وانا في درب الهلاك ظهرت لي يا ملاك

35

صعد خالد الدرج بصراخ :ديم
ريوف :ما سوت شي
خالد بترجي :وينها وينها ؟
ريم :بغرفتها تذاكر
خالد :جيبوا عبايتها بسرعه تكفون بدر
بدر :هلا
خالد :شغل سيارتي
بدر :وش بتسوي
خالد بصراخ :شغلها وانت ساكت
دخل غرفتها :ديم بسرعه قومي
ديم :بسم الله شفيك ؟
خالد :غاليه بتولد ولاده مبكره ابيك معاي
ديم :وي طيب طيب الحين
يوسف:وش صار ؟
ديم :بعدين اكلمك زوجه اخوي بتولد ولاده مبكره
يوسف :يلا نعتبرها اختبار لك
ديم :اي اي مع السلامه
خالد :يلا امشي ديم
ديم :هي بأي شهر ؟
خالد بحزن :توها بدت الثامن بتولد
ديم :وش صار لها ؟
خالد :نزل دم كنا جالسين وهي فجأه حست بألم ناظرت تحتها كان فيه دم
ديم :وش الاعراض الي حستها اخر الايام ؟
خالد:نغزات قويه كنت اقول لها نروح المستشفى تقول لا عادي بالثامن يتحركون اكثر
ديم :الحين هي بوعيها ؟
خالد :اي بس ما تقدر تمشي بيجيبونها ريم وريوف
ديم ركبت بالمقعد الخلفي :جيبها هنا
خالد فتح الباب وحملها ليدخلها
ديم :بالشويش لا تسوي حركات سريعه ادري انك مستعجل بس بيضرها ذا اكثر
خالد :انفداك غاليه تسمعيني؟
غاليه بألم :اي
ديم :تنفسي وكأنه ولاده طبيعيه بوقتها لا تتوترين وتزيدين نفسك اذا تحسين الم اضغطي على يدي بمقدار الالم الي تحسينه
غاليه بصعوبه :البنت البنت
خالد :طلعت صح ؟ ديم بنتي
غاليه :العنود نايمه بالبيت
ديم :خلاص انتِ معليك برسل للبنات يروحون لها بس اهدي لا تتوترين ولا تضغطين على نفسك كل شي ان شاء الله بيمر وبتولدين طبيعي
بالبيت
ريوف بضحك :انا مدري شفيني نقزت قدامه واقول ما بتسوي شي
ريم :الحين صدق غاليه بتولد
بدر :قصري صوتك لا تسمعك امي معد تنام
ام خالد :وش صار ؟
ريم :هاه؟
ام خالد :مين بيولد ؟
ريوف :محد بيولد الهنوف حامل
ام خالد :قلنا لها بس تقول لا اخذ حبوب
ريم :حملت من فوق الحبوب ؟
ريوف :لا سحبت عليها يومين بالديره وامداه البزر تكون بيومين
بدر :هاه حبيبتي ما درستيها بالاحياء ؟
ريوف :الاحياء اسوء ماده كلها ديدان ومدري ايش وع و على قول بعض الناس ايووو
بدر :لبى الي يقول ايو بس انوثه احسن من بعض الناس وع وع تقل رجال
ريوف :بسم الله كيف عرف انها هي ؟
ريم :ولله واضح من وجهها
بدر :الحب يا جاهلينه
ريوف :ههاي ضحكتني وانا مالي نفس اضحك انا جاهله بالحب ؟ لو يفتحون تخصص حب بالجامعه جبت فيه الاولى بمرتبه شرف واخذت وسام الملك عبدالعزيز
ريم :مافيه شي يستدعي دراسته
ريوف :صح لما تجربينه تصيرين محترفه
استعدل بجلسته :ومع مين جربتيه ان شاء الله؟
ريوف :انا ؟
بدر :اي
ريوف :مع نفسي عندي تقدير وحب لذاتي ريم ما تحب نفسها حتى شعرها كيرلي تسويه ستريت
ريم :كذابه انا شعري ستريت محد بالعايله كيرلي الا انتِ
ريوف :يا...
بدر قاطعها :مين ؟
ريوف :مالك دخل
بدر :ريوف
ريوف :اي انت عادي تحب ساعديني ومدري ايش بس انا لا
بدر :ما قلت لا علميني بس
ريوف : عشان بعدين تذبحني انا وياه
بدر :نايف صح ؟
ريوف ووجهها محمر :لا
بدر :الا هو
ريم :خلاص بس لا تنطق من الحيا
بدر :خليها تهجد شوي معاها دوده ماقد قعدت
ريوف :حرام عليكم خلوني اعيش مراهقتي
بدر :ماشاء الله ما خلصت المراهقه؟
ريوف :توني ٢٠
ريم :ماشاء الله امس وانا اغير حفاظتك
بدر :وانتِ بعد مسويه شايبه ترا الفرق بس ٩ سنوات
ريم :بدروي حبيبي وش تعشيت اليوم اول مره تتكلم كذا
بدر :انا تعبت دايم اكتم اسكت واكتم خلاص خلوني اعبر
ريوف تهمس لريم:لو انه مو ولد قلت جته الدوره
ريم ضحكت :استغفر الله
بدر :اي انتم تضحكون بس انا حزين ابي اتزوج
ريوف :اهااا عرفنا المقصد انتم ما تعجبوني ابي زوجه تسليني مين زوجته زينب كيف بتسليه تدخله غرفه مليانه عقارب وتقول له يلا حبيبي العب
ريم :الحقيقه ترا زينب طيبه بس انها تستلعن معك يعني المشكله فيك مو فيها
ريوف قامت :جلستكم بدت تخيس انا بروح انام وانتم سولفوا عن زينب لين يطلع شعر بألسنتكم
ريم :نوم العوافي
بدر :نوم العقارب
ريوف :اعوذ بالله
...
نايف :كيف؟
الهنوف :ولله ذا الي صار امي اذا نايمه ولا بتنام لا تصحيها تخوفها
نايف :بروح انا
الهنوف :اي عشان تصحى امي تتجنن
نايف :طيب غاليه لحالها
الهنوف :مو لحالها ديم معاها بالغرفه وتشوف العمليه حتى
نايف :كيف دخلوها ؟
الهنوف :خطيبها توسط لها وقال اعتبروه تطبيق مدري ايش ودخلت
نايف :ماشاء الله يا سرع وساطته
الهنوف :يلا حبيبي بقفل باقي وافي ما علمته
نايف :انا بعلمه بس اسمعي
الهنوف :هاه؟
نايف :اذا اشتهيتي شي وما جاب لك زوجك علميني اشوف شغله
الهنوف ضحكت :ان شاء الله
نايف :مع السلامه
الهنوف :مع السلامه
غازي :وش يقول ؟
الهنوف ويدها على بطنها :يقول اذا اشتهيت شي وما جبته لي اعلمه
غازي جلس :مشتهيه شي الحين؟
الهنوف :لا
غازي :اذا اشتهيتي قولي لي
الهنوف فتحت ذراعيها :تعال ابي انام
استلقى وهي بحضنه ورأسها على صدره
الهنوف :ولا جيب جوالي ابي اقرا
غازي :وش تقرين ؟
الهنوف وهي مبتسمه :معلومات عن الحمل والجنين وكذا متى يبدا يسمع اصواتنا
ويده على بطنها :الحين ماهو بحاجه الا راحتك نامي وبكره تقرين
الهنوف :لا يحتاج كثير
غازي :وش يحتاج؟
الهنوف :حب ابوه لأمه
غازي :بيفيض من حب ابوه وامه
الهنوف :من الحين اقول لك اذا طلع ولد بتصير تغار منه
غازي :انا اغار من ولدي مستحيل
الهنوف :ولله ترا تصير لا تقول مستحيله بتغار منه لأنه ياخذ وقتي منك
غازي :اهم شي يجي بصحه وعافيه بعدها عاد نتهاوش والفوز للأقوى
الهنوف :ولو طلعت بنت
غازي وهو يمسح على شعرها :على كذا أنتِ بتغارين
الهنوف وهي مبتسمه :ما بخليها بتصير حليفتي
غازي :حليفتك ،لا تدخلينها بشغلك الي ماله داعي
