وانا في درب الهلاك ظهرت لي يا ملاك

2

يوم الاربعاء بالديره
ابو سيّاف:يالله حيهم يالله حيهم اخواني تفضلوا تفضلوا بيت ابوكم وما من غريب
ابو سطام:ماشاء الله ماشاء الله بيت ابوي هو هو ما غيرت به شي مو مثل بعض الناس يغير بمجلسه ميه مره
ضحك ابو وافي وقال :وانت نفس مانت يابو سطام للحين تفضح اسراري عند ابو سياف
ابو سيّاف :ما ودي اني اغير اثاث ابوي الله يرحمه وريحته فيه
ابو خالد :اي ولله ريحه ابوي الله يرحمه باقي بالبيت على كثر ما نجيك وهي باقي ما راحت الله يرحمه ويسكنه فسيح جناته
كلهم :الله يرحمه
ابو سطام : وين سيّاف
ابو سيّاف :يذبح بالقعود
ابو وافي ضحك :اخر مره كان ياكل البعر الحين يذبح القعود
دخل سياف وقال :هذي بدايتها يا عمامي معايره
وحضنهم واحد واحد
ابو سياف:وين عيالكم
ابو خالد: ينزلون الاغراض بالسياره
ابو سياف : سياف قم ساعد عوال عمك ضيوفنا هم
سياف: ابشر
ابو سطام : لالا لا تكلف على نفسك هم بينزلونها خل يمطون عظامهم شوي بالرياض مغير تسدح
ابو خالد: حتى الذبايح ما يفقهون بها شي لو تذبح قدامهم كلب وتقول خروف يصدقون
نايف:اهووو اعمامي تجمعوا يتحلطمون علينا
سطام:ما ودي اقول ذي الكلمه بس كذابين
وافي:عيب وش كذابين
ابو وافي: خلصتوا تكذيب فينا يلا تعالوا حبوا راس عمكم وسلموا عليه
وافي :ابشر
...
في الجهه الثانيه من البيت
ام سيّاف : يا هلا فيكم
ام خالد: يا هلا فيك ولله ان لك وحشه يام سياف
ام سطام : اي ولله اشتقنا لك خاصه المرقوق الي تسوينه لو الف الدنيا ما لقيت زيه
ام سياف ضحكت وقالت :شكلك جيتي عشان المرقوق
ام وافي:لا ولله اننا جينا لمعزتكم عندنا
ام سياف : ماشاء الله ذولي البنات كبروا
ام خالد :وبنتك وينها فيه نبي نكحل عيوننا بجمالها
ام سياف :ولله ان الجمال فيكم خاصه ام وافي للحين عيونها حليوات والتجاعيد ماهي ذاك الزود ،بس عساك ما تطقين فلر
ملاك :هذاني جيت
وسلمت عليهم وجلسوا بالمجلس والبنات يتراسلون بالقروب :
ريم :شكل امي تبي تاخذ ملاك لبدر لو كملت مدح بتطلبها لخوي
الهنوف ولله انها حلوه وجهها بريء لو اني ولد تزوجتها ياحظ اخوك
ديم :مدري احس ما تقبلتها فيها شي غريب
وجدان :عشانها من الديره ؟
غاليه :وراكم ما تعطونها وجه قفلوا الجوال وسولفوا معاها مسكينه
ريوف:على اساس انتي موب ماسكته وتراسلينا
غاليه : بس مسكته عشان اعلمكم
شوي الا طفى الكهرب
وصرخوا البنات كلهم الا ملاك
ملاك : شكله بيجي مطر زي ذاك الاسبوع
ام خالد : يازين مطر الديره بالله عليك يام سياف نفرش بالحوش ونتقهوى على الحطب
ام وافي: وان جا مطر طفت نارنا
ملاك :فيه فانوس بجيبه بس ابي من يضوي لي بالكشاف
ريوف:انا معاك
ملاك :يلا
وطلعت ملاك الدور الثاني وريوف تتبعها بالجوال وتنور لها لين ما وصلوا غرفه فتحتها الا هي مليانه كتب ريوف بدون شعور قالت :واو ماشاء الله هذا انتي تقرينه
ملاك :قريته
ريوف :من وين تجيبين الكتب
ملاك :اطلبها اونلاين ولا اوصي مع اي احد بيروح الرياض
ريوف:كم عدد الكتب الي قريتيها
ملاك :تقريباً٦٠٠ كتاب
ريوف :ماشاء الله
ملاك :واطمح اوصل عشره ألاف
ريوف:ان شاء الله توصلين الي تطمحين له
ملاك :ان شاء الله
سكتوا شوي وقالت ملاك :لقيته
ولفت على ريوف الا هي ماسكه كتاب وتقرا
ملاك ضحكت وقالت :عجبك الكتاب ؟
