وانا في درب الهلاك ظهرت لي يا ملاك

4

بعد اسبوع
ريوف على سجادتها اخر الليل بنور القمر تدعي والدموع من عيونها كانها مطر :يارب المظلومين انهم ظلموني وانت احكم الحاكمين يارب برأني كما برأت يوسف يارب برأني كما برأت عائشه يارب المكروبين فرج كربتي كما فرجت كربه يونس في بطن الحوت حسبي الله الذي لا اله الا هو ونعم الوكيل حسبي الله الذي لا اله الا هو ونعم الوكيل حسبي الله الذي الا اله الا هو ونعم الوكيل
ملاك دخلت :عادك ما نمتي
ريوف : وكيف انام ومافيه احد يصدقني كيف انام وانا مظلومه يارب ان الي ظلمتني ما تذوق النوم
ملاك حضنتها وقالت :حبيبتي انتي
ريوف :ملاك انتي تصدقيني ؟
ملاك :ما سمعت منك الاحداث عشان احكم ... مستعده تحكين لي ولا لا
ريوف اخذت نفس عميق وهي تبكي
ملاك :ريوف حبيبتي انا مو مكذبتك مستحيل اتهمك بشي أنتي ما سويتيه انتي بعيني بريئه حتى لو سويتيها
ريوف :مستعده احكي لك
ملاك :بس اول شي اشربي مويا وهدي على نفسك وامسحي دموعك لو انتي على الحق ربي ما بيضيعك لو وكلتي امرك لله مثل ما سمعتك قبل شوي ما عليك خوف الله هو خالق السماوات والارض وما بينهما ما بيعجزه انه يظهر الحق بس خلي عندك ثقه قويه بالله
ريوف شربت مويا ومسحت دموعها وقالت :ونعم بالله ...كل شي بدا يوم قلتوا لي اروح اعلم ابوي اننا بنطلع نفطر قبل اسبوع لقيت... نايف بمجلس الرجال وكان وجهه متغير وعيونه حمرا وصوته رايح ...سألته وش فيك قال لي انه شرب لبن نياق واستفرغ منه وانا ضحكت عليه ذاك اليوم وقلت انه ... دلوع ولبن النياق اقدر اشربه وهو ...تحداني على خمس ميه انه يجيب لي لبن نياق واشربه بدون ما استفرغ واخذنا الكلام بالمجلس و... بعد شوي طلعنا وربي ما سوينا شي مثل ما تقول ذيك العجوز اقص لساني لو سوينا شي ... عساني بالموت لو صار شي بذاك المجلس ...عساني بالموت
ملاك :لا تضغطين على نفسك صدقتك انا ولا تدعين على نفسك بالموت الي صار شي منطقي من شخصيتك تحبين التحديات والمغامره الي قلتيه منطقي اكثر من الي قالته ذيك العجوز ... الحين اجلسي شوي واجي
ريوف : طيب
قامت ملاك وجابت حمامه
ريوف وهي تبتسم : وش ذا
ملاك :قد سمعتي بالحمام الزاجل ؟
ريوف :اي قريته بالروايه الي اخذتها منك
ملاك :هذا ياقوت هو الحمام الزاجل الوحيد بذي الديره وانا دربته بيدي
ريوف :وش نسوي
ملاك :بنستخدمه مثل اداه للفضفضه رح نكتب رساله ونعلقها برجله ويطير فيها لين مكان محد فيه ويفك الرساله بنفسه
ريوف :تسوين كذا من زمان ؟
ملاك :كل يوم
ريوف :وش ذا الهم الي يخليك تفضفضين كل يوم ؟
ملاك وهي تطالع بالقمر :تعرفين قصه اخوي ماجد الي توفى ؟
ريوف: سمعت عنها
ملاك :بس ما سمعتيها من جهتي
ريوف :بسمعها اذا ما عندك مانع
ملاك :امي يوم ولدت بأخوي ماجد كان عمري ٦ سنوات حبيته كثير والاهم من هذا انا الي رعيته ...امي يوم ولدت فيه جاها اكتئاب الولاده (بدت تدمع ملاك ) وطبعًا لأننا بالديره ما يعترفون بالامراض النفسيه عندهم بس امراض جسديه او مس وسحر وذي الاشياء وبسبب معتقداتهم ذي ... امي عانت من اكتئاب الولاده لسنتين محد كان مقتنع انه اكتئاب كانوا يودونها عند شيوخ يقرون عليها على اساس انه حسد طول ذي السنتين وانا اهتم بماجد صرت له الام والاب والاخت والاخ لين يوم من الايام اقتنع ابوي انه مرض نفسي وراح الرياض يعالج امي طبعًا العلاج كان له اعراض جانبيه وامي كانت تحتاج تروح الطبيب كل اسبوعين وبعد شهرين اخيرًا تشافت من الاكتئاب ورجعت تهتم بماجد لكن بعد ما فات الاوان ماجد تعلق فيني كأني امه وامي صارت شخص غريب بالنسبه له وبعد سنه تقريبًا يوم تعود على امي وانا استأمنت امي عليه طلعت العب برا وكان عمري وقتها عشر سنوات شوي اشوف ماجد خرج من البيت لحاله ورايح لكومه شعير شفت فيها عقربه ... صرت اصرخ عليه واقول ماجد ارجع فيه عقرب فيه عقرب بس ما سمعني شفته ينقرص قدام عيوني وابوي كانت رجله مكسوره وقاعد بالبيت بس واحد من الحاره ما اذكر مين هو بالضبط كان ابعد مني مسافه لكنه ركض وشال ماجد ووداه عند جدتي الي كانت خبيره بالعلاجات بالاعشاب سألتني عن لون العقرب وقلت لها انها سودا انقلب وجه جدتي وقامت تدور باغراضها بتوتر كنت ابكي وقتها لأني اشوف ماجد يتألم قدامي قالت جدتي :اصص ولا كلمه لا تبكين انتي حفيده بخيته يعني تدورين حلول للمشاكل بدال البكى
قلت لها :طيب وش الحل
قالت :روحي بوسط الحاره وقولي جدتي تبي العشبه الفلانيه اخوي قرصته عقرب سودا
نفذت امرها وطلعت بوسط الحاره صارخت بأعلى صوتي والدموع بمحاجري كنت اتذكر كلام جدتي وامسحها واقوي نفسي عشان اخوي استنفروا اهل القريه كلهم وقاموا يدورون العشبه ومثل ما تعرفين ... محد لقيها واخوي ماجد ...مات
حسيت الدنيا قفلت بوجهي لين يوم لقيت بيضه حمامه فسقت توها واخذتها عندي وربيتها على اساس انها بتصير حمامه زاجله وفعلا صارت حمامه زجله افضفض على الوراق واعلقه برجلها وهي تروح ترميها بمكان محدد
ريوف :عانيتي كثير بحياتك
ملاك :تعرفين معنى آيه (إن الانسان خلق في كبد )؟
ريوف :لا
ملاك :يعني ان الانسان خلق في المعاناه وكلنا سواسيه بالمعانه لكن نختلف في مدى الصبر الي يصبر افضل من الجزوع
ريوف تبكي
ملاك :لا تبكين انتي حفيده بخيته يعني تدورين على حلول للمشاكل بدال البكى
ريوف :طيب ما بيدي شي غير الدعاء
ملاك :هذا اقوى سلاح انتي بتلتجئين لرب الناس عشان ينجيك
ريوف :طيب تسمحين لي ابكي ذي الليله بس ؟
ملاك :لك اسبوع تبكين جربي تكتبين رساله ونعطي ياقوت
ريوف : وش اكتب
ملاك :كل الي بخاطرك
ريوف :بجرب ... عطيني القلم
...
