وانا في درب الهلاك ظهرت لي يا ملاك

15

وجدان :لأنك قبل شوي قلت ان ذا عشاني وناديتني من بين المعازيم لين هنا اخر شي ما تبرر لي وش ذا المنطق ؟عطني سبب مقنع وبسكت خلاص
تركي رفع صوته وقال :لأني احبك مو عاجبني اني اشوف غيري يغازلك كذا مو عاجبتني فكره انه كل دقيقتين مرسل لك غزل صار لي ايام ما انام افكر وش يرسل لك كيف يوصفك انقهر من كلامه اتمنى اني اشوفه قدامي واخنقه بيديني ...كل ذا لأن حبك سكن وجداني
وجدان طالعت فيه بهدوء وبدون اي تعابير منها لفت ظهرها وتركته ،تركته وسط هواجسه وآماله فيها وتركت له جرح عميق وتساؤل عن ذا الجرح ،كيف الصمت يسبب جروح؟ ظل تركي مثل عادته يراقبها بطريقها لين تختفي من قدامه لكن ذي المره عكس كل مره يراقبها بحزن وانكسار ،نزل شماغه عن راسه لعله يخفف الثقل الي يحسه بنفسه بس ما ينفع هذا ثقل قلبه بعد ما تهشم ،وأخيرًا بعد ما اختفت عن عيونه دخل غرفته ورمى نفسه على السرير يحاول ينام لعله يطلع كابوس ويصحى منه
دخل راشد وقال :ما بتجي معانا ؟
تركي :احس اني تعبان
راشد :شفيك ؟
تركي :تعبان وبس
راشد :تمام
في الجهه الثانيه كانت وجدان تمشي بصمت وداخلها الف صوت والف كلمه اول مره شخص يعترف لها داخلها خوف من غدره وأمان بوجوده ، كره للكلمه الي قالها وإعجاب فيها ،تناقض غريب كيف الاضداد تجتمع بنفس الوقت وتسبب حيره عجيبه ،ليش تركته ؟ وش كان المفروض تقول ؟ أكيد كسرته كان المفروض تقول له اي شي تعتذر منه بأي طريقه بس مو بذا الصمت الجارح ،بس هي ما عطته جواب والصمت ما يُعتبر جواب واضح الفتره الجايه بتكون اصعب فتره تمر عليها ،وأخيرًا وصلت للبيت ودخلت بين المعازيم وروحها مو نفس روحها تتمنى لو كان البيت خالي وتجلس فيه لحالها مع صمتها وتفكر قطعت أفكارها أمها وهي تقول :وين رحتي ؟
وجدان :هاه ؟ رحت بيت عمي متعب بغيت شي من هناك
ام سطام :يلا روحي ساعدي البنات بيجهزون العشا
وجدان :ابشري
دخلت المطبخ وبدت تساعد البنات وهي سرحانه شالت الصينيه وطيحتها
الجازيه :بسم الله عليك جاك شي ؟
وجدان :هاه ؟ بس سرحت شوي احس اني تعبانه عادي اطلع فوق ارتاح شوي ؟
ملاك :اي عادي يا حياتي احنا بنكفي
وجدان تتصنع الابتسامه :تمام
نزلت بتلم القزاز الي تكسر
ريم :خليه الحين بيجرح يدك بنلمه بالمكنسه
وجدان بنفس اللحظه انجرحت :اح
ريم :قلت لك بتنجرحين
وجدان :الاشياء المكسوره تجرح
ريوف :اي تجرح توك تستوعبين
الجازيه :شكلك مسخنه تعالي اشوف حرارتك احسك مو طبيعيه
وجدان :لا بس مرهقه من الشغل احتاج راحه شوي
غاليه :اذا تبين هدوء روحي بيتنا نامي فغرفتي
وجدان :لا عادي بطلع فوق
ديم :انتبهي لجرحك وعالجيه
ملاك :فوق فيه اسعافات اوليه تعرفين مكانها عند الحمام
وجدان :بروح اشوفها
ملاك :بروح اشوف سيّاف جاب كراتين الماي ولا لا
ملاك لحقت وجدان وقالت لها :انتي بخير ؟
وجدان :اي بس تعبانه
ملاك :دخلت وراك الحمام ولقيت ذي
وجدان :شقيها وارميها
ملاك :سوا فيك شي ؟
وجدان :لا
ملاك :اجل ؟ طلعتي بوجه ورجعتي بوجه قولي لي ترا حفظت اسرار قبلك
وجدان تضحك :ريوف ؟
ملاك :اي
وجدان تنهدت :القصه غريبه كل مره اعرف مين المذنب ومين الضحيه بس ذي المره ما اعرف المذنب ولا الضحيه مع انها القصه سهله وكل شي واضح فيها
ملاك :قوليها خل نشوف كيف يحكم القاضي
وجدان :انتي القاضي ؟
ملاك: اي انا القاضي وانتي المتهم بسمع القصه منك واحكم عليك
وجدان تبتسم :القصه فيها جزئين الجزء الاول يوم تعرفنا وكان واضح كل شي بس الجزء الثاني هو المعقد
ملاك :ابدأي بالاول
وجدان :يوم رحنا عند خالته ام علي بعدين رحنا بيته وقلت للبنات ابي الحمام بس ام راشد ما كانت موجوده ومافي احد كان بالبيت رحت بجرأتي ذيك بدور حمام بدون ما اسأل احد من اهل البيت ولا انتظر وبالغلط فتحت غرفته وعدت الايام ونسيت يعني وبعدين ثاني مره تقابلنا يوم تجمعتم وانا نمت وبعدين لحقتكم صار حادث بالطريق وساعدني
ملاك :اعطيني تفاصيل الحادث
وجدان :افضل ما اذكره
ملاك :عادي وش الي يخوف ؟
وجدان تنهدت : طيب الحادث انه فيه كلب صغير عض على عباتي وكنت خايفه منه لأني لحالي وبكيت وهو جا وفك الكلب مني
ملاك :حادث طبيعي
وجدان :بس بكيت تستوعبين !