الهنوف :لا مو كذا مثلًا يمكن تصحى يوم تلاقي حواجبك مرسومه
غازي :حواجبي من زمان اقول لك لا تقربينها ما ابي ارسمها خليها
الهنوف جلست :غازي مشتهيه ارسم حواجبك
غازي جلس :كذابه
الهنوف :ولله ما كذبت مشتهيه ارسم حواجبك
غازي :طيب جيبي الفرشه مدري شسمه وارسميها
الهنوف :بسوي لك حواجب السيف
غازي :لا تحلقين حواجبي
الهنوف :اصلًا حرام
غازي :ولا تصورينها
الهنوف وهي تفتش بالادراج:لا مارح اصورها تطمن ...ايوه ذا هو
غازي :يروح صح ؟
الهنوف :اي يروح بمزيل المكياج
غازي :اغمض ولا ما يحتاج ؟
الهنوف :لا ما يحتاج
غازي :بس علميني وش بتسوين يعني قولي الحين بسوي كذا طيب؟
الهنوف :اي اول شي بمشط لك حواجبك
غازي :حتى الحواجب تتمشط ؟
الهنوف :اي عشان تبان الفراغات
غازي :وليه ندور للفراغات ؟
الهنوف :عشان نعبيها
غازي:طيب هي كانت مغطاه ليه نطلعها
الهنوف :لأنك بتواجه ظروف صعبه ممكن تتحرك فيها حواجبك وتبان الفراغات
غازي :شدعوه ياقلبي ما بطلع اجاهد انا كلها حواجب
الهنوف :الحين اثبتها بصابونه الحواجب
غازي :مو الصابونه للتنظيف كيف صارت مثبت؟
الهنوف :مدري هو كذا اسمها
غازي :احس حواجبي ثقلت
الهنوف :لا لا تلمسها
غازي وهو يلمسها :ليش؟
الهنوف :خربتها
غازي :ابي اشوفها
الهنوف :بعدين
غازي :كم تاخذين وقت ترسمين ؟
الهنوف :حواجبي اخذ عشرين دقيقه
غازي :الله لو انك تزرعينها من جديد
الهنوف :انت حواجبك كثيره بخلص بسرعه
غازي :عشان ننام بسرعه يام عيالي
الهنوف ابتسمت وهي ترسم حاجبه :خلصت الاول الحين ببدا بالثاني
وضعت اصبعيها على لسانها ثم مسحت بهما الفرشه
غازي بتقرف :وش ذا ؟
الهنوف :عشان الفرشه تصير حاده اكثر
غازي :ما تصلحين ميكب ارتست ولا بيهجون الزباين
الهنوف :ما اسوي الا لنفسي
غازي :الحين تسوين لي
الهنوف :اعتبرك من نفسي واحبك
امسك يدها الاخرى وقبلها :ونفسك تحبك
الهنوف :امم تعرف خلاص ما ابغى اكمل
غازي :خربتيها صح؟
الهنوف :لا خلاص راحت شهيتي بنام
غازي :عطيني مرايا اشوف
الهنوف :هاك
غازي :يا ساتر واحد رافع واحد نازل
الهنوف :الي نازل باقي ما سويته
غازي :الحين كيف امسحه ؟
الهنوف :بمزيل المكياج بجيبه
غازي :لالالا ارتاحي
الهنوف :ما احب ذا التعامل مع الحوامل يعني انا انسانه بس داخلي نونو وش يفرق عن الباقين
غازي :تتعبين بسرعه شوفي اختك ارهقت نفسها بزواجنا وجتها ولاده مبكره
الهنوف :صدق مدري وش صار عليها عطني جوالي وراك اشوف
غازي :هاك
الهنوف شهقت:ولدت
غازي :شلونهم عسى ما جتهم مضاعفات
الهنوف تضحك :اي بخير شوف صورتها
غازي ابتسم:ماشاء الله عقبالنا
الهنوف :ياربي صغيره توها بالثامن
غازي :الحين ينومونها
الهنوف :اي مسكينه ،ابي اروح اشوفها
غازي :تونا قلنا بسم الله لنا يومين ببيتنا
الهنوف :بس نص يوم اروح اشوفها واسلم عليها وارجع
غازي :تتعبين نفسك
الهنوف :وش اتعب نفسي كله بالسياره بعدين امشي خطوتين واشوفها وارجع وعد وعد
غازي :طيب بكره
قرصت خديه :واي فديته فديته يسمع كلامي
غازي :بقول شي
الهنوف :قول
غازي:شكلك تتوحمين علي
الهنوف :لا انت صرت حلو ذي الايام
غازي :لا ذا صدق وحام
الهنوف :لا حبيبي انت صرت حلو فجأه شعرك صار ناعم مدري كيف تعال بحضني خلني العب فيه
غازي :الا ياروحي وحام
الهنوف :طيب ما بتخليني اتوحم براحتي ؟
غازي :الا توحمي توحمي بس بسألك شي
الهنوف :اسأل
غازي :متى تركتي؟ الحبوب
الهنوف ابتسمت :تذكر يوم بالديره قلت لك بقي وحده بعدين قلت لك لا فيه ثنتين غيرها
غازي :اي
الهنوف :كذبت عليك كانت هي وحده بس واكلتها يعني قلت يومين ما تضر واحنا ما بنتقابل كثير
غازي :تحسبين اعضائك توقف اذا ما كنا مع بعض؟
الهنوف:وش دراني احسبه بس يصير بنفس اليوم الي يصير فيه شي
غازي :نمتي بحصه الاحياء شكلك
الهنوف :خلاص حبيبي مو فرحنا وقلنا الحمدلله وصدفه حلوه وكنا اثنين وخلاص دي الوقت الحب ثالثنا ليش نرجع للماضي
غازي :ما قلنا كنا اثنين وخلاص دالوقت الحب ثالثنا
الهنوف :خلاص نقول الحين يلا واحد اثنين ثلاثه بصوت واحد
غازي ابتسم :معد باقي الا تقولين النشيد الوطني
الهنوف :غازي اسنانك حلوه
غازي :يارب ما اصحى القاك تنتفينها
الهنوف :لا اضحك مره ثانيه كيف
غازي ابتسم :هاه
الهنوف سحبت يده لقلبها :عس قلبي كيف يدق
رفع يده لرقبتها :حبيبتي ذي شكلها حمى مو وحام
الهنوف :يدك ناعمه بحضنها وانام
غازي ابتسم :طيب اهم شي تنامين
الهنوف :طف النور
استلقى وهو مبتسم ويده بحضنها :حبيبتي
الهنوف :لبيه
غازي :تذكرين يوم تقولين لي البعد ينفعنا ؟
الهنوف :اي اذكر كنت غبيه وقتها
غازي همس :الحمدلله يارب صبرت وذي جزاتي
...
استيقظ على صوت انينها :وجدان
نظر لها وكانت نائمه :وجدان قومي
شهقت وجلست بفزع :تركي تركي
احتضنها و مسح على شعرها :انا هنا لا تخافين
وجدان بضيق:حلمت فيها
تركي :مين؟
وجدان :البنت الي بالقضيه كانت تناديني اكيد ما ماتت لازم القاها
قبل رأسها :يمكن كابوس ماله علاقة
وجدان :لا كان واضح الحلم اذكر التفاصيل كلها شفتها شمرت كمها وكانت مجروحه على شكل كلمه امي اكيد امها لها علاقه
تركي :واضح كأنه حقيقه؟
وجدان :اي لازم افسره
تركي :خلاص خليه الصباح نفسره عند شيخ
وجدان :الساعه كم ؟
بحث عن هاتفته على الطاوله :الساعه ٣ الفجر
ابتعدت عنه ويده لا تزال على ظهرها وابتسمت :نقوم نشوف الشروق ؟
تركي :وين؟
وجدان :بالمكتب حقي الي سويناه مو قلت الجدار الي من جهه الشرق كله زجاج نقدر نشوف الشروق من هناك وحتى نفتح الباب يدخل علينا هوا
تركي :خلاص بس اذا تبين تفتحين الباب البسي شي ثقيل برد
وجدان :لا مو برد يعني توه بدا يتعدل الجو
تركي :هو مو برد بس انتِ لابسه بدون كم ورقبتك وصدرك كلها عرق بتبردين
