وانا في درب الهلاك ظهرت لي يا ملاك

3

ام سيّاف :ملاك وينك
غاليه:خالتي شفيك؟
ام سيّاف ملاك ما لقتيها بأي مكان
غاليه: كأني شفتها قبل شوي تطلع من الغرفه ومعاها لبس اسود
ام سيّاف :عبايه ؟ اكيد عبايه وين بتروح ذي البنت ياربي بتجنني
ريم : اشفيكم
غاليه :ملاك طلعت من البيت ومحد يعرف وينها
ريم : قومي ندورها
غاليه :ما ندري وين تحب تروح عشان ندورها
ريم :اجل ارسلي لخالد يقوم اخوها يدور عليها
ام سيّاف :لا تصحينهم من نومهم انا بروح لها
طلعت ام سيّاف وتوها بتقفل باب الحوش لقيت ملاك جايه
ام سيّاف : ملاك حبيبتي وين رحتي ؟اقلقتيني عليك
ملاك تبكي:اشتقت له يا يمه
ام سيّاف وفيها غصه :وش ذكرك فيه يامي انتي ؟
ملاك :ما نسيته اصلا عشان اذكره بكل مكان يتبعني طيفه ...وبكل عطر اشم ريحته بكل ضحكه اشوف ضحكته ما نسيته ولا بنساه
ام سيّاف تبكي مع بنتها :يا حبيبتي انتي تعالي ادخلي لا تبردين
دخلوا داخل لقيوا كل البنات صحيوا عشان ملاك ضايعه يوم شافوها تبكي اشفقوا عليها بس محد تكلم وكلهم رجعوا ينامون او بالاصح "يحللون حاله ملاك"
الهنوف :كيف وحده تطلع من البيت اخر الليل وترجع تبكي اكيد صار لها شي تحرش ولا شي
وجدان :اششش بعيد الشر عنها
ديم :يمكن راحت لقبر اخوها
ريوف :بس ليه ما تروح بالنهار عادي ليه راحت بعد ما نمنا
ديم :يمكن ما تبغى احد يشوفها بضعفها
غاليه : يا حياتي هيي
الجازيه : اسمعوا بنات الحين هي بتنام عند امها وانتم ناموا بكره لحد يتكلم بالموضوع لا تلميح ولا شي نسوي نفسنا ما نعرف شي
الهنوف:منجد يلا ننام
شوي بعد ما نامو دخلت ملاك عندهم ودخلت فراشها تتذكر الي صار :
فكت الحمامه ولحقتها ويوم وصلت المكان ...
ما لقيت احد جلست تنادي:فيه احد هنا ؟ فيه احد ؟
محد رد عليها جلست شوي وقالت :ليش جيت هنا ؟ ادور على مين ؟ يعني ماجد مثلا بيكون حي ولا ايش
شوي وبكت قالت :يارب وصلت عجز لدرجه ادور على امل حياه واحد ميت يارب الطف بحالي
وشوي رجع نزل المطر قامت ملاك ونفضت التراب من عليها ورجعت البيت
قالت ملاك وهي تعلق على الاحداث الي صارت :غبيه انا لو قابلت الشخص الي رد على الرساله وش بسوي يعني بشكره ولا ايش ...بس مواساته كانت حلوه
وطلعت الورقه من جيبها ورجعت قرتها وابتسمت وقالت :ليش يروح لذاك المكان بذاك الوقت اكيد متضايق من شي ...وش دخلني انا فيه ... بس هو واساني يعني يحتاج احد يواسيه ... اااففف يا ملاك وش ذا التناقض خلاص يارب ان كان فيه خير ابقيه وان كان فيه شر اصرفه
...