ملاك :عادي كلنا عندنا مخاوف نبكي منها كملي
وجدان :انا مخاوفي ابين لأحد اني ابكي وعشان كذا جلست قدام البيت شوي عشان ما تشوفون وجهي وانا ابكي وسولف معاي كان يتكلم بشكل فلسفي غريب ،وكان اول شخص يناديني بالمحاميه وجدان
ملاك :ذي نقطه مهمه لازم نتكي عليها كيف مشاعرك يوم تتذكرين
وجدان :ذي المشكله مشاعري
ملاك :طيب كملي
وجدان :وبعدين عدت الايام وبدا الجزء الثاني بالقصه يوم بدت تجيني رسايل غزل من شخص مجهول يوم سافرنا الرياض بدت ذيك الرسايل تجاهلتها لأني أحسبه شخص يطقطق يعني تعرفين ذي النوعيات يسوون كذا تحديات انا تجاهلتها بس كان كل دقيقتين يرسل لين مره يوم خطوبه ترف كتب لي رساله انه كان وده يكون الفرحه فرحتين ويتقدم لي ومدري ايش والغريب اكثر اني قبل ما دخل كلمت سطام وانتي سمعتي امي يوم قالت كلميه رحت اكمله وهو كان واقف مع اخو غيداء مشاري وتركي ويوم كلمته كانوا اثنينتهم ماسكين الجوال وانا وسطام تكلمنا ومدري كيف دار الكلام وسطام باس راسي وانا مسكت يده وبنفس الرساله حقت انه وده اكون من نصيبه وكلامه المقرف وصف وقفتي مع سطام انا شكيت
ملاك قاطعتها :شكيتي بتركي لأنكم قد تقابلتم اما مشاري ما تعرفينه ولا تتوقعينها منه
وجدان :بالضبط وجتني الرساله وانا قاعده بينكم وطلعت هاوشته ووريته الرساله بس طلع مو هو وقلت له انه خلاص يخليه سر والمفاجأه اكبرى الي بدت تتعقد الامور من عندها انه كان حافظ كلامي بالحرف قلد نفس تعليقي على حادثه الكلب ودار الكلام ورجع لمسلسل عن المحاماه هو بدا يتابعه قبل اسبوعين يعني بعد ما تعرف علي وكأنه يبي يعرف عني وعن حلمي كثير
ملاك :اتوقع صدفه
وجدان :مو صدفه خليني اكمل وبعدين يوم المياسه جت وانا رحت عندها تقابلنا عند الباب وعطاني موعد اقابله ورا الحوش وكان الساعه ٤:٣٠ ورحت الساعه ٤:٠٠ لقيته هناك يوم سألته من متى انت هنا قال انه من ٣:٤٥ وبمزح مني قلت انت كذا تجي على مواعيدك بدري دايم وهو رد انه للناس المميزين تدرين كيف رقعها ؟
ملاك :كيف ؟
وجدان :قال الي يكونون محامين وكذا وبعدين تكلم عن مشاري وانه لاحظه انه طول الوقت على الجوال وصار يشك فيه اكثر مع اني ما قلت له يراقبه ولا شي بس هو كان يراقبه ويوم خلصنا كلام عن موضوعنا الاساسي كان يحاول يطلع مواضيع نتكلم فيها ويوم رحنا المركز كان يراقبني ويوم توظفت كان مبتسم طول الوقت وباقي تقولين صدفه ؟
ملاك :مو صدفه ذي واضحه انه ...
