وانا في درب الهلاك ظهرت لي يا ملاك

24

وافي نظر لزاويه صغيره وسحب ملاك ليصبح ظهرها على الجدار ووافي يحاوطها بيديه :هنا افضل
ملاك التي تضايقت من قربه لهذه الدرجه :انت اطلع وانا بتخبى
وافي :مقدر ممنوع ندخل هنا والعقاب شنيع انتي اطلعي
ملاك :بس انا عيب اطلع بيشك فيني
وافي :اجل خلاص نتحمل
وجهها مقابل لصدره ولا يفصل بينهم سوا سنتمترات قليله وتشعر بأنفاسه فوق رأسها :ممكن تطبل تتنفس بس لين نطلع احس انفاسك براسي
وافي بسخريه رغم الوضع المتوتر :حتى التنفس ببتحكمين فيه وانتي بعد اكتمي نفسك احسه يدخل بصدري
احمر وجهها خجلًا من قوله وفاجأتها عطسه كادت تخرج لولا أن وافي غطا فمها بيده
ملاك بعدت يده :ما اسمح لك تلمسني
وافي ينظر لوجهها:وانتي للحين تلمسيني
نظرت ليدها وكانت لا تزال تمسك بيده:خلاص فكيتها بس انت كل شوي ...
وافي :اششش بعدين نتناقش
ملاك :ارجع ورا شوي بس
وافي :يا روحي انتي مقدر منطقه الخطر تبعد عني بس مقدار شعره فوق ذا رافع رجلي لو طحت عليك لا تقولين لمستني مدري ايش ماهو بأرادتي
ملاك :خلاص اسكت كأنه بيطلع ؟
وافي بعد عنها :طلع
ملاك اخذت نفس عميق :كنت بموت
وافي جلس على الكرسي وتكتف :ايه استاذه ملاك وش تبين تناقشيني فيه ؟
ملاك تعطس:ولله واجد بس خلني ساكته
وافي :فيك زكام ؟
ملاك :اي
وافي :الحين تنقلين العدوى وانا الي فيني مكفيني
ملاك :ولله لو ما كنت بذا القرب ما نقلت لك العدوى
وافي :طلعي كل الي بخاطرك عشان ترتاحين يقولون الي ينام وبخاطره شي يموت
ملاك :صدق ليش اسكت ؟ انت انسان مستحل الحُرمات كل ما شفتني لحالي جيت وكل ما سمحت لك الفرصه لمستني هذا وش نسميه ؟
وافي :حركات لا أراديه وعفويه تأتي بالمواقف الحرجه ؟
ملاك :لا اسمه تحرش
وافي يشير بأصبعه لنفسه :انا ؟ انا متحرش جتني الفرصه اني اغتصب بنت لين عند رجولي بس اخاف ربي خفته ببنت الناس ما بخافه فيك ؟ لو تتذكرين كل شي بيننا يصير بلحظات متوتره
كمل وهو يعد بأصابعه :يوم بالسياره كنتي متوتره من السواقه وانا تعبان ويوم بغرفه نايف كنتي تراقبيني واعصابي تالفه ويوم الحريق كان توتر يعني حريق وش بيصير ويوم الولد ذاك انقرص ويوم العرس بغيتي تحرقين بيتها بذاك البخور ...
ملاك :لا ماشاء الله حافظ كل شي ما أثر الحادث على ذاكرتك
وافي :اي ما انسى لأني بكل لحظه استغفر عن ذيك اللقائات لأن عندي ضمير انتي تحسبين ضميري ميت ليش لأني تعاطيت شهرين تشوفين نفسك الملاك الخالي من الذنوب وانا ايش ؟ انا شيطان استغل كل فرصه اسوي ذنب
ملاك :طيب وش جابك هنا بذا الوقت ؟
وافي :جبت الكتاب الي اخذته الظهر جبته الحين تحسبين اني ميت عليك ...