قالت ريوف :اسفه ولله ما استأذنت منك ،اي الكتاب حلو
ملاك :خذيه اقريه وقولي للبنات واذا احتجتوا اي كتاب تعالوا عندي لأن مكتبتي للجميع
ريوف بدون ما تحس حضنت ملاك وقالت :ولله انك اطلق بنت عم
ملاك ضحكت وقالت :كيف تحكمين وتوك عرفتيني
ريوف :كل شي فيك حلو تقرين كتب وعيونك حلوين وشعرك اسود وجسمك رشيق وبشرتك حلوه وشخصيتك طيبه ملاك بمعنى الكلمه
ملاك تضحك وتقول :لا عاد بالغتي انتي
ام سياف تنادي:ملاك اشبكم ابطيتم عسى ما صابكم شر
ملاك :لا يا يمه جايين الحين بس خذتنا السوالف
نزلوا ملاك وريوف بسرعه وطلعوا الحوش كلهم وولعوا الحطب والفانوس خلوه عندهم عشان لو جا مطر شوي وملاك شافت العنود جالسه لحالها طفشانه وقالت :العنود تبين تلعبين مع الاطفال الي برا
العنود طالعت بأمها وهي ساكتها
غاليه :عادي روحي
ملاك :يلا قومي واوديك بس بجيب طرحتي
وطلعوا ملاك والعنود وهم رايحين بالطريق قالت العنود :ليه انتي حلوه كذا مره ،شكلك تسمعين كلام مامتك كثير
ملاك قالت :انتي احلى من كل البنات
وشوي الا نزل مطر وخافت العنود وتخبت بطرحه ملاك
ملاك :عادي يا ماما المطر ما يخوف وحتى نلعب فيه بالديره
العنود: كيف تلعبون
ملاك مسكت يدينها وقالت :قولي معاي الي اقوله
العنود :طيب
قعدت تدور ملاك هي والعنود وتقول : ياربي زيده واحنا عبيدك وشوي تجمعوا الاطفال عليهم وصاروا يلعبون كلهم وملاك نسيت نفسها وجلست تلعب معاهم الا يوم طلع اخوها وعيال اعمامها
خالد: يا عيال غضوا البصر
سيّاف :هذي ملاك بروحلها
وافي مسك يد سيّاف وقال: هدي يا ولد العم ماهو كل شي ينحل بالضرب
سيّاف : ومين قال اني بضربها ...تحسبون عيال الديره يتعاملون كذا ؟تراني احب ملاك وحاطها بعيوني ومستحيل أأذيها
ثم راح لملاك وكلمها ورجعت البيت وطالع فيهم سيّاف وراح وخلاهم
نايف:ياليل زعلت الولد من اول يوم
وافي: ماكان قصدي وبعدين ترا هو قال بروحلها الكلمه قويه
سطام:لا عاديه ذي الكلمه بس انت ماخذ فكره غلط عنها تتابع مسلسلات واجد
وافي:الحين كلكم تقلبون علي عشان هذاك الي مالكم معاه الاساعه
خالد: وش ساعه تراه ولد عمنا ونعرفه من الصغر
وافي:انا ما عرفته الا الحين كنت احسبه بزر بالمتوسط
سطام :واذا بزر ولد عمنا ومضيفك ببتيه يعني غصب تحترمه وتحبه
وافي:طيب...وانت يا نايف معاهم ؟تبيع اخوك عشان ذا البدوي
نايف:ايه معاهم لا تتكلم عنه بالجهل وانت ما تعرفه زين وبعدين كلنا اصلنا ذي الديره يعني حنا بدو
مشى وافي بجهه وترك عيال عمه
بدر: وين بتروح الحين
وافي:بروح اتمشى لحالي وانتم روحوا راضوا ولد عمكم الي بتموتون عليه
سطام :تستهبل انت بتتمشى لحالك اخر الليل وبالمطر ما تدري وش يطلع لك
وافي:خل يطلع لي عقرب يقرصني وافتك زي ماجد اخو سياف
نايف:وافي شفيك ذي اليومين متغير صاير حساس بزياده وتكبر المواضيع ما كنك البكر
وافي رجع وصرخ عليهم :واذا البكر يعني واذا البكر ما اغلط ؟ ما اعصب ؟ ما اعبر عن مشاعري ...لازم دايم اصبر لأني البكر لازم دايم اسكت لاني البكر خلاص خلوني لحالي لو مره وحده
ورجع يمشي
نايف: بلحقه ذا المجنون محد يدري وش بيسوي بنفسه
بدر :لا خله شوي وبيرجع المكان الي رايح له مافي شي خطير
رجعوا الشباب المجلس
ابو سطام :وين وافي ماشوفه معاكم
نايف :زع...