اليوم الثاني
ملاك :الهنوف قومي نروح نجيب بيض
الهنوف :ترا كله سوبر ماركت مو لازم اروح معاك خليني انام شوي
ملاك ضحكت وقالت :وش سوبر ماركت بنجيبه من عش الدجاج شخصيًا واعمامي قالوا لازم تتعلمون على ذي الاشياء كل يوم دور وحده اول وحده انتي
الهنوف :طيب ما اقدر ابدل دوري ؟
ملاك :لا عمي ينتظر تحت قومي توضي للفجر وشوي بيأذن نصلي ونروح
الهنوف:ولسى ما اذن ؟
ملاك :ايوه هذا نظام الديره
الهنوف :ليه محد قالي ان ابوي بيبدا تجاربه علي
ملاك :يلا بلا دلع قومي
قامت الهنوف وتوضت واذن الفجر وكلهم صحيوا وصلوا وبين الاذان والاقامه طلعوا ملاك والهنوف يجيبون البيض وكان نايف ووافي يتوضون للفجر بالحنفيه الي برا
نايف :وافي شوف هذيك مو الهنوف
وافي : الا ولله
نايف :رايحه للدجاج شكلها بتجيب بيض
وافي : اي سمعت ابوي امس قال لازم نتعلم علوم الديره بيرسل البنات للدجاج كل يوم وحده واحنا بعد الفجر بنروح للنياق
نايف :اجل تفرج على مسخره الهنوف بعد شوي بتطلع من العش تصرخ
وافي: احس ما بتخاف
نايف: على كف ؟
وافي :على كف
شوي وهم يتوضون سمعوا صوت الدجاج بالعش وخرجت الهنوف تصرخ والدجاجه تلحقها ناظروها نايف ووافي وجلسوا يضحكون عليها وطلعت وراها ملاك تضحك عليها لمحها وافي ثم غض بصره بس نايف طالع فيها وقال : ولله انها مزه شوفها يا وافي لا تفوتك
وافي ضرب نايف على راسه وقال :ياخي انت ما عندك حيا ما تستحي ؟ بنت عمك ذي المفروض تستر عليها وتغض بصرك عنها قبل بنات البشر كلهم ،ياخي نسيت وصيه الرسول خيركم خيركم لأهله
نايف:ولله انها فتنه جميله البنت جميله وبعدين النظره الاولى حلال
وافي :ياخي واذا فتنه المفروض تغض بصرك النظره الاولى حلال سامحتك بس لا تعيدها خلاص عاد
نايف:ابشر على خشمي
سطام جا بيتوضى وقال :وش فيها الهنوف تركض من الصباح
نايف:فاتك ابوي ارسلهم يجيبون بيض والدجاج لحق الهنوف واتوقع بكره دور اختك وجدان
سطام :اللعب بكره المتعه الحقيقيه نشوف المحاميه الي ما تخاف من شي يخوفها الدجاج
وافي:يلا لا يكثر حكيكم بس خلونا نلحق الصلاه...
بعد الصلاه
وافي:سيّاف
سيّاف كان بيطلع من المسجد ووقف
وافي:امش معاي برا بكلمك
سيّاف:خير ان شاء الله
وافي: لا خير خير
يوم طلعوا برا قال وافي:انا اعتذر عن الي بدر مني امس ولا كان ودي اهينك وانا ضيف عندك بس عندي مشاكل ما يعلم فيها الا ربي
سيّاف:عاذرك يا وافي من اول دقيقه لأنك ولد عمي وانا ادري ان ولد العم ما يقلب على ولد عمه لو ايش
وافي حب راس سيّاف وقال :ولله انك رجال
سيّاف حب راس وافي وقال :الرجال من يعتذر عن خطاه ويعترف فيه
سطام :خلصتم محاببه يلا نفطر تراني ميت جووع
سيّاف :وش الي نفطر بنروح نحلب الابل
نايف :ما عندي طاقه ارفع يدي تبيني احلب النياق
سيّاف :لو بيدي ريحتكم وانتم ضيوفي بس اعمامي مشددين عليكم وتراهم سابقينا عند الابل
...