وضعت يدها على صدرها :تعرقت ؟
تركي :اي
وجدان :بتروش وبعدين نروح نجلس
تركي :كذا انتي بتزيدين المرض لنفسك
وجدان :ولا نروح نسوي شي نشربه دافي يعني قهوه او هوت شوكلت او شي كذا وبعدين اتروش ونشربه
تركي :انتِ ادخلي تروشي وانا بسويه
وجدان :وش بتسوي
ابعد شعرها عن وجهها وهو ينظر بعينيها :مفاجأه
وجدان :شاهي ؟ ترا مو مره احبه
تركي :لا شي تحبينه
وجدان :اجل انا بروح
تركي :لا تطولين عشان ما يبرد
قامت وقبلت خده :لا تحرق المطبخ
تركي :قد امداه احترق وصار رماد
وجدان :دام كذا لا تروح خلاص
شابك يده بيدها :انا اقصد قلبي
وجدان :صار رماد يعني ما تحبني؟
وقف تركي وشدها من خصرها:انتِ تستغبين ولا باقي نعسانه؟
وجدان ضحكت وهي تمسك وجهه:استغبي طبعًا ولا انا متأكده أن حبك لي ما يخلص
تركي اقترب اكثر:ما يخلص ويزيد
وجدان ابعدت يده عن خصرها :انا بتروش وانت سو الي بتسويه واذا طلعت بقول لك سالفه حلمي فيك
تركي :انا حلمت فيك كثير
وجدان :لا يوم قلت لي احبك حلمت فيك
تركي :متى اي مره ؟ كثير قلتها انا
وجدان:ذي المره انت تستغبي
تركي :يلا بس روحي وانا بجهز المفاجأه وتقولين لي حلمك
دخل المطبخ وهو يحاول تذكر مكونات ما سيحضره ثم بدأ بتحضيره وهو يغني :اه يا روحي ويا قلبي وروحي مش روحي وبس ويا اجمل احساس بالدنيا ممكن يتحس
دخلت وجدان وحضنته من الخلف واكملت :خذ عيني خذني بأحلامي العمر الباقي بأيامي
التفت لها وأكمل معها وهو مبتسم :وكفايه اشوفك قدامي وانا عيني فعنيك
وجدان تحاول ان تنظر للفرن:وش سويت ؟
رفعها على الدولاب :ممنوع تشوفين وممنوع تنزلين من هنا لين اخلص
وجدان :طيب وش اسوي لين ما تخلص؟
تركي وهو يطحن فستق :غني لنا بصوتك الجميل
وجدان :ماهو حلو يعني ما يعتبر صوت رائع بالاغاني
تركي التفت :صوتك حلو بكل وقت حتى وانتِ تتنحنحين
وجدان ابتسمت :طيب عطني جوالك اشغل فيه الاغنيه عشان اغني معاه
تركي :هاك
وجدان:كم الباسوورد؟
تركي :١٤٤٤٢٧
وجدان ابتسمت :تاريخ زواجنا صح ؟١٤٤٤/٢/٧
اقترب منها :وتاريخ ولادتي
وجدان :مو تاريخ ميلادك بشهر ٨؟
تركي ابتسم :ما قلت لك أني ولدت من جديد معاك ؟و مو قلنا عمري بدا فيك ؟ شفيك نسيتي يا محاميتي العزيزه
وجدان حاوطت رقبته :نسيت
طبع قبله بجانب شفتيها :اذا نسيتي مره ثانيه تذكريها بذي
وجدان :القدر بيطفش
ركض للفرن وأبعده عن النار :انتِ تنسين تاريخ ميلادي الجديد ووانا أنسى وقتي معاك وش الحل ؟
وجدان ابتسمت :وش رايك ما اغني واقول لك قصه حلمي قبل انساه ؟
تركي :قوليه
وجدان :تعرف العاده بالعيد بالديره يتجمعون وكل شوط يطلعون ناس يرقصون رقصه منطقه معينه امك واختك يرقصون خطوه جنوبيه المهم انت قلت لي انك تحبني يوم العيد
تركي:اول عيد بالحياه
وجدان بدت بالضحك :معليش حبيبي يعني هو الحلم وقتها كان سيء بس الحين اذا تذكرته يضحك
تركي :قوليه
وجدان:المهم رحت نمت ومدري كيف صحوني ودخلت المجلس لقيتك ترقص مع امك خطوه جنوبيه
تركي :عادي فيه خطوه للرجال
وجدان :لا شكلك كان يضحك بين الحريم بعدين الجزء المرعب قلت لريوف ليه تركي معاهم قالت عادي طالعت فيك وانا اقول مو عادي وصرت تقرب مني بشكل يخوف وتقول ليه ما تحبيني؟ وكل الي بالمجلس يقولون زيك لين اخرتها حشرتوني بالزاويه صرخت قلت خلاص احبه احبه وكلهم بعدوا بقي بس انت مسكت وجهي وقربت مني و...
تركي ابتسم :و؟
وجدان :صحيت
تركي ضحك :شكلها حربك الداخليه مع نفسك
وجدان :لا الحرب صارت بعد ما صحيت اسبوع كامل افكر ما اقدر انام
تركي تنهد :تدرين وقتها ما توقعت نوصل لذي الايام
وجدان :حتى انا كان اكبر احتمال عندي اطاوع نفسي الغبيه وارفضك
تركي :عشاني من الديره ؟
وجدان :لا لأن احلامي كانت اني اكون وحدي ورغم اني اعرف ان سعادتي معاك كنت اقول لا خلاص وجدان انتِ عندك حلم لا تغيرينه بس بالاخير غيرته بأستشاره ابوي
تركي التفت برعب :ابوك يعرف من البدايه؟
وجدان :لا بس قلت له لو كان عندي حلم بنيت كل خيالاتي عليه وحلم ثاني اعرف انه بيسعدني بس انه ما يتوافق مع الحلم الاول وش اسوي قال لي انه الانسان اذا جته فرصه للسعاده يختارها ولو كانت تغير طريقه الي بناه لنفسه لأنه تقدير الله فوق كل تخطيطاتنا واجمل تقدير لما يكتب لنا السعاده بشي ما توقعناه
تركي :فعلًا ما توقعت القى سعادتي في بنت تجي من الرياض بإجازه شهرين بس الحين مالي سعاده غيرها
وجدان نزلت :انا قلت نظرتي عن عيال الديره بس انت ما قلت نظرتك عن بنات المدن
تركي :تبينها من الاخر؟
وجدان :اي
تركي:كنت اشوفهم متكبرات ويشوفون انفسهم مدري على ايش
وجدان :انا اشوف نفسي؟
تركي ابتسم :طبعًا لكل قاعده شواذ انتِ مستثناه من القاعده ويحق لك شوفه النفس
وجدان :اي طبعًا دامني زوجه تركي يحق لي شوفه النفس
تركي :كونك وجدان يحق لك شوفه النفس
وجدان :نروح؟
تركي :اول شي ذوقي الي سويته
وجدان :ما ودك تقول اسمه ؟
تركي :لا بس بغطي عيونك وانتِ اشربي بشويش لا تحترقين وخمني وش هو
وجدان اخذت الكوب :يلا
تركي :بشويش لا تحرقين لسانك
ذاقته وابعده يده عن عينيها وهي تخلخل اصابعها بين اصابعه:خلاص
تركي :وش تتوقعين ؟
وجدان :سحلب
تركي :صح
وجدان :طعمه حلو مره
تركي :ضبطته
وجدان :لا قصدي سكر
تركي :ذا طعم شفايفك عسل
وجدان:اتكلم جد ذوقه
اخذ الكوب من يدها وارتشف منه :ولله صدق
فكر قليلًا وقال :تصدقين حطيت له سكر مرتين مره قبل ما تجين ومره الحين كنت بحط الفستق بس سهيت معاك وحطيت سكر
وجدان :يلا بس نشربه
تركي :اصلًا نحتاج طاقه كثير العصر عمرتنا
وجدان :وين كوبك ؟
تركي :بعقلك ياحياتي بتقدرين تشربين ذا الكوب الكبير وحدك؟
وجدان :بنشرب مع بعض صح ؟
تركي : ما عندك مانع صح؟
وجدان ابتسمت:اكيد
...
