وانا في درب الهلاك ظهرت لي يا ملاك

20

سيّاف :ليش بدر يدق علي ؟ نسيناه
سطام :كيف ؟
سيّاف :صبر برد عليه...الو
:السلام عليكم
سيّاف :وعليكم السلام بدر ؟
:اخوك بدر ؟
سيّاف :ولد عمي عسى ما شر ؟
:لقيناه طايح بالمحطه مغمى عليه والحين بالاسعاف رايحين الرياض
سيّاف :احنا رايحين الرياض بعد اي مستشفى بتروحون؟
نايف :مستشفى ؟
سيّاف :اي ...خلاص اعرفه
وافي :وش صار ؟
سيّاف :بدر طاح وشالوه بالاسعاف
احمد :الصباح كان كويس كيف كذا ؟
مشاري :يمكن عنده مشاكل فقر دم ولا شي
نايف :لا ما عنده بدر بس جاه سرطان زمان وتعالج منه ما اتوقع يأثر
سطام :الحين نعلم اهله ولا كيف؟
وافي :علموا خالد بس واذا وصلنا المستشفى نعلم باقي اهله
نايف :ادق عليه ؟
وافي :انا بكلمه عشان ما يتوتر
في الجهه الثانيه سياره خالد
خالد :الحين ما بتخلينا نسمع شي غير بيبي شارك ؟
العنود تغني ولا همها
غاليه :شوفي شوفي الاسعاف جا
العنود شهقت :مين فيه ؟
خالد :يمكن حادث
غاليه طفت الجوال :ويي طفى شحن ما يمدينا نشغل بيبي شرك خلاص شوفي الطريق كيف حلو
خالد :كله صحراء...اخوك يدق
غاليه :شفيه ؟
خالد :الو
وافي :غاليه معاك؟
خالد :هاه اجل وش رايك ؟
وافي :طيب بقول لك خبر لا تتوتر ولا تبين لها طيب
خالد :وشو ؟
وافي :نزلنا المحطه و...
خالد شهق بسخريه :نزلتم المحطه وشريتم من البقاله وما عندكم فلوس يا غبائكم
وافي :صبر خلني اكمل نزلنا هناك وقلنا ربع ساعه ونرجع السياره واخوك نزل وطلعنا ونسيناه
خالد ما تحمل وضحك :وش اسوي يعني ؟
وافي :لو تقاطعني مره قانيه بصدمك تراني اشوفك قدامي خلني اكمل وبعد ما عدينا المحطه مسافه ثلث ساعه يمكن دق علينا وكانوا الاسعاف يقولون شالوه وبيودونه المستشفى لقيوه طايح
خالد انقلب وجهه للجديه وعينه على الاسعاف الي مر من جنبهم:ايش؟
وافي :بيودونه مستشفى ... احنا بنروح معاه وبعدين انت وهلك الحقوا لا تعلمهم الحين معد يعرف ابوك يسوق
خالد :طيب طيب مع السلامه
غاليه :شفيه ؟
خالد :يسأل عنك
غاليه :غريبه
خالد :يحسبك رحتي مع امك من اول
غاليه :طيب ليه ما دق علي ؟
خالد :يمكن ضيع رقمك
غاليه :بشوفه...
العنود :ماما ابي الحمام
غاليه قفلت جوالها :قبل شوي كنا بالمحطه ليش ما تقولين ؟
العنود :توني حسيت
غاليه :واحد ولا اثنين ؟
العنود :واحد
غاليه :طيب ابوك يوقف على جنب
خالد ما يسمعهم
غاليه :هاه خالد ؟
خالد :ايش
غاليه :وقف على جنب
خالد :طيب الحين
غاليه :يلا افتحي الباب وانزلي ...وداليا اذا تبي تنزل
ام احمد :تبغين الحمام ؟
داليا :لا
العنود :ماما انزلي معاي
غاليه تنهدت :طيب
جلسوا ينتظرون بالسياره الا غاليه تصرخ :لااا
خالد :شفيكم ؟
غاليه جلست على المقعده وتضحك بقهر :سوت اثنين
خالد يضحك :لحول
غاليه :انا ما قلت لك واحد ولا اثنين ليش تكذبين ؟
العنود :ما افرق بينهم
غاليه :خالد
خالد :هاه
غاليه :انزل انت غسل لها انا احس اني بطرش
خالد بأستغراب :انا ؟
غاليه :اي
ام احمد :اذا ما قدرتي انا بغسل لها
غاليه :لالا ياخاله انتي ارتاحي
تأشر لخالد بعيونها :يلا
خالد :طيب طلعي القفازات بالدرج وعطيني
غاليه :هاك
خالد نزل وشمر عن اكمامه وغاليه تطالع فيه وماسكه الضحكه
خالد :ما دفنتيه ؟
العنود :معرف
خالد :السنه الجايه روضه ما تعرفين كيف للحين ؟
العنود :الروضه فيها حمام
خالد :طيب طيب خلاص الحين كيف نبدا كيف تسوي امك ؟
العنود تشرح له وهو متقرف
غاليه :برساه جوالك يدق
خالد :مين ؟
غاليه :وافي
خالد :ردي عليه
غاليه :الو
وافي :شفيكم وقفتم ؟
غاليه :حاله طارئه
وافي :كيف ؟
غاليه :العنود تبي الحمام
وافي :ووين خالد
غاليه مساكه الضحكه :يهتم بالحاله
وافي فهم وجته ضحكه :معد بقيتي به رجوله
غاليه :عساك تتزوج وحده تخلي كل شغل البيت عليك وش دخل الرجوله بأنه يغير لبنته ؟ عادي الحياه الزوجيه مشاركه
وافي :طيب خلاص نعتذر بس خلصوا بسرعه
غاليه :بعدين تعال
وافي :وش
غاليه :مضيع رقمي انا ولا ايش؟
وافي :ايش
غاليه :تدق على خالد وتسأله عني وانا موجوده
وافي :جوالي الشاشه مكسوره ما يمدي انزل للأرقام الي تحت رقم خالد فوق
غاليه :وش ومعنى هو فوق وانا تحت ؟مو اختك انا
وافي:ترتيب الحروف ياحياتي ترتيب الحروف خ قبل غ
غاليه :وش رايك تتزوج ؟
وافي :وش الطاري ؟
غاليه :ابي اسمعك كذا تغازلها يا حياتي ياروحي
وافي :اي بجيبها استعراض قدامكم واقعد اغازلها خلاص بس مع السلامه بتخلصين رصيدي
غاليه :مع السلامه
...