وجدان :لا تقولينا
ملاك :طيب بس كملي وش صار اليوم وقال الكلمه الممنوعه الي ما تبين تسمعينها
وجدان :سوا شي مو قانوني عزم مشاري عنده على اساس يرويه حواله الخربان وراح قلد مشهد من المسلسل الي نتابعه وفتش جوال مشاري وهو ما يدري وما لقى فيه شي وجا يقول لي بكل حماس وانا كسرت حماسه يوم قلت له انه الي سواه غلط وعصب وانا عصبت وقلت له برر لي ليش تسوي كذا وانا ما طلبت وقال انه يحبني
ملاك :وش سويتي ؟
وجدان :مدري الي سويته صح ولا غلط بس اني عطيته ظهري ورحت بدون كلمه
ملاك :طيب انتي وش تحسين ؟
وجدان :انا مقهوره اني ما لاحظت كل ذا كنت مثل العمياء ما لاحظت حفظه لكلامي ولا فضوله عني ولا هوشته معاي على القشطه
ملاك تكتم الضحكه :تهاوشتم على قشطه ؟
وجدان :اي عشان كذا يوم عرفه ما جبت لكم قشطه
ملاك :هو اخذها
وجدان :لا خطيب الهنوف جا وخذها
ملاك :نصيبه
وجدان :احس نفسي غبيه ما لاحظت شي او اني لاحظت بس سكتت مدري ليه
ملاك :يمكن لأنك ...
وجدان :لا مستحيل
ملاك :ليش ؟ وش فيه تركي
وجدان :مافيه شي بس الحب مو حلو
ملاك :عادي شي شخص اعرفه يقرا روايات عن الحب بس يستحي يتكلم بحجه انه لو حب رح يطقطقون عليه
وجدان :صادق ذا الشخص مهما كان
ملاك :جربي فرصه
وجدان :طيب عطيته فرصه وقلت له حتى انا احبك وش بيصير بعدين ؟ نتراسل بالجوال وبعدين يقول ارسلي صورك وش لابسه ومدري ايش وابتزاز وقضايا
ملاك :خلي تفكيرك بعيد شوي عن الشغل لو يحبك مستحيل يسوي كذا لو تقولين له حتى انا احبك لو تحبني صدق دق باب ابوي واشرب معاه فنجان بيجي ويخطبك مو كل شي ابتزاز وصور وبعدين انتي وجدان بتصدقين اي شخص يقول لك ارسلي صورك ؟
وجدان :بس الحب يضعف ويعمي انعميت وانا جنبه اشوف حركاته والتفاصيل ذيك الي قلتها اجل كيف لو تكلمنا كل يوم
ملاك ابتسمت :هذا اعتراف انك تحبينه ولا ايش ؟
وجدان :مدري مدري اكره الحب ليش كذا صعب
ملاك :الحب مو صعب الحب اسهل واجمل شي بس انه تلوث بمتغصبينه
وجدان:متغصبينه ؟
ملاك :اي متغصبينه الناس الي يبغون يحبون غصب يدورون علاقات الكترونيه غصب وللأسف يطيحون بناس شهوانيين يقنعونهم ان الحب عباره عن شهوه لا غير وصار الحب شي معيب وبعدين الحب ماهو علاقه بين بنت وولد بس الحب لما تحبين امك اختك اخوك ابوك
وجدان :بنت عمك
ملاك ابتسمت :بتنزلين ولا بترتاحين ؟
وجدان :بجلس افكر
ملاك :خذي وقتك
ملاك توها بتروح ووجدان قالت :وبعدين ؟
ملاك :ايش
وجدان :وبعدين اذا قررت وش بيصير انا خايفه من ذا الشي
ملاك :الي كاتبه ربي
...