ردت على هاتفتها الذي كان يتصل منذ ساعه :الو
ديم قاطعته :حضرت اول عمليه قيصريه بحياتي
يوسف:كيف ؟
ديم :يعني هو يخوف بس عادي
يوسف :كان ودي اشوفك
ديم :صدقني ما راح يكون شي حلو
يوسف ابتسم :ليه؟
ديم :وجهي كان الوان الطيف كل شي غير الرسوم الي ناخذها
يوسف :قلتها وكررتها كثير بس مشكلتك تنامين
ديم :خلاص ذي قرصه اذن معد انام عشان ما احلم احلام وانصدم من الواقع
يوسف :ولسى ما حضرتي عمليه ١٥ او١٦ ساعه
ديم :بنهار وقتها
يوسف :وقتها لو كنتِ صايمه تفطرين قبلها وصلاتك تجمعينها
ديم :صدق توني اعرف بجمع الصلاه
يوسف :اي من عظمه الامر اجازوا فيها جمع الصلوات والافطار يعني روح بين يدينك لو غلطتي بلمسه تكون برقبتك يوم القيامه
ديم :كنت ابي جراحه بس قبلوني طب عام زعلت وقتها بس الحين عرفت انه مو بوسعي اكون جراحه ولا يكلف الله نفسًا الا وسعها
يوسف :يمكن تقدرين تصيرين جراحه بس باقي ما تكونت نفسك الي تتحمل الجراحه
ديم ابتسمت :لا خلاص الي وصلت له يكفيني طب عام شهر واتزوج سنتين واتخرج اتوظف بمستشفى وخلاص
يوسف :الرضا بالقدر زين لكن اسعي ورا احلامك اكثر انا كان يمديني ارضى بأني طبيب نفسي وافتح عياده واجلس فيها استقبل مرضى نفسيين واعالجهم وخلاص لكن دورت اكثر وشوفي وين وصلت ولسى ادور
ديم بسخريه :يعني بتصير وزير الصحه ؟
يوسف ضحك :ما تدرين يمكن
ديم :لو رضيت بالامر الواقع ما كان تقاطعت طرقنا
يوسف :شفتي رح تلقين شي احسن لو دورتي لنفسك هدف ثاني
ديم :الحين هدفي الاول اخلص مذاكره واختبر عشان ابدا اجهز
يوسف :وش تجهزين؟
ديم :اجهز لليله العمر
يوسف :مو باقي شهر ؟
ديم :لا باقي ثلاثه اسابيع ويومين
يوسف ابتسم :اشوفك صرتي دقيقه بالمواعيد
ديم :لأنه اهم موعد بحياتي بكون دقيقه فيه
يوسف :تبين العرس بالرياض ؟
ديم :بغير عن بنات عمي ابي اسويه بالشرقيه بشاليه عالبحر ويكون وقت العصر وعرس ناعم جدًا وعائلي نوقع عقد القران ووننزف ونتصور وكذا وخلصنا
يوسف :يعني ادور لك شاليه بالدمام ؟
ديم :يا ليت
يوسف :خلاص العصر ان شاء الله ادور
ديم :لا يكون ما نمت للحين ؟
يوسف :لا نمت بس الحين صحيت بتطمن عليك وارجع انام
ديم :اجل ليه بتدور العصر ؟
يوسف :عشان اليوم الجمعه محد يفتح الصباح وعشان اشوفه العصر كيف بيكون
ديم :اي صح الجمعه يعني بنروح عند عمي متعب
يوسف :من وين ذي العاده عندكم كل جمعه تتجمعون ؟
ديم :عمي متعب هو الكبير وبعد ما سافر الرياض يشتغل لحقوه اخوانه يعني ابوي وعمي جابر وكان يحس انه من واجبه يتطمن عن احوالهم كل اسبوع لو ناقصهم شي او صارت مشكله وهو يعرف انهم ما بيجون لو قال تعالوا بتطمن عليكم قرر انه يقول لهم الجمعه نصلي مع بعض والغدا يكون عندي لأني اخوكم الكبير ومن واجبكم علي انكم تزوروني وانا بحسبه ابوكم وضربهم عالجرح وصاروا يحسونه واجب يجون وخلاص صارت عاده
يوسف:الحين يعرفون انه سوا كذا؟
ديم ابتسمت :لا بس انا وانت بس نعرف
يوسف :يعني سر ممكن يخرب علاقتهم
ديم :لا سر يخليهم يتهاوشون بالليمون على الغدا
يوسف :عايلتكم غريبه احسكم تمشون بالعفويه والبركه
ديم ضحكت :تقريبًا
يوسف :يعني ما عجبك الكلام؟
ديم :لا بس كل الناس يقولون كذا عنا عاد احنا اهم شي عندنا علاقتنا ببعض كويسه
يوسف :ذا اهم شي
ديم :الحين اهم شي ترجع تنام مدري متى نمت البارحه
يوسف :الساعه ١ نمت
ديم :يعني بس نمت ثلاث ساعات
يوسف : باقي ربع ساعه عالاذان بصلي وارجع انام
ديم تثاءبت :انا من امس الصباح صاحيه
يوسف :الحين تنامين ١٧ ساعه
ديم :ولله احتاج ٢٠ ساعه مو بس ١٧
يوسف :احتاجك تكونين صاحيه العصر عشان اصور لك الشاليهات
ديم :اذا صحيت بشوفها مقدر اصحى العصر
يوسف :لو تصحين بيكون فجر السبت خلاص انا برجع الرياض وقتها
ديم :طيب خل واحد من اخوانك يشوفها غازي
يوسف :غازي مشغول كل يوم يداوم ما عنده الا الجمعه اجازه خليه مع زوجته
ديم :اجل غسان
يوسف :غسان طالب بالثانويه مايصدق تجي اجازه يذاكر تحصيلي
ديم :اجل مين اخوانك
يوسف :باقي ريان ماهو هنا
ديم:وين ؟
يوسف :بالخارج يحب السفر كثير
ديم :طيب خواتك ولا وحده تسوق ؟
يوسف :الا منى بس انها بالجامعه
ديم :خلاص اجل ما نتعب احد كل ما تجيك فرصه دور وانا بشوف منى يمكن تعرف احد او مكان
يوسف :طيب انا بدور اليوم وبصورها لك واخذ ارقامهم الي تعجبك نحجزها
ديم :اي كذا تمام مدري ليه ما فكرنا كذا من اول
يوسف :من النوم ما ندري وش نقول
ديم ابتسمت :انت تنسى الاشياء الي تقولها وتسمعها اذا بتنام؟
يوسف :اي
ديم :اجل احبك
يوسف ابتسم :وانا احبك
اغلقت الاتصال وهي مبتسمه وضعت هاتفها في حقيبتها ونظرت لخالد :بسم الله
خالد :بسم الله على قلبك لا يطلع يروح الدمام
ديم :خطيبي
خالد :عادي خطيبك بس مو بالاماكن العامه ووين بمستشفى يعني الناس يجون مرضى تغثونهم زياده
ديم :شفت بنتك ولا باقي؟
خالد :لا ما شفتها
ديم :اجل امش اوريك
خالد :لا ماشاء الله اخذتي دور انك موظفه هنا
ديم :تصدق عجبني بتوظف فيه
خالد :واثقه
ديم :واسطاتي قويه لو ماهي كان محد دخل مع زوجتك
خالد :ايه تبين عرسك بالدمام
ديم :اي
خالد :مين سمح لك ان شاء الله؟
ديم التفتت بحزن :خالد تراها ليله العمر مستحيل تتكرر ابي بالدمام على البحر والغروب وكذا
خالد ضحك :عشانك ضحكتيني بسمح لك
ديم :وش قلت؟
خالد :قلتي مع الغروب
ديم :اي غروب وبحر
خالد :تعرفين الجهات ؟
ديم :اي
خالد :تعرفين ليش سموا المنطقه الشرقيه شرقيه؟
ديم :اي عشان الشروق من عندهم
خالد :تبين الغروب مع البحر بالشرقيه ؟ ذي ما تجي الا يوم القيامه
ديم :استغفر الله مدري كيف غفل يوسف عنها
خالد :يمكن لأنه من النوم ما يسمع شي
ديم سرعت خطواتها:انا مدري وش خلاني اجي معاك مع ان عندي اختبار ومن الصباح صاحيه ساعتين واكمل ٢٤ ساعه
خالد :طيب معليش وشلون اشكرك؟
ديم :ابي اصحى القى بالثلاجه حلا وقهوه لي
خالد :حلا ايش؟
ديم :تراميسيو
خالد :قهوه عربي؟
ديم :لا v60
خالد :ان شاء الله بس متى تصحين انتِ؟
ديم :بعد عشرين ساعه
خالد :يا ساتر بيمديها غزل تدخل المدرسه وانتِ باقي نايمه
ديم توقفت عند زجاج الحضانه :هذي هي غزل شوفها
خالد :اي وحده ؟
ديم:ذي الي باليمين
خالد ابتسم :صغيره
ديم :باقي شهر ما كملته
خالد :الحين بينومونها ؟
ديم :اي لين تكمل التاسع هنا
خالد :وغاليه ؟
ديم :يومين وتطلع
خالد :بشوفها
ديم :باقي نايمه
خالد :اوديك البيت وارجع اشوفها
ديم :اي يمديها تصحى
خالد :يلا امشي
...
ملاك مبتسمه :صباح الخير
ام سيّاف :صباح النور وش ذا الابتسامه
ملاك :غاليه ولدت
ام سيّاف :مو توها بالسابع؟
ملاك :بالثامن ولدت
ام سيّاف :يا روحي هي متى ؟
ملاك :شفت الرسايل الساعه ٣
ام سيّاف :سهرتي لين ٣
ملاك :لا الرساله تجي تحتها الوقت الساعه ٣ يعني
ام سيّاف :متى نمتي امس؟
ملاك :اول ما دخلت من الحوش
ام سيّاف :على طاري الحوش
ملاك :هلا
ام سيّاف :وش سوا لك ولد عمك وضربتيه؟
ملاك :ما سوى شي
ام سيّاف :اجل؟
ملاك :قال لي سوي برياني وصفقته
ام سيّاف :ليه؟
ملاك :حسسني اني شغاله
ام سيّاف :طيب الولد مسكين اشتهى برياني وعلم اول من جا بوجهه
ملاك :طيب عنده رقم ابوي ورقم سيّاف يقول لهم
ام سيّاف :ما يصلح يقول لهم تحسين الوضع غلط
ملاك :وانا حرفيًا صرت نادله اوديه الاكل واعلمك وش مشتهي معد باقي الا اخذ دفتر وقلم واقول له وش طلبك
ام سيّاف :تعالي الحين وديه فطوره
ملاك بتذمر:يمه ...
