وانا في درب الهلاك ظهرت لي يا ملاك

43

ابو سيّاف :هاه اسمعك ؟
وافي:انت عمي ومعزتك مثل معزه ابوي ،وانا لي طلب عندك
ابو سيّاف :وش ؟
اخذ نفسًا عميقًا كأنما يستجمع قوه العالم أسره :ابي بنتك زوجةٍ لي على سنه الله ورسوله
سكت قليلًا وحك لحيته بتفكير مما زاد توتره اكثر فقال :بحطها بعيوني وقلبي والي تامر به يا عم ابشر
تمعن بوجهه وقال :ما عندنا بنات للزواج
وافي :كيف ؟
ابو سيّاف :الله يوفقك شف نصيبك عند غيرنا مالك عندي نصيب
وافي :وملاك يا عم ؟
قاطعه ابو سيّاف :ماهي نصيبك
وافي :ياعم اسألها اقل شي هي تبيني
ابو سيّاف :كلمه قلتها وما عيدها مالك نصيب
وافي بحزن :ابشر
خرج من المجلس مكسورًا والاهم من ذلك يفكر بكسر ملاكه ،وعدها كثيرًا ولكنه يخلف وعده الآن .ربما هي محقه تمادينا بالحرام حتى جافانا الحلال اتصل والده فرد :يبه
ابو وافي :هاه بشر
سكت قليلًا وقال بغصه :ما عطاني
ابو وافي :كيف؟
دخل بنوبه هلع وبدأ نفسه يتقطع :ما عطاني ...عمي ...عمي ما عطاني ملاك ...ما عطاني ...ما اخذتها ...ما اخذت ملاكي ...يقول مو ...يقول ماهي ...ماهي نصيبك ...ملاك مو نصيبي ...كيف
قاطعه والده :وافي
وافي :ما اخذتها ...ما قدرت ...ماني قد وعدي ...ماني وافي ...
ابو وافي :وافي تسمعني ؟
رمى هاتفه جانبًا وأقترب من أحد الجدران تسند عليه وهو يفتح ازرار ثوبه ويحاول اخذ نفسه
رأه نايف واقترب منه :وافي
رفع رأسه ونظر له :ما اخذتها ...ما اخذتها
نظر للهاتف بجانبه واخذه :الو
ابو وافي :من انت وين وافي؟
نايف:نايف انا ،وافي عنده نوبه
ابو وافي :تعرف كيف تهديه صح ؟
نايف :اي
ابو وافي :كويس قفل الحين وشوفه وانا بكلم عمك
نايف:طيب
وضع الهاتف بجيبه وامسك وافي بكتفه :قوم
وافي :ملاك ...
نايف:يا ولد قوم وخذ نفس
وافي :كيف اتنفس ...معرف شي ضعت ...ضعت
غطى عينيه :غمض عيونك ولا شي صار  منت متوتر ونفسك الحين طبيعي ماصار لك شي غير معتاد كل شي طبيعي والحياه هاديه
عاد لنفسه الطبيعي وفتح عينيه :نايف
نايف:شلونك؟
نظر لوجهه :ما اخذتها خطبتها من ابوها وقال مالك نصيب
نايف :وش سببه ؟
وافي :مدري عنه كذا فجأه قال ما عندي بنات للزواج حتى رأيها ما اخذه
نايف :خلاص لا تشيل هم بيكلمه ابوي ويتفاهم معاه
وافي :وإن ما اخذتها توها وسعت بي الارض ضاقت طفشت من ضيقها
نايف :خلاص لا تفكر بسلبيه وترجع لك النوبه
وافي :معليك مني هي وش بتسوي
امسك يده بقوه :نايف ملاك بتزعل وعدتها انا ما وفيت بوعدي
نايف :استغفر الله خلاص اسكت شوف ابوي يتصل
وافي:نايف ملاك ...