سطام :منهو ذا جاي يسلم ؟
سيّاف :ذا اها ذا راشد اخو تركي
سطام واخوه الكبير ؟
سيّاف :اي ...يا مرحبا
راشد :يا مرحبا فيك
سيّاف يشد على يده :وينك ياخي وش ذا الشغل
راشد :حرس وطني ما لقيت الا اليوم وثلاث ايام قدام وارجع
سيّاف :نحفت من ذي الوظيفه
راشد :بالله ؟ احس جتلي كرش
سيّاف يضحك :لا الكرش راح مع الطفوله
راشد يطالع بسطام :ومن ذا ؟
سيّاف :ولد عمي سطام
راشد يسلم عليه :هلا فيك
سيّاف :المفروض هو يرحب فيك قعد بالديره اكثر منك
راشد :كلها عشر سنوات واتقاعد وارتاح
سيّاف :يا ساتر لو اتزوج واجيب ولد فيه بيمديه يدرس ويوصل صف رابع ابتدائي
راشد يضحك:تزوج خلنا نشوف
سيّاف :انت ما ودك تتزوج زوجه تسليك بالغربه
راشد :وين الغربه كلها الشرقيه وبعدين شفيك ترد كلام امي هي محرشتك علي؟
سيّاف :توني ادري انك جيت يوم شفتك هنا
سطام :وين اخوك معد جا
راشد يضحك:نسيت يتعذر منكم ويقول انه تعبان داخ من المحاكمه الي صارت
سيّاف يضحك :حال صار بس خلها على الله ... تعال اعرفك على عيال عمامي هذا نايف واخوه وافي
راشد سلم :اخوان سطام ؟
سيّاف :لا
راشد :وافي يشبه لسطام مره
سيّاف :ولدوا بنفس اليوم
راشد :سبحان الله
وافي يحط يده على كتف سطام:ما بقى احد ما شبهنا ببعض ما اشوف شبه
سطام :وخر يدك ولا ابقسك اخلي مافيه ملامح
وافي :وش ذا الشماغ من وين جبته
سطام :تركي عطاني
راشد :من اشمغتي اكيد
سطام :اكيد يقول انه عندك سوق اشمغه
راشد :بس ولله عرف ينسق اهنيه
سطام : تشوفون فرق يا عيال؟
نايف :لا
وافي :لا
سيّاف :لا بس ذولا عيال عبدالعزيز نظرتهم للأشمغه والثياب غير
راشد :انتم كلكم تنسيقهم غلط الا سطام استغربت انه ولد عمكم طلع تركي منسق له
سيّاف :خلها ميزه نتميز بها مثل ما بعض القبايل تتميز بميله العقال حنا بنتميز بالتنسيق الغلط
سطام :يعني طلعتوني من العايله ؟
نايف :ما بنطلع احسن فرد بالعايله مين يضحكنا بعدك
سيّاف :بدر
وافي :بدر ذباته خايسه
بدر :سمعتكم
نايف :من وين طلعت ؟
بدر سلم على راشد :تسولفون كذا بذي الميانه قدام الضيوف وتحشون فيني عيب عليكم
راشد :اي ضيوف انا اخو تركي راشد
بدر :اها حياك كم عمرك ؟
راشد يضحك:يهمك ؟
بدر :اي عشان خوينا هناك ثلاثيني ما يعجبونه الشياب ولا يبي يجلس معانا
راشد :اخوك ؟
بدر :كيف عرفت
راشد :احس انه اخوك مدري ليه
نايف :يا ولد تتشابهون انتم كلكم انت وخالد واخواتك الثلاث نفس الخشم
صار صمت بعد كلمه نايف ورقعها وقال :اذكركم يوم صغار نفس الشكل كنتم
وافي يرقع له زياده :اي يوم كنت اصفكم والي ما يعجبني احبجه بالكوره
سمعوا ابو وافي يقول :تفضلوا على قل الكلافه
وافي :يلا سمعتم ابوي تفضلوا
راحوا العيال كلهم ونايف بغى يلحقهم ومسكه وافي قال له :انت ما تعرف تتكلم الا بها ؟ ما عندك كلام صاحي غيرها إن كان ما تعرف تسولف بغيرها اسكت لا تفشل روحك كذا
نايف :بدون قصد طلعت ياخي
وافي :عقلك راح مع ذي البنت مره ما عاد تعرف شي بالدنيا
نايف :متأكد بتجي وحده يوم من الايام بتخليك مجنون اكثر من المتعاطين بس اصبر
وافي :وش دراك
نايف :تطقطق علي والدنيا دواره
وافي :ما اطقطق انقذك من الموت ضربًا وخنقًا وشنقًا من عيال عمك توك بالمراهقه ٢٣
نايف :٢٣ تخطيت المراهقه
وافي :زيها زي ١٣
نايف :عشر سنوات فرق يا حبيبي
وافي :مافيه فرق بس امش قدامي للعشا
نايف :اذا على قولك مافيه فرق خلاص انت زيك زي الي عمره ١٧
وافي :ما يهمني العمر اهم شي الراحه
نايف :شيبت من بدري
وافي :من الي شفته بحياتي شيبت
نايف :وش شفت ؟
وافي :شفت جرثومه معده بوقت عيد الاضحى ما اقدر اكل لحم واكلي كله محدد من الدكتور زيي زي الشايب الي عنده ضغط وممنوع ياكل كرسترول وملح
نايف :انت بس كمل علاجك واذبح لك ذبيحه نصها تصدق بها والنص الثاني نسافر فيه ابها ونخليهم يسوون لنا مندي وهذاك القرص حقهم
وافي :بتاخذ نص ذبيحه من الرياض لأبها ؟ لا يكون بتحملها معاك بالطايره بعد
نايف :نذبحها بأبها ونطبخها فيها الخرفان ماهي بس بالرياض
وافي :دور فكره احسن
نايف :لقيتها ! نزوجك وتتعشى بالزواج لين تشبع مفطحات وبعدين تروح تاكل ماك مع زوجتك حبيبتك لأنها مستحيه تاكلبين المعازيم وتطلب لك اثنين دبل بيق ماك وتاكلها كلها تعوض حق شهرين وبعدين شهر العسل تروحون ايطاليا تاكلون بيتزا
وافي :تسلم على ذي الخطه كنت محتار وش اسوي خلال الخمس سنوات الجايه بس وفرت علي وقتي
نايف :ياخي ليش ما تتزوج عندك القدره
وافي :ما عندي قدره ما عندي فلوس اوكل فيها بنت بطولك واقضي لها كل احتياجاتها اذا خذت بنت ما باخذها من بيت ابوها بالعز لعندي واذلها بفقري منتف انا حالي حال نفسي شغلي حق شهر كامل اهو قدام رح تعشى منه
نايف :صدقه ذي عشان يتبارك رزقكم
وافي :واثق من نفسك انك ما بترجع معانا
نايف :ادرس بمعهد ارامكو اتخرج ووظيفتي تنتظرني
وافي :خلهم يذلونك بعدين وترجع لنا
نايف :اكيد معاكم بس بعتبره مصدر دخل ثاني
وافي :يصير خير بس روح تعشى قبل ما تصير تدور لك عشى ثاني
نايف :وين رايح ؟
وافي :معروف وين بروح يعني
...