تذكر حلمه البارحه وحس بتوتر أكثر تنحنح وشد بلوزته من عند رقبته لعل الهوا يدخل ويبرد عليه
ملاك :طيب يا استاذ وافي ما قلت اني انسانه خاليه من الذنوب ولا قلت انك انت مختم كل الذنوب بس قلت لك وقف تتلاقى معاي وقف تقرب مني واهتمامك لي أخر شي افكر فيه
وافي :طيب انا وش اشرح لك من ساعه وش اشرح ؟ كل شي خارج ارادتي يعني لو ابوي ما جا كان شفت التسجيل ورجعت غرفتي نمت بس الظروف ضدنا
ملاك :طيب وش تنتظر الحين ؟
وافي :تدرين ؟ انتي انسانه شايفه نفسك بشكل مبالغ فيه ليش انا دايم الي اكون غلطان وانا الي اطلع مع ان كلنا غلطانين الاعقل فينا هو الي بيطلع اول
ملاك اخذت الفلاش بعد ما اكتمل التحميل وراحت عند الباب :طبعًا انا الاعقل
وافي يزاحمها :لا ولله انا الاعقل
ملاك طالعت فيه :لأني الاعقل برحمك وأخليك تطلع قبلي عشان رجلك
وافي :صدقيني لأني الاعقل كنت بخليك تطلعين قبلي لأني احترم غبائك
ملاك تشير له بقبضتها :ماني غبيه انت الغبي انا قاريه خمس ميه وستين كتاب وبقرا الف كتاب يعني ماني غبيه
وافي بأستفزاز لغضبها الذي يراه لأول مره :صح بس مجنونه
ملاك عطست واخذت نفس عميق واردفت بهدوء لتستفزه :مو مجنونه فيه ناس تصادمت حياتي بحياتهم تلفت اعصابي منهم عصبيتي ذي ما قد طلعت على احد واسأل سيّاف اذا تبغى
وافي يضحك:اسأله ؟ وقتها بيذبحك قدامي
ملاك تضحك :واه يا مسكين ما تدري ان سيّاف يوثق فيني اكثر من عيونه
اكملت وهي تشير له بأصبعها ببرود :بيذبحك انت قدامي
وافي :خلاص يا اجمل واذكى واعقل بنت بالعالم اطلعي قدامي اشوف
ملاك :طبعًا بطلع قدامك وكلامي يمشي عليك
وافي يضحك :بصفتك مين ؟ عمي خلاك تساعدينه بأشياء يقدر يسويها بدقيقتين بس من شفقته عليك وصدقتي نفسك أنك استخباراتيه كذبتي الكذبه وصدقتيها
ملاك :اي يقدر يراقبك بالرياض يوم سافرنا انا كنت عينه وقتها ما شكيت فيني مقدار ذره
وافي :بس انك فاشله لدرجه كشفتك من اول يوم
ملاك تنظر اليه بصمت وهو كذالك
وافي :خلاص طلع كل شي بخاطرك ؟
ملاك :اي وانت ؟
وافي :طلع الحمدلله احس اني انسان نظيييف
ملاك بسخريه:فعلًا ماشاء الله
وافي :انتي قريتي خمسميه وستين كتاب كم كتاب دين بينهم ؟ فعلًا لأنك ما تعرفين شي اسمه توبه ورجوع عن الذنب تبت عند الكعبه هناك تعلقت بستارها ودعيت ربي يفكني من ذا البلا لكن الله اذا احب عبدًا ابتلاه من اول بتلاني بالمخدرات والحين فيك
ملاك :يقال اني مره الاحقك ذي المره انت كذبت الكذبه وصدقتها
وافي :كلنا مكذبين كذبه ومصدقينها لأن الوضع اوفر صار خلاص من ذي اللحظه ننسى الي صار نبدا من البدايه كولد وعم وبنت عمه
ملاك تعطس:لا بنت عم وولد عمها