الفجر
الهنوف طلعت الحوش الا الباب يدق
الهنوف : مين
نايف : انا نايف
فتحت له الباب ودخل
الهنوف:وش تبي
نايف : ابي اتكلم معاك عادي تجين ؟
الهنوف :محد هنا كلهم نايمين اجلس هنا
نايف يطالع بالشجره الي بالحوش
نايف :وش رايك نطلع فوق الشجره ؟
الهنوف :تحدي ؟
نايف : لا احس ابي مكان خاص فينا انا وانتي نتكلم فيه بأسرارنا
الهنوف تطالع فيه بحزن :طيب
يوم طلعوا الشجره قالت الهنوف :وش تحس ؟
نايف :احس اني اعجز انسان على وجه الارض ...وش قالت ذيك العجوز بالحرف ؟ انا وصلني الكلام منقول من ابوي
الهنوف تتذكر الي صار وتحكيه لنايف :
نزلوا البنات بسرعه ووقفوا على نص الدرج
نزلت ريوف درجتين زياده وقالت :يمه وش فيك
ام خالد طلعت الدرج وهي تقول :وش ما فيني وش الي ما هببتي فيني
وسحبت ريوف من شعرها وسط صراخ البنات وامهاتهم وهم يحاولون يفرعون بينهم...
بعد شوي فرعوا بينهم قالت ام سطام : وش صار عشان تقلبين على بنتك وش الي قالوا لك عشان تجين تاخذينها من شعرها بين البنات ؟
ام خالد وهي تبكي وتهز جذعها قدام وورا :اه يا يمه الي قالوه لي يقطع القلب ...قالوا ان بنتي ......
ام وافي : وش بها بنتك
ام خالد :بنتي وولدك يام وافي بنتي وولدك
ام وافي كأنها فهمت بس تحاول ما تصدق الفكره :وش فيه ولدي اي واحد
ام خالد :نايف ...نايف وريوف كانوا بالمجلس لحالهم الصباح ...وشافتهم خالتي صيته يوم دخلوا ويوم يطلعون
ام وافي تشهق :حسبي الله ونعم الوكيل حسبي الله ونعم الوكيل ببنت عمك تسويها ما وسوس لك الشيطان الا معاها ...ليتني رضعتكم سوا وصرتم اخوان ليتني
غاليه وهي تواسي امها وصوتها تغير ووجها انقلب من الي سمعته :يا يمه ما تنفع ليتني بعد ما فات الفوت ما تنفع
ام سطام :إن لله وإنا اليه راجعون اللهم اجرنا في مصيبتنا اخلفنا خيرًا منها
ام سيّاف :هونوا على ارواحكم لا يرتفع لكم الضغط خالتي صيته ذي اليومين ذاكرتها ضعيفه
ام خالد :لا ولله يا فايزه ما شفتيها انتي كيف كانت تحكيها بتفاصيل دقيقه ليتني تصممت وقتها ولا سمعتها كانت متأكده من كلامها
ام وافي :الحين وش السوات نرجع الرياض ونستر عليهم ونزوجهم ولا ايش
ريوف كانت واقفه ورا الباب تسمع كلامهم وتبكي ويوم قالت ام وافي نزوجهم دخلت عليهم وجلست عند ركب امها :يمه لا تزوجني لا لا ما ابي يا يمه ولله ما سويتها ما سويتها
ام خالد تلف وجهها عن ريوف وتتجاهلها :الا بنزوجك بس ما بنزوجك نايف بكلم خالد يدور لك واحد من اخوياه يستر عليك
ريوف زادت تبكي وتشاهق وقالت :يمه حتى انتي تصدقينهم ؟ حتى انتي
ريم قامت وهي تمسك دموعها وقومتها من تحت واخذتها للغرفه
ريوف :ريم انتي اختي الكبيره وتعرفيني تصدقين ذيك العجوز
ريم :ما اقدر اقول شي
ريوف تبكي : حتى انتي يا ريم
العنود وهي تتكلم مع امها :ماما وش فيها عمتي ريوف تبكي ؟
غاليه :ما فيها شي يا ماما بس بطنها يوجعها
العنود :طيب ليه كلكم تبكون
غاليه تصرفها : تبغين تروحين عند بابا ؟
العنود :بيشتري لي حلاو ؟
غاليه : اي
العنود : ايوه ايوه ابغا اروح
غاليه وهي تكلم خالد
غاليه :الو
خالد : هلا بك يا بعد حيي هلا بك ما اشتقتي ؟
غاليه وصوتها متغير :تعال خذ العنود تبيك
خالد :تبكين ؟ عسى ما شر
غاليه :لا بس شوي تعبانه
خالد :تبين اوديك الرياض ؟
غاليه :لا بس الدوره برتاح شوي و بتخف بعد شوي بس تعال وخذ العنود
خالد :اذا احتجتي شي دقي علي
غاليه :ان شاء الله
العنود :بيجي ؟
غاليه : اي بس يلا خذي حذيانك
بعد شوي جا خالد ودق الباب
غاليه :العنود ماما وش رايك نلعب لعبه ؟
العنود :وش هي
غاليه :اذا بابا يسألك عني قولي له تعبانه نسوي فيه مقلب اوكي ؟
العنود وهي تضحك :يسس
غاليه : يلا ابوك عند الباب
دخلت غاليه البيت
ام خالد :وين العنود ؟
غاليه :مع ابوها
ام خالد :سمعت الي قلناه ؟
غاليه : ما اظن
ام خالد : عساها ما تقول لأبوها شي
غاليه : لا ما بتقول له ان شاء الله
...