وجدان تضحك :اخخخ ما اصدق انك دخلتي بين الدجاج
الهنوف :حتى انا مو مصدقه ولا ابي اصدق واتمنى من كل واعماق قلبي انه حلم
ملاك :للأسف الشديد مو حلم هذا واقع كل يوم وبكره دورك يا وجدان لا تضحكين كثير
الجازيه :قلت لك يا وجدان خمسين مره لا تضحكين كثير ويرجع الشر عليك
ريم :كل ساق سيسقى بما سقى
ديم :ماله دخل
ريم :صدق ماله دخل ؟
غاليه : اي ماله دخل ذا المثل ليتك سكتي
ريم :ياخي طيب سلكوا شوي خلوا الواحد يستمتع انه مثقف شوي يقول امثال عالصباح وكذا
ريوف :سهل ان الذكي يسوي نفسه غبي بس مو سهل ان الغبي يسوي نفسه ذكي اقولها وبكل اسى وحزن ما تنفعين حقت امثال
ديم :اخس من وين تعلمتي هالحكي
ريوف :امس يوم رحت مع ملاك خذت كتاب من مكتبتها وعجبني ولقيت فيه ذا الجمله
ملاك :اي صح يا بنات مدري قالت لكم ريوف ولا لا بس مكتبتي مفتوحه لكم اذا تبون بعد الفطور نروح وكل وحده تاخذ كتاب تقرا
وجدان :مع ان عندي عقده من الكتب بس بحاول
ريوف :لا تراها مو نفس الكتب دراسيه مره ممتعه
غاليه :عندك عن التاريخ ؟
ملاك : بتاع كلو
الهنوف :ولله انك اطلق بنت عم عرفها التاريخ
ريوف :شوفوا بالله جحدتني
الهنوف :لا ما جحدتك بس تنازلتي للمركز الثاني
ديم :ملاك مافيه مكان كذا نطلع نستكشفه بيت مهجور شي احس لازم نطلع نتمشى
ملاك :مافيه بيت مهجور بس فيه مكان مرره حلوا خاصه اذا جا مطر
الجازيه:وين
ملاك :بتشوفونه اذا رحنا
ريم :طيب وش رايكم نطلع نفطر فيه احنا وامهاتنا احس طفشت من البيوت
وجدان :قدام
ملاك :اجل بروح اطلع المفرش حق الطلعات من فوق وانتوا خلصوا البيض والفطور لين اجي
الجازيه :تم
ام وافي:ابو وافي يقول ما تطلعون لين تستأذنون منه ولا من اعمامكم
ريوف :اجل بروح اعلم ابوي
ديم :اجي معاك؟
ريوف :شدعوه بس بروح عند ابوي واجي ما بروح بعيد
ديم :طيب شفيك شادتها
ريم :يلا بلا هوشه عاد من يوم عرفتكم وانتم تتهاوشون على الاقل خلونا نستمتع بالاجازه
وجدان :من زين ذا الاجازه عاد
الجازيه :وجدان خلاص بلا تحلطم مو عاجبك اسكتي
...
ريوف :يبه ...فيه احد ،شكلهم مو هنا ...عمي يبه وينكم ؟
نايف طلع من الحمام وصوته متغير :محد هنا
ريوف تلتفت وراها بشويش عشان تشوفه :يمه اعوذ بالله من الشيطان الرجيم اللهم سكنهم في مساكنهم ...