بعد ساعه بالرياض
خالد وقف السياره عند البيت :غاليه
غاليه رجعت :هاه
خالد :نادي امي ابي اكلمها
غاليه :ترا لاحظت انك متضايق من شي
خالد تنهد :بدر طاح بالمحطه والحين بالمستشفى بروح له
غاليه :تخاف ؟
خالد :واذا جاه مره ثانيه
غاليه :عادي بيحارب مثل المره الاولى ويشفى منه بأذن الله
خالد :بس كلام الدكتور للحين بأذني لو جاه مره ثانيه بيكون اصعب
غاليه :ما تصعب على رب الكون
خالد مسح عيونه وبصوته غصه :نعم بالله ... نادي امي
غاليه :لا تكبر الموضوع مره يمكن بس داخ
بعد شوي جت ام خالد :هاه شفيك يا وليدي
خالد :اطلعي السياره
ام خالد :ليش؟
خالد :بدر اغمى عليه والحين بالمستشفى
ام خالد :متى ؟
خالد :قبل ساعه
ام خالد :ولا تعلمني
خالد بحزن :ما ابي اخوفك الحين نروح له وتشوفينه
بالمستشفى
خالد :بدر سعود بأي غرفه توه جا مع الاسعاف
الممرضه :غرفه ١٣٢ الطابق الثاني
خالد يأشر لأمه تجي
ام خالد :وابوك يدري ؟
خالد :جاي بالطريق...بالطابق الثاني
دخلوا الغرفه
ام خالد :بدر
بدر ساكت
خالد يكلم الدكتور
ام خالد :وش فيك وش تحس ؟
بدر ودمعه وحده نزلت على خده :نفس الاعراض زمان
ام خالد :هم قالوا لك ؟
بدر :لا بس انا احس
ام خالد :لا إن شاء الله بس دوخه ونرجع البيت
خالد دخل
ام خالد :هاه اخوك كلم الدكتور الحين يقول لنا وش فيك
خالد سكت شوي وقال :يبون يسوون له رنين مغناطيسي
بدر :هاه شفتي يمه
ام خالد تحاول تنكر :يمكن بس اجراءات احترازيه عشان يتأكدون بالاخير عندك تاريخ طبي مع الورم
جت الممرضه واخذته للرنين المغناطيسي خمس دقايق ما يتحرك ولا عضو فيه غير قلبه الي يدعو بالنجاه وعقله الذي يستشعر الآم الماضي ،عام ٢٠١١ تلقى والد بدر أتصاًلا من المدرسه يخبره بمعاناة بدر من وعكه صحيه جعلته يسقط مغمىً عليه ،كحال كل والد خرج ليأخذ ابنه من المدرسه ويجري الفحوصات الطبيه اللازمه للتأكد من صحته ،ظن أن الامر لن يطول وسيكون تشخيص الاطباء انه انفلونزا او قله تغذيه لكن الفحوصات المبدئيه لم تعطي نتيجه واضحه لذى لجأ الاطباء للفحوصات الدقيقه "الرنين المغناطيسي" كأي طفل كان بدر خائفًا من هذا الجهاز ،ليس يخاف منه ولكن يخاف من نتيجته ومستقبله فقد سمع دون قصد حديث الطبيب مع والده وما الامراض التي تظهر بهذا الجهاز سمع النزيف الداخلي وكان يهابه كثيرًا فهناك قصه تحكي أن معلمًا من المدرسه تعرض لحادث سير واصابه النزيف الداخلي ولكن لم يلحق على علاجه فمات ،ماذا لو كنت مثله ؟ لا اود الموت صغيرًا ،كانت هذه كلماته لأمه التي لم تتوقف عن البكاء بصمت
قبل الدخول للجهاز استقبله الطبيب بأقتراح يجعل الفحص ممتعًا :وش اخر سوره تحفظها بالمدرسه ؟
بدر :المجادله
الطبيب :ماشاء الله ... ترى الجهاز ما يخوف بس تنام فيه كأنك على سريرك وعشان يمر الوقت بسرعه راجع السوره بعقلك
دخل الجهاز واخذ بنصيحه الطبيب وسرعان ما انتهى هذا الفحص
بدر طلع واستقبله الطبيب على الباب :كيف حفظك ؟
بدر ابتسم :كويس
الطبيب :متأكد؟
بدر :نسيت آيتين بس
الطبيب :اذا رجعت البيت راجعها
بدر يبدو انه ارتاح للطبيب :اذا جاني نزيف داخلي بموت ؟
الطبيب :بأذن الله ما تموت اذا تدخلنا بدري وبعدين من وين جاك ذا الخوف يا بطل ؟
بدر :استاذي مات بالنزيف
الطبيب :طيب كم مره جتك زكمه ؟
بدر :كثير
الطبيب :صديقي مات بزكام وهذا يعني أن الموت والحياه بيد الله بس احنا مسخرين من الله اننا نساعدكم ...الحين بروح اشوف النتيجه وإن شاء الله تطلع سليم وما تستفيد شي من ذا الجهاز غير المراجعه