وافي :ولد عم وبنت عمه
ملاك :بنت عم وولد عمها
وافي :الي هو بس نبدا من جديد ننسى كل شي انا اعتبر ذا الحادث طهاره من ذنوبي وانتي اعتبري ذا الزكام طهاره لك
ملاك :بنت عم وولد عمها يعني كل شي بيننا رسمي واول ما تشوف وجهي حط ببالك كلمه حرام
وافي :وانتي اذا سمعتي صوتي اسمعي صوت حرام زائد لين نخلص من عيشتنا بنفس البيت بتصيرين اختي الصغيره وانا اخوك الكبير
ملاك :يلا اطلع يا ولد عمي
وافي ينزل راسه وكأنه ما صار شي من قبل :لا لا انتي اول
ملاك:خلاص انت اطلع اذا طلعنا من ذا الباب نبدا البدايه مو الحين
وافي طالع فيها
ملاك :مضيع شي بوجهي يالحبيب؟
وافي وهو لا يزال يطالع فيها :اخر مره اشوفك
ملاك :واذا ؟
وافي :احاول انسى ملامحك عشان ما تطلع بكوابيسي
ملاك :كذا تنساها انت غريب والسبب الشاهي صدقني
وافي :لاا الشاهي افضل من كل شي بالحياه
ملاك :اشرب قهوه بتصير انسان متحضر هادئ مو ذي الهمجيه
وافي يضحك :يعني توصفين ابوك وابوي واعمامي كلهم بالهمجيه
ملاك عطست :النقاش معك بيقعد لين الفجر خلاص الباب كبير بيوسعنا سوا نطلع سوا
وافي :طلي من الباب اذا شفتي احد برا
ملاك طلت :محد تعال
وافي طلع :اوبس قفلت الباب
ملاك :نسيت بدايه جديده
وافي :طيب بس افتحي لي الباب
ملاك تطالع فيه بجمود :طيب
فتحت له الباب :تفضل
وافي :يبي له تصليح ذكريني بعدين
ملاك بسخريه:اي انا اختك الصغيره بجي اصحيك من نومك اقول وافي صلح الباب عشان لا تنحبس تكفى
وافي :بدايه جديده نسيتي
ملاك تمسح وجهها بكلتا يديها :السلام عليكم ولد عمي
وافي :وعليكم السلام قفلي الباب
ملاك قفلت الباب وتنهدت كأنها ارتاحت من شي داخلها من زمان وكأنها تأكدت من شي تخافه ،بدايه جديده لا شي يذكر بيننا
اخذت الفلاشه ودقت على عمها :اخذتها بس مقدر اجيبها الحين بكره الصباح
ابو سطام :يعطيك العافيه متأكده نفس اليوم ؟
ملاك :شفت المشهد كان يلعب بالسياره صدق و ...
ابو سطام :وش ؟
ملاك :وافي جا
ابو سطام :يا سلام انتم تقابلتم اكثر من المتزوجين
ملاك :لالا اخذت احتياطياتي نزلت بعبايتي
ابو سطام مسح وجهه بيده وتنهد :وش سوا ؟
ملاك :شاف الفيديو وجلس يسب بفيصل
ابو سطام :علمك اسمه؟
ملاك :اي ...يعني لا ما قال لي بس سمعته يسبه يقول فيصل مدري ايش
ابو سطام ضحك :تخافين تسبين قدامي ؟
ملاك :ما اشجع السب
ابو سطام :متعود انا سمعت كل انواع السب الي قاله وافي وسمعتيه قطره من المطر الي سمعته بحياتي
ملاك بالمطبخ سمعت صوت احد قادم :يلا بكلمك بعدين
ابو سطام :يلا نوم العوافي
ملاك :الله يعافيك
دخل ابو وافي المطبخ :ملاك ؟
ملاك بتوتر تخبي الفلاشه بكمها :شسمه كنت جيعانه ونزلت