نايف :ايوه يبه
ابو وافي :عمك كلمته
نايف :اي وش يقول ؟
ابو وافي :ولله مدري ما فهمت منه شي وكأنه زعلان منا يقول مابي ازوجها لوافي وفيه مليون رجال غيره واحسن منه
نايف :وش ناقصه هو طيب؟
ابو وافي :سألته يقول مايناسبنا قلت له اخذت رأيها قال مو لازم انا اشوفه مو مناسب
سكت قليلًا وقال :يمكن عرف بالسالفه ؟
ابو وافي :ما ظنتي وإن عرف بيسأل جابر اعرفه ياسر ماهو باللي يقرر على جهاله
نايف :اجل وش جاه علينا ؟
ابو وافي :مدري ولله بكره نجي ونشوف،وشلونه وافي الحين ؟
نايف :يعني يحاول يكون تمام
ابو وافي :عطني اياه
نايف :هاك ابوي يبيك
اخذ الهاتف :يبه كلمه قول له بحطها بعيوني ما بيصير لها شي معاي قول له وافي تغير ويشوفها كل شي مستحيل يأذيها
ابو وافي :خلاص اهدى بكره بنجي انا وعمامك وبنكلمه ما بنطلع ان شاء الله لين تاخذها بس اهدى لا تكبر الموضوع
وافي :اكيد؟
ابو وافي :اكيد ودام عمك جابر معانا بيقنعه ولله ما نطلع الا وانت ماخذها
وافي :إن شاء الله
اغلق الهاتف ومده لنايف :باخذها بكره
نايف :اي بتاخذها معليك
تنهد وهو ينظر له :ليش انت جيت ؟
نايف :العصر ابوي قال لي انك بتخطبها وقلت اجي معاك الحمدلله جيت بالوقت المناسب
عانقه وافي :كيف كنت بعيش بدونك
نايف بسخريه:زي ما كنت بتعيش بدون ملاك
وافي :خلاص خلني افكر بأي شي ثاني
في الجهه الاخرى
تغسل الاطباق وهي تردد الاغاني بسعاده ،سمعت صوت الباب وخرجت من المطبخ لتتلقى خبر عمرها  :يبه ؟
ابو سيّاف :هلا
بقيت واقفه تنتظر منه البشرى الا انه قال :لا تطلعين اليوم
بلعت ريقها :ليش؟
ابو سيّاف :ما تعبتي من السفر ؟ نامي
ظنت انه لا يود من وافي رؤيتها فأبتسمت :ابشر
ابو سيّاف من خلفها :تريني رفضته لا تتأملين
اغمضت عينيها وبلعت ريقها ثم التفتت له :ليش؟
ابو سيّاف :ما جاز لي
ملاك :يبه...
ابو سيّاف بحده :انا ادرى بمصلحتك وكلمتي قبل كلمتك خصوصًا بذي الامور
اخفضت رأسها :ان شاء الله
...
من سواد التعاسه وطغيان الفراق حتى بياض الفرح وحلاوه اللقاء ،دخلت مكتبه وهي مبتسمه :انت هنا ؟
يوسف بتركيز :اي
اقتربت منه ونظرت لما معه :تصلح حقتي
يوسف :ما مداني اصلحها ذاك الاسبوع الحين جالس اصلحها
حضنته من الخلف وقبلت خده :بس انتبه ليدينك
ابتسم :بعد ما قربت اخلصها تقولين كذا
ديم بسخريه :اسوي نفسي مهتمه وكذا
يوسف :يبي لي اعلمك تصلحينها
ديم :لا ان شاء الله ما تنكسر مره ثانيه
يوسف :خليها بمفتاح البيت عشان ما تجيها ضغوط وظروف صعبه
ابتعدت عنه :لا وين بمفتاح البيت ماني مجنونه انا
يوسف :قلت مفتاح البيت مو ترمينها
ديم :عندي مشاكل مع مفتاح البيت
لف كرسيه نحوها :تبين جلسه نفسيه؟
ديم :مم ممكن
ارتدى نظارته:اجلسي بشكل يريحك
جلست على المكتب:كذا اتوقع اني مرتاحه
يوسف :اسمعك
ديم :يوم ابوي عطاني اياها قلت له بس ماعندي سياره قال خلاص خليها معاك لين يسمحون بالسواقه بالسعوديه ولا تطلعين تدرسين بالخارج وتشترين سياره قلت له واذا ما صرت دكتوره قال وقتها تعلقينها بمفتاح بيتك وتتفرجين فيها انتِ وزوجك وعيالك وتقولين لهم ذا كان حلمي بس انا ما وصلت له ...
