وانا في درب الهلاك ظهرت لي يا ملاك

16

وجدان باقي واقفه مكانها بعد ما راح تركي واخيرًا قررت ترجع البيت وهي بالطريق جتها سياره من ورا وسمعت صوت البوري ووقفت وحطت يدها بالشنطه على اساس لو كانوا متحرشين ترشهم بالفلفل كان تركي لحق عليها وقال :يا حلو ممكن النمبر ؟
وجدان طلعته وقالت :قليل حيا
تركي :لا ترشين تراني انا وبعدين ليش تشيلين بخاخ فلفل بالديره محد بيتحرش فيك
وجدان :محد يدري بأي مكان فيه متحرشين وبعدين ليش ما رحت ؟
تركي :ابي شي اتواصل فيه معاك عشان ما اشتاق لك
وجدان :يسمحون بالجوال بالدوره ؟
تركي :لا بس باخذه واخليه عند واحد من العيال ويطلعونا هم كل ويكند بتطمن عليك وارجع
وجدان :بعطيك بس اخاف تهربه بعدين وتطيح بمصايب
تركي :اكثر شي يحرموني من الاوف
وجدان :لا تهربه
تركي :طيب وعد ما بهربه
وجدان :يلا روح بسرعه قبل ما يشوفنا احد
تركي :ما عطيتيني
وجدان :كتبته من اول بالورقه
تركي :تبين تسولفين معاي ؟
وجدان :خلاص روح الحين تشوفنا المخرفه ذيك
تركي :عادي ما يهمني
وجدان :طيب روح عشان ما تتأخر وبكلمك فويس طول الطريق
تركي :وعد ؟
وجدان :اي وعد
تركي :اجل مع السلامه
وجدان ابتسمت :مع السلامه
بعد ما راح بقيت مكانها مبتسمه شوي وقالت :وش اسوي انا زي الهبله
دق جوالها وكان رقم جديد
وجدان :الو
تركي :الو اشتقت لك
وجدان :توك رحت باقي اشوف سيارتك كيف اشتقت ؟
تركي :يا بعد حيي تراقبين السياره
وجدان :معاك سماعه ؟
تركي :لا
وجدان :حطها عشان ما تلقم مخالفات الطريق كله
تركي :الحين احطها ...ايه ممكن تعرفينا عليك اكثر يا محاميه
وجدان :وجدان بنت جابر
تركي :بس ؟ابي اعرف وش تحبين تاكلين لونك المفضل الافلام الي تحبينها حيوان اليف شي
وجدان :انت وش تتوقع اني احب
تركي :تحبين البيتزا ولونك المفضل اخضر وتحبين افلام الخيال العلمي وتحبين القطاوه
وجدان :احب البيتزا صح احب القطاوه صح الباقي غلط
تركي:كيف ما تحبين اللون الاخضر ؟
وجدان :لازم احبه ؟
تركي :اكثر لون انذكر بالقرآن ولون لباس اهل الجنه الله يجعلك زوجتي بالدنيا والاخره
وجدان ساكته
تركي:شفيك سكتي ؟
وجدان :اول مره اكلم احد ما كنت متخيله اني بيوم بصير كذا كنت متخيله حياتي مستقله بعيش وحدي واشتغل وعندي صديقات واهل وبس
تركي :يعني مو عاجبك ؟
وجدان :لو مو عاجبني كان شفتني اكلمك الحين عن نفسي ؟
تركي :اتوقع وصلتي الحين البيت صح ؟
وجدان :كيف عرفت ؟
تركي :احفظ طريقك وكم تاخذين فيه وقت
وجدان :يلا انا بقفل اسمع اصواتهم بالحوش
تركي :لا لاتقفلين خليني على الخط
وجدان :وش اقول لهم ؟
تركي :صديقتي
وجدان :طيب ...عادي تكلم ترا لابسه سماعه
تركي :لازم المحامين عندهم سماعه
وجدان :اي
ريوف :شرفتي حبيبتي وين رحتي ؟
وجدان :رحت اتمشى شوي
ريوف :وش فيك فرحانه
وجدان :مقدر اقولك الحين لأني قاعده اكلم زميلي بالعمل
ريوف:زميلك وش اسمه
وجدان :فراس
ريوف :تعرفين شكله كيف
تركي بالسماعه :صرفيها
وجدان :مكالمه جماعيه الفريق كله وفيه بنات بس الحين الي يتكلم فراس
ريوف :تمام ادخلي سوينا مكرونه الي تحبينها وبقينا لك بس الملح ناقص حطي شطه
وجدان :ما يحتاج
مشت خطوتين ووقفت قالت :عادي تجيبينها لي فوق مع سبرايت عندي شغل
ريوف :اي عادي بس فيه سفن مافيه سبرايت
وجدان :فيه ببسي ؟
ريوف :اي