ابو وافي ضحك :عليك بالعافيه يا روحي... انتي دخلتي مكتبي ؟
ملاك بلعت ريقها :هاه ؟
ابو وافي :لقيت الكتاب الي عطيتك على المكتب والباب مخليته مفتوح
ملاك وهي تشتم وافي بداخلها :اي اي خلصته قبل شوي ونزلته بس نسيت الباب مفتوح
ابو وافي :ثاني مره قفليه فيه ناس ملاقيف بيروحون لكميرات المراقبه ويسرقون التسجيل
ملاك حست انه يقصدها وبان الخوف بملامحها
ابو وافي ضحك :لا تخافين ماهو احد غريب
فتح الثلاجه وطلع اشياء من الثلاجه :زمان يوم وافي كان بالمتوسط سرق سيارتي يبي يتعلم
طلع التوست وبدا يسوي لها ساندوتش :وبحسب ظنه انه بيخفي جريمته وراح للكميرات بيحذف مشاهد ذاك اليوم طبعًا قفطته بطريقه غبيه ومن بعدها صار محرم عليهم يدخلون ذيك الغرفه
ملاك مستغربه من الموضوع :وكيف عاقبته
ابو وافي :مين قال لك انه عليها عقاب؟
ملاك حست بغبائها :اا يعني قصدي انه ...شوف هي قاعده الله ما حرم شي الا وله عقاب اكيد انت مسوي نفس الشي صح ؟
ابو وافي ضحك :منطقك جميل ...صح عاقبته بس ذوقي ذي الساندويشه واقولك ايش العقاب
ملاك :ايش ؟
ابو وافي :تونه
ملاك ذاقتها :اممم لذيذه
ابو وافي :وصفه سريه سويتها قدامك
ملاك تضحك :ما لاحظتها
ابو وافي يغمز:اجل خليها سر
ملاك :وكيف عاقبته ؟
ابو وافي يأشر لها تمسح خدها :عاقبته بعقاب ما يُعتبر عقاب
ذهب ليصب لها العصير :خليته يقرا عشره كتب من مكتبتي بأسبوع ويلخصها لي ويقرا التلخيص قدام اخوانه ومنها كتاب كان يتمنى يقراه وهو صغير بس منعته ووقتها قراه بالغصب
ملاك :الف ليله وليله ؟
ابو وافي :اي كاتب عليه انه يبي يقراه بعمر ١٥ بس تأخر سنه وانتي دام خلصتيه بيوم ابيك تلخصينه
ملاك ضحكت :بلخص كتاب غيره أحسه ما يصلح تلخيص
ابو وافي :براحتك بس ابي اشوف تلخصيك كيف
سكتت شوي وقالت :ليش تأخر وهو كان يتمنى يقراه ؟
ابو وافي :تعرفين المراهقه تتغير عندك بعض المفاهيم بس تكتشفين بعدين انها غلط هو كان يحسب الكتب اشياء غبيه بمراهقته
ملاك :الكتب ؟ مو غبيه يعني ...
ابو وافي :لو ناقشتي وافي زمان كان ممكن تقنعينه
ملاك بفضول :كيف كان وافي زمان يعني بطفولته وكذا
ابو وافي حط يده فوق الثلاجه وطلع صور لوافي وهو صغير :هذا هو
ملاك تبتسم :كان صغير مره
ابو وافي :كان يحب اغاني طلال المداح بس توفى وهو عمره سبع سنين
ملاك :الله يرحمه بس احس بذاك العمر ما يقدر يدرك ولا يفرق بين المغنيين
ابو وافي ضحك :تعرفين وافي اول ولد واول ما حملت فيه امه جلست اقرا عن الحمل والولاده والاطفال لأني كنت اخاف ما اكون اب كويس للأولاد غاليه كانت بنت وهاديه عكس ما كنت اسمعه عن الاولاد وانهم مشاكسين واول معلومه جت عيني عليها انه الصوت الي يسمعه الطفل وهو ببطن امه جنين بيتعود عليه ويحبه لما يولد ويكبر حبيت اجرب وصرت كل ما اقرب من ام وافي اغني وانا في درب الهلاك ظهرت لي يا ملاك غيرتي مجرى حياتي شفت السعاده معاك وعلى ذا الحال صرت اغني ذي البيتين كل ما اشوفها