بدر ضحك :إن شاء الله
بعد نصف ساعه
الطبيب :السلام عليكم
ابو خالد :وعليكم السلام
بدر يطالع فيه بأمل
الطبيب :انتم تؤمنون بالقضاء والقدر
ام خالد :شفيه ولدي؟
الطبيب :قدر الله ما شاء فعل لقينا ورم حميد ببطنه
ابو خالد :حميد ؟
الطبيب :اي حميد يعني نقدر نسوي عمليه ذا الاسبوع ونستأصله وبعدين نبدا بالكيماوي سنه عشان نتأكد من عدم توسعه وانتشاره بباقي اجزاء الجسم
الطبيب طلع يكلم ابو خالد عن العمليه
بدر :يمه وش يعني كيماوي
ام خالد مستغرقه بالبكاء ولا ردت على بدر بحرف
ابو خالد دخل :يلا نرجع البيت
بالسياره بدر يحاول يفهم الي يصير حوله :يبه وش يعني كيماوي
ابو خالد :خلاص يا منيره اهلكتي روحك بالبكى ترا ما قال بيموت فيه أمل علقي املك بالله ولا تجزعين
التزم بدر الصمت عندما لاحظ انه لم الجواب عند والديه وفكر بسؤال اخوه الكبير خالد طالب الجامعه الذي يعرف كل شي بنظر بدر المراهق ،عند المنزل
ابو خالد :خلاص لا تبكين يشوفونك عيالك كذا
ام خالد :طيب خلاص
بدر نزل وراح لغرفه خالد مباشره :خالد
خالد :وش تبي ؟ فلوس لا
بدر :بسألك سؤال
خالد :وش ؟
بدر :وش يعني كيماوي
خالد اعتدل بجلسته :مين قال لك ذا الكلام ؟
بدر :طحت بالمدرسه ورحنا المستشفى وسوو لي فحص دخلوني كذا بجهاز انام على ظهري وهو فوقي وبعدين الدكتور طلع قال انه عندي ورم حميد وبسوي عمليه وبعدين كيماوي
خالد يحاول يستوعب
بدر :كيف العمليات تخوف ؟ انت قد جربت تشيل اللوز نفس الشي ولا غير ؟
خالد :وين امي ؟
بدر :تحت ...بس قولي وش يعني كيماوي
خالد :يعني مغذيه تاخذ فيها علاج
بدر :بس وليش امي تبكي عادي
خالد :ما تكلم معاك الدكتور عن شي ثاني ؟
بدر :لا
خالد :الورم هو السرطان تدري ليش سموه سرطان ؟
بدر :لا
خالد :لأنه ينتشر بسرعه نفس ما كائن السرطان يمشي بسرعه
بدر :يعني بموت
خالد :لا اذا حميد يعني ببدايته وإن شاء الله ما يجيك شي
بدر :طيب اذا سويت العمليه وش بسوي بالكيماوي وش يسوي
خالد :الكيماوي يقتل الخلايا السرطانيه عشان ما تتكاثر مره ثانيه
بلع ريقه وكمل :وترا له اعراض جانبيه
بدر :كيف
خالد :شعرك وحواجبك بتطيح
بدر :بيضحكون علي
خالد :مين الي بيضحكون ؟
بدر :الي بالمدرسه
خالد :لا ما بيضحكون اذا ضحكوا انا بوريهم شغلهم
بدر يحاول يغير الموضوع :كيف الجامعه ؟
خالد :ماشي الحال
بدر :المشروع سلمته بوقته ولا تأخرت
خالد :غلطت بالتاريخ سلمته قبل بأسبوع والدكتور قال على تسليمك المبكر اذا اذا شفت فيه غلط بعطيك درجه التسليم تعويض
بدر :اجل اشتغل دايمًا بدري
خالد :مشكلتي احب اتأخر بكل شي
ابو خالد :تعالوا تحت بنتكلم
بدر بلع ريقه لأنه عرف الموضوع يخصه
ام خالد كانت جالسه تبكي وساكته
ريوف كانت لا تزال طفله بعمر الثمان سنوات :امي
ام خالد ساكته
ريم اخذتها :تعالي اشغل لك التلفزيون
ريوف :طيب
ابو خالد :كلكم اجتمعتم
خالد :اي
ابو خالد :تعرفون كل يوم أحمد الله أني مسلم وعيالي وزوجتي مسلمين ؟احمد الله كل ما اشوف قلوبكم تتعلق بالدين ومثل ما تعرفون الله يبتلي عباده لأنه يحبهم ويود اختبار صبرهم ومحاسبتهم بالدنيا لأن حساب الاخره شديد ،واليوم ابتلاني الله وابتلاكم بمرض اخوكم بدر بالسرطان
التفت على بدر :المرض ما يخوف ولا شي بس الي علينا نصبر ونعمل بالاسباب وبأذن الله بترجع مثل ما انت واقوى
ريم بجزع المراهقين تظن انها تسكت والدها بالمنطق :كيف نصبر وامي تبكي كذا ؟