العنود مع ابوها
خالد : بابا العنود وش فيها ماما ؟
العنود تضحك بالسر :ماما تعبانه
خالد : تعبانه وتضحكين ؟
العنود ما قدرت تمسك نفسها وضحكت وجلست تقول :ماما مو تعبانه مقلب
خالد وقف بنص الطريق : كيف مقلب؟
العنود :ماما مو تعبانه تبغا تسوي فيك مقلب بس كلهم يبكون بالبيت
خالد : ليه يبكون وش قالوا
العنود :اول شي وديني البقاله واقول لك
خالد :العنود خلصيني وش قالوا ؟
العنود :اول شي ابي البقاله
خالد :اففف يلا بسرعه
يوم طلعوا من البقاله
خالد :ها بتقولين لي وش صار ؟
العنود :اي
خالد : وش
العنود:جت ماما منيره وهاوشت عمه ريوف وسحبت شعرها بعدين اخذتها عمتي ريم وخالتي الهنوف وخالتي الجازيه الغرفه
خالد :ايوه ... ليه ماما منيره هاوشت ريوف ؟
العنود:ماما منيره تقول فيه عجوز شريره ساحره زي الي مع سندريلا تقول
خالد :ايوه وش تقول
العنود :تقول عمه ريوف وخالو نايف كانو مع بعض والعجوز الساحره ما تحب الامير والاميره مع بعض لأنها ما كانت اميره يوم هي صغيره
خالد : وش كانوا يسوون نايف وريوف
العنود : الامير والاميره ؟
خالد : اي الامير والاميره وش يسوون
العنود :مدري بس الله كان يبغاهم مع بعض ويفوزون زي سندريلا
خالد يهمس :افف بدينا خيالات الصغار ...لحظه وش الي صار نايف وريوف مع بعض وشافتهم عجوز ؟ ... العنود تبغين ترجعين عند ماما ؟
العنود :لا ابغا اروح عند بابا سعود
خالد :بابا سعود نايم يلا نرجع عند ماما
العنود : طيب
...
يوم وصلوا
خالد :العنود نادي ماما
العنود :طيب
شوي طلعت غاليه مع العنود :وش تبي
خالد يطالع بالعنود :ابي اتكلم معاك
غاليه :العنود روحي العبي بالمرجيحات
العنود :طيب
خالد :وش الي صار ؟
غاليه : ما فيه شي تعبانه بس
خالد يرفع صوته :لا تكذبين علي وش صار؟
غاليه :اششش لا ترفع صوتك قدام العنود
خالد :خلصيني وش الي صار ريوف ونايف ومدري ايش
غاليه وهي خايفه : قالت لك العنود ؟ ...يا ويلي
خالد :بتقولين ولا ادخل اسأل امي
ام خالد طلعت :انا بقول لك
غاليه تطالع فيها :خالتي
ام خالد :ادخلي انتي والعنود
غاليه :طيب
خالد : ها يمه وش صار
ام خالد :اختك ريوف هببت فينا الهبايب
خالد : وش هببت
ام خالد :نامت مع نايف بمجلس عمك ياسر
خالد :ايش ؟ انا اوريها
خالد بغى يدخل البيت ويصارخ :ريوووف
ام خالد مسكته :تعال وين رايح
خالد : بوريها هذي الي ما تربت انا بربيها
ام خالد :انت مجنون ؟ بدال ما تستر على اختك تفضحها بالشارع
خالد :نستر على زانيه ؟لا ولله ما استر عليها واتبرى منها هنا
ام خالد ترفع صوتها :محد يتبرى من احد وانا حيه
خالد وقف يفكر شوي وقال :نايف نايف الحيوان انا اوريه
ام خالد تلحقه :تعال خالد تعال
خالد ما سمعها ولا التفت لها
ام خالد : ياربي هذا الولد بيذبحني
ديم :انتي قلتي له وعلمتيه تحملي الي سويتيه
ام خالد :تلوميني ؟
ديم :اي الومك على كل شي صار ماسترتي على بنتك وكلمتيها بينك وبينها
ام خالد :لا يكون انتي تدرين من اول ساكته
ديم : ريوف مستحيل تسويها اختي وانا اعرفها
ام خالد :بنتي وانا اعرفها
ديم :اجل تحملي عواقب تربيتك الفاشله
ريم :ديم لا تكلمين امك كذا
ديم :معليش ولله اذا هي مو واثقه بتربيتها وتتهم بنتها بالحرام بكلمها كذا
ام خالد :خليها خليها تطلع الي بخاطرها عن تربيتي ...هاه يا مس ديم وش الي مو عاجبك بتربيتي ونغيره عشان نرضيك ؟
ديم طالعت فيهم ودخلت البيت وراحت غرفت ريوف على طول وراحت حضنت ريوف وقالت :ريوف حبيبتي اذا محد صدقك بذا الكون كله انا اصدقك انتي ما سويتيها صح ؟
ريوف يوم سمعت الكلام ذا من ديم بكت زياده وحضنت ديم كأنها بحركتها ذي تقول اخيرًا لقيت ملجأي الوحيد
ديم بعدت عن ريوف شوي وجلست تمسح شعرها وتقول :ريوف قولي لي انتي صدق سويتيها ولا لا ؟
ريوف وهي تشاهق :لا ما سويتها
ديم حضنتها:حبيبتي عرفت ولله عرفت
...