ام سيّاف :جت ضيفتك
ام وافي :ام غازي
ام سيّاف :اي روحي استقبليها
ام وافي :يالله حيهم ام غازي واهلها
ام غازي:الله يحيك
ام وافي :تفضلوا المجلس
ام غازي :ناصر من يوم عرف اننا بنجي عندكم صار كل شوي يسأل متى نروح متى نروح يوم سألناه ليش قال انه يبي بنت سلفتك نسيت اسمها ملاك
ام وافي تتصنع الضحكه :الله يهديك على طول تدخلين بذي المواضيع كلمي امها ...ومنهو ناصر ؟
ام غازي تضحك :ناصر ولد بنتي الي قرصته العقرب
ام وافي تضحك :اهاا هي بالغرفه اذا بيروح
ام غازي :حتى امه تعبانه ما جت وهو جا معاي مصر انه يجي ويشكرها
ام وافي :سلامتها شفيها ؟
ام غازي :زكام تعرفين من بعد كورونا كل شهر شهرين تجي نزله برد
ام وافي :اي الله يكفينا شره
ام سطام :الا على طاري اللقاح وين اخذتيه بالكويت ولا هنا ؟
ام غازي :اخذته هنا
دخل ناصر على ملاك وهي تغني وخلاها لين تكمل وقال :صوتك حلو
ملاك خافت اول ما تكلم وبعدين التفتت وقالت :خوفتني
ناصر عطاها هديه :شكرًا
ملاك :ياروحي انت كيفك بخير ؟
ناصر :اي بخير عشانك انقذتيني
ملاك :لا مو عشاني عشان الله وبعدين عشاني
ناصر :افتحي الهديه
ملاك :وش هي يا ترى ؟
ناصر :مفاجأه
ملاك فتحتها :الله ايش هذي الشباصه مره حلوه
ناصر :هذي ماما اشترتها يوم كنت فبطنها عشان كانت تحسبني بنت والحين بعطيك انتي
ملاك لبستها :مره تجنن
ناصر :لا لا تلبسينها انتي خبيها واذا جبتي نونو بنت لبسيها وسميها نادين عشان ماما كانت بتسميني نادين وتتذكريني اذا شفتيها
ملاك ضحكت :ابشر بخبيها هنا محد يعرف مكانها الا انا وانت
الهنوف دقت :عادي ادخل
ملاك :مين
الهنوف :انا الهنوف
ملاك :ادخلي
الهنوف دخلت :سلام
ناصر :انتي العروسه حقتنا ؟
الهنوف :مين علمك ؟
ناصر :خالي غازي قال انك عروسته وبتسوون عرس حلو وتلبسين فستان ابيض وتصيرين احلى وحده
الهنوف :هو قال كذا ؟
ناصر :اي يقول انتي حلوه
الهنوف :دايم تسولف معاه صح ؟
ناصر :هو صديقي
الهنوف :وش رايك تصير صديقي ؟
ناصر :لا ملاك صديقتي
الهنوف :طيب نسولف انا وانت لأن ملاك مشغوله
ناصر :بروح عند جدتي عشان اذا رجعت البيت ارجع معاها
الهنوف :لا تخاف اجلس معاي واذا رجعت البيت انا بوديك
ملاك :ما كأنك زودتيها بتروحين بيتهم ؟
الهنوف :مين قال اني بروح
غطت اذاني ناصر وكملت :حماره الجده الي بتترك حفيدها وترجع البيت
ملاك :الهنوف
الهنوف :هاه ما قلت غلط
ملاك :بس مو قدام الولد
الهنوف :اذانيه مغطاه
ناصر :انتي صف كم ؟
ملاك :انا ؟
ناصر :ايوه انا بروح الروضه ابيك تصيرين صديقتي هناك اخاف لحالي
ملاك :انا خلصت مرحله الروضه من عشرين سنه
الهنوف :انا بروح معاك الروضه بس وش رايك نسولف
ناصر :لا انتي بتروحين مع خالي غازي
الهنوف :يا خالك غازي ذا
ناصر :اناديه ؟
الهنوف :لالا