وكالعاده والدها الواثق بالله وبحكمته اسكتها :تبكي لأنها مصدومه امك وتعرفينها اكثر انسانه صابره وتتحمل بكره تلقينها سكتت...الحين اي احد عنده سؤال بنجاوب عليه عشان ما يبقى عندكم تساؤل
ديم بعقليه الطفوله المتفائله والتي لا تزال تحملها حتى الان علقت حلمها بإنقاذ اخيها جلست بجانبه وهي تقول:لا تخاف بصير دكتوره اذا كبرت واساعدك
ابو خالد ابتسم من تفاؤلها فهو يعلم انها من ستصبرهم على هذا البلاء :إن شاء الله تساعدينه وتساعدين غيره ...انت يابدر سألتني شي بالسياره ما انتبت له
بدر :سألت خالد خلاص
ابو خالد اخر هاتفه ليرد على المستشفى :الو
الاستقبال :الاستاذ سعود وافي ؟
ابو خالد :ايوه تفضل
الاستقبال :نعتذر عن عدم وجود طبيب العمليات يمديك تأجل العمليه ؟
ابو خالد :متى يرجع ؟
الاستقبال :مارح يرجع للأسف انتقل لمستشفى بخارج المملكه وحتى نجد طبيب أخر بنفس الاختصاص نحتاج شهرين
ابو خالد :لا ما ابي الا ذاك الدكتور هو افضل دكتور بذا المجال
الاستقبال :ابشر ولا يهمك حاب نعطيك تحويل للمستشفى الي نقل له ؟
ابو خالد :بأي دوله ؟
الاستقبال :بريطانيا
ابو خالد :كيف التكاليف كم احتاج ؟
الاستقبال ابتسم :لا ما تحتاج شي كل شي بيكون على حساب الدوله
ابو خالد دمع بعد أن كان يحمل هم ضيق المال بعلاج ابنه :الله يديم علينا حكم آل سعود
الاستقبال :آمين ...تامر على شي ؟
ابو خالد :لا الله يسلمك
الاستقبال :بنكلمك بباقي التفاصيل بعدين بأمان الله
ابو خالد :الله يسلمك
عاد ابو خالد للصاله التي لا تزال تجمع عائلته
ابو خالد :اخر مستجدات المستشفى بنسافر للخارج
ريم :كلنا ؟
ابو خالد :لا انا وبدر وامكم انتم خلوكم هنا عندكم مدراس
بدر :طيب حتى انا عندي مدرسه
ابو خالد ابتسم :انت بكل الحالتين رح تترك المدرسه بس الفرق انك اول كنت بتغيب وتداوم ايام قليله والحين بتروح وتتركها ما فيه فرق
بدر :بس يبه بسقط سنه
ابو خالد يمازحه :عادي عشان اذا عدت السنه تكون اذكى منهم لأنك اكبر وتجيب ١٠٠٪؜ واوعدك اذا جبتها لك الي تتمناه
بدر :مستحيل ما شفت احد جابها على وجه الارض
ابو خالد :مو مستحيل لو مستحيل ما حطوها هدف
بدر:بحاول
بعد اسبوع
ابو خالد :احنا الحين بنروح المطار وانت ياخالد خواتك عندك امانه وقلت لعمكم متعب يجي يتطمن عليكم كل يوم لا تتهاوشون ولا تسوون اي غلط ترا الوقت الي بنروحه سنه ماهو هين عاونو بعض ريم ساعدي خواتك بالواجبات ولا تتجزعين عليهم انتي الكبيره العاقله اذا خالد طلب شي سويه له واذا انتم تبون تطلعون بيطلعكم ولا بتقصرون بحق بعض إن شاء الله
خالد :الله معاكم
ريم :توصلون بالسلامه بعدين كلمونا
ريوف :ماقد طلعت طياره ياحظك بدر
ام خالد :انتم بس خلصوا دراستكم وبعدين يحجز لكم ابوكم تجون الاجازه وبعدين نرجع مع بعض ...وين ديم
خالد :تبكي بغرفتها
ابو خالد :تبي تسافر ؟
ريم :لا ماتحب الوداع
ابو خالد :بروح اشوفها انتظروني
دخل عليها وهي دافنه وجهها بالمخده :ديم
ديم ساكته وما يسمع الا صوت شهقاتها
جلس جنبها :قومي
ديم :بنام
ابو خالد :خذي ذي
ديم جلست :وش
ابو خالد :كنت بعطيك اذا دخلتي الجامعه بس خربتي
ديم :توني بالمتوسط
ابو خالد :اي بس خذيها
ديم :سلسله مفاتيح ؟
ابو خالد :اي
ديم :ما عندي سياره ولا اقدر اسوق
ابو خالد :ما ندري يمكن يصير مسموح السياقه ولا تصيرين اشهر طبيبه سعوديه بالخارج وقتها بتحتاجين سياره
ديم :واذا ما صرت
ابو خالد يمازحها وهو يغمز يدها :اذا ما صرتي طال عمرك علقيها بمفاتيح بيتك وتفرجوا فيها انتي وزوجك ووري عيالك انه كان حلمك