نايف:تخافين مني؟
ريوف :لا يا حيوان مستحيل اخاف منك بس صوتك متغير شكلك بترجع لأصلك يا كلب
نايف :كيف عرفتي اني اميل لفصيلتك يا الكلبه
ريوف :صدق ليه صوتك متغير وعيونك محمره
نايف يلتفت:بقولك بس لا تعلمين احد
ريوف :اخس صارت بيننا اسرار
نايف :كلي زق
ريوف :بعلم ابوي
نايف :انا بقول له انك دخلتي مجلس الرجال وانا جالس فيه بدون غطى
ريوف :وي نسيت اتغطى عنك لأنك مو رجال
نايف :كلي زق ولا تشككين برجولتي
ريوف :طيب خلاص بيننا اتفاق قولي ليش وجهك كذا وما بعلم احد وانت ما تعلم ابوي باللي صار
نايف :تم
ريوف :يلا خلصني تراهم ينتظروني
نايف :يا ذا السر الي متشفقه عليه الي صار اني شربت لبن نياق وما استصاغه لساني ورحت اطرشه
ريوف تضحك :بس ذا سرك ...اخخ يا بطني ترا لبن النياق عادي بس انت دلوع
نايف :انا اوريك الدلع
ريوف :يمه بسم الله وش بتسوي
نايف :بعد شوي بجيب لك تنكه لبن نياق تشربينها كلها بدون تعليق
ريوف :على كف ؟
نايف :لا ما اضرب حريم
ريوف :كل زق ...اجل على خمس ميه
نايف :تم
ريوف: وين نتقابل ؟
نايف : هنا ؟
ريوف :لا بعد شوي بنطلع احنا والبنات نفطر بمحل قريب جيب التنكه على اساس بتذوق امك وانا بشربها والخمس ميه خلها قريييبه
نايف :وين المحل يا حلوه ؟
ريوف :هناك عند ذاك التراب الكثير
نايف :اسلم على الوصف تصلحين قوقل ماب
ريوف :كل زق وجهز الخمسميه واذا لقيت ابوي قله اننا بنطلع مع امهاتنا عند المكان الي قلت لك وبعدين كيف اعرف انك جيت ؟
نايف :بصفر لك ثلاث صفرات واتبعي صوتي وتعالي ولا تنسين احتمال خسارتك وجهزي الخمس ميه
طلعت ريوف وبعدها نايف من مجلس الرجال الي كان منفصل عن بيت ابو سياف
...
وجدان :عانوها جت
ريوف :ما لقيتهم
ريم : ابطيتي
ريوف :جلست ادورهم برا قلت يمكن قريب بس لقيت نايف قريب من المجلس وسألته قال انهم راحوا عند الابل وقلت له يعلم ابوي وراح عندهم
الجازيه :اجل يلا خلونا نطلع
طلعوا وبالطريق وهم يمشون قربت وجدان لريوف وقالت بصوت خافت :وش قصتك انتي ونايف تتقابلون كثير هالايام
ريوف :صدفه لا اكثر ولا اقل
وجدان :يا خوفي ذي الصدف تجيب مصايب
ريوف وهي تسرع عشان تعدي وجدان :وش يعني بحبه مثلا ؟
وجدان تعلي صوتها عشان تسمعها :يمكن محد يدري
ملاك وقفت ونزلت الاغراض وقالت :وصلنا
الهنوف :اخخخ اخيرًا تعبت
ملاك :واضح يا خالتي ام وافي ان بنتك كسلانه
ام وافي : ايي ولله ان ذا الجيل كسلانين يومتني بعمرها ارقى ذيك الجبال بدون ما اتعب (وتأشر على جبال بعيده )
ام خالد:يا زينها من ايام كنتي تقابلين متعب فوق ذاك الجبل عشان كذا كنتي ما تتعبين
ام وافي تضحك :اسكتي ليتك سترتي علي
الهنوف :يمه ليه ما تعلميني انك كنتي رومنسيه كذا
ام وافي :عيب
الهنوف :طيب ليه كنتي تسوينه
ام وافي :كنت جاهله
غاليه تدق ام سطام وتقول :خالتي حصه اليوم نبيك تفضحين امي نبي عفشها كله عندنا