ام سيّاف قاطعتها بحده:ولد عمك ماهو بغريب
ملاك :طيب هات
ام سيّاف :يا ويلك تصفقينه
ملاك :ولله اذا عاملني زي الشغاله بصفقه
ام سيّاف :الله يهديك بس
خرجت ملاك وواجهت راشد في طريقها يسير من بعيد تمتمت بنفسها :ياربي
عندما اقتربت منه داست على قدمها خطأً
اقترب راشد وامسك الصينيه :عنك
ملاك سحبت الصينيه:لا بوديها وافي
التفت لأحد الماره :عطيني عشان ما يشكون بيننا شي شوفيهم يطالعون
بلعت ريقها واعطته الصينيه :بالمحل تلاقيه
دخل راشد المحل وهو يحمل الصينيه وكان وافي يقلب في هاتفه ابتسم وهو يظن انها ملاك :صباح الخير
راشد :صباح الكسل
رفع رأسه عندما سمع صوته :وش تسوي ووش قصدك بالكسل؟
راشد :جبت لك فطورك تخلي بنت عمك كل يوم تجيبه لك هنا وهي رجلها مكسوره مدري شفيها ؟ ما تستحي
وافي :ولله محد طلب تدخلك بين بنت عم وولد عمها
راشد :اي ولد عم انت طول عمرك عايش بالرياض بين الكلاب وهي هنا وجاي بعد ٢٤ سنه تقول ولد عمها
وافي :وش قصدك بالكلاب؟
راشد ابتسم بخبث :تعرف قصدي انت
وافي ابتسم بأستفزاز :للأسف ما تعرفت على اي كلاب الا بالديره ولاني فاهم مقصدك
راشد :ما تفهم الي اكبر منك
وافي :صدق يا كبرك المفروض اقول لك يا عم
راشد وهو خارج :عيالك بيقولون لأبو عيال ملاك يا عم
فهم وافي مقصده وضرب بيده على الطاوله وصرخ خلفه :ولله ما يقولون له الا يبه
لم يسمعه راشد/تجاهله
نظر للصينيه وهو يتذكر موقف الحقيبه عندما رفضت اعطاءه رغم أنها ثقيله لكنها هذه المره أعطت راشد الصينيه ،عقد حاجبيه ودفع الصينيه لتسقط على الارض وقال بضيق :ولله ما تقربها ياراشد ما تقربها واحنا نشم الهوا
جلس وهو ينظر للطعام المسكوب :اكيد ذا الزفت بعد حط فيه شي ما يصدق يجيب لي اكل
اتصل على عمه :يا عم
ابو سطام :صباح الخير السلام عليكم ما تعرفها؟
وافي :راشد جا ورفع ضغطي وطلع
ابو سطام :لا تخليه يستفزك ما قلت لك مليون مره
وافي :طيب معلينا منه لو جبت عينه من اكل نقدر نطلع نسبه المخدرات فيها؟
ابو سطام :اتوقع
وافي :بجيب لك شي اليوم بجي اشوف غاليه وبنتها واعطيك وارجع
ابو سطام :تمام بس وش قال لك وخلاك تعصب
وافي :حيوان يقول لي بعدين عيالك بيقولون لأبو عيال ملاك يا عم
سكت ابو سطام قليلًا ليستوعب :اهاا فهمت يقصد انه هو بيصير ابو عيالها وعيالك بيقولون له يا عم ؟
وافي بحده :لا تشرحها يا عم ولله فهمتها بس لا تزيد الطين بله
ابتسم :ياخوي انت بعد لو يقول لك هرجه تقوم عليه اصبر ما سوى شي بعده ولا يقدر يسوي وملاك معليك فيها بكلم ابوها يحجزها لك
وافي :اي عشان اذا جا راشد الدلخ بعقل النعامه يخطبها يقول ابوها ولله ولد عمها حجزها وهي تعرف انه انا مكلم ابوها
ابو سطام :وش فيها اذا عرفت ؟
وافي بضيق :افهمني يا عم ما ابي أذيها اذيتها بما فيه الكفايه خلاص لو هي عرفت بنضعف وضعفنا ذي الفتره ماهو كويس لنا ابد
ابو سطام تنهد :فهمت عليك
وافي:اساسًا لو خطبها راشد و...
بلع ريقه :ووافقت مارح اسوي شي خلاص نصيب يمكن عقاب من ربي عشاني عصيته
ابو سطام :معليش بذي الحاله لو خطبها انت ادخل بوسط المجلس وقول لهم ابيها تعذب روحك عالفاضي ؟ وترا حتى هي تبيك بس تكابر
وافي :وش تكابر انرضت رجلها ولا رضت تعطيني الشنطه واليوم مدري كيف اقنعها راشد وعطته الصينيه
ابو سطام :يمكن عنده مهارات اقناع ؟ او فكر فيها بالمعكوس ما ترضى عليك التعب بس راشد ترضاه عليه
وافي تنهد :خلاص يا عم اقفل الموضوع بعدين بفكر الحين قلي وشلون الخطه ؟
ابو سطام :كل شي تمام بس باقي ما تقابلنا نبي ناخذ احتياطاتنا وبعدين نقابله
وافي:ان شاء الله نخلص قريب
ابو سطام :ان شاء الله
نظر وافي للباب ورأى ملاك قادمه من بعيد :يلا يا عم انا بقفل مع السلامه
ابو سطام ضحك:مع السلامه
وافي :يارب تبررين بدون ما تتهربين
ملاك دخلت :وش ذا ؟
وافي ببرود :راشد كبه
شهقت:تهاوشتوا ؟
وافي :لا لأنه ما جا منك انكب
ملاك بشفقه :قبل ما تذوقه حتى ؟
وافي :اي
ملاك :طيب لمه وانا بجيب لك غيره
وافي :لا عادي انتِ اجلسي وانا بلمه
ملاك جلست :طيب ما افطرت
وافي :ما يحتاج افطر ما اشيل اشياء ثقيله انا
ملاك ضحكت :ومين قال ان الفطور للي يشيلون اوزان ثقيله بس شفيك صرت زي الاطفال ؟
وافي :ولله مدري مين الي زي الاطفال تشيلين شي ثقيل ورجلك تنسكر بعدين ما تقدرين تشيلين صينيه وتعطين راشد
ملاك ابتسمت :تغار من راشد؟
وافي بحده :لا ما اغار بس تجرحين رجولتي ما خليتيني اشيلها ذيك المره
ملاك عبست :ما كنت اعرف ان الموضوع كذا اسفه
قام وافي من الارض وقال بهدوء :انا اسف صرخت عليك وتحسست من موضوع بسيط
ملاك هزت رأسها :انا الغلطانه كان المفروض اراعي ظروفك
وافي جلس :ظروفي بتكون بخير لو اختفى راشد
ملاك :وافي ولله ما سوى شي انا اعرفه راشد على نياته
وافي :اي على نياته و نياته كلها خبث
ملاك :وش سوى لك ؟
اخذ عينه من الطعام ووضعها في كيس صغير :بنشوف بكره
ملاك :يعني تحدي؟
وافي :لا ولله انا حياتي مخنوقه مابي اخنقها زياده
ملاك تنهدت ويدها على رقبتها:ودي اساعدك اكثر بس مدري كيف
وافي:انك تكونين موجوده يكفي
صمتت وهي تنظر اليه
وافي :يعني قصدي انه انتِ اول وحده صدقتني
ملاك :وش رايك بالحمام ؟
وافي بأستغراب :الحمام ؟
ملاك :اي تربيه الحمام وكذا
ابتسم وافي بخفاء عندما لاحظ انها بدأت تشك به :ولله حلو يعني ما احسه مكلف ومتعب مثل القطاوه وذي بس الحمام احسه ما يتعلق بالانسان يعني ما تحسينه صديقك
ملاك سكتت قليلًا ثم قالت :انا اربي حمامه ذكر
وافي :صدق ؟ حاطه له اسم ولا اسميه انا
ملاك بحماس :لا انا مسميته ياقوت
وافي :اسم حلو من وين اقتبستيه؟
عبست عندما لاحظت انه لا يعرفه :ما اعرف كذا بس ياقوت