دقه بدر وقال :بيتمشى لحاله شوي وبيجي
ابو وافي :يعرف المكان هو ؟
خالد:راح شرق جهه الجبل الي كنا نلعب عليه واحنا صغار
ابو وافي:اجل ما عليه خوف
شوي وقال ابو سطام :يلا استأذنكم بروح اشوف النياق
ابو سياف :قم سياف مع عمك دله الطريق
ابو سطام :قلنا طولنا عن الديره يابو سياف بس مو لدرجه ننسى حلال ابونا الله يهديك ...ادل ادل ريح ياسياف
ابو سيّاف يمازح ابو سطام :الشيب غزاك قلت يمكن معاك زهايمر
ابو سطام :ان كان الزهايمر بيجي احد بيجي ابو خالد
ابو خالد: ليه ؟
ابو سطام :كل ما زانت الجلسه نسيت مفتاحك ببيتي
ابو خالد: انا ؟ مستحيل
ابو وافي: الا حتى عندي تنسى اغراضك دايم
ابو سطام: يلا استأذنكم
...
في الحوش
ملاك :ريوف تعالي
ديم تغز ريوف: حركات صارت صديقتك
ريوف تضحك :اي صارت صديقتي
ريوف :طيب جايه
جلسوا على المرجيحات الي بالحوش
ملاك :تفشلت بالشارع الله ياخذني
ريوف :وش سويتي
ملاك :طلع جانبي الطفولي ولعبت مع البزران في المطر وجا اخوي سياف ومعاه عيال غريبين شكلهم عيال عمي المهم شافوني العب معاهم وتهاوشوا مدري ليه بس اعرف اني السبب
ريوف :تعرفين مين تهاوشو؟
ملاك :اتوقع واحد اسمه وافي واخوي سياف
ريوف :اهاا وافي ولد عمي متعب
ملاك :ياربي وش سويت انا
ريوف : مره تهاوشوا بالضرب
الجهنوف :مين الي تهاوشوا
ريوف :بسم الله وش جابك
الهنوف:وش تسولفون بدوني
طالعت ريوف بملاك وهزت ملاك براسها بالموافقه
ريوف :ملاك كانت تلعب مع الاطفال بالمطر وجو عيال عمي واخواني وشافوا وتهاوشوا وافي وسياف اخوها
الهنوف:هوشه قويه فيها ضرب ولا بس كلام ؟
ملاك :لا بس كلام ،ترا الكلام يعور اكثر من الضرب
الهنوف :دام كلام لا تخافين وافي ذي اليومين صاير حساس وصار يسهر وقت طويل يوم ولا يومين وينام وقت طويل واخلاقه ونفسيته تغيرت وما يحب ريحه العطور مره
ريوف :مسكين اكيد لأنه ما لقي وظيفه
ملاك وجهها تغير لأنها عرفت اعراض التعاطي وقرتها بكتاب من كتبها
الهنوف:ريوف قومي دوري ابي اتمرجح
ريوف :ما بتكفيك يا دبه بتطيح فيك
الهنوف :اقدر ارفع عليك قضيه بسبب كلامك ذا وعندي ملاك شاهده صح ملاك ؟
ملاك سرحانه
ريوف :لا تكبرين الموضوع ملاك عادي هم كذا العيال بكره تشوفينهم يتصالحون
لسى سرحانه
الهنوف تدقها :ملاك شفيك ؟
ملاك :ها ولا شي ولا شي
الجازيه :هربنا انا وديم ووجدان لأنهم بدوا يسولفون سوالف متزوجات
ريوف :يوو الله يعين ذي السوالف ما اطيقها
وجدان :احس فيني نوم
ملاك :اذا تبون تنامون بجهز لكم الغرفه
ريوف :الله اخر مره نمنا مع بعض من زمان
ديم :احب الجلسات الي قبل النوم يا انها تموت ضحك
الهنوف :تبين نساعدك ملاك ؟
ملاك :لا عادي هي بس الفرش بحطها وانتم تجهزوا للنوم واذا تبون مويا بالمطبخ روحوا عادي
غاليه :وش تسوون
الجازيه :بنروح ننام
غاليه :طيب بنتي برا
الهنوف:بنروح نجيبها انا وريوف
ريوف :شدخلني انا
الهنوف سحبتها وطلعوا
الهنوف :يا ذكيه عشان نسأل العنود عن الهوشه هي تعرف عيال عمي كلهم