وجدان تسوي نفسها تتكلم عن الشغل :بس اخوي فراس الملف انا مدققته ويعتبر دفاع عن النفس وانا شاهده هناك
تركي :بعدين بتقولين لي من هو فراس ذا
وجدان :لا لاتعلق عليه تراه دليل
تركي :تتكلمين بالشيفرات؟
وجدان :وذا الي اقوله من ساعه
تركي :الحمدلله كنت بلطم اي شخص اسمه فراس قدامي
وجدان :يطلعون شجاعتهم بمواقع غلط
تركي :ما فهمتك يا قلبي الحين انتي تسبيني ولا تمدحيني
وجدان :الاثنين
ام سطام :من تكلمين
وجدان تسوي نفسها مستعجله :الشغل
ام سطام :الله يوفقك اقنعتيهم تقعدين بالديره ؟
وجدان :اي قالوا بينتظروني
تركي:طبعًا بننتظر وجدان بننتظر ولو تبغى بنوقف الزمن عشانها نوقفه
وجدان :ذي النقطه كأنك مبالغه فيها اختي
تركي :ما ابالغ ولله من الحين انتظر الدوره تخلص
وجدان :لا تستعجلين بالتدقيق يعني هو من اسمه تدقيق ياخذ وقته
تركي:متى توصلين الغرفه وتبطلين ذي الشيفرات ؟
وجدان :قبل شوي
تركي :بعد شوي ؟
وجدان :اي
سكتت شوي وتركي سمع صوت تقفيل باب قال :الحين وصلتي
وجدان :وما بغيت كأني امشي على بيض من التوتر
تركي :وبعدين تعالي انا قلت لك قولي صديقتي ليش تقولين فراس
وجدان :لأن زميلي صدق اسمه فراس
تركي :مو شخصيه خياليه ؟
وجدان :اي
تركي :ماشاء الله وتعترفين كذا بكل برود (يقلد صوتها )زميلي اسمه فراس ،متى تعرفتي عليه ؟
وجدان:اول امس دخلت مكالمه جماعيه مع الفريق
تركي :كم ذكر بالفريق ؟
وجدان :اثنين
تركي :عرفنا الاول من الثاني ؟
وجدان :ما ادري حتى انا ما اعرفه وبعدين ليه تحقق معاي ؟
تركي :غيره الرجل الشرقي
وجدان :شكلي حبيت الشخص الغلط
تركي :اطقطق يا حبي اطقطق بغيت اكمل طقطقه عليك بس حبيت كلمه حبيت منك
وجدان :لا يكون بتقول عيديها بسمع رومنسيه بايخه
تركي :كيف تبغين الرومنسيه
وجدان :انا اؤمن ان الرومنسيه افعال
تركي:طيب ليه ما لاحظتي من اول يوم اراقب طريقك واحفظ كلامك ذي افعال تعبر يعني صح ؟
وجدان :اي لاحظتها بس حسيت اني عمياء على قولهم الحب اعمى
تركي :لحظه يعني انا قبيح ؟
وجدان تضحك:ربط المواضيع ؟
تركي :يالضحكه الي اصير لها فدا واروح
وجدان :صدق وش دخل
تركي :شفتي ترند الاكس الي بتيك توك البنات يفضحون اكساتهم ويحطون صورهم والتعليقات يقولون الحب اعمى لأن الولد قبيح
وجدان :لا انت مو قبيح انت حليو
تركي :ولله ما يندرى عنك وش حليو
وجدان :الله حق وسيم
تركي :صدق
وجدان :ليه ما عندك ثقه بنفسك ؟
تركي :الا عندي بس ابغا اشوف نظرتك لي
وجدان :وتفرق يعني ؟
تركي :تفرق كثيير
ريوف تدق
وجدان :تفضلي
ريوف :نفس ما تحبين
وجدان :شكرًا
تركي :المكرونه اكلتك المفضله ؟
وجدان :اي
تركي :وتحبين السبرايت اكثر من السفن؟
وجدان :اي
تركي :وما تحبين تخربين المكرونه بالشطه ؟
وجدان :اي
تركي :اول ثلاث معلومات اعرفها عنك
وجدان :وانت ما اعرف عنك شي كم عمرك ؟
تركي:عمري ابتدا يوم شفتك ونسيت احسب
وجدان :حتى انا نسيت
تركي :بس بالله كيف عضلاتي
وجدان :ترا خفت يوم شفتك ونسيت يعني ما ركزت لأنه مو لازم اركز
تركي :وانا حسبتك جنيه من جمالك سمراء وعيونك حلوه وخشمك مرتب مو مثل خشمي مطبات
وجدان :شكل صدق عندك انعدام ثقه بالنفس ترا خشمك حلو انا حبيته عادي
تركي :دامك حبيتيه انا حبيته
وجدان صدق كم عمرك فرق العمر مهم
تركي :بعمر اخوك
وجدان :٢٧؟
تركي :اي
...