وافي :اشتريته ولا كيف ؟
ملاك :لا لقيت بيضته بالحوش توها فقشت واخذته على اساس امه بتجي وتاخذه بس ما اخذته وقررت اربيه
نظر لعينيها :وش فيك فجأه طفيتي ؟
ملاك نظرت لعينيه التي كانت تحدثها بصدق وإن كان لسانه يكذب وأخيرًا فهمت لغه العيون أنت شيطاني وأنا ملاكك ، سأختبرك أختبارًا بسيطًا أرجو ان تنجح به وتكون شيطاني :تذكرت انا جيت ابيك تكتب لي اسم الشاهي الثالث الي ورقته بنفسجيه
وافي ابتسم وهو يكتب :عجبك ؟
ملاك وهي سرحه بأبتسامته :هاه ؟
رفع عينه وهو يمزق الورقه:اقول عجبك الشاهي
بلعت ريقها :اي عجبني بس شوي يعني اذا شوي فهمت ؟
ضحك وافي :اي فهمت
اخذت الورقه وقامت :انا بروح
وافي :مع السلامه
دخلت المنزل وهي تحمل الورقه بتوتر وتبحث عن اي ورقه كتبتها معه :يارب هو
اخرجت ورقه الشعر وقارنت الخط لم يكن نفسه غير الخط لكي يشوش عليها وضعت رأسها على الطاوله بحزن :ليه
استعدلت بجلستها وهي تتأمل الخطوط مره اخرى وقالت بغصه:ليه مو انت ؟
سمعت صوت والدها دخل البيت وهو يغني ،والدها الذي تعتبره كنز معلومات رغم قراءتها لذلك الكم الهائل من الكتب مازالت تعتبر معلوماته الاصح ومصادره الاوثق ، نزلت ليه مع تساؤل ممكن ان يعيد اليها الامل :يبه
ابو سيّاف :هلا بحبيبه الروح هلا
جلست بجانبه وحضنته:بسألك سؤال
ابو سيّاف وهو يمشح على شعرها:اسألي
ملاك :يقدر الانسان يغير خطه اذا يبي؟
ابو سيّاف :اي يقدر
ملاك :طيب كيف بالقضايا اذا كان فيه رساله تهديد ولا شي يخلون المجرم يكتب بدون ما يغير خطه
ابو سيّاف :خلينا نتخيل انك مجرمه والله لا يقدرها ان شاء الله وجيتي تكتبين تهديد لشخص تكرهينه كيف بتكون حالتك
ملاك :ولله مدري
ابو سيّاف :كيف مشاعرك للشخص الي تكرهينه ؟
ملاك :كره وحقد وغضب وكل المشاعر السلبيه
ابو سيّاف :طيب لما تكونين معصبه من احد خطك بيكون على طبيعته وما تقدرين تغيرين فيه فيجونك الشرطه ويلعبون على اعصاب المجرم لين يشوفونه عصب ويعطونه الورقه يكتب نفس الكلام
ملاك جلست :يعني العب على اعصابه ؟
ابو سيّاف :اعصاب مين ؟
ملاك :ولا شي قاعده اكتب كتاب ان شاء الله قريب بصير كاتبه
ابو سيّاف :ماشاء الله ،اهم شي راعي بكتابك الدين والاخلاق ولا تكتبين الفاظ مالها داعي يا ملاك
ملاك :لا معليك يبه ازهلها انا حتى كلمه كلب مستحيل اقولها لأحد
قبل رأسها :يا حبي لك
ملاك :وش رايك اجيب لك براد شاهي وانا اسوي كوب قهوه ونجلس نسولف من زمان عن جلستنا ذيك
ام سيّاف من المطبخ:ولله يا ياسر ان شفتك شربت البراد كله يا ويلك ،عندك نقص حديد خلاص
ابو سيّاف ابتسم :سمعتي امك؟ جيبي لي بس كوب شاهي يكفي صح فايزه ؟
ام سيّاف :كاس بس
ملاك :يمه شدعوه كاس ما يرويه
ام سيّاف :يشرب ماء اذا يبي يروى ماهو شاهي
ابو سيّاف ضحك :خلاص بس جيبي لي كاس
همس :انا اصلًا شربت مع ابو راشد براد قبل اجي
ملاك :احس خيانه لا تعيدها مره ثانيه
ابو سيّاف ضحك :ابشري ما بعيدها
...
وجدان :يلا حياتي اخلص مو لازم كل هالتجهيز تراهم قاعدين بثياب نوم
تركي :اناقتي اهم من كل شي
وجدان :اهم مني؟
تركي :لا انتِ مستثناه ،جيبي عطري الي عندك
وجدان:اي واحد؟
تركي :الاسود
فتحته وهي تشمه :احب ريحته تعطر منه دايم
تركي :اتعطر منه بالزيارات بس يعني يوم شفتيني بغرفه راشد كنت متعطر منه ويوم هاوشتيني بعد كنت متعطر منه
وجدان ابتسمت :عشان كذا حبيته يتعلق بذكرايات قديمه
نظر لرقبتها :ما عجبني منظر رقبتك كذا
امسكت رقبتها :كيف؟
تركي وهو يبحث في احد الادراج:فاضيه
وجدان :ما لقيت سلسال مناسب للبسي
اخرج علبه بها عقد :ذا بيناسب
وجدان:يجنن عملي
تركي :شوفي وش منحوت عليه من ورا
وجدان ابتسمت :شعوري لك مثل نقشٍ يخلد في مدى الاجيال
تركي وهو يلبسها:بما انك قلتي انه عملي رح يكون برقبتك طول الوقت عشان وين ما كنتي وكيف ما كانت حالتك تتذكرين حبي لك
وجدان :ما انساه انا عشان اتذكره
قبل رقبتها وهو يحضنها من الخلف :مدري كيف بفارقك
وجدان :بسم الله اي فراق
تركي :الحين بنزلك عند اهلك وانا بروح عند الرجال
وجدان ابتسمت :عشان تشتاق لي
تركي :انا قلت لك اشتاق لك حتى وانتِ جنبي ودي نصير جسد واحد ما نفترق
امسكت يده :دام روحنا روح وحده ما يهم الجسد
تركي :يلا مشينا ؟
وجدان :بمر محل الهدايا
تركي :ليه ؟
وجدان :بجيب لبنت عمي هديه ولدت البارح
تركي :ماشاء الله وش جابت ؟
وجدان وهي مبتسمه:بنوته سمتها غزل
تركي :احنا قلنا بنسمي غيث وغيم شفيها عايلتكم على حرف الغين
وجدان :الاسماء الي فيه معانيها حلوه غزل يعني كلام حلو غيث مطر وغيم يعني غيم
تركي:انا ما جاز لي اسم مثل اسم وجدان هو معنى هو جمال هو وزن اجمل ما اخرجته اللغه العربيه من مفردات الحب مفرده وجدان
وجدان ابتسمت :احسك تبالغ
تركي :واسوء ما اخرجته من جمل احسك تبالغ
امسكت يده وقبلتها :امزح معاك احب اشوفك وانت تتنرفز
تركي :احس غريب الزوجه تبوس يد زوجها
وجدان :لا عادي ولية عهد السويد بيوم زواجها باست يد زوجه اكثر من مره وتتعمد قدام كل كميرا تسويها
تركي :اما السويد عندهم وليه عهد
وجدان :وحتى ملكه ووليه العهد بنتها وعندها بنت ثانيه اميره
فتح لها باب السياره:طبعًا تركي بيعيش زوجته وبناته عيشه افضل من عيشه ملكه السويد وبناتها
وجدان انتظرته الى ان ركب السياره:وش دراك اننا بنجيب بنات ؟
تركي وهو يربط حزام الامان:انا ابي بنات مالي خلق عيال يشاركوني فيك
وجدان :وانا ابي عيال يشبهونك
تركي :بيشبهوني بس محد فيهم بيحبك كثري
وجدان ابتسمت:يمكن نجيب تؤام ما تدري؟
تركي :وين تؤام محد فيه جينات لا من طرفي ولا طرفك
وجدان :ابوي ولدت معاه تؤام بنت بس كانت ميته
تركي :يعني فيه فرصه
وجدان :اي
...