قاطعها :طيب خليني اكمل باقي القصه
ديم :تفضل
يوسف :وصرتي تعتبرين انك تعلقينها بمفتاح البيت دليل على فشلك وانك ما وصلتي لحلمك ؟
ابتسمت :صح ،وش الحل ؟
اقترب منها بالكرسي ووضع يده خلف ظهرها:الحل نشتري لك سياره وتعلقينها بمفتاحها
ديم :مالي خلق
ضحك وهو يتراجع :خلاص اذا صار لك خلق كلميني
نزلت من المكتب :تعرف احس ابي اشتريها بفلوسي
يوسف وهو يجمع العده :فلوسي هي فلوسك ولا ؟
ديم :اقصد راتبي اذا توظفت
يوسف :بعد سنتين
ديم :سنه ونص
يوسف :ما يهم المهم اني معاك بتخرجك
ديم :بتحضر كدكتور او كزوج؟
يوسف :نشوف مزاجك بعد سنه ونص
ديم :يمكن اصير مو مزاجيه وقتها ؟
يوسف :وقتها نشوف
قام :ترا ما بدرسك ذا السميستر
ديم :كذاب
يوسف :ولله مافيه ماده لك انا ادرسها
ديم :لو ادري انه اخر سمستر تدرسني فيه كان حللت المحاضرات تحليل
يوسف :كيف بالنوم ؟
ضحكت :ما يضحك
يوسف :وعلى ايش تضحكين ؟
ديم :توني استوعب اني أول مره اشوفك بلبس غير الثوب واللاب كوت
يوسف :ليه شفيه شكلي يضحك ؟
ديم :مافيه شي بس كذا احسه غريب على عيني
يوسف :هذا يوسف الطبيعي
قتربت منه وقرصت خده بلطف :وانا مغرمه بيوسف الحقيقي طالع كيوت
يوسف :كل ذي الرجوله والشيب واخرتها كيوت ؟
ديم :وش اقول ؟
يوسف :برستيج هيبه كريزما
ديم :معلينا منك انا تشوف فيني اختلاف بشخصيتي وشكلي؟
يوسف :لا ديم هي نفسها ديم
ديم :اي اعرفني ما احب اتغير لكن انت ابو وجهين
يوسف:مو وجهين فيه علاقات لازم تكون سطحيه وفيه علاقات لازم تكون عميقه
ديم :بس علاقاتك العميقه محدود مره اكاد اجزم لك انه بس انا وغازي وامك وابوك علاقات عميقه حتى اصدقاء شكلك ما عندك
يوسف بإبتسامه :اكاد ايش؟
ديم :اكاد اجزم لك
يوسف :حركات ولله مصلطحات جديده
ابتسمت :احاول اوصل لمستواك
جلس على الكنبه:عشر سنوات وتوصلين
ديم :انا سريعه التعلم بوصل بأقل ،خلنا بموضوعنا الاول علاقاتك قليله مره
يوسف:طيب راحه علاقاتي العميقه محصوره على زوجتي واخوي وامي وابوي ما احتاج زياده لأني كذا انام مرتاح بدون هموم
جلست بجانبه :اكتفيت يعني عيالك ما بتتعمق بعلاقتك معاهم ويصير عندهم دادي ايشوز ؟
ضمها تحت جناحه :بتعمق بس مو العمق الي احكي لهم همومي يعني علاقه اب واولاده ان شاء الله وبالاول والاخير انا دكتور نفسي واعرف اتعامل مع الناس
ديم :دكتور نفسي بس يقول لك المثل الخياط ما يقدر يخيط سرواله
يوسف بسخريه :وهو ليه يلبس سروال مشقوق من الاساس
ديم وهي تحاول اخفاء ابتسامتها :تموت لو ما خربت امثالي تموت
يوسف :لأنها امثال الامثال ما تشمل الجميع يمكن فيه خياط كسر القاعده وخيط سرواله ؟
ديم :طيب خلاص اقتنعت
يوسف :زعلتي
ديم :اي
يوسف :احب صراحتك ،ليه زعلتي؟
ابعدت يده عنها:مدري عنك يمكن لأنك دايم بأي نقاش تحاول تبين انك الصح وانا الغلط وانك اكبر مني وتعرف اكثر يعني عندك جنون عظمه كنك قصيمي
يوسف بإبتسامه:وش دخل القصمان ؟
ديم :شفت الحين كذا تحاول تفكك كل شي وتحلله نفسيًا واجتماعيًا انا اتكلم بشكل عام ...
امسكت وجهه :ولله يوسف فيه اشياء لو كذا تعدي عليها بدون ما تحللها بتصير حياتك حلوه صدقني
يوسف :طيب بحاول عشانك
ديم :من اول يوم هوشه الله يستر
يوسف :لا لأن تونا جديدين على بعض ولسى ...
ديم :يوسف !