ناصر :انتي قلتي يا خالك ناصر يعني تنادينه
الهنوف :لا ما اناديه بس ...الحين وش يفهمه ذا
ملاك :اسمع هذي مو جدتك تنادي ؟
ناصر :الا شكلها بروح البيت بدوني
بعد ما طلع قالت ملاك :بطلي تتلزقين بالبزران
الهنوف تصحك :وش غرتي عليه؟
ملاك :يا الله يا الله ترا بزر لو تزوجت قبل اربع سنوات جبت واحد بكبره بعمر ولدي لو كان عندي ولد
الهنوف :اكيد امزح بس ليش ابطل
ملاك :تعرفين نقالين كلام وذا يقول لك انه صديق خاله يعني بيقول له كل شي وعاد الحين جا لحاله مع جدته بجيبه استجواب من خالاته اذا راح وبيقول كل شي
الهنوف :يعني سويت غلط؟
ملاك :واكبر غلط
الهنوف :خلاص بوافق عليه ذا واخلي العرس بعد شهر وخلاص طفشت
ملاك :بكيفك
الهنوف :وين ؟
ملاك :عندنا ضيوف تارسين المجلس تبيني اقعد اقابلك واتركهم ؟
الهنوف :ترا لاحظت انك تقلدين اللهجه الكويتيه
ملاك :عشان تتعودين بس
الهنوف :ولاحظت انك تقلدين حركاتي بعد
ملاك :عشان تعرفين ان الدنيا دواره
ريم :وينكم ؟ ترا بدوا الشوط الجنوبي وقامت ام راشد وترف والمياسه صف
الهنوف :الحين بجي بس روجي ما راح صح ؟
ريم :اي
ملاك :نادوا وجدان بتفرح لما تشوفها
ريم :الجازيه راحت لها
وجدان نزلت اخر وحده ويوم دخلت المجلس شافت ام راشد وجنبها تركي والمياسه فركت عيونها وطالعت مره ثانيه وبرضوا شافته
ريوف :شفيك واقفه بترقصين صفي معاهم بتتفرجين اجلسي
وجدان :تركي واقف معاهم
ريوف :اي عادي
وجدان :كيف عادي
ريوف :ليش ما تحبينه ؟
وجدان طالعت بتركي :هاه
تركي :ليش ما تحبيني ؟
وجدان صارت ترجع ورا وكل الي بالمجلس يقولون:ليش ما تحبينه ؟ ليش ما تحبينه ؟
اخر شي صرخت وقالت :احبه احبه خلاص اتركوني
كلهم راحوا وبقي تركي قرب منها ولمس وجهها وقال :كنت اعرف انك تحبيني
وجدان :بعد يدك
تركي :بس انا احبك
وجدان صرخت :بعد
صحيت وجدان وحطت يدها على المكان الي لمسها تركي فيه بالحلم وقالت :حلم حلم
ام سطام دخلت:شفيك ؟سمعتك تصارخين
وجدان :نمت بالغلط وحلمت حلم يخوف
ام سطام :العصفور؟
وجدان ضحكت :اي
ام سطام :من يومتك صغيره تحلمين بذا العصفور مدري ليه
وجدان :بس ذي المره العصفور مختلف كنت احبه
ام سطام :يمكن بيصير حلم حلو
وجدان :تقولين ؟
ام سطام :اي كنتي تقولين اذا توظفت معد بحلم بذا العصور والحين صرتي تحبينه
وجدان :بس كان يضايقني
ام سطام :معليك منه معد قمتي للعشا تبين اجيب لك ؟
وجدان :الساعه كم ؟
ام سطام :١٢
وجدان :نمت نومه طويله وانا مدري
ام سطام :اكيد كنتي تحتاجين لها والحين تحتاجين للأكل
وجدان :وش سر ذا التعامل ؟
ام سطام :ولا شي عيد وتوظفتي لازم ندلعك
وجدان :الله يديم ذا الدلع
ام سطام :يلا قومي غسلي وجهك وكلي وتعالي الحوش جالسين احنا بنسوي شاهي والجو حلو
وجدان :على الحطب ؟
ام سطام :اكيد
...