سطام :وصلنا
اسماء :مدري وين ادخل الحين
سطام :شوفي ذا تركي جا معاه وجدان ادخلوا مع بعض
اسماء :احس اني بكون غريبه عليكم
سطام :وش غريبه تراهم يحبونك ويعتبرونك منهم
وقفت اسماء تهز رجلها وتعض شفتها بتوتر نظر لها سطام :اوعدك بس نتغدا واخذك نطلع مارح يصير شي غريب وبعدين بتلقين العنود معاهم بتسليك شوي
اسماء:العنود تسليني بس تزيد توتري تقول اشياء مالها داعي واسئله غريبه بيغمى علي لو جلست معاها نص ساعه
سطام ضحك :وش تسألك
اسماء :تقولي سطام يحبك انتِ تحبينه
نظر لعينيها :وش قلتي لها ؟
اسماء :طبعًا اضطريت اقول اي كلهم كانوا يطالعون فيني
قرص خدها بلطف :سيده سكر لا تتوترين تراهم كذا خاصه ريوف تشوف اشياء احنا ما نشوفها والعنود طلعت عليها ،بعدين اليوم اجلسي مع وجدان اسأليها عن الحياه الزوجيه وتعلمي منها
نظرت له بحده
سطام :ولله امزح لا تذبحيني
وجدان :سلام
سطام :هلا بالعروس احلويتي
وجدان :شدعوه ما رحت عياده تجميل انا
نظر لأسماء التي بدأت ملامح الحزن ترتسم على وجهها :خذي اسماء وادخلي انتِ وياها
تركي :عاد هي حلوه من اول بس ما حسيت الا بعد ما فقدتها
سطام :ترا للحين ما عطيتني فلوس المكالمه
تركي ضحك بأستفزاز :صارت حقتي ما يحتاج
سطام :اقدر اخذها منك
تركي :ما تقدر هي تبيني
سطام :وشلون الحياه الزوجيه عن حب ؟
تركي :زي العسل انت وشلون حياتك الزوجيه عن غصب
سطام :كأننا بحلبه مصارعه كل شي نتهاوش عليه امس اخذت البطانيه ونمت وانا بردان
تركي يغيض سطام :احنا ننام حاضنين بعض ما يحتاج بطانيه
سطام :ولله؟ معد باقي الا توصف لي اول يوم
ضربه على رأسه :اثقل يالمخفه تراني باقي اخوها ما تبريت منها عشان تقول لي اشياء كذا
تركي ضحك :بس كيف شعورك وهي صارت حلالي وما تقدر تسوي شي
سطام :احسن من لما تاخذها بالحرام
وافي :هلا بالمتزوجين اشوفكم متنتوا
سطام:بسم الله ما كنت بالديره ؟
تركي :جا عشان اخته ولدت
سطام :اما زوجه خالد ولدت ليه انا اخر من يعلم ؟
وافي :يمكن لأنه ما يربطك فيهم شي عميق ؟
سطام :انا انعزلت عن العالم مع ذا الزواج
وافي :واضح طالعه لك هالات
تركي :مسكين ما ينام من البرد
وافي :وانت صاير دب
تركي :شدعوه ما تأكلني هي ليل نهار
وافي :لا انت نحفت من الدوره والحين رجعت طبيعتك
تركي :اسبوعين وارجع انحف مع الدوام
وافي :تفضلوا ادخلوا انا بروح اسلم على امي واجيكم
سطام :الحمدلله قررت تدخلنا احسبك بتجلسنا بالشمس اليوم
وافي :يارجال انت صاير تجي البيت اكثر مني كان دخلت على طول
سطام :كنت انتظر ذا الدلخ لأني ادري به بيدخل عند الحريم بالغلط
...
ريوف :يعني جدولنا ذي الشهور مزدحم زواج بعد زواج
الهنوف دخلت :سبرايز
ام وافي قرصتها
الهنوف امسكت على كتفها :اي يمه ليش ؟
ام وافي :حامل
الهنوف :طيب بالحلال ولله زوجي تزوجنا قبل ثلاث شهور نسيتي؟
ام وافي :الوحده تمسك خط سفر خمس مرات باليوم وبعدين تقول ليه جتني ولاده مبكره اهجدوا ببيوتكم عند رجالكم
الهنوف :جيت بشوف غاليه يمه
ام وافي :كان خليتيها بعدين الحين توك امس رجعتي بيتك جيتي اليوم حتى زوجك ما عطيتيه حقوقه
الهنوف :على طاري زوجي تراه برا يبي يسلم عليك
اخذت طرحتها بغضب وخرجت :نشوفه الحين
غازي :هلا بعمتي شلونك ؟
ام وافي بدون مقدمات قرصته
غازي امسك كتفه:احح ولله ما زعلتها
ام وافي :وانت بطولك وعرضك ذا ما تمسك زوجتك ببيتها ما تقدر تقول لها ما اسمح لك تطلعين وبتلعنك الملايكه ان طلعتي ؟
غازي :ولله يا عمه مالي رأي عليها بنتك تعض ماهي آدميه زينا
ام وافي :انت كان عطيتها ذاك الكف من اول يوم كان هجدت وطاعتك لكنك خليتها على راحتها
غازي :ما ارضى عليها الكف وبعدين لو ضربتها كان طلقتونا من اول يوم وقلتوا ذا يعنفها ما يستاهلها
ام وافي :صح صح لا تضربها لكن ما عندك اسلوب ولا شخصيه تقنعها ؟
غازي :ولله فرحتني بحملها قلت اسوي الي تبيه
ام وافي :اي بعدين جهز البنزين والسياره اول ما تدخل الثامن بتولد زي اختها.
غازي :لا ولله ياعمه ما بخليها خلاص ذي اخر طلعاتها بعدها بمسكها بالبيت حتى ما بخلي رجولها تدوس الارض
ام وافي :يا ويلك ان كان شفتها الاسبوع الجاي هنا
غازي :ابشري على خشمي
ام وافي :يلا الحق الرجال وخلك معهم تعلم منهم كيف يمسكون حريمهم
غازي :ان شاء الله
ام وافي :وانت وش فيك متخبي ورا الباب؟
وافي :ابي اجي بس خايف تقرصيني
ام وافي :تعال ما بقرصك
قبل يدها :مبروك الحفيده الثانيه
ام وافي :ابي حفيد انا منك انت
قابل وافي اقتراحها بأبتسامه على عكس عادته :ان شاء الله قريب
ام وافي :صدق؟ ادور لك بنت ؟
وافي :لالالا لا تدورين انا ابي وحده معينه
ام وافي :مين ؟
وافي مبتسم :بحرف الميم
ام وافي بحماس :ملاك؟ ولله ملاك ولله ملاك
وافي :اشش يمه يمه
ام وافي :اكلم امها ؟
وافي :لا تكلمين احد خليه سر لين انقل شغلي للرياض
ام وافي:اقل شي احجزها لك ما ياخذها احد
وافي :مره لا تحجزينها ولا شي هي ادري بها ما بتقبل بأحد
ام وافي ابتسمت :حتى هي تبيك ؟ تتقابلون كثير صح؟
وافي :لا ما نتقابل بس انها تبيني يعني احس انها تبيني
ام وافي :احساسك ما ينفع بكلم امها بس
وافي :لا يمه طلبتك خليه سر بس شهر بالكثير وبعدها لو بتعلنين بقناه السعوديه اعلني
ام وافي :ان شاء الله ،تبي نجهز لك الجناح الي بالبيت تجون فيه؟
وافي :انا بجهزه على مهلي بعدين
ام وافي :متى بعدين بتدخل ثلاثين وانت باقي ما تزوجت
وافي :توني ٢٩ اضافة الى انه غازي ٣٠ وشوفيه ماشاء الله زوجته حامل ويوسف اخوه٣٥ توه يتزوج عادي يمه لو تأخرنا لبعد العشرين بالعكس نصير واعين اكثر
ام وافي ضحكت :معد بقيت وعي ما وعيته خلاص
وافي :غاليه عندكم ولا بالمستشفى ؟
ام وافي :لا ولله بالمستشفى باقي ابيك توديني لها العصر
وافي :ان شاء الله بوديك وارجع الديره
ام وافي :اقعد عندي يوم ولا يومين
وافي :مقدر
ام وافي ابتسمت :ما تقدر تبعد عنها ؟
وافي :لا عندي شغل كثير ذي الايام
ام وافي :الله يوفقك ان شاء الله ونشوف عيالك قريب
وافي ابتسم :ان شاء الله ،وين الهنوف ؟
ام وافي :خلها تقعد داخل بتتعب روحها وتجيها ولاده مبكره زي اختها
وافي :بغيت اسلم عليها
ام وافي :بعدين
وافي :بعد الغدا
ام وافي :ان شاء الله
في الداخل
الهنوف :هذا ذهب؟
وجدان بسخريه :اي ذهب لا تشتهينه بس وينقطع علي
الهنوف ضحكت:وش ابي فيه شكله خايس مستطيل
وجدان ابتسمت وهي تفكه :شوفي مو خايس من داخل مكتوب عليه
ريوف :اشوف وش مكتوب ،شعوري لك مثل نقش يخلد في مدى الاجيال ؟ زوجك كاتب؟
ديم :لا يحماره ذي كلمات الاغنيه ذيك حقت راشد الماجد
الهنوف :مغير انا ماقد شفته جاب لي هديه
ام وافي :لو قعدتي معاه كان جاب لك هدايا قد الدنيا لكنك ولا مره قعدتي معاه حتى حمل مدري كيف حملتي
الهنوف :يمه ترا قعدها شهرين ببيتنا مغير ذا الشهر رايحين جايين بس