ام وافي : عيب عليك يا بنت تفضحين امك
ام سياف : يلا قوموا افطروا وعينوا من الله خير وبعد الفطور نتسابق حنا الاربع نشوف من تسبق بعد ذا العمر الطويل
ام سطام تضحك :اكيد انا جسمي رشيق ما تغير
الجازيه تسولف مع البنات بصوت منخفض :اول مره اشوف امهاتنا كذا يسولفون
ملاك :طبيعي هذي حاله نفسيه جتهم ينسون العمر الي هم فيه ويتذكرون افضل ايامهم لأنهم جو بمكان تربوا فيه وهم صغار اليوم كله رح يبقون يتذكرون ماضيهم وبتجي سوالف حلووه
وجدان :يعني انتي مخططه لذا كله ؟
ملاك تغمز :ايه ما يضر شوي فعاليات سباق امهات وكذا
ديم :ما اتخيل امي تركض احس بفطس ضحك هنا
الهنوف تاخذ نفس عميق : الله المكان حلو مره ليت جبت كمرتي واصور هنا
ملاك :ومين قال انه ما عندي كميرا
الهنوف :كيف يعني ؟
ملاك طلعت طلعت كميرا من شنطتها وقالت :ولله ما خليها بخاطرك يا بنت العم
ريوف:وانا اقول مواهبنا وين مختفيه طلعتي انتي ماشاء الله اخذتي كل المواهب علينا اصدميني وقولي انك ترسمين
الجازيه :صدقت الي قالت انك اطلق بنت عم
ملاك :لا الرسم جربته بس ما فلحت فيه ،بس اذكر غاليه كانت ترسم يومتها بالمتوسط وحتى مره رسمتني وانا صغيره للحين محتفظه فيها اذا رجعت البيت وريتكم
غاليه :يا قدمي اتوقع ان الرسم كان خايس مدري ليش كنت احسب نفسي رسامه
ملاك :بالعكس الرسمه تجنن احب اشوفها كل يوم
الهنوف :بالعكس انتي جميله ورسمتك طلعت جميله ولا غاليه ما تعرف للرسم ولاهي فالحه فيه
الجازيه :لا ولله غاليه فنانه بس لو كملت على موهبتها بتصير رسامه
غاليه :حمستوني ارجع للرسم وافتح بزنس
ريم :بس تري الرسم الورقي صار قديم وادواته مكلفه جربي الرسم الرقمي وافتحي مشروع بالانستا ترسمين الناس وتعاوني مع وحده تطرز وتطرز الصور الي ترسمينها على طلبات الناس بتربحيين
ديم :حركات طلعتي راعيه بزنس لو درستي اداره اعمال احسن لك من الانجليزي
غاليه :اي ولله ايباد العنود عندي جديد ما تستخدمه واساسًا هي ما طلبته بس ابوها شراه لها دلع
الجازيه : غريبه ولله الاطفال بذا الجيل مدمنين ايباد
ملاك :لا العنود شخصيتها غير امس شفتها يوم وديتها تلعب على طول اندمجت مع الاطفال وهي ما تعرفهم
...
ابو خالد: ايييه يا زينها من ايام كان ابوي يخلينا نتسابق والي يخسر نحذفه بالبعر
بدر :واضح انك كنت تفوز من يوم اشتقت لذيك الايام
ابو وافي : اي كان يفوز ابوك والي يخسر ابو سطام دايم يخسر مدري كيف قبلوه بالعسكريه وهو بطيء
سطام :يخسى من يسبق ابوي
خالد:ورع اهجد معاك مصيبه خلها لنفسك
سطام يلقط البعر من التراب :ولله ما اخلي ثار ابوي
وافي يضحك :خف علينا تقل قتلوه
سطام يرمي وافي :الموت والخساره والمذله عندنا واحد
ثم يلتفت على عمه ابو خالد الي يسولف مع اخوانه ويضحك ويحذفه بالبعر
ابو سطام :ورع اهجد ما تحترم عمك
نايف:يقول انه يبي ينتقم لك يا عمي لا تقلب عليه