يوسف :طيب خلاص ،لأكثر من عشر سنوات هذي جزء من شخصيتي مقدر اتخلى عنه بسهوله
ديم:ان شاء الله تقدر
ضمها مره اخرى :الريموت عندك ؟
ديم :اي
يوسف :شغلي اي شي نتابعه لين يأذن العشا ونصلي ونطلع
استعدلت بجلستها :اي شي؟
نظر لوجهها :فهمت ذي النظره لا ولا والف لا
ديم :بليز
يوسف:سبونجبوب كله مافيه منطقيه مقدر عذاب نفسي ذا
ديم :بليز حبيبي بيعجبك ولله
يوسف :خلاص طيب شغليه
ديم :تبيه انجليزي ولا عربي ؟
يوسف :فرقت يعني كله يألفون اشياء مو منطقيه
ديم :طول محنا جالسين بذي الغرفه اسوي حظر لذي الكلمه خلاص
يوسف :طيب خلاص شغلي سبونجبوب والشكوى لله
ديم :وبعدين نطقك لأسمه ينرفز اسمع النطق الصح الحين
يوسف :طيب
ديم :شفيك تسلك ؟
اخذ نفسًا عميقا :ديم حبيبي طالعي فيني
نظرت له :هاه
يوسف :شوفي انا يا أما اتكلم بفلسفه وجنون عظمه على قولتك ولا اسلك ما فيه ثالث لذي
ديم :طيب خلاص تكلم بطبيعتك وانا بحاول اتأقلم بس بالمقابل انت بتتأقلم مع سبونجبوب
سحبها لحضنه :خلاص حبيبتي خلينا نستكن شوي ونرتاح من نقاشاتنا الدائمه
ديم :خلاص اسكت الحلقه بدت،وش ذي الكنبه مب مريحه وش رايك ننقل التلفزيون بغرفه النوم عشان السرير مريح اكثر
يوسف :ما يحتاج
ضغط زر بجانبه فتحولت الكنبه لسرير :متحسب لكل الحالات
ديم :شقصدك لو تهاوشنا واحد يطلع ينام هنا ؟
حضنها اقوى :لا لا لا لو تهاوشنا ننام بنفس الفراش لو ايش سمعتي ؟
ديم بإبتسامه :طيب
...
ام سيّاف :ملاك
لم ترد
جلست بجانبها :ادري انك مو نايمه وقاعده تبكين وسادتك مبلوله
ملاك وهي مغمضه عينيها :ممكن تخلوني انام ؟
ام سيّاف :ادري بك ما بتنامين وبتجلسين تبكين
ملاك :طيب سؤال يمه ليه يرفضه بدون سبب ؟ لو قال لي اي سبب برضى بس كذا يقول ما جاز لي وكلامي فوق وقبل كلامك ولله توجع يمه توجع
مسحت على شعرها :هو ابوك وادرى بمصلحتك يا يمه عاش اكثر منك وشاف من الحياه ما شاف يمكن يعرف شي عن وافي انتِ ما تعرفينه
جلست ملاك ومسحت دموعها :قال لك شي عنه ؟
ام سيّاف :لا ما قال شي لي ساعه ازن فوق راسه ليه تقطع رزق البنت ما يرد
عادت للبكاء :ليش تغير فجأه ؟ ما كأنه ابوي الي عرفته طول عمري
ام سيّاف :يا ملاكي ياروحي الابوه والامومه تحتاج شده بعض الاحيان انتِ الحين ما فهمتي ليش رفض بس بعدين بتشكرينه اكيد
نظرت لوالدتها :انتِ عاجبك صح؟ ما تبون الا راشد ولد الستين كلب ،دام كذا انا احرم على نفسي الزواج غير من وافي
دخل ابو سيّاف على كلمتها فعم الصمت
ام سيّاف :ياسر اسمع ...