نايف :يعني هذا كله صار لريوف بسببي ؟ شفتي كيف انا انسان غبي
الهنوف :مالك ذنب حتى انت ضحيه
نايف :بس ريوف بتتعذب اكثر مني بسبب نظرات المجتمع الغبيه لها
الهنوف حطت يدها على يد نايف :طيب سمعت ان خالد كان بيذبحك بالرشاش صدق ؟
نايف وجلس يحكي لها الي صار :
خالد دخل مجلس الرجال وهو معاه رشاش وقال :نايف يا كلب تدخل بعرض اختي انا اوريك
قاموا الرجال بسرعه
ابو خالد : وش الي تهذري فيه انت ؟
خالد :هذا الكلب الي المفروض يعتبر ولد عمي اعتدا على عرض اختي
ابو وافي يطالع في نايف : منجد ؟
نايف وهو يرجف لأن السلاح موجه عليه :وش تقول انت ؟
خالد :لا تسوي نفسك ما تدري انت اختليت بأختي بذا المجلس وسويت الي ما ينقال
ابو سيّاف :مين قال لك ذا الكلام ؟
خالد : مالكم دخل مين قال لي اهم شي انظف شرفي
جا خالد بيعشّق الرشاش
ابو سطام جلس يناظر بالغرفه لين شاف شماغ جنب خالد
نقز على خالد واخذ السلاح منه ورماه على ابو سيّاف واخذ الشماغ الي جنب خالد وربط فيه يدينه
خالد : فكوني على ذا الحقير فكوني
ابو خالد قرب من خالد الي جالس بالارض ويدينه مربطه وسفعه كف وقال :اول شي قول الي صار زين عشان نحكم مين اعتدا على عرض مين
خالد :خل امي تحكي لك هي الي عندها العلم الاكيد
ابو خالد : وانت حمار جاي بعلم ماهو اكيد وتبي تقتل ولد عمك ... حتى امك ما عندها علم اكيد الي عندها العلم الاكيد ريوف
خالد : بتكذب عليك
ابو خالد :اسكت انت ولا كلمه انا الي ربيت اختك انا الي اقرر اسمعها واصدقها ولا اكذبها
سكت شوي وطالع فخالد وقال : اسمعوني انتم ...لحد يفكه خلوه هنا مربط بوسط المجلس عشان يتعلم ثاني مره التهور وش يسوي
ابو خالد طالع
بدر : يبه وين رايح
ابو خالد :ابي اشوف اختك واخذ العلم منها
بدر بيلحق ابوه
ابو خالد :اقعد انت واعتبر بأخوك عشان لا وسوس لك الشيطان منه ولا منه تشوف مصيرك كيف
بعد شوي
نايف كان بيطلع
خالد : وين بتطلع ؟ بتروح تدور لك بنت ثانيه تعتدي على عرضها
نايف وقف وطالع فيه شوي وقال :بروح اصلح الي خربته ...بس بالسلم مو بالحرب والهواش
ابو سطام: اقعد انت هنا الكبار بيحلون الموضوع ... متعب وياسر خلوكم عند هالورعان لا يهببون فينا مصايب
ابو سطام طلع و وافي لحقه
وشوي ورجع وافي
...
نايف وبعدها ما ادري وش صار بين عمي جابر ووافي ... اساسا عمي جابر ووافي متغيرين كثير هالايام صايرين اقرب لبعض بزياده كأنه عمي جابر ابو وافي
الهنوف :عمي جابر جا عندنا مع عمي سعود
نايف : صدق ؟ وش سوو
الهنوف :دخلوا عند ريوف وكلموها
نايف :سوو لها شي ؟ ضربوها ولا اذوها ؟
الهنوف :لا
نايف :اشوا
الهنوف :بقول لك شي بس لا تزعل ولا تسوي اي حركه غبيه وجابوني بصراحه
نايف : ما تصدقيني حتى انتي ؟
الهنوف :لا لا احس فيك طاقه غريبه اذا تكلمنا عن ريوف ولا شفتها
نايف :طبيعي كلنا متهمين بشي ما سويناه
الهنوف :لا من قبل يعني يوم كنا بالرياض كأن عندك مشاعر لها
نايف : وش قصدك
الهنوف : ادري انك فهمت بس تستغبي
نايف تنهد وقال : اي احبها من يومتنا بزران
الهنوف :مره تحبها
نايف :كنت ناوي اخلص الدراسه بأرامكو واتوظف عندهم وبعدين اجي اخطبها لكن ...
نايف يضحك بقهر :زي ما تشوفين حتى حلمي البسيط سرقوه مني
الهنوف حضنته :يا حبيبي انت ...لا تشيل هم كل شي بيعدي
نايف يضحك
الهنوف : وش فيك تضحك ؟
نايف : اول مره تصيرين حنونه كذا معاي
الهنوف :ترا بدفك من فوق الشجره وتعرف الحنان كيف
ام وافي : الهنوف
الهنوف :وي امي تنادي انا بنزل وانت دبر لك طريق تخرج فيه قبل يشوفونك بالبيت ويلعنون خيرك
نايف : لحظه
الهنوف نزلت : هلا يمه
نايف :الحين وش ينزلني ... اي وش ذا
سطام يصكه بالحصى و يهمس له : يا حيوان وش تسوي فوق الشجره ؟
نايف : احاول انزل
سطام : بلا استغباء ليه طلعت ... انت لو يشوفك عمي ابو خالد ولا خالتي ام خالد ذبحوك انزل
نايف : وكيف انزل ومحد يشوفني
سطام: انا عندي خطه بس انزل وتخبى ورا الشجره
نايف : طيب
سطام يدق الباب
ام سيّاف : ملاك شوفي مين يدق الباب
نايف يطالع بسطام من فوق الشجره ويقول :لاا نكبتنا يا شيخ نكبتنا
سطام :انا اعرف اسكت خلاص
ملاك : مين
سطام :انا
ملاك فتحت الباب وشهقت : بسم الله مين انت وتخبت ورا الباب
سطام : ولد عمك انا
ملاك :احد يقول انا اذا دق الباب ؟
سطام : و احد يفتح الباب لكل من قال انا
ملاك : طيب وش بغيت
سطام : نادي امي خالتك حصه
ملاك : طيب اصبر
نايف : غبي انت
سطام : يلا اطلع بسرعه قبل تجي امي
نايف طلع وسحبه سطام وخباه ورا الباب
ام سطام : نعم وش بغيت ؟
سطام : وش فطوركم ؟
ام سطام :الي فيه الخير والبركه ليه وش بغيت ؟
سطام :زهقت من فطور الشيبان اذا بتحطين لي من فطوركم
ام سطام : ابشر يا حبيبي ابشر بحط لك بس باقي ما جهزناه اذا بتروح عند اعمامك لين اجهزه وادق عليك
سطام :دقي بس هاه ؟ لا تجين وتتعبين نفسك
ام سطام :ان شاء الله
سطام يبوس يدينها : يا جعل هاليدين ما تمسهم النار
ام سطام قفلت الباب
نايف : ما بغيت تخلص سوالف مع امك
سطام : يلا رجعنا الحين يمسكونك تحقيق وين كنت
نايف: عسى هم ارسلوك ؟
سطام :اي
نايف : يارب عديها على خير
...