ديم :يحزن
ابو خالد :وعشان ما تحزنين شدي حيلك
ديم :بتطولون ماقد سافرت بعيد عنكم ولا سافرتوا بعيد عني لو قلتوا يوم او اسبوع عادي بس سنه طويله
ابو خالد يمازحها :هذا وانتي تبغين تبتعثين ؟
ديم :ببكي شوي بعدين انسى وادرس
ابو خالد :طيب سوي نفس الشي الحين ابكي شوي وانسي اذا وصلنا بنكلمك يا ويلك اذا عرفت انك تبكين
ديم :طيب ولا يهمك
ابو خالد :ياحبي لك لو سميناك حنان احسن
ديم :ليه وش فيه اسمي
ابو خالد :حنان يعبر عن شخصيتك
ديم :برضوا ديم لأن معناه المطر بدون رعد وبرق ماهو حلو المطر بدون رعد وبرق ومريح وحنون ؟
ابوخالد يضحك :فزتي علي واقنعتيني
باس يدها وهي بنفس اللحظه باست راسه :يلا انا بنزل عشان ما نتأخر
ديم :توصلون بالسلامه
اسبوعين مرت بعد العمليه وبدأ بدر بجرعات الكيماوي او جرعات العذاب والالم لم تأثر جسديًا مثل تأثره النفسي وقف حياته ليصلح خلل بها فاته الكثير خلال شهور وسيفوته اكثر خلال شهور قادمه ،لكن لا بأس قطار الحياه بكل مكان له محطه إن فاتتني واحده سألحق بالاخرى لا يهمني كلام سائقي الاجره "الناس"عن فوات القطار لي يريدون احباطي لأعتمد عليهم فيسرقونني "يخذلوني"سالحق القطار بنفسي وسنه لا تغير شيئًا ،في الحقيقه غيرت الكثير تعلم اللغه الانجليزيه واتقنها بطلاقه خلال شهور اصبح نهمًا بقراءه الكتب من ملله لن يعتبرها كرحله علاج سيعبترها دراسه ورغم كل هذه النقاط الايجابيه لا يزال يحزن على فقد اخوته اشتاق لبيته الدافئ وضجيج ديم وريم وتذمر خالد وريم من الجامعه يشتاق لمحيطه المدرسي ويشتاق لأجواء رمضان ،نعم لقد دخل رمضان لأول مره وهو ليس بمنزله كما اعتاد لأربع عشرة عامًا،ارهقه العلاج يتمنى لو يكون بنفس قوته فيعبد الله اكثر من ذي قبل يخاف ان يأخذه الموت وهو مقصر ،دخل والده ليبشره بعيشه لرمضان كبقيه الرمضانات :اخوانك خلصوا دراسه وحجزت لهم بكره بيجون
سعد بهذا الخبر ثم حزن ،ماذا لو لم يتقبلوا شكلي الجديد؟
ام خالد :شفيك؟
بدر :ما شافنوي من زمان وفجأه بيجون شكلي كذا
ابو خالد وكما يفعل منذ شهور يحاول ان يلطف الجو :لا تخاف قلت لهم يجيبون اقلام بنوقع على صلعتك
ام خالد ضحكت :عاد ريوف بترسم لك بيت وشجره وش احسن من كذا ؟
بدر بحماس:متى بيوصلون ؟
ابو خالد :الصباح
في صباح اليوم التالي
ابو خالد دخل وخلفه اولاده ،وبدر ما إن سمع صوت الباب حتى ركض ليستقبلهم ويبهرهم بشكله الجديد لكن انقلب السحر على الساحر :خالد ؟
خالد يمسح على رأسه الخالي من الشعر :وش فيك
بدر :ليه تسوي كذا ؟
خالد بعبوس مازح :ماعجبك ؟ عجبني ستايلك قلت اقلده
بدر حضنه :يامجنون
خالد :ريوف كانت تبي تقلدك بعد بس بالغصب اقنعناها
ريوف :يبه ابي احلق طفشت ريم تشعفني اذا مشطت لي
ام خالد :نسيتوني ؟
ريوف ركضت :اشتقت لك
ام خالد :وانا اكثر ياروحي
ديم:ما وريتونا بيتكم كيف
بدر :i have books بتحبينها
ريم :اوه صرت تعرف انجليزي احسن مني
بدر :يس تعلمت هنا
خالد :حلو حافظ على اللغه وطورها واذا رجعت السعوديه ودخلت الجامعه مارح تتعب
ريوف لاحظت ان بدر سرق الاهتمام منها :حتى انا اعرف انجليزي i love you
بدر :me to
ام خالد :يلا بس اتركوا السوالف وتعالوا ساعدوني بالمطبخ تأخرت رحلتكم وباقي ساعتين على الاذان ما سويت شي
ابو خالد :صايمين ؟
ريم تضحك:يبه ذي المره السابعه تسألنا