ريوف :صح وربي وبرضو نقول لها ما تعلم احد
الهنوف :ليش
ريوف :احس ملاك متفشله من الموقف مسكينه
ريوف وقفت وقالت :الهنوف تسمعين الي اسمعه
الهنوف :اتوقع
ريوف: وش تسمعين
الهنوف :انتي وش تسمعين
ريوف خلينا نقول بنفس الوقت
الهنوف :كلب
ريوف :كلب
ريوف :عندك خطه
الهنوف :ايوه
ريوف :ايش
الهنوف :نعد لين ثلاثه ونركض
نايف :خطه سيئه
ريوف صرخت :بسم الله وش جابك انت
بدر :وش فيهم البنات
نايف :يخافون من ذا الجرو
ريوف :كذاب مو جرو ذا كلب كبير مسعور لو يعضك تتحول زومبي
بدر شال الجرو بيده وقال :هذا الوجه البريء بيحولك زومبي
الهنوف :طيب صوته كان كبير
ريوف :شكله جني كان متشكل كلب كبير ويوم جيتم صار جرو
بدر :لا انا شايفه من يوم طلعتم جرو
ريوف :بدر يالحيوان من يوم طلعنا تراقبنا ولا فكرت تنقذنا
بدر :ليه طالعين
ريوف :نبي نجيب العنود
الهنوف:اي صح نايف كيف صارت الهوشه
نايف :اي هوشه
الهنوف:ملاك تقول وافي وسياف تهاشوا عشانها تلعب مع البزران
نايف :اهااا ماهي هوشه
الهنوف:اجل ايش
نايف :وافي حساس بزياده ذي الايام ...يلا ارجعوا البيت قبل تتحولون زومبي
ريوف :طيب والبنت ؟
بدر :ابوها خذها ووداها عند امها ...يلا ارجعوا بننام الحين
ريوف :لا تتحكم فيني ولا بكلم وجدان ترفع عليك قضيه
بدر :ياي خفت تراها خريجه محاماه مو محاميه
ريوف :بس تعرف القانون اكثر مني ومنك
بدر :طيب خلاص نعتذر ياسيده ريوف ...هل يمكنك يا سيده ريوف الذهاب الى المنزل اذا سمحتي
ريوف :طيب بس اسكت خلاص ما تعرف فصحى
...
وافي يكلم نفسه وهو جالس على تراب متجمع بشكل كبير مثل الكثبان الرمليه
:حلو عيال عمي يقلبون علي عشان سيّاف ويقولون ليه متغير ...محد يعرف حالتي محد يهتم فيني لو اموت هنا محد درا بي
ابو سطام :الا انا اهتم فيك وابوك وكلهم يهتمون فيك
وافي: وش جابك هنا
ابو سطام :رجولي
وافي ضحك :مو وقت مزحك يا عم
ابو سطام :ولاهو وقت زعلك
وافي:ليه محد يفهمني طيب ؟
ابو سطام :لأن محد يدري وش سبب تغيرك ...تبي تعلمهم براحتك بس بينظرون لك نظره المجرم
وافي:طيب انت وش تشوفني
ابو سطام :ولد اخوي طاح بغلط ويحتاج من يقومه
وافي: مين يقومني
ابو سطام :انا
وافي حضن ابو سطام وقال :لولاك يا عمي كان ضعت
ابو سطام بعد عنه وقال :لولاي ؟
وافي ضحك وقال :لولا الله ثم انت
ابو سطام :ايوه خلك كذا واذا زعلت تعال اجلس هنا طلع طاقتك السلبيه وارجع مثلي يوم كنت صغير كنت اجي هنا اذا تهاوشت مع ابوك العصر وارجع المغرب
وان شاء الله اذا تعافيت ادور لك وظيفه وزوجه وتبدا حياه جديده
وافي: الاولى طيب بس الثانيه باقي ما ابي اتزوج
ابو سطام قام وقال : براحتك
نزل شوي وقال :ما بتجي
وافي :شوي والحقك احس لسى زعلان من شي
ابو سطام :بس لا تتأخر عشان ما يجيك ابو فانوس
وافي: خرافات الاولين
ابو سطام :اعرف واحد قال خرافات وبعدين صار ساحر
وافي:عادك يا عمي تقرا روايات الجن
ابو سطام :حلوه ياخي جرب اقراها
وافي :جربت ما عجبني
ابو سطام ضحك ونزل
...