ريم دخلت على ريوف وهي جالسه تبكي وريوف يوم شافتها تخبت بالبطانيه
ريم :ريوف
ريوف ما ترد
ريم :ودي اتكلم معاك
ريوف :بعد ايش ؟ كل الناس صدقوني الا انت وامي
ريم :دام كل الناس معاك ما تحتاجينا
ريوف :الا اكثر شي احتاجه انتم اكثر شي احتاجه اخت تطبطب علي بدال ما تتهمني وام تدعي لي بدال ما تدعي علي وتسبني محد صدقني فيكم الا ديم وابوي
ريم :وبدر نسيتيه ؟
ريوف :ما جاني
ريم : انا جيت عشانه يبي يكلمك امي لو تدري اني دخلت بجوالي عندك ذبحتني
ريوف :وش بيقول بيتهمني معاكم ولا ايش
ريم :انا اقول اسمعيه وشوفي
ريوف :هاتي
بدر :الو
ريوف :نعم
بدر :كيفك ؟
ريوف :ماني بخير
بدر :انا واقف عند البقاله تبين شي
ريوف :لا بس ابي كلمه وحده اي ولا لا
بدر :ايش ؟
ريوف :تصدق اني سويتها ؟
بدر :لا وترا حتى ريم ما تصدق بس قاعده تمثل على امي ...تعرفينها شخصيه ريم تحس نفسها مسؤوله عن الكل وهي تحبك اكثر من نفسها يوم كنتي صغيره كانت تهتم فيك اكثر من نفسها
ريوف وهي تسمع ذا الكلام جلست تطالع بريم وتبتسم
بدر :تدرين انها تحاول تقنع امي انك ما سويتي شي ...لا تعلمينها اني قلت ذا الكلام عنها
ريوف :ان شاء الله
بدر :هاه غيرتي رأيك تبين شي ولا لا ؟
ريوف :جيب لي على ذوقك
بدر :من عيوني الحين انا عندك
ريوف : يلا مع السلامه
ريم : وش يقول ؟
ريوف تطالع فيها وهي ماسكه الضحكه :يقول انه مصدقني وبيجيب لي شي من البقاله
ريم :هاه شفتي بدر وابوي وديم معاك
ريم جت بتطلع
ريوف :ريم
وقفت ريم وطالعت فيها
ريوف :شكرا
ريم ابتسمت وطلعت من الغرفه
ام خالد : وش كنتي تسوين عندها ؟
ريم :اختي ما بتطمن عليها ؟
ام خالد : وليه جوالك معاك
ريم :بدر كان يبي يكلمها
ام خالد : وش دراني انه بدر عطيني الجوال
ريم :بتشوفين بدر الي مكلمها
ام خالد فتحت الجوال ولقيت رقم بدر وبأسمه بعد :محد يدري يمكن تلعبون علي
ريم :يمه وش ذا الشك المبالغ فيه رقم ولدك وحافظته
ام خالد :الو
بدر :هلا
ام خالد :من انت ؟
بدر :يمه انا ولدك بدر نسيتي ؟
ام خالد :لا ما نسيتك ... وبعدين ثاني مره اذا تبي تكلم اختك الملعونه دق علي انا
بدر :لا حول ولا قوه والا بالله خلاص يمه قفلي بجي الحين معاي اغراض لريوف
ام خالد :اغراض وش ؟
بدر :اكل اكل بنتك عقدتيها ما تاكل لها اسبوع
ام خالد :جعلها تموت جوع
بدر قفل بوجهها
ريم : الباب يدق مسرع جا
ريم راحت تفتح :مين
خالد :انا اخوك خالد
فتحت له
خالد :تفتحين لكل من يقول انا اخوك ؟
ريم :عرفتك من صوتك
خالد :يمكن واحد يغير صوته
ريم : لا حول ولا قوه الا بالله جنون العالم كله انقسم نصين نص عندك ونص عند امي
خالد :ماني فاضي لك بعدين حسابك وين امي
ريم :فوق
خالد :افتحي لي طريق بكلمها
ريم :ترا بيت الناس مو كل ما بغيت امي دخلت على كيفك عيب ولله عيب
خالد :شوف مين يعلمني العيب والحرام
ام خالد طلعت :يا هلا بولدي يا هلا
خالد :هلا بك يمه
ام خالد : وش بغيت يا حبيبي؟
خالد :لقيت لك عريس يبي يستر على ريوف
ام خالد :الساعه المباركه منهو
ريم : مو منجدكم ؟
خالد :خويي فهد تذكرينه
ام خالد :اي
خالد :اشتكيت له السالفه وقال انه يبي يستر على ريوف ويتزوجها
ريم :لاا مستحيل
ديم طلعت على كلمه ريم :وش فيه
ريم :خالد يبي يزوج ريوف لصديقه الاربعيني
ديم :لا مالك حق
ام خالد :الا له حق يستر على اخته ...هاه يا وليدي متى يجون يخطبونها
خالد :اليوم بيجي هو وامه واخواته ابيكم تضيفونهم احسن ضيافه
ام خالد :من عيوني من عيوني بس نبي الزواج بعد ثلاث ايام
خالد :اي قالها هو ما عنده الا ذا الاسبوع اجازه يبي يتزوجها ويرجع فيها الرياض ولا من شاف ولا من درا
ديم تبكي :كيف يطاوعك قلبك تسوي بأختك الصغيره كذا
ريم :انا ندمت اني شفتك على حق انت اكبر غلطان
وراحوا داخل
خالد :كلامكم ما بيسوي شي بزوجها وغصب عنكم
ديم :كلامنا ما يسوي شي بس كلام ابوي بيغير كل شي
خالد : ابوي موافق
ديم وريم دخلوا عند ريوف وحضنوها وجلسوا يبكون
ريوف : وش فيكم وش صار ؟ لا تخوفوني
ام خالد دخلت وهي تبتسم :قوموا عدلوا اختكم وزينوها
ريوف :وش فيه ؟ يمه وش فيه ؟
ام خالد :بيجون يشوفونك اليوم نبي نزوجك
ريوف تهز راسها بالرفض وتبكي :لا يمه لا لا يمه ارجوك بتظلميني يا يمه
ام خالد وهي تطلع:انا ابي مصلحتك بزين حياتك
ديم :مستحيل ابوي يكون موافق بكلمه
ام خالد رجعت :ما عندك جوال
ديم :اخذتيه ؟
ام خالد :للأحتياط لين تتزوج اختكم