مرت الشهور الاخيره بسعاده مع وجود باقي اسرته وأخيرًا الفحص الاخير الذي اصبت ان بدر قد تعافى على حسب كلام الطبيب ذو اللهجه البريطانيه البحته:الشكر للرب لقت انتهت فتره العلاج واحتمال كبير الا يعود له المرض وبوجود الاحتمال الكبير لا ننسى الاحتمال صغير بعودته وإن حدث وعاد سيكون اصعب بكثير ولكن مع ذلك ادعو الرب ألا يعود مره اخرى
بدر يمازح الطبيب الذي اعتاد صحبته :لماذا هل تكرهني لهذه الدرجه ولا تود رؤيتي؟
الطبيب يضحك :لا بالعكس إن كان بعدك عني يعني صحتك فأنا اشجعه كثيرًا ،وداعًا ياصديقي العزيز واتمنى ان اراك اشهر مذيع بالعالم
بدر :وداعًا
خالد :صار خويك
بدر :تعودت عليه دايم يسولف معاي
خالد وهو يمشى مع بدر بالممرات :ابوي حجز بنرجع الرياض
بدر :قضيت سنه بس كأنها عشر سنوات
خالد :اشك انها دعوتك رجعت عليك
بدر :اي دعوه ؟
خالد :يوم كنت تقول يارب اسافر لندن واجلس فيها سنه
بدر ضحك :صدق توني افكر فيها كان المفروض اقول من غير شر لكن قدر الله ماشاء فعل تعلمت كثير بذي السنه
خالد :لاحظت عليك تغيرت صرت اهدى
بدر :اكتشفت انه بعض الاحيان الهدوء والمراقبه من بعيد افضل
عاد لواقعه عند دخول الطبيب بعد انتهاء الفحص خمس دقائق مر شريط تلك السنه امام عينه
الطبيب :تفضل معاي للخارج
خالد :بشر ؟
بدر يضحك بحزن :اصبر تراه ياخذ نص ساعه الى ساعه يشوفه
الطبيب :تعرف ماشاء الله ياهي وحده من الثلاث تتابع مسلسلات طب او تدرس طب او لا قدر الله لك تاريخ مع ذا الجهاز
بدر ابتسم :قدر الله وكان لي تاريخ معاه
الطبيب :إن شاء الله ما ينعاد التاريخ
بدر :وتلك الايام نداولها بين الناس
خالد بضيق من حال بدر وهو يحاول يخفي حزنه :يلا نمشي
بدر :كلمتوا احد من اهلنا ؟
خالد :ما اظن امي من الخوف ما تسوي شي وابوي شكله نسى جواله بالسياره
بدر :وانت ؟
خالد :قلت لغاليه انك بالمستشفى و...
بدر وايش
خالد :واني خفت عليك يبدا من جديد
بدر :ما تلاحظ؟
خالد :ايش
بدر :اخر يوم بالمستشفى يوم ودعت الدكتور كنا نمشي كذا بالممرات ونتكلم بس الفرق ذيك النهايه واليوم البدايه
خالد وقف :كيف حكمت ؟ لا تتفاول على نفسك يابدر
بدر :مو تشاؤم انا احس كذا نفس الشعور ذاك اليوم
خالد سكت وكمل مشي
بدر :اذا كان معاي لا تعلمون احد وما ببدا العلاج لين يخلص عرس بنت عمي ما ابي اخرب فرحتهم
خالد وقف مره ثانيه :لا ولله ؟ واذا كنت تحتاجه ضروري
بدر :اسبوعين ما تضر
خالد :الا كل دقيقه تضر انت مدري كيف تفكر احسبك كبرت وعرفت كل شي بس شكلك باقي زي اول يوم يوم جيت تسألني وش معنى كيماوي
بدر :افكر اني ما اكسر فرحه احد
خالد :يعني ترمي نفسك للهلاك عشان عرس ماتدري ينجح ولا تضير بينهم مشاكل ؟
بدر :اوعدك اول ما يخلص العرس انت بتاخذني للمستشفى واصلًا معد باقي الا اسبوع
خالد :واذا جو الحين وقالوا عمليه كيف بتسوي يالمضحي؟
بدر :بدخل ونقول لهم زايده
خالد :بدر ركز معاي ومن احياها فكأنما احيا الناس جميعا بتقتل نفسك عشان فرحتهم ولا بتحيي نفسك عشان ربك ؟ ...انا اصلًا ليه اناقشك واحنا مو متأكدين
بدر :يلا نرجع نشوف الدكتور يمكن صاروا يطلعونها اسرع
خالد :يلا امش قدامي
بدر :العيال يدقون
خالد :رد عليهم
بدر :الو
سطام :ولد كيفك ؟ نسيناك بالمحطه واغمى عليك ولا حسينا خفف من هدوءك شوي ،ليش طحت؟
بدر يتصنع الضحكه :شكل عندي زايده بسوي فحوصات الحين يمكن احتاج عمليه
خالد تأفف يوم سمعه يقول كذا
سطام :لا تطول ابي اهزمك فيفا
بدر :طيب ...يلا الدكتور جاي
الطبيب :لازم ناخذك لمعاينه دكتور التخدير ساعتين وندخلك عمليه ضروري
