :ريوف وش ذا الوقاحه جحدتي اخوك بسرعه ترا محد كان ينقذك من تكفيخي الا هو
ريوف : ما جحدته ترا بس كانت فيه صفات سيئه جت غاليه الحلوه وغيرتها فيه واشكرها بلا تكبير مواضيع ...روحي جيبي عبايتك خل نطلع
الهنوف :بنات تدرون عندنا بنت عم بالديره اسمها ملاك ضايفتها بالسناب ما تنزل الا كل شهر  مره
ريوف: ليه الدوره هي
الجازيه : مسكينه عايشه بالديره ماعندها شي تسويه
الهنوف :ما شفتي مكتبتها كبييره ماشاء الله وعندها آلات قهوه ومكتفيه بنفسها ما تحتاج تطلع
ريم :اذكر كنا نلعب معاها واحنا صغار بالديره ما كان عندها اخوات بس عندها اخين وواحد توفى الله يرحمه
الهنوف :وي كيف توفى الله يرحمه
غاليه :قرصه عقرب وعمره ٤ سنوات ومحد عنده العلاج الا جدتي الله يرحمها ويوم جت بتسوي له العلاج كان فيه مكون ناقص ومحد لقيه جلسوا يوم كامل كل اهل الديره يدورون ذا العشبه محد لقيها اخر شي توفى الله يرحمه
وجدان :طيب ليش ما يجيبونه الرياض للمستشفيات
ريم :عمي كانت رجله مكسوره ومحد يقدر يسوق غيره بالديره كل ابوهم شياب ولا صغار بالسن مره
ديم وهي تدمع :الله يرحمه
وكلهم بعدها قالوا الله يرحمه
بعدين الجازيه انتبهت لدمعه ديم وقالت :وااه بكت الحساسه بكت صاحت صاحت
قالت الهنوف :يلا بنات نطلع سياره السواق موجوده بروح اجيب مفتاحها وانتم تجهزوا لين اجي
طلعوا البنات الحوش ينتظرون الهنوف تجي الا طلع بوجههم نايف قال :ماشاء الله وين رايحين يا حلوات ...او اقصد يا حلوات كلكم الا ريوف
قالت ريوف:شوف مين يتكلم عن الجمال انا مستغربه للحين ليه ما حطوك بموسوعه غينيس كأبشع شخص بالعالم
نايف :لأنه ما يبون يهضمون حقك ...المهم وين رايحين صدق واستأذنتوا من مين ؟ ومين بيوديكم
جت هنوف وقالت :انا بسوق ونطلع عندك مانع لا سمح الله كلم محاميتي وجدان
وجدان بصوت خافت :خير لا تدخليني بمشاكلكم
قال نايف : لا ما عندي مانع بس من سمح لكم ابوي ولا عمي ولا امي ولا مين ؟
طلع ابو وافي وقال :انا سمحت لهم ...روح المسجد قبلي وأذن حلقي يعورني اليوم
وغمز للهنوف وقال : اول شي صلوا العصر وانتظروا الجو يبرد ولا تتأخرون مثل ما قلت لكم بس ثلاث ساعات تتقهون وترجعون
غاليه :ابشر
ابو وافي: كيفكم يا بنات
البنات :بخير
وراحوا يسلمون عليه
ابو وافي :الهنوف معتس فلوس ولا اعطيتس ؟ روحي السوق الشعبي واشتري ملابس تصلح للديره لأننا بنروح الاسبوع الجاي احنا وعمامك
الجازيه :الله متى
ابو وافي : الاربعاء ان شاء الله
وجدان :ياربي ما يمدي استمتع بتخرجي زي الناس
ابو وافي : لا بتستمتعين الديره حلوه
وجدان :اففف
الهنوف :اسمعوا نايف يأذن يلا ندخل ونصلي وبعد الصلاه نطلع
دخلوا البنات وقالت ديم :جعلني سروالك يا عمي فزعت لنا
وجدان :الحين منجد بنروح الديره ابصيييح
غاليه :اكيد ما بنطول بس اسبوع ولا اسبوعين بالكثير
ريم : اي اكثر مره طولنا شهر ورجعنا
الجازيه :ياخي كيف انتم ماشاء الله تتذكرون الديره انا ما اذكرها كثير
جت ام خالد وقالت :يلا بنات صلاه العصر بتروح عليكم
راحوا البنات صلوا ويوم جو بيطلعون الا امهاتهم صاحين يتقهوون
ام وافي: على وين ماشاء الله
الجازيه :بنروح الكوفي وبنمر السوق الشعبي نشتري ملابس عشان اعمامي يقولون بنروح الديره يوم الاربعاء
ام سطام :ماشاء الله ما بغينا ولله ان قلبي مشتاق للديره ومشتاق لأم سيّاف بالكثير
ام خالد:مين سمح لكم تطلعون ؟
ديم :عمي متعب جعلني سر... احب راسه
ام سطام :معاكم فلوس ولا اعطيكم
الجازيه :لا معاي
وجدان :معاي مكافئتي ما سويت فيها شي ذا الشهر
ام خالد :وانتم معاكم ولا اعطيكم
ريم :ايه معاي الي بيكفيني ويكفي خواتي
الهنوف :انا ابوي عطاني لا تسألين يمه لأننا بنتأخر مع السلامه
...
في الديره
ياسر :سيّاف شوف لك قعود طيب نذبحه يوم الاربعا ونعشي عمامك فيه
سيّاف :عمامي بيجون ؟ الله يحيهم أن ما وسعهم البيت توسعهم العين والقلب ...في قعود طيب ولد الحمرا ابذبحه لهم
ابو سيّاف:كفيت ووفيت يا ولد الاجاويد كفيت ووفيت
ملاك :سمعت طاري قعود الحمرا وش ناوين عليه
ابو سيّاف :هلا بك يا بنيتي هلا بك اعمامك تذكريتهم
ملاك :اي عمي متعب وجابر وسعود ؟ وش بلاهم عساهم بخير
ابو سيّاف :لا لا بخير ان شاء الله بس انهم ناوين يجونا بعد يومين روحي علمي امك علشان تجهز لهم البخور الطيب وترتب الغرف الي بينامون فيها وانتي ساعديها لا تتعب يا بنتيني
ملاك :ابشر من عيوني هذي قبل هذي