ديم :لا انتي مو امنا انتي انسانه ثانيه طلعت داخل شخصيه مجنونه
ام خالد :الا انا امكم الي ولدتكم انا امكم الي رضعتك وربتكم والحين تبي مصلحتكم وسعادتكم
ام سيّاف دخلت :وش صار
ام خالد :الساعه المباركه يا ام سيّاف الساعه المباركه وودي انك تشاركيني فرحتي
ام سيّاف فرحت :وش ؟
ام خالد :بنزوج ريوف
وتزغرط
ام سيّاف انقلب وجهها يوم شافت البنات متضايقين وقالت :ماشاء الله الله يوفقها وطلعت
قابلت ام وافي وام سطام على الدرج :وش فيها تزغرط ؟
ام سيّاف :تجننت تبي تزوج ريوف غصب عنها
ام وافي :لا حول ولا قوه الا بالله
ام خالد نزلت :ام سيّاف بغيت اسألك عندك بن للقهوه ولا ارسل خالد يجيب
ام سيّاف : مدري روحي شوفي
نزلت ام خالد وهي تغني :ومبارك عرس الاثنين ليله ربيع عين وقمره والي جمع بين الاثنين الله يطول بعمره
ام سطام :صدق انها تجننت الله يصلح الحال بس
ملاك كانت بالمطبخ وسمعت الي صار وراحت عند البنات
وجدان : وش فيهم ؟
ملاك :ماهم بصاحين
الهنوف : وش صار
ملاك :اليوم بيجون خطاب يشوفون ريوف
الهنوف :يا حسرتي عليك يا نايف يا حسرتي كل ما قلت انها بتزين خاست
الجازيه : ليه وش فيه نايف
الهنوف وهي تدمع :اليوم الفجر كنت جالسه معاه وهو يسولف وقال لي انه يحب ريوف من زمان ...بس واضح انه مافيه نصيب
وجدان :يا حياتي هو يارب انك تجبر بخاطره
ريم دخلت بسرعه :بنات من معاها جوال بسرعه قبل تجي امي بسرعه
الهنوف : بسم الله عليك وش فيك
ريم :خالد يبي يزوج ريوف لخويه الاربعيني ويقول ان ابوي موافق انا متأكده ان ابوي ماهو موافق ابي اكلمه قبل يجون الخطاب
ام خالد :ريم تعالي زيني الحلا
ريم تبكي :بنات ارجوكم ساعدونا دقو على ابوي ولا على اي واحد من اعمامي
وجدان :ازهليها بس روحي عند امك عشان ما تحس بشي طيب ؟
ريم :يلا امي جايه
الهنوف :بدق على ابوي بس ما عندي رصيد
ملاك :حتى انا
الجازيه :انا عندي رصيد بس ما عندي رقم عمي
وجدان :طيب دقي على سطام
...
خالد :يبه
ابو خالد : هاه
خالد : يبه انا ادركت خطاي وجيت ابا اعتذر
ابو خالد :وش الي خلاك تدركه ؟
خالد :امس ما نمت جلست افكر بكل شي صار وفهمت اني على خطا
ابو خالد :الحمدلله عقبال امك
خالد : بس يبه
ابو خالد :هاه
خالد :خويي فهد عنده اجازه اسبوع وقلت له تعال الديره وبيجي اليوم ابي اضيفه
ابو خالد :مع انه الوقت الغلط بس تم نبي نكرمه ... علمت امك ؟
خالد :اي علمتها
ابو خالد :متى بيوصلون ؟
خالد :بعد صلاه المغرب شوي ويأذن صح ؟
ابو خالد :اي ...روح علم عمك ابو سيّاف وعيال عمك ولا تبين للناس انك متهاوش مع عيال عمك
خالد :ولا يهمك مارح يفهمون شي
...
سطام :جوالي طفى شحن
سيّاف :خله يا ولد بعدين نشحنه
نايف: منجد خله نبي نسولف شوي
تركي :حطه شوي يشحن بسيارتي يمكن اهلك يدقون ولا شي
...
ابو سطام :بوديكم محل شاهي ماقد ذقتم مثله اذا ذقتوه بتصيرون مدمنين عليه
ابو وافي :محل ابو براد ؟
ابو سطام :اي العيال ما يعرفونه اول مره تذوقونه صح ؟
بدر :اول مره اسمع فيه بس بروح اودي ريوف اغرضها ونصلي المغرب ونروحه
ابو وافي : ابو خالد يدق
وافي : يمكن يبي بدر
ابو وافي :الو
ابو خالد :الو ...اقولك اليوم بيجي واحد من اخويا خالد وودنا انكم تضيفونهم معانا وترحبون بهم
ابو وافي :ابشر معكم احنا معكم بس متى ؟
ابو خالد :بعد الصلاه ...ما اقدر اصلي معاكم اليوم جاني الابهر بصلي بالبيت اذا لقيت ياسر وجابر علمهم
ابو وافي :جابر معاي وياسر شفته يدخل المسجد قبل شوي
ابو خالد :اجل يله نشوفكم على خير
ابو وافي :مع السلامه
ابو سطام :مين
ابو وافي :ابو خالد يقول خالد عزم خويه من الرياض بيجي بعد الصلاه ويبينا معاه
ابو سطام :الحمدلله وهو ترك الزعل
ابو وافي :ابو خالد ما يحب الزعل مره بس خالد الله يهديه دمه حامي
ابو سطام :ما بيسوي شي قدام خوييه ما يبي يتفشل
خالد :يا عم
ابو وافي : عانه جا
خالد :السلام عليكم
ابو سطام :وعليكم السلام
ابو وافي :وعليكم السلام
خالد :قال لكم ابوي ؟
ابو وافي : اي قال لنا
خالد :الحمدلله توني كنت بقول لكم ... وعيالكم ما لقيتهم بغيتهم معاي
ابو وافي :راحو عند الابل مع تركي وسيّاف
ابو سطام : وش صار لك قلبك صفى علينا؟
خالد :ولله يا عم ادركت انه مالي غيركم بذي الدنيا وانتم اهلي
ابو سطام :اي هذا خالد العاقل الحمدلله على السلامه
خالد يضحك :يلا نلحق الصلاه بيجي الرجال بعد شوي
...