خالد ارتبك :وش فيه ؟ نفس المكان صح مو مكان خطر ما انتشر ؟
ابوهم شافهم مرتبكين من بعيد وجا :شفيكم ؟
الطبيب :بنسوي عمليه ضروري الحين
ابو خالد :إنا لله وإنا اليه راجعون كم نسبه النجاح ؟
الطبيب :للأسف ٢٠٪؜
بدر :بسويها
خالد :مجنون ما بخليك تسويها
بدر :انا حر بنفسي بسويها لو مت تصدق عني كل يوم ولو بريال
خالد مسكه من كتوفه وبحلقه غصه :بدر ما بتموت على الاقل سوها بالخارج يمكن احسن بدور لك احسن طبيب بالعالم لا تعرض نفسك للخطر بدر تكفى ترا مالي غيرك
بدر بثبات عجيب :وشبابنا فيهم الخير والبركه ،وش فيها اذا مت ما بيصير شي وكلنا بنموت ترا بس مصيرنا بالاخره بالجنه إن شاء الله
ابو خالد ما تدخل لأن داخله تقوم نفس الحرب جانب متوتر كتوتر خالد وجانب هادئ مثل هدوء بدر بأيهم يؤمن
خالد ترك بدر وهو فاقد الامل انه يقنعه وحط يدينه على شعره ومسح عيناه التي تحارب الدموع
بدر مشى مع الطبيب وكله ثقه بربه بينما خالد يجلس في ذلك الرواق لم تعد تحمله قدماه ،لا شي اسوء من النظر لأحبتنا يفصلهم خيط رفيع عن الموت ولا نملك ابره لنجعل ذلك الخيط ساترًا عن الموت أنه شعور العجز يا الله الطف بأخي
ابو خالد قرر تصديق ثبات بدر :قم
خالد :وش؟
ابو خالد :امش المصلى نصلي ركعتين وبعدها رح اشتري ذبيحه وتصدق فيها بنيه شفاء اخوك
خالد :بدر بيدخل العمليات واحنا مو بيدنا شي وتقول كذا ؟
ابو خالد :وش اقول يعني ما ربيتكم انا وقبل كل حرف انطقه اقول انه الله اقوى من كل انسان لأنه هو خالق الانسان ؟ مو قلت انه اذا ما نقدر على شي نفوضه لله وين راح عقلك ونسيت قم اغسل وجهك وتوضى وتأكد ان الله ما يخيب عباده بينما الاطباء فيه احتمال انهم يخيبونك
خالد قام :اعوذ بالله من الشيطان الرجيم
...
ابو وافي :افتحي
ام وافي :ماني فاتحه
ابو وافي :طيب نتكلم كيف نحل المشكله واحنا ما تكلمنا
ام وافي :زي ما سويتها بالسر
ابو وافي :طيب باخذ ملابسي
ام وافي :تصحك على مين اغراضك كلها معاك
ابو وافي :افتحي ولا كسرت ذا الباب عليك
ابو احمد :انا بكسره عليك ان ما وخرت من قدام الباب
ابو وافي :بيتي زوجتي
ابو احمد :ولله مافكرت ببيتك وزوجتك يوم رحت فتحت بيت غيره
ابو وافي :كان غلط بس خلونا نتكلم ونحلها
ابو احمد :خلاص قالت لك ما تبي يلا روح بعدين تعال
ابو وافي :لحول
غاليه :يمه شتسوين على الباب ؟
ام وافي :ابوك الحيوان يبي يدخل ما بخليه يقتحه جلست عليه
غاليه :سحبتي الكنبه لحالك وخليتيها قدام الباب عشان ابوي ما يدخل ؟
ام وافي :لا عجبني المكان هنا افكر اغير الاثاث وش رايك ؟
غاليه :يمه محد قد سوا ذي الفكره يحطون الكنب على الباب
ابو احمد :افتحي ياخيتي ابدخل
ام وافي :طيب
جت بتسحب الكنبه
غاليه :يمه بتسحبينها لحالك غلط
ام وافي وانتي اذا سحبتيها تشوفين ورعك طايح بالارض
الهنوف نزلت :يا الهي هل ما اراه حقيقه ؟ لقد خرج الوحش من داخل امي واظن انها ستصبح مصارعه في WWE
غاليه:بدل ذي التعليقات اسحبي الكنبه عن امي
الهنوف :وانتي
غاليه :بطني اكبر من راسك ما تشوفينه ؟
الهنوف :طيب
ابو احمد دخل بعد ما بعدت الكنبه: وش تسوين يالعنود
ام وافي :ابي اغير الاقفال معاه مفتاح
ابو احمد :معليك لا تغيرينها اخذت المفتاح عليه...وانتي وين زوجك ما شفته جا
غاليه :راح المستشفى
ام وافي :ليه ؟
غاليه :بدر طاح اغمى عليه
ام وافي :توك تقولين ؟ متى طاح حبيبي هو عساه ماهو الخبيث
غاليه :بكلم خالد الحين
خالد :الو
غاليه :تبكي ؟