ابو راشد :شفيه ذا الولد طول اليوم نوم
راشد :يقول تعبان
ام راشد :يمكن مسخن ؟بروح له
راشد:ما يبي يشوف احد
ترف :اجل زعلان ذا
ام راشد :من ايش ؟
ابو راشد يهمس :يمكن لأنه ما توظف اليوم شاف وجدان اصغر منه متوظفه زعل
ام راشد:يا حبيبي هو
راشد :خلوه يقدم عسكريه ما فيه الا هي
ترف :منجد اقنعه انت قبل ما تسافر.
راشد :بكره بكلمه
تركي دخل :ما يحتاج انا بقدم بنفسي
ام راشد :وش اقنعك ؟
تركي :ابي ابعد عن ذي الديره فتره يعني فتره الدوره ثلاث شهور واشوف حالي اتعين قريب منكم ولا بعيد
ابو راشد :الله يوفقك
ترف :متأكد انك تبيها ؟
تركي:اي
دخل المطبخ وسوى شاهي وطلع الحوش وراشد لحقه
راشد :نسولف ؟
تركي :ما عندي شي اقوله
راشد :احسك زعلان مني ؟
تركي :لا ولله وش مسوي انت
راشد :مدري من يوم جيت وانت متغير
تركي :مو زعلان منك ارتاح
راشد :اجل مين ؟
تركي :كيف مين ؟
راشد :انت كذا تتخذ القرار الي كنت ضده اذا زعلان من احد
تركي ابتسم:لذي الدرجه مكشوف ؟
راشد :واكثر
تركي:اجل دامني مكشوف بقول لك
راشد :طيب
تركي :ذي المره مو زعلان من احد زعلان من نفسي
راشد :حلو ما تعتبر نفسك احد اول علامات الامراض النفسيه
تركي :لا ما اقصد كذا بس اقصد اني اول مره ازعل من نفسي واشوف تصرفي غبي
راشد :وش سويت
تركي سكت شوي وقال :بتضحك
راشد :مستحيل
تركي :الموضوع بنت
راشد :ولله وكبرت شسويت فيها وكيف كسرت قلبها ؟ومن هي اصلًا
تركي:وجدان الي تكلمتم عنها داخل وما سويت شي غير اني حبيتها
راشد :يمكن حبيتها بشكل غلط ؟
تركي :لا بس حفظت كلامها وراقبت طريقها وتعرفت عليها وبالاخير قلت كل كلمه تتمنى بنت تسمعها من ولد تحبه
راشد :احبك ؟
تركي :اي اصعب كلمه
راشد :وش سوت
تركي :هنا المشكله راحت وهي ساكته لأني بالغت
راشد :طيب ما فكرت انها ممكن تفكر ؟
تركي:مستحيل اعرفها هي ما تتردد
راشد :بس ذا موضوع كبير اكيد بتتردد
تركي :ما تبيني وانا بروح عشان معد نتقابل كثير قبل شوي قدمت عالعسكريه والقبول بيجي بعد العيد بأسبوع
راشد :عطها فرصه اسبوع وانتظرها
تركي :تقولها ؟
راشد :جرب
تركي :اخاف تعطي نفس رده الفعل
راشد :وقتها تعلم تحب من بعيد
تركي :من بعيد كيف ؟
راشد :تراقب طريقها وتحفظ كلامها بس بدون ما تقرب منها
تركي :صعبه
راشد :دامك تشوفها صعبه الدوره الي بتدخلها اصعب ثلاث شهور
تركي :عادي
راشد :بكيفك
...
اليوم الثاني
ريوف :كشتخنا لازم نحللها معد باقي فعاليات بالديره ؟
ملاك :اليوم ترف بتجينا ونجلس نسولف بس بالبجايم
ديم :صدق ؟ ولله ما كان لي خلق اكشخ ريحتيني
ريوف :لا بنطلوني حلو
الهنوف :اذا دق الباب قولوا لي ابوي بيجي
غاليه :عسى ما شر ؟
الهنوف :لا لا بس يقول يبي يكلمني اعرف وش بيقول بيقول توافقين على غازي
غيداء :وش بتقولين ؟
الهنوف :كلامك يا بوي هو الي يصير وهو بيقول ولله سألنا عنه وطلع ابن حلال واقول اجل الله يكتب الي فيه كل خير ويقول يعني موافقه واسوي نفسي مستحيه وخلاص
ريوف :عيني عالخطه البطله
الهنوف :جا بفتح
ابو وافي :سلام
الهنوف :وعليكم السلام تفضل
ابو وافي نادي امك وبنتكلم بالبيت
الهنوف :طيب
بالبيت
ام وافي :هاه وش عندك ؟
ابو وافي :الرياجيل كلموني امس يقولون يبون نرد لهم خبر ذا الاسبوع عشان اجازته بتنتهي وانا استحيت منهم وجيت بسألك توافقين عليه ؟
الهنوف :الي تشوفه يا بوي يصير
ابو وافي :الرجال سألنا عنه وطلع كويس