ملاك تذكرت لما كان يغينها للولد وابتسمت اكثر
ابو وافي:وبعد ما ولد وبدا يفتح عيونه غنيته له والمفاجأه انه ابتسم وهو عمره توه اسبوعين
ملاك نسيت الواقع الي هي فيه وركزت على ان وافي طفل :ياروحي هو اتوقع لو كلمت طلال المداح عنه كان بيكرمه كأصغر فان له
ابو وافي ضحك :طيب تدرين ليش سموك ملاك ؟
ملاك :لا ماقد سألت
ابو وافي :انا سميتك
ملاك بتعجب :انت ؟
ابو وافي :اي وافي وقتها عمره اربع سنوات كان طول الوقت يكرر ذي الاغنيه دق علي ابوك وقال ابشرك جتني بنت وما ادري وش اسميها وقتها كان وافي يدور حولي ويغني قلت له سمها ملاك وفعلًا اخذتي من اسمك نصيب
ملاك نظرت للأرض من خجلها بمدحه لها ومن فكره أن اسمها متعلق بوافي وهو السبب بكونها ملاك :يلا تصبح على خير وشكرًا على الاكل الذيذ
ابو وافي :تصبحين على خير
...
صباحات الرياض حيث اول ساعات الصباح تزدحم الطرقات بالناس كلٌ منهم يحمل همًا وحلمًا كلٌ متوجه الى قضاء همه او تحقيق حلمه منهم السعداء والتعساء منهم المبكرون والمتأخرون ،المتأخرون تشاركهم ديم بتأخرها اليوم كما شاركتهم مرات عديده بدأت المحاضره من نصف ساعه ،محاضره ذلك الدكتور الذي لابد انه يكرهها لكسلها دخلت القاعه وهي تحاول ضبط انفاسها بعد ركضها بالممرات لتلحق ...لسوء حظها وجدت القاعه مكتضه بالطالبات سوى مقعد واحد بالامام ذلك المقعد الذي وعدت نفسها أنها لن تجلس عليه مطلقًا جلست وهي تحاول استيعاب اعجاب الفتيات بهذا الدكتور من الواضح انه كبير بالسن يكبرنا بعشر سنوات لا نعرف طباعه ولا نعرف سوى اسمه الاول لمَ هذا الاعجاب ،قاطع تفكيرها صوته وهو يقول :هذا كل ما عندنا اليوم ،هل من اسأله ؟
تعجبت ديم من نفسها وهي تردد كلامه ،جملته التي ينهي بها كل محاضره لا تتغير منذ سنتان
احد الطالبات بأسلوب مصطنع :انا عندي سؤال
يوسف :تفضلي
:يعني هو خارج الدرس بس انه مجال اهتمامك
يوسف بصرامه :اعتقد تكلمنا من قبل عن منع المواضيع التي خارج الماده
نظر لساعته العتيقه :لكن اليوم خلصنا مبكر نستقبل سؤالك
:شكرًا ،وش تعريف الحُب بعلم النفس
التفتت ديم لتنظر بإزدراءلتلك الطالبه التي تبدو بنظرها بلهاء بأسألتها
يوسف :موضوع الكثير فاهمه غلط ،الحب مو من القلب الحب ينبع من العقل القلب ماهو الا عضله تضخ الدم بالجسم لا اكثر
:شكرًا على الاجابه بس برضوا فيه سؤال ثاني ،الحب من اول نظره ...