خالد يحاول يغير صوته :لا
غاليه :وش صار
خالد :دخل العمليات
غاليه :نفسه ؟
خالد :اي ...غاليه احتاجك
غاليه :عند امي انا
خالد :تجهزي نص ساعه واجي اخذك ابي البيت
غاليه :طيب
طلع الصاله :هاه بشري ؟
غاليه ودخل العمليات
ام وافي :لا اله الا الله ١٢ سنه مرت ليه يرجع
غاليه :انا بروح البيت خالد بيجي بعد شوي
ام وافي :ياحبيبي هو الله يقومه بالسلامه
ابو احمد :ولد سعود ؟
ام وافي :اي
ابو احمد :الله يقومه بالسلامه
الهنوف لحقت غاليه :وش صار ؟
غاليه :بدر طاح وودوه المستشفى ولقيوا عنده السرطان
الهنوف :هو الدكتور قال انه لو رجع بيكون صعب مره صح ؟
غاليه :اي الحين بالعمليات
الهنوف تاكل اظافرها :ياربي الله يعينه ويقومه بالسلامه
غاليه :خلاص من اظافرك
الهنوف :الحين كيف خواته الله يعينهم اكيد لحالهم بالبيت
غاليه :انا بروح بيتي وبروح عندهم بعدين اتوقع باقي ما يدرون
الهنوف :ياربييي يحزنون اكثر
غاليه :هذا خالد يدق بروح ،العنود عندكم مابيها تجي بأجواء الحزن
الهنوف :تلعب مع ملاك داخل
غاليه :اذا سألت قولي لها بالبيت بجيب اغراض وبجي
الهنوف :طيب بعدين اعطينا الاخبار
غاليه :طيب
طلعت السياره وشافت خالد عيونه حمرا
غاليه مسكت خده :خالد
خالد مسك يدها على خده وبكى زياده :اخاف
غاليه كانت بتبكي من بكاه :خلاص بعدين نتكلم بالبيت ،خواتك يدرون ؟
خالد :لا
غاليه :انا بعلمهم الحين انت لا تدخل عندهم طيب ؟
خالد :بنتظرك بالبيت
غاليه دخلت عليهم :سلام
ريم :وين امي؟
غاليه :وين خواتك ؟
ريم :بالغرفه
غاليه :ناديهم بقول لكم شي
ريم :عسى ما شر
غاليه ما قدرت ترد لأنه شر بذاته
جوا البنات بعد ما نادتهم ريم
غاليه :اخوكم
ديم :مين ؟
غاليه :لا تتوترون الله معاكم
ريوف حست برعب :مين غاليه ؟
غاليه :بدر اغمى عليه وودوه المستشفى
ريم :ايه ؟
غاليه وتفرك اصبعها الابهام من توترها :ولقيوا عنده المرض
ديم سكتت وتطالع فيها
ريم :وش بيسوون؟
غاليه :دخلوه العمليات الحين
ريوف رجعت شعرها وهي تمسك البكيه
غاليه شافت الوضع متوتر وما تبي توتره اكثر :انا بروح بيتي وخالد هناك اذا تبون شي تعالوا
طلعت غاليه ودخلت بيتها الي بابه مقابل لباب اهل خالد ويتشاركون نفس الحوش
جلست على الكنبه جنب خالد وحطت الوساده بحضنها عشان ينسدح عليها ويفضفض كعادته بكل ما يحزنه :تعال
خالد حط راسه ويدها كانت تلعب بشعره :اول مره اخاف كذا غاليه ما ابي افقده ما ابيه يروح ما عندي الا هو وهو حمار راح بكل برود ويقول ...اذا مت عادي كلنا بنموت ومن قبل مسوي بيحس بالناس ويضحي عشانهم يقول لا تعلمون احد لين يمضي العرس وبعدين اتعالج طيب ليش بالموت انت اناني ولا تفكر انك بتتركنا وراك ،ليش بدر كذا غبي ومضحي ما يفكر بنفسه
غاليه والدموع على عيونها اول مره تشوف خالد كذا :طيب كم نسبه النجاح
خالد زاد بكائه مع ذي الجمله :تدرين ٢٠٪؜ بس ٨٠٪؜ احتمال افقده اخاف حيل كان ودي ابني جدار قدامه عشان ما يروح بس ما بيدي شي هذا اكثر شي اكرهه
غاليه:حتى احتمال ١٪؜ فيه امل انت لا تضعف كذا ترا وراك ثلاث خوات تركتهم مع هذا الخبر ما اعرف وش صار لهم اذا تبي تسوي شي لبدر خلك ثابت بمثل ثباته يوم بيروح
خالد جلس يطالع فيها
غاليه :اي صدق
خالد حضنها :انتِ دايمًا مفتاح حيرتي
غاليه :الحين قم صل ركعتين وادعي له وبعدين شوف امك وابوك وانا بروح للبنات
بعد نصف ساعه من العمليه خرج الطبيب ويصرخ :معجزه معجزه
قام ابو خالد له بشر ؟
الطبيب :معجزه من رب المعجزات ...