ابو سيّاف ببرود وهو خارج :اول واحد يجي يخطبك بتتزوجينه مهما كان الا وافي
عادت للبكاء بشده وحضنت امها :معد اعرفه معد اعرفه تغير حيل
ام سيّاف :خلاص يا بنتي خلاص قطعتي قلبي عليك
ابتعدت ملاك :بالله هذا ابوي الي اعرفه ؟ هذا زوجك يا يمه الي عاشرتيه اكثر من عشرين مدري ثلاثين سنه ؟ حتى انتِ عرفتيه تغير ،فيه احد قال له شي اكيد
ام سيّاف وهي تمسح على ظهرها :بروح اشوف له الحين لكن انتِ خلاص لعد تبكين نامي الحين وبكره سيّاف وزوجته بيجون يفطرون عندنا لا تبينين لهم شي واخوك عاد تعرفينه لو وسوس له ابوك بيروح يذبح وافي
خرجت ام سيّاف بينما ملاك لا تزال غارقه بالدموع ،اخرجت عقدها ونظرت له وهي تبكي ثم عانقته
في الجهه الاخرى
ام سيّاف :قول لي بس سبب اي سبب على الاقل لو تكذب علي لكن انت كذا ساكت ما تقول شي
ابو سيّاف :قلت الي عندي اول واحد بيجي يقول زوجني بنتك بعطيه
ام سيّاف :انا لله ياربي
سمع صوت اغلاق غرفتها بالمفتاح وقام :ملاك
وقفت بطريقه:خلها اقل شي تعيش حزنها تبكي يومين وتنساه
تنهد ابو سيّاف :خاب ظني ببنتي كيف تحبه من وراي ؟ وولد اخوي الي عيشته عندي ببيتي كيف يسويها فيني
ام سيّاف :هذا موضوعك ؟ واخوك متعب مو حب العنود وغدى يلحق وراها من جبل لجبل ؟ وش نهايتهم تزوجوا ليه تفرق بنتك وولد عمها دامه جاي بالحلال
سكتت قليلًا وقالت :ولا سوا فيها شي؟
ابو سيّاف :لا اعوذ بالله ما سوا شي ،بعدين موضوعي مو حبته وحبها موضوعي شي ثاني
ام سيّاف :اجل ايش ؟ ليه ترفض ولد اخوك وهو ولد اخوك احق واحد ببنتك
ابو سيّاف :عرفت عنه شي
ام سيّاف :وشو
ابو سيّاف :خلاص من التحقيق الزايد عرفت عنه شي خلاني اشوفه مو مناسب لبنتي
ضربت كفوفها :اما انا غسلت يدي منك و معد بقول شي
في غرفتها قبل لحظات
ارسلت ياقوت بأمل ان يكون موجودًا فعاد بعد قليل محملًا برد على رسالتها :
قابليني عند مكاني
بدأت بربط الملائات جيدًا ثم ثبتتها بالسرير ونزلت دون ان يلحظ أحد ،تخاطر بكل شيء لأجله ولأجل تصديق أمل كاذب وصلت للمكان ورأته من بعيد فسرعت خطواتها وصرخت عند اقترابها :وافي
التفت لها :ملاك
توقفت عنده وقالت بغصه :وافي ابوي ...
قاطعها :مارح اتركك ابوي بيجي وبيكلمه باخذك اوعدك
مسحت دموعها :لا الوضع مو كذا ابوي يبي يزوجني صار انسان جديد ما اعرفه قال...اول شخص بيخطبك بوافق عليه الا وافي ...ما ابي اعيش مع غيرك
وافي:ملاك قلت لك ابوي بيكلمه لا تخافين مارح يصير شي
ملاك:وافي انت ما فهمت ابوي تغير كأنه انسان جديد مستحيل يسمع لأعمامي ولو قال لسيّاف بيعاملونا مثل اليهود واسوء
زاد بكائها ونظرت للسماء الماطره ثم له وقالت :اخاف تكون اخر مره اشوفك فيها معرف وش اسوي اتمنى احضنك واتمنى امسك يد...
قاطعها وهو يحضنها بأقوى ما لديه ويهمس بأذنها: انا وعدتك وباقي على وعدي ما يحيدني عنه الا الموت
أمسكت وجهه واغمضت عينيها ولاصقت جبهتها بجبهته ،همست بصوت اخفت من وقع المطر حولهم:وانا انتظرك
كثيرًا ما تجاوزنا الحدود ولكن بأفعال لا تستحق لتكن الاخيره مستحقه ،ولتبقى ذكرى إن خاننا الزمان،ليكتب لي إنجاز/سيئه ،أنني عانقت حبيبتي حرامًا...وربما قبلتني
اقتربت منه حتى تخالطت انفاسهما لكنها سرعان ما تراجعت وهي تمسك رأسها:لا لا لا لا
وافي :ملاك انا...
قاطعته:صح اني ابيك بس ابيك بالحلال ما...
قاطعها بهذه الابيات وهو يقاوم غصته:
مابغيتك بالحرام ومابغيتك بالظلام
مابغيتك غير بالعز الشريف المهتدي
مابغيتك بالتلاعب مابغيتك بالكلام
مابغيت الا اخوك يصير "خالٍ" لولدي