قاطعها يوسف :مافيه حب من اول نظره الحب شعور نفسي بالعقل يتكون خلال فتره طويله الحب من اول نظره مثل ما يسميه البعض هو اعجاب لا اكثر اعجاب بالشكل او بالصوت او بالرائحه وهذي التفاصيل الصغيره ،اذا انتهت اسألتك نقدر ناخذ الاسئله الباقيه ولكن داخل اطار الدرس
:انا عندي سؤال ،متى ناخذ درجات الاختبار
ديم تأففت من اختبار البارحه دكتور مجنون لدرجه يجعلنا نختبر بأول يوم بعد الاجازه
الدكتور :صححت نصفها فقط واليوم بصحح النصف الاخر ،وعلى طاري الاختبار اذا جت ديم قولوا لها تجي غرفتي
ديم بصدمه :طيب ...يعني إن شاء الله
يوسف :هل من اسأله أخرى ؟
لا مجيب
يوسف :إذن أنتهت المحاضره ناخذ اسماء الحضور
بعد أن انتهت من اعمالها مرت لمكتبه طرقت الباب ودخلت فور أذنه لها :السلام عليكم
يوسف :وعليكم السلام
ديم :انت طلبتني
يوسف بدون أن ينظر اليها :ايه تفضلي اجلسي
ديم جلست
يوسف نظر لها :نعم يا ديم اسمعك
ديم :وش؟
يوسف :ليش دخلتي طب وانتي تنامين بالمحاضرات وتتأخرين
ديم :ظروف
يوسف بأسلوب طبيب نفسي واضح :الظروف تأخرك وتخليك تنامين ولا هي دخلتك طب
ديم وبدأ الدم يغلي في رأسها من اسلوبه البارد واستخفافه بها وبحلمها :ليش هذي الاسئله ؟
يوسف :درجاتك بالاختبار ما تنقال من نقصها
ديم :الي اعرفه الجامعه محد يدور علي ويحاول يساعدني ارفع درجاتي بنفسي ،لا تصدمني وتقول بنسوي استدعاء ولي امر محنا بمتوسطه
يوسف بأبتسامه مستفزه :ودي اسوي استدعاء ولي امر على درجاتك لكن مثل ما تقولين احنا مو بمتوسطه احنا هنا ندرس طب ندرس كيف ننقذ ارواح الناس تتهاونين بالمحاضرات اليوم بكره تجيك حاله ما تعرفين كيف تعالجينها ...قولي لي ليش داخله طب
ديم :دوافعي الخاصه
يوسف بأستفزاز لها :الفلوس ؟
ديم اخذت نفس عميق :لا مو الفلوس كنت ابي انقذ اخوي
يوسف بصدمه :نفس دوافعي ...وش مرض اخوك ؟
ديم :اتوقع ما يخصك هذا الموضوع
يوسف ابتسم :يخصني تمت توصيتي عليك لأني اكتشفت انك من اقارب اخوي
ديم بلعت ريقها ووقفت :اذا خلصت بخرج
يوسف يشير بيده :تفضلي
بعد ان خرجت اتسعت ابتسامته غريب أن يفعل هذا لكنه يجرب اسلوبًا في علم النفس التحفيز بالتحطيم اخرج دفتره ليكتب ما لاحظه فيها من تصرفات بينما في تمشي بخطوات غاضبه بتلك الممرات يستفزني لأنه يعلم قرابتي من زوجه اخيه سيخرج مافيه من حقد بهذه الحجه تقلده بصوت ساخر به بعض الغضب :تمت توصيتي عليك
في نفس الوقت تسير اختها المستجده بجامعه اخرى وقد تعرفت على احدى الفتيات
ريوف :انتي بالسكن يعني ؟
ضي:اي جايه من الشمال
ريوف :معاك وحده بالغرفه ؟
ضي:معاي وحده جداويه تخيلي انا من الشمال وهي من الغرب فرق الثقافات فوووق
ريوف تضحك :الجداويات يصدمونك دايم وحده قريبتي اعرفها جداويه تفكيرها غريب
ضي :بس للأمانه حلو
ريوف :شوفي كلهم حلوين اهل جده بس قريبتي مرره ما استصاغها لساني
ضي غير منتبهه لحديث ريوف تشير من بعيد :شوفي هذي هي
زينب جت :سلام ضيو
ضي بحماس :ذي صديقتي الي حكيت لك عنها امس ...