ابو خالد: خله انا اوريه
يشيل بعر من الارض ويحذفه على سطام
سطام :اووه يا عمي توجع يا ثقل يدك
ابو خالد :مين قال لك تتحداني
بدر :تحدي بدوني ؟
ابو خالد :تبي تجرب ؟
وحذفوا بعض بنفس الوقت
بدر :يبه وش ذا يعور
ابو سياف:ولله منت بهين يا بدر
ابو خالد:طالع لأبوه
نايف :الحمدلله انا طالع لأبوي مسالم ما احب الهوشات
ابو وافي يحذف نايف :ومين قال لك اني مسالم يا الخواف ؟
نايف بعد ما حذف عليه ابوه جلس يمسح يده مكان الالم ويقول :اساسًا ما ابي تحدياتكم الخايسه امي موصيتني على لبن نياق بحلب لها واوديها
ابو وافي :اجل رح انقذتك امك
سياف :تعرف تحلب ولا اعلمك
نايف :اعرف يا بعد حيي اعرف
وافي وهو يهمس لسياف :كذاب ما يعرف شوف الحين ان رفسته الناقه
سياف :ما بترفسه ذي مسالمه بس اللهم بتلقم راسه
نايف :تراني اسمعكم
وافي :واذا تسمعنا
نايف :منجد تعض الناقه ؟
سياف يضحك :اي وتحقد ما تنسى يعني لو نفكك منها اليوم وترجع بعد عشر سنوات بترجع تبي تنتقم زي سطام يبي ينتقم لأبوه
سطام يحذفهم :ترا الانتقام يشملكم
وافي فقد السيطره على نفسه وصرخ :سطام انا اوريك
ويلحقه وافي ويسدحه بالارض وهو معصب ويعم الصمت بالمكان ...وافي بيبقس سطام قرب ابو سطام بسرعه يبي يفرعهم بس قام وافي وقوم سطام وحضنه وقال :خواف انت كيف تبي تنتقم ؟
بدر :ما لومه يوم انه يخاف بغيت تقتله بركت فوقه
وافي ونبرته تغيرت وصارت غريبه كأنه يخبي شي :امزح ياخي محد يمزح معاكم
ابو سطام فهم وحاول يخبي معاه وجلس يضحك ويقول :سبحان الله نفس مزح جدك ثقيل
...
نايف يصفر ثلاث مرات وريوف تسولف مو منتبه له او بالاصح تتجاهله شوي عشان تقهره
بعد خمس دقايق بعدت ريوف عنهم بعد ما قالت لهم انا بتدور مكان تقضي فيه حاجتها
نايف :ما بغيتي تشرفين
ريوف :كنت اصرفهم
نايف :جبتي الخمس ميه ؟
ريوف : انت اول جبتها ؟
نايف :ايه بس انتي جبتيها ولا بتشردين ؟
ريوف طلعتها من جيبها وحطتها على الارض واخذت الفلوس من يد نايف وحطتها تحت وقالت :عشان ما تشرد
نايف :نشوف الحين من يشرد
وفتح التنكه
ريوف :متأكد ذا لبن ماهو صابون ؟
نايف وهو يمسك الضحكه :متأكد
ريوف : اشبه كذا رغوه
نايف :ذا احسن شي فيها الرغوه يوووه تستمتعين فيها
ريوف :شوف مين يتكلم كأنك ما طرشت بسبتها
ضحكوا مع بعض بنفس الوقت وبعدين طالع نايف بعيونها وهي عشان تصرفه اخذت التنكه وبدت تشرب بسرعه يوم خلصت قالت : وش ذا التحدي السهل ومالها ...
ما كملت جملتها الا هي تطرش
نايف : يع يالمقرفه على الاقل مو قدامي
ريوف تطرش بعد ما خلصت قالت :احس بدوخه طبيعي ؟
نايف :انا ما حسيت بدوخه
ريوف طاحت
نايف :جلس عند راسها ورفعه : ريوف ريوف تسمعيني ؟ قومي ريوف
شوي فتحت ريوف وشافت الخوف بوجه نايف وجلست تضحك
نايف :مقلب يا الملعونه
ريوف : اخخخ يا بطني شوف وجهك كيف
نايف :انا اوريك برده لك بيوم ما تتوقعينه
...
الساعه ٨