وجدان :للحين ما يرد؟
الجازيه :اي
وجدان : طيب ابوي دقي عليه
الجازيه :دقيت بس الظاهر انه يصلي
ملاك :حاولي بعد الصلاه اذا ما ردوا بطلع ادور عليهم
وجدان:انا بروح لأمي اخذ جوالها واجرب فيه يمكن يرد ابوي
ام سطام جت: بنات شفتم جوالي ؟
وجدان:لا
الهنوف: المشكله لو قلت بدق على واحد من اخواني من جوالك ما بيردون لأنهم ما يردون على الارقام الغريبه والظاهر مافيه امل من امك بشوف امي
ملاك :للأسف حتى ابوي
وجدان :شكلها صفه مشتركه بين اعمامي لأن حتى ابوي ما يرد على الارقام الغريبه
ام وافي عند الحمام تشهق
الهنوف طلعت بسرعه : يمه شفيك ؟
ام وافي :جوالي طاح بالبالوعه
الهنوف :ببكي ياربي ...يمه ليش
ام وافي : معليك حبيبتي بجيب غيره لا تبكين لا تبكين
الهنوف: يمه نبي نعلم عمي ...
ام خالد :الهنوف انتي ما عليك صلاه صح ؟
الهنوف بفقدان امل :اي
ام خالد :اجل روحي المطبخ اذا ما عليك امر وانتبهي للكيك لا يحرق بصلي
الهنوف : ان شاء الله
الهنوف وهي تنزل على الدرج تذكرت غاليه صارخت وقالت : غاليه نسيت غاليه
وصارت تركض وتنادي: غاليه غاليه
غاليه طلعت من الغرفه :نعم اشبك
الهنوف : ابي جوالك تكفين مافي وقت للتبرير
غاليه :مدري كيف اصارحك اني كسرته يوم تهاوشت مع خالد
الهنوف :ياربي وش ذا البيت الي ما به جوال
غاليه :وجوالاتكم ؟
الهنوف :مافيها رصيد الي تطيحه بالبالوعه الي محد يرد عليها
غاليه :العنود معاها جوال
الهنوف :يسسسس احبك احبك ياغاليه
غاليه : بس ما عندها غير سناب وماهي ضايفه الا انا وابوها
الهنوف :طيب لو سكتي من اول !خليتيني افرح عالفاضي
غاليه : وش تبون بالجوال والرصيد
الهنوف :ما تدرين ؟
غاليه :بيزوجون ريوف بس وش تبغون بالجوال ؟
الهنوف:خالد يقول ان ابوها راضي وهو مستحيل يكون راضي وتبي تدق عليه وتسأله
غاليه :خالد الحيوان انا اوريه
الهنوف : وين رايحه
غاليه:بروح افضحه قدام اعمامي كفايه الي يسويه متحكم بعايله كامله
ام خالد :الباب يدق شكلهم جو
الهنوف :شكل ما يمديك تروحين
غاليه : ولله ما اسكت ذي المره بس خليني ارحب بالضيوف الي محد يتمناهم واطلع له بدون محد يدري
الهنوف :طيب كيف بتدخلين عند الرجال
غاليه :دام علي عباتي بدخل
الهنوف:غاليه وش كنت تاكلون انتي وزوجك الشهور الي فاتت مو طبيعي انكم كذا تمشون على الناس وخاصه الكبار !
غاليه :هو بدا وتمادى من حقي ارد عليه
الهنوف:غاليه خلاص اجلس بينحل الموضوع البنات لسى يدقون على سطام يمكن يرد
وجدان جت:بنات شكله ما بيرد بطلع له
الهنوف :جربي اخر مره
وجدان :اهههه رد رد يا بنات رد
الهنوف :كفووو الحمدلله
وجدان :الو
سطام :الو وش بغيتي خمسين مكالمه من العصر ؟
وجدان :الوضع جدي روح عند عمي ابو خالد وعلمه ان خالد يبي يزوج ريوف لخويه
سطام :اف خويه الي بيجي الحين
وجدان :اي ما علم ابوه شكله ويقول لهم ابوي راضي
سطام : ما علمه شكله عمي اتصل علي يقول خالد بيجونه ضيوف وبيكم معاه
وجدان :اجل يلا الباقي عليك بقفل بسرعه عشان اسلم على المعازيم الي يارب يرجعون خايبين
سطام :يلا
تركي : علامهم ؟
سطام :قصه طويله
تركي :وش هي
سطام :بقولها من البدايه لأنها معقده بس اذا طلعنا السياره
تركي :امش
سطام :السالفه يا طويل العمر قبل اسبوع نايف دخل المجلس حق عمي ياسر وبعد شوي دخلت وراه ريوف تبي ابوها بالصدفه وما كانوا اعمامي بالمجلس وشافتهم عجوز واتهمتهم بالشي الي ببالي وبالك وهم ما سوو شي وقام خالد تجنن ويبي يقتل نايف واشار عليه بالسلاح وبالغصب مسكوه وبعدين كلم خوييه الاربعيني عشان يجي يتزوج اخته ويستر عليها من ورا ابوه
تركي :كيف ما يعرف ابوه وهو بيضيفهم ؟
سطام :اكيد مكذب عليه واذا جو بيفتحون الموضوع حق الزواج بيتكلم هوه كلام يخلي ابوه يسكت وينحرج يردهم
تركي :طيب ؟ شسم العجوز
سطام :اتوقع اسمها صيته ايه صيته
تركي :جدتي !
سطام : اما الحمدلله انك قلت من بدري ولا كنت سبيتها
تركي : ما علينا ترا جدتي عندها مرض الهلوسه وزهايمر تتعالج منه
سطام :اما
تركي : اي تتوهم اشياء ماهي موجوده وتنسى اليوم لو تسألها وش صار ذاك اليوم بتكون ناسيه
سطام :عندك اوراق تثبت مرضها ؟
تركي : اي عندي وش تبي فيها ؟
سطام :جيبها جيبها ذي الاوراق بتحب المشكله من جذورها ... لو ادري انها جدتك كان علمتك بالسالفه من زمان
...
خالد :يا هلا بضيوفنا ويا مرحبا
فهد :السلام عليكم
الرجال : وعليكم السلام
نايف يهمس لوافي :مدري احس جاني ضيق من ذا الرجال احس وكأنه بيسرق شي مني
وافي يطقطق :قبل ما يطلع تفقد جيوبه
نايف : ههه يا ظريف تضحك
...