ام راشد :تركي راح وراشد بيروح وانتي بتروحين والمياسه بيجيها نصيب وتروح ويخلى البيت وارجع لحالي
المياسه :انا ما بتركك وحتى بجيب لك ثامر يملى لك البيت حياه
ترف :اي وتنسوني
ام راشد تضحك :كلكم عندي سوا وانتي إن جاك نصيب وارتحتي له وافقي يمكن يعزك اكثر منا
المياسه تشيل شماغ ابوها :مافيه مثل عز ابوي وثم عز عمتي
ام راشد :وين بتروحين ؟
المياسه :بطلع ارعى الغنم
ام راشد :اشتري لها علف احسن
المياسه :لا الرعي افضل
ام راشد :خذي لك ماي من هنا وتمر يمكن تدوخين
المياسه :اي اخذت
ام راشد :لا تبعدين كثير ولا تطولين والمره الجايه نقول لابو راشد يكلم سيّاف يرعاها لك
المياسه :ومنهو ذا سيّاف ؟ محد بيرعى الحلال الا انا
ام راشد:دامك تبين براحتك بس بطلع معاك كل فتره وفتره اشوف وين تروحين
المياسه :قولي لي اتمشى اغير جو عادي
ام راشد :اغير جو معاك
المياسه تضحك :طيب
...
سطام :ناقتك طلعت من التنويم ؟
سيّاف :اي
سطام :مبروك ما جاكم ويتربى بعزك
سيّاف :تراها مو زوجتي
سطام :متأكد لو تزوجت بتحبها اكثر من زوجتك
سيّاف :مدري من هي زوجتي بس احبها من الحين الله يحفظها
سطام :وش ذا المنبه ؟
سيّاف :لازم اطلع ناقتي كل يوم ذا الوقت ترعى من حشائش الارض
سطام :الجين تأكدت بتحبها اكثر من زوجتك
سيّاف :بتجي معاي ؟
سطام :لا
سيّاف :براحتك بس بسوي براد شاهي
سطام :ما ابي شاهي طفشت منه احس لو يسحبون دمي بيطلع شاهي
سيّاف :اي فقدت خويك تركي كان يجيب لك قهوه
سطام :الله يوفقه
سيّاف :انا اشك انك بتتزوج عسكريه
سطام :ليه ؟
سيّاف :دايم تنجذب للعسكر ابوك عسكري وخويك عسكري واخوه حرس وطني واختك محاميه زوجتك بتطلع عسكريه
سطام :الحين وش حدك علي؟
سيّاف :القدر
سطام :رح بس لا تموت ناقتك
سيّاف :مقابله النياق احسن منك
سطام :اي اي توكل بس جو شيبان معد باقي الا تغني المعلقه والكريك
...