ريوف :ما يحتاج ضيو (تقلد نبره زينب) اعرفها اسمها زينب هي قريبتي الي قلت لك من جده
ضي: الله زينب تعرفينها ؟
زينب مدت يدها لريوف وهي تمضغ العلك :اي اعرفها ...كيفك ريفو
ريوف بنفس الاسلوب :بخير ز...زوزو
زينب :كيف الجامعه معاك ؟
ريوف بأستهزاء:مره حلوه ما توقعت اصادفك
ضي تقاطعهم وهي تمسك بيديهم :يلا امشوا نروح ستاربكس ولا دانكن عندنا سوالف كثييير
ريوف :سوالفي مخلصه معاها
ضي :بس انا سوالفي كثير
ريوف تمسك جوالها
ضي :ريفووو اتركي الجوال خلينا نسولف
ريوف :صبر بكلم اخوي يجي لي اذا خلصت
ضي :طيب وش اطلب لك ؟
ريوف :اي شي على ذوقك
زينب وهي تطالع بريوف:انا ابي سبانش لاتيه
قربت من ريوف وهي تهمس :زي الي يحبه نايف
ريوف ضحكت وقالت :فعلًا اشفق عليك ما تعرفين كيف الحب
زينب :علميني كيف
ضي جت :ايش ؟
ريوف :قاعدين نسولف عن وحده من صديقاتها بدون شخصيه تحب واحد واي شيه يحبه تروح تقلده لدرجه نسيت نفسها
زينب انقلب وجهها يوم ادركت انه الكلام يقصدها
ضي بتفاعل :ايي صدق يعني انا ما جربت الحب ولا شي بس احس المتزوجات والي يحبون ينسون نفسهم ياخذون شخصيه ازواجهم وينسون انفسهم زمان
ريوف متجاهله زينب :اي هذا الي اقوله انتي لما تحبين شخص يعني حتى صديقاتك لما تحبينهم لا تنسين نفسك حطي حدود وخلي شخصيتك
زينب بلعت ريقها وطالعت بالجوال :محاضرتي بتبدا بعد شوي
ضي:وقهوتك ؟
زينب :باخذها واشربها بالمترو لين اوصل القاعه
ريوف بأستفزاز :لا تضيعين بالمترو كفايه الاشياء الي ضيعيتها
زينب تضحك بقهر
ضي:اذا خلصتي المحاضره كلميني نرجع السكن سوا
زينب :طيب
ريوف جوالها دق :يلا ضيو انا بطلع اخوي جا
ضي :الله بتتركوني لحالي
ريوف :بكره بتداومين ولا عندك اوف ؟
ضي :عندي اوف
ريوف :حتى انا
ضي قامت وحضنتها :يلا حبيبتي اشوفك بعد بكرا
ريوف :ان شاء الله
...
مكتبها مليء بالاوراق تراجع جميعها وتحاول حلها أخذت نفسًا عميقًا لتنظر لتلك اللوحه التي على مكتبها وتحمل اسم المحاميه/ وجدان بنت جابر ابتسمت لتحقيق حلمها وأتسعت ابتسامتها لذكرى والدها تنهدت مره اخرى براحه وهي تعيش حلمها بالحقيقه ،خطر ببالها سؤال :ماذا بعد ؟ حققت حلمي وليس لدي اهداف أخرى اكره ذلك... نظرت مره اخرى لأسم والدها لتخطر ببالها فكره/هدف جديد
رفعت سماعه تلفون المكتب بنشوه فرح لتتصل على والدها منها رغم أن هاتفها ليس به اي مشكله :الو السلام عليكم
ابو سطام وهو يحذر من الارقام الغريبه :وعليكم السلام مين معي ؟
وجدان بصوت جاد :المحاميه وجدان بنت جابر
ابتسم لصوتها وسايرها بالحديث :محاميه وجدان من زمان اتصل عليك ما تردين شكرًا لأنك اعطيتيني من وقتك
وجدان ضحكت :الله يخليك لي ...فاضي
ابو سطام :افضى عشانك أمري ؟
وجدان وهي تلف سلك التلفون على اصبعها نظرت لساعتها :بعد نص ساعه بيخلص دوامي اذا بتجي لي ونروح ...