ملاك :اخيرا ناموا
فتحت النافذه وجابت حمامه بقفص هي حاطتها عند النافذه وعلقت برجلها ورقه هي كاتبتها وطارت الحمامه
ملاك :شفتي يا ملاك زي كل يوم ما تغير شي بحياتك
...
وافي: وش ذاك يطير ...حمامه بذا الوقت
وقفت الحمامه جنبه
وافي:وش ذا برجلها ورقه حمام زاجل مين باقي يستخدمه
مسك الحمامه وهي تحاول تفك الورقه من رجلها وفكها وقراها

الرساله :اليوم يوم رائع ...طبعًا لو كنت فيه لكنني لن انكر جماله فقد زارنا اقاربي كما قلت لك بالامس ،عندما رأيتهم تذكرت يوم فقدك حين اجتمعوا على الحزن وقد كانوا قبلها يجتمعون على الفرح والسرور والاعياد انتابني شعور الخوف من مقابلتهم فلم ارد ان يتكرر ذلك اليوم الكئيب فيعزونني فيك ولكنني تشجعت كما دائمًا واقتربت منهم وسلمت عليهم دون خوف تعرفت عليهم والاهم من ذلك زارنا ضيفك المفضل لكنه لايزال لم يفهم انك لست هنا انه يزورنا منذ خمسة عشر عامًا كل مره فيها اقول له انك رحلت فيأبى الا ان يزورنا ويذكرنا بك ...انه المطر لكن هذه المره بدل ان اعاتبه على قدومه وانت لست هنا رحبت به كما رحبت بضيوفي ولعبت فيه مع الاطفال وكأن الزمن قد عاد بي للطفوله ،حيث كنت موجودًا وحتى انني لوهله رأيت خيالك بين الاطفال كنت تنادي علي لأعود الى البيت ولا امرض لحقت بك لكنك اختفيت الى متى سأبقى على هذا الحال ؟ كنت ولا زلت اتمنى ان اذهب اليك ولكنني لا اريد ان تفقدني امي فيزيد وجعها ولا اريد لأبي واخي ان يصابا بالجنون اخذت مكانك وحاولت الهامهم الصبر لكن انا من يصبرني ؟.

اخذ وافي الرساله وطلع قم من جيبه وكتب على قفاها ورجع ربطها بالحمامه وطيرها وقال :ارجعي لصاحبك
بعد شوي وصلت الحمامه عند ملاك بس المفاجأه ان الورقه باقي فيها مسكت ملاك الحمامه وعاتبتها :ليش ما فكيتي الورقه ؟
ويوم جت بتفكها لقيت عليها كلام فتحتها وقرت
الرساله :لا اعرف من أنت لكنني متأكد بأنك انسان قوي فقد تغلبت على مخاوفك وسلمت على اقاربك وهم يذكرونك بحزنك ... وبالنسبه للمطر فهو لا يزال في ضيافه فقيدك لكنه يزوركم ليتطمن عليكم فالمطر حديث عهد بربه وارواح من فقدنا عند ربهم لذلك كف عن معاتبه المطر واحك له أنك بخير لكي يُطمئن فقيدك عليك
وتأكد بأن فقيدك فخور بك وبقوتك
مجهول
ملاك : وش ذا اول مره احد يرد على رسالتي ابي اعرفه الي رد عليها
اخذت عبايتها ونزلت والحمامه بيدها ويوم طلعت من البيت فكت الحمامه ولحقتها ويوم وصلت المكان ...