الهنوف :ابن حلال
ابو وافي:ابن حلال والراي رايك
الهنوف :الله يكتب الي فيه الخير
ابو وافي :يعني موافقه ؟
الهنوف ساكته ومسويه مستحيه
ام وافي :السكوت علامه الرضا
ابو وافي :اجل بكلمهم ...يلا مع السلامه
ام وافي :مع السلامه
رجعت ولقيت البنات وترف ينتظرونها
الجازيه :هاه وش صار ؟
الهنوف :نفس ما قلت بالضبط
زينب :اجل ذي السهره اليوم برعايه اختيار فساتين عرس الهنوف
ترف :حددت ؟
الهنوف :لا باقي بعدين بنتكلم فيها بس باقي النظره والخواتم مدري متى ناوينها
ام وافي دخلت :بكره
غاليه :يمه تتسمعين لنا؟
ام وافي :بس مريت وسمعت ذي الكلمه
ريوف :كنت مجهزه لذا اليوم من زمان وحافظه فساتين كثير ايهم اختار
الهنوف :وريني كيف
ريوف :انتي معليك انشغلي بمسكتك ودبشك
الهنوف :الحين كيف ادبش ما اعرف
غاليه :بعلمك بعدين عندي جدول مشيت عليه بعطيك اياه
ريم :الحين وين تسوون الزواج هم من اهل الشرقيه واحنا من اهل الرياض
ريوف :وش ذا السؤال الغبي اكيد عندنا بالرياض
الجازيه :يسوونه بالنص
الهنوف :وجدان شفيها ساكته اليوم ؟
ترف :صدق لاحظتها
وجدان :احس اني تعبانه من امس
ترف :ذكرتيني بتركي امس كان تعبان ومدري كيف قام وقرر يسجل بالعسكريه مع انه ما كان مع ذي الفكره
ملاك :العسكريه ؟
ترف :اي والاسبوع الجاي بيجيه القبول ويروح الدوره
وجدان :وش ذي الجلسه مافيها شي ناكله بروح اجيب الفصفص
طلعت وراحت الحمام وقالت :اكيد بسببي بيروح وجدان الغبيه وجدان الغبيه
وتذكرت اول ما صادفته دخلت الحمام برضوا وسوت نفس كذا وبدت عيونها تدمع :كيف ارجع الزمن واقول له حتى انا احبك ؟
دق الباب ملاك :بنت شفيك طولتي
وجدان :هاه الحين بطلع
ملاك :بكيتي ؟
وجدان :لا
ملاك :الا
وجدان حضنتها :بيروح بسببي
ملاك :يمكن ما يهرب منك ويبغى يكون نفسه عشان ياخذك بالحلال ما فكرتي فيها ؟
وجدان :ما اظن
...
بعد اسبوع
تركي :مر اسبوع وما جت ولا قالت شي
راشد :باقي ساعتين على روحتك
تركي :بس هي عرفت من زمان ولا جت
راشد :انتظر لأخر دقيقه
تركي :مافيه فايده خلاص بروح
راشد :خلاص روح بس لا تفقد الامل اذا رجعت بتجي مثل الرجال وتخطبها
تركي :واذا رفضتني
راشد :تحاول لين توافق
تركي شال شنطته :بروح اودع امي واطلع خلاص
راشد :لا تصير امعه كذا خلك رجال واوقف ورا اقوالك قلت لها احبك جرب لين توافق
بعد ما طلع تركي تلفت حوله مافيه احد توه طلع السياره سمع صوت دق على الباب وكان طفل صغير قال له :انتظرتك كثير خذ هذي
فتح الورقه وكان مكتوب :انتظرك بمكاننا -وجدان -
طالع بالورقه شوي ويوم استوعب نزل من السياره وراح للمكان لقى وجدان واقفه تنتظره وتتلفت حولها جا وقال :صارمكاننا ؟
وجدان التفتت:حسبتك ما بتجي
تركي :انتظرتك لأخر دقيقه
وجدان بدت تدمع :بتروح ؟
تركي :لازم اروح
وجدان :خذ ذي ولا تفتحها الا بالسياره
تركي :وش ذي؟
وجدان تمسح دموعها:الكلمه الي ما قدرت اقولها
تركي خذها وابتسم وقال : قريتها بعيونك بس ما يمنع اخذها ...تبكين ؟
وجدان :اي
تركي :كيف تبكين وانتي وجدان ؟
وجدان :ابكي لأنك تركي ...عالعموم لا تتأخر عشاني
تركي :لو بيدي اغير الزمن عشانك
وجدان :خلاص لا تخليني ابكي اكثر روح وانا بنتظرك
تركي طالع فيها ولف ظهره بصعوبه وراح وتركها ذي المره عكس تركي الي يروح ووجدان تراقب طريقه ،تركي يتكلم ووجدان تحفظ كلامه ،بس كلهم ينتظرون الوقت يمر