المياسه طلعت ترعى وتفكر بكل شي وش نهايه القضيه مين بيفوز انا ولا هم ؟ ثامر بيتغير مثل ما هم تغيروا ولا بيبقى مثل ما هو ؟ وينهم الحين والف فكره وفكره ببالها أنهت كلامها بتنهيده بعدها قالت :يارب كن معي
بعد دعائها ذا سمعت صوت جاي من بعيد ،صوت مرعب ؟ صوت سلاح ؟ صوت صراخ ؟ لالا صوت شخص يغني واي اغنيه يغني سمعت صوت شخص يقول :الفرق بين الملعقه والكريك ...الفرق بين الملعقه والكريك ان الكريك اكبر من الملعقه
ضحكت المياسه بنفسها وقالت :وش ذي الاغنيه الغريبه
تجاهلت الصوت بس ما زال يكرر نفس الجمله ويلحن كل مره بطريقه بالاخير نرفزها وقررت تروح لراعي الصوت وتواجهه
المياسه :هي انت
سيّاف :بسم الله
المياسه :وش ذا الازعاج
سيّاف :ابد ولله اشرب شاهي واغني
المياسه :اغنيتك خايسه ومزعجه رح اشرب شاهيك بمحل ثاني
سيّاف :ابي هنا
المياسه :هنا محل الرعي ما تشوف الرعاه هنا ؟
سيّاف :وانا ارعى هنا ما تشوفين ناقتي ذيك؟
المياسه تضحك:ترعى الا ناقه وحده شكلك ما تفقه شي بالابل
سيّاف :افقه احسن منك بس ذي مريضه كانت منومه بسبه واحد غبي ما عرف يولدها
المياسه :شكله انت
سيّاف :ولد عمي
المياسه :وش اسمها ؟
سيّاف :مين
المياسه :الناقه مين يعني زوجتك ؟
سيّاف :اهاا اسمها الشقرا وما تحب احد الا انا
المياسه :ليه الشقرا قهوه هي ؟
سيّاف :لونها زي القهوه ما تشوفين
المياسه :تقول ما تحب احد
سيّاف :اي وين رايحه
المياسه :بروح لها
سيّاف :يا مجنونه تعالي بترفسك ولا تاكل راسك
المياسه تجاهلته وقررت تغامر وسيّاف مكانه يراقب موتها بس المفاجأه انها ما سوت اي رده فعل وحتى حبتها سيّاف قرب وقال :كيف ؟ حتى ابوي ما تسمح له يقرب منها
المياسه :قد ركبت عليها ؟
سيّاف :مستحيله ذي
المياسه :اجل شوف
قربت منها وهمست بأذنها وبركت الناقه وطلعت عليها
سيّاف :سحر ذا كيف كذا ؟
المياسه :اي سحر اسمه الاسلوب
سيّاف :انزلي الحين تتضرر منك
المياسه :من ثقلي
سيّاف :انزلي ولا انزلك بطريقتي
المياسه :واضح حبتني
سيّاف سحب رجلها وبغت تطيح
المياسه :وش تسوي تبي تقتلني
سيّاف :انتي بتقتلين ناقتي
المياسه نزلت :ولله تصدق شكل النياق احسن من الغنم لو بعت ستين راس من الغن كم تجيب لي ناقه ؟
سيّاف :ضان ولا ماعز ؟
المياسه :ثلاثين ضان وثلاثين ماعز
سيّاف :تجيب لك قعود صغير
المياسه :والقعود ما يتكاثر لحاله وش الحل ؟
سيّاف :تدورين واحد يشتري ذكر وانتي انثى وتتشاركون مولود لك ومولود له لين يصير عندك ذكر وانثى وهو ذكر وانثى وتنتهي الشراكه
المياسه :انت بتشاركني ؟
سيّاف :ولله شفي
المياسه :الي جابته ناقتك ذكر ولا انثى ؟
سيّاف :توأم ذكر وانثى
المياسه :خلاص تم انا باخذ الانثى وانت الذكر بس متى السوق عندكم وابيع حلالي واخذه
سيّاف :السوق بكره
المياسه :وين موقعه ؟
سيّاف :يبعد ساعه عن هنا ما بتقدرين تروحين
المياسه :تنزل من قدراتي ؟ كنت بعطي اي احد يوديه بس عشان كلمتك ذي انا بروح بنفسي
سيّاف:خلاص نشوفك هناك تدخلين بين الرجال وتبيعين عليهم
المياسه :وش فيها اذا اخدم نفسي ؟
سيّاف :انا مدري ليه هنا اناقشك
المياسه :لانك بتصير شريكي بالنياق
سيّاف :انتي بس بيعي حلالك وتعالي عندي اعطيك ذكر وانثى بسعر وحده
المياسه :قصدك ما اقدر ابيعهم ؟
سيّاف :محد بينتبه لك بالسوق وشكلك كذا
المياسه :وش اسوي افرد شعري الحريري وارقص ؟ خلاص انا بعتبره تحدي وابيع حلالي وبكره بنفس ذا الوقت اجيب لك الفلوس وانت تجيب لي ذكر وانثى بسعر وحده
سيّاف :نشوف اذا احد وداك
المياسه :اروح على رجولي مثل ما جيت على رجولي
سيّاف :اذا جيتي على الوقت ما يكون اسمي سيّاف
المياسه :اختار اسمك الجديد من الحين