ابو سطام :وين نروح ؟
وجدان بربكه حماس:نروح نشوف معارض السيارات بشوف لي سياره اجمع من راتبي عشانها
ابو سطام :انتي لو تبغين كل معارض الرياض جبتها لك ليش تجمعين وانا حي ؟
وجدان :يبه تعرف حققت حلمي وماعندي احلام و...
ابو سطام قاطعها:وما تحبين تبقين فاضيه
وجدان ابتسمت لمعرفته لها :وابي اخذ الشي بعرق جبيني بجرب شعور السياره الي انا اشتريها لنفسي واكون تعبت عشانها
ابو سطام ينظر لساعته وهو أيضًا محاط بأوراق العمل :خلاص انا ربع ساعه واجيك
وجدان :بتنزل المكتب ؟
ابو سطام :اي بشوفه
دق باب مكتبها :يلا يبه بكمل شغلي وبكلمهم اذا جيت يدلونك على مكتبي
ابو سطام :بحفظ الرحمن
وجدان :تفضل
دخلت سكرتيرتها تحمل باقه ورد
وجدان بأبتسامه :سمر ؟ وش ذي
سمر :هديه من مجهول
وجدان التي تظن انها من تركي :جيبيها كيف
سمر تغمز :خطيبك ؟
وجدان :اتوقع بس اليوم ايش ؟
سمر :الاثنين
وجدان :بالدوره هو ما يقدر يطلع
سمر :مو شرط هو مجهزها يمكن مكلم اخوه يجهزها لك اول ما تداومين
وجدان شمتها وابتسمت :يمكن ...اي صح سمر ابوي بيجي بعد شوي اذا جا دليه على مكتبي
سمر وهي طالعه :طيب
وجدان تضحك :تعالي
سمر :ايش؟
وجدان :تعرفين شكله ولا اي احد بيجي بتدخلينه علي ؟
سمر ضحكت بربكه :كيف شكله ؟
وجدان توصف والدها بحب :طويل شوي وجهه بدأت فيه بعض التجاعيد ولحيته فيها شوي شيب
سمر :طيب ذي صفات اي واحد بعمر ٤٨
وجدان :ما قد ذكرت ان عمره ٤٨
سمر توترت
وجدان ضحكت :يووه سمر شفيك مو واثقه من نفسك قلت لك
سمر ضحكت :انسى كثير
وجدان بحده تمازحها :سكرتيرتي المفروض ما تنسى
سمر :اتوقع فرق الاسلوب أثر علي
وجدان :كيف كانت الي قبلي؟
سمر :كانت ما تهتم كثير للتفاصيل مثلك وكل شي تقراه مره وحده وتقفله تخلص من بدري
قربت منها وهمست :واهم شي تاخذ رشوات
وجدان :يقولون استقالت وهي انفصلت بالاصح ؟
سمر :صح كيف عرفتي
وجدان بأستغراب :كيف عرفت ؟ دارسه قانون يا حياتي
سمر :قلت لك انسى
وجدان :لازم تسوين فحص احسك مو تمام
سمر :بسوي
وجدان :بأقرب وقت
سمر :يلا أنا استأذن خليك شوي مع ورودك الحبيبه
وجدان :يلا انتبهي لأبوي اذا جا
سمر :ابشري
فتحت البطاقه الي على الورد وكان مكتوب بها : لا تعلمين كم آه نطقت بضياعك مني وكم دمعه ذرفت عيني ،لمَ يُصّر العالم أن يأخذك مني ؟
تساءلت بماذا كان يتقرب تركي من ربه حتى ظَفِر بك ،كم هي قاسيه الدُنيا كقسوه عينيك ،أهنئك بعملك الاول وبنفس الوقت اواسي نفسي بكسرك الاول لي وداعًا ولكن ليس للأبد...
وكما العاده ختم رسالته بأسم -مجهول يهواك-