ام خالد : يا مرحبا بأم فهد يا مرحبا حياك تفضلي
ام فهد شكلها غريب عيونها مدعوجه كحل اسود واظافرها طويله وراسمه وشم بنص ذقنها بذا الشكل :|:
الهنوف :مدري شكلها يخوف ولا لأني اعرف انها بتكون حماه حبيبه اخوي المستقبليه بعيد الشر
وجدان : لا شكلها يخوف منجد وبعدين انتي مره خليتيها حبيبه اخوك يمكن ما تبي
الهنوف :اخخ شقد يصلحون لبعض بس الظروف حسبي الله على ذيك العجوز
جلسوا شوي يسولفون وبعدين قالت ام فهد :وين عرسونا نشوفها
ام خالد : الحين الحين بتجي بنات قوموا جيبوها
قاموا البنات
وجدان :اكره نفسي قاعده اودي بنت عمي للموت بيدي
الهنوف :مو اكثر مني قاعده ازوج حبيبه اخوي لشخص اكبر منها ب عشرين سنه وفوق ذا اخوي المسكين جالس معاهم على عماه
وجدان :خلاص يختي عرفنا ان اخوك يحبها ما نقدر نسوي شي
الهنوف :ترا شعور يعور يارب تجربينه فأخوك
وجدان :استغفر الله
...
ملاك :خلاص حبيبتي ريوف قطعتي قلبك بالبكا يمكن ما تعجبينهم
دخلوا وجدان والهنوف على ذي الكلمه
الهنوف :المشكله انها حلوه مستحيل ما تعجبهم
ريم :بعد ذا الحال ان شاء الله ما تعجبهم
ديم :يارب يارب يارب ما تعجبهم اسفه على ذي الدعوه يا ريوف بس يارب يشوفونك على شكل قرد
وجدان :يارب اعمي ابصارهم عن جمالها يارب اجعلها ابغض الخلق بقلوبهم
ملاك :اشبكم جيتم ؟
الهنوف :يبغون يشوفونها هذولين الساحرات
وجدان :وربي جبتيها اشكالهم زي الساحرات
ريوف :حسبي الله ونعم الوكيل في كل من كان له يد بذي الزواج وهو راضي يقولون الي جمع بين الاثنين الله يطول بعمره انا بقول الله يقصر بعمره ويجعله كله عذاب اذا تم ذا الزواج
الهنوف : يا حبيبتي انتي ربي يفرج عليك
ام سيّاف تصرخ :اعوذ بالله !
ملاك :بسم الله وش فيها امي
...
فهد: ولله انا جيت ابي افاتحك يا عمي ابو خالد بموضوع انا فاتحت خالد فيه وهو وافق لكن رأيك الاهم
ابو خالد :اسلم
فهد :ابي بنتك على سنه الله ورسوله
نايف شرق بالقهوه وعم الصمت بالمجلس
وافي :بسم الله عليك اشرب ماي
نايف شرب وهمس لوافي : يمكن يقصد ريوف ؟ يبي ريوف صح ولله لو يبيها مالي قعده بذا المجلس
وبغا يقوم
وافي مسكه :اقعد يمكن يبي ريم هي الكبيره وللحين ما تزوجت اما ريوف الفرق بينهم كبير
فهد عاد كلامه :ايوه يا عم ابي بنتك على سنه الله ورسوله
ابو خالد :احنا نعرفك من زمان رجال طيب ولنا الشرف بنسابتك بس اي بنت تبي ؟
فهد :ريوف
ابو خالد :ولله ما ودي اكسر بك بس ...
خالد :الساعه المباركه بناخذ رأي البنت ونرد لك
نايف قام وبصوته غصه قال :استأذنكم احس اني تعبان
ابو وافي فهم على طول وقال : وافي الحق اخوك لا يصير به شي
وافي :سم
طلع وافي لقي نايف جالس على طوبه وشماغه على كتفه ودافن وجهه بكفوفه
وافي :علامك انت ؟ ما قلت لك لا تلوم نفسك بالي صار ؟
نايف :لا الموضوع مو كذا
وافي :اجل ايش ؟
نايف : ما ودي اقول فات الفوت خلاص
وافي : الا بتقول
نايف :ما بقول خلاص قلت لك
وافي : بتقول غصب عنك
نايف :ياخي احبها ياخي من يوم صغار ربينا ثلاثه مع بعض انا وهي وحبي لها دايم تسألني ليه احب قصه قيس وليلى لأن قيس مثلي حب بنت عمه من يوم هم صغار بس الفرق قيس شاعر عبر عن حبه بأشعار توصفهم وانا انسان فاشل ما عنده شي اكبر احلامه يخلص الجامعه ويتوظف بأرامكو ويتزوج البنت الي يحبها بس ذا الي كنت ابيه وسرقوه مني خلاص معد بقى لي شي كنت دايم اقول بنفسي نهايتي ما بتكون مثل قيس بس الظاهر هذي النهايه المكتوبه على العاشقين
وافي سكت وجلس يطالع فيه وحضنه بقوه وقال :رجال انت رجال
نايف صار يبكي ووافي يطبطب عليه
وافي :ولله بتاخذها وبغير ذي النهايه
نايف :وش بتسوي
وافي وهو راجع للمجلس :خلك هنا
نايف : تعال
دخل وافي عليهم وقال :ريوف ولله محد ياخذها
خالد :ليه تبيها لأخوك ؟
وافي :اي ابيها له
خالد ضحك :عطني سبب مقنع يخلني اصدق ان اخوك ما اختلى فيها وريوف لنايف
وافي :سبب ؟
خالد بأستهزاء :اي سبب غير انه اخوي واصدقه
وافي :...
سطام :السبب عندي
خالد :وش ؟
سطام : العجوز ذيك مريضه عقليه والادله بذي الورقه خذ اقراها انت وخويك عشان تعرفون ان عيال عمي ماهم راعين ذيك السوالف
خالد :نشوف يمكن مزوره بس نشوف
شوي وانقلب وجهه يوم شاف ختم المستشفى وتوقيع الدكتور على الورق
فهد : وش ذي المسخره عطني الورق ذا اشوف
وانقلب وجهه وقال :ذي لعبه انتم تلعبون علي نبي نزوجك البنت ويوم تعنيت وجيت لديرتكم الخايسه ذي قلتم خلاص لولد عمها ولله مالي قعده هنا وانت يا خالد لا اعرفك ولا تعرفني
يوم طلع من المجلس قام ابو خالد وقال :اشوف الورق
يوم قراه قام يبكي وسجد سجود شكر
يوم شاف وافي الموقف خرج وحضن نايف وهو يبكي
نايف : وش صار؟
وافي :تبرأت
نايف شد الحضن على وافي وصار يبكي معاه ويقول :الحمدلله
...
ريوف :ابوي ابوي ابي اروح لأبوي وابشره
ريم وهي تضحك :البسي عباتك يالخبله
ريوف رجعت وحضنت ريم :ماني مصدقه الي صار الحمدلله الحمدلله
ديم :هاه شفتي يا يمه اتهمتي بنتك وبغيتي تودينها بميه داهيه بغيتي تزوجينها لولد ساحره ...