ام سطام وهي تنظر لوجدان :باقي احنا مدري متى
وجدان :احنا باقي بعد سنه ان شاء الله
ريوف ضحكت :وش بعد سنه شوفي هذي قالت سنتين ممداها ثلاث شهور
الهنوف :ولله شعور يجنن بنات فرحه حلوه ان شاء الله كلكم تجربونها
ام خالد :اما ريوف ما ظنتي تجربها هي يبيلها الي يربيها
ريوف :اي لسى توني ٢٠
ام سطام :شوفي اسماء عمرها ٢٢ومتزوجه
ديم :انتِ واختك تؤام ؟
اسماء :لا انا اكبر ب١٠ شهور الشهر الجاي بدخل ٢٣
الجازيه :يمه صغيره الفرق بينك وبين سطام ٦ سنوات
ام سطام بحده :لا مو صغيره فرق طبيعي الي مو طبيعي ١٠ سنوات واكبر
شرقت ديم بالقهوه
ريم :بسم الله عليك
ديم :انا ويوسف وش ذنبنا الفرق بيننا طبيعي
وجدان :حبيبتي يوم انتِ ترضعين حليب امك باقي هو صف رابع ابتدائي فرحان يكتب بالقلم
ديم :انا كأنسانه بالغه اشوفه طبيعي وقررت ذا القرار بعقل انسانه بعمر ٢٥ سنه وقريبًا ستدخل ٢٦
ريم :طبعًا تتكلم بالفصحى عشان تبين لك ان رأيها صحيح
الهنوف :طيب صحيح رأيها ما تقولين انها مراهقه وقررت ذا القرار بشكل عاطفي ويوسف تعرفه من سنتين يدرسها
الجازيه :وطبعًا ذي تعزز لسلفتها
ديم :بسم الله شفيكم علي ترا حياتي وانا بعيشها الرسول تزوج عائشه وهي عمرها ٩ وهو مدري كم بس انه اكبر من ٤٠
وجدان :ماله دخل ماله دخل تقارنين يوسف بالرسول مقارنه باطله جدًا
ديم :ما اقارن بس اقول لك انه شي طبيعي كلنا بالغين قررنا ذا القرار بعد تفكير بيننا تفاهم وعواطف إذن القرار صحيح والموضوع فيه اختلاف وجهات نظر
ام سطام :على كلامك نقدر نقول ان اسماء يوم ترضع حليب امها سطام كان بأول ابتدائي وشوفيهم متفاهمين شحلاتهم ما عليك منها ديم الكلمه طلعت مني بالغلط ماعليك والله يوفقك مع يوسف
وجدان :بالعكس الله يوفقك بس تراني كنت اطرح وجهه نظري لا اكثر واقول انه بالنسبه لي وركزي على بالنسبه لي يعني رأي شخصي الفرق المناسب بين البنت والولد اكثر شي ٥سنوات وقد قلتها يوم الهنوف وعندي الاثباتات بالقروب
ريم :هدي هدي بس محنا بمحاكمه
وجدان :على طاري المحاكمه ام اسيل الي عندك اذا تبيني اصير محاميتها بصير وبدون مقابل لو كانت ظروفهم ما تسمح
ريم :ما تبصر شي تبينها تدخل قضايا؟
وجدان :كيف؟عميا عادي اهم شي سمعها
ريوف :يا بنتي داخله غيبوبه المره
اسماء:مين ذي؟
ريم :طالبه عندي لاحظت عليها ما تهتم بشكلها وجالسه وحدها وكل حصه لي اشوفها تبكي بصمت كلمتها طلعت امها تشبهني وداخله غيبوبه بسبب ضرب ابوها لها
اسماء :ياروحي هي يعني ذكرتيها بأمها ؟
ريم :اي تعلقت فيني مسكينه تخيلي امها صغيره تزوجت وعمرها ١٥ الحين عمرها ٤٤ توها
اسماء :وابوها الحين وش صار عليه؟
ريم :طرده اخوها
ريوف :عمره ٢٩ واسمه طلال
وجدان :وش مؤهلاته ؟
ريوف :بتوظفينه عندك؟
وجدان :ولله تعريفك فيه حسسني انه داخل مقابله عمل
ريم :ما شفتوه يا بنات يحزن عيونه حمره وهالاته ماخذه نص وجهه
الهنوف تنهدت :شكله يبيله وحده تخفف احزاته
ريوف :اي ولله ولو تشبه لأمه بعد
الهنوف :منجد
الجازيه :معليكم منه ذوقوا ذا الشبس جبته من امريكا يجنن
الهنوف :افف ريحته خايسه ابعديه
وجدان :بالعكس ريحته حلوه
ريوف :وجدان شكل زوجك ما قصر صار عندك بطئ استيعاب خليه يخفف الشغل شوي
وجدان :وجع تفكيرك كله قرف
ديم :ماخذه وضعيه تزوجت حب حياتي ونسيتكم
اسماء تنهدت
وجدان :لا ولله ؟ ما نسيتكم ولا كان ما جيت واحنا تونا لنا ثلاث ايام
ام سطام :صدق لو قعدتي معاه وما جيتي
وجدان :شكلكم ما تبوني لأنه من يوم دخلت اي كلمه اقولها تقلبون علي
الهنوف ضحكت :ولله مدري انا الوحام ولا انتِ
ام وافي ابتسمت :كم لك اسبوع انتِ؟
الهنوف :اسبوعين وثلاثه ايام
ام وافي ضحكت :توك ما شفتي شي خلي الثاني بس يجي ويا لوعه كبد بتلقاك حتى زوجك بتكرهينه،قوموا بس خلونا نسوي الغدا
الهنوف :لا غازي توحمت عليه صرت احبه اكثر ،افف اشتهيت اشوف يده الحين
وجدان :يمه ان كان ذا الوحام ولله ما ابيه
ريوف ضحكت :الحمدلله ما توحمت على اعضاء ثانيه
وجدان :ريوف ترا بخنقك
ريوف :اي يمكن تتوحم على عضله السمانه مدري شسمها حقت ديم احد يتوحم على رجل بالله؟انتم تفكيركم وصخ وتحطونها فيني
ديم :انا نفسيتي نفسيه وحام بدون زواج
الجازيه :انا اكلي اكل حوامل لدرجه يوم سافرت واكل كذا مستغربين مني يحسبوني متزوجه
ريوف :الحين يحمدون ربهم انك مو متزوجه
الهنوف :اي ما فهمت السالفه كامله
وجدان:اي سالفه بيخطبها اليوم
اسماء :بيخطبك هنا ؟
الجازيه :لا ببيت ابوي بس بعد المغرب
ديم ابتسمت:شفيهم الرجال يخطبون على وقت المغرب دايم
ريوف :لأنه المغرب بعده العشا يتعشى ويفكر فيك وينام لو خطبك من النهار بيجلس يوم كله يفكر فيك
الهنوف :بنات اسمع العنود تبكي
ريم :شكلها صحيت بروح لها
اسماء :العنود امس وش سوت يوم طلعت امها ؟
ريوف :ولا شي بس صحيت من النوم تبي تطلع عيوننا ودارت بالصاله سبع مرات لو وديناها الحرم اعتمرت اصرف لها وبعدين جلست تحاول تقنعني ان عدد اصابع رجلي تسعه واخيرًا قررت ترجع تكمل نوم بس ...
اسماء ابتسمت :بس؟
ريوف :عند جده السميه وجبناها انا وبدر وتعلقت فيني تبيني انام بغرفه نايف واخيرًا قررت اننا ننام بغرفه الهنوف
ديم :اما نمتوا هنا انا جيت ونمت على طول قلت يمكن انام للمغرب لكن ما جت تسعه الا انا صاحيه
ريم :حتى انا صحاني جوالك اشعارات واجد
وجدان بلعت ريقها :مين ؟
ديم :يوسف قلت له يدور شاليه بالدمام ابي العرس هناك قاعد يسأل وش المواصفات كم المدعوين ومدري ايش نسيت اقفل الاشعارات
الهنوف:كويس احضر من قريب لأن لو قلت لغازي ابي الرياض مره ثانيه بيصفقني
الجازيه :الحين محد بيحضر زواجي؟
الهنوف :ولله ودي لكن شفتي امي كيف استقبلتني
وجدان :انا بحضر بنسافر بس اسبوع وبنرجع قبل التاريخ الي حددتيه بيوم
ريوف :واحنا مو مالين عينك ؟
الجازيه :بغيت اختي معاي
ديم :وملاك اظن انها بتجي
ريوف :بتجي اكيد
ريم :وش دراك ؟
ريوف :انا احس
رن هاتف وجدان :يلا بنات انا بروح
الهنوف :وين تونا ما تغدينا
وجدان :عندنا رحله بعد ساعه والعصر عمرتنا
الجازيه :ردي يمكن بيقول لك مشتاق لك ولا سماجته ذي
ريوف :اووف يا التصريح القوي ،بس صدق ردي اسمعيه وش يقول
قامت اسماء واخذت هاتفها
الجازيه :اسماء وين بتروحين؟
اسماء :بروح الحمام
ريوف :تعرفين مكانه؟
اسماء :اي شفته قبل ادخل
وجدان :اذا ضيعتي اسألي امي تلقينها بالمطبخ
ريوف :يعني بتلقى المطبخ ولا بتلقى الحمام ؟ مدري وين اختفى منطقك
وجدان :خلاص كلي زق واسكتي خليني ارد
ديم :البيت فيه مليون غرفه ردي بأي غرفه ثانيه مالي خلق اسمع قرف المتزوجين
وجدان :اختك اساس القرف كلميها
ريم :تقول الاساطير ان أحد طالبات الطب الاتي وقعن في حب معلميهم قالت لخطيبها البارحه انها تحبه
ريوف :اووووه متى ؟
ديم ابتسمت :هو نسى يقول انه ينسى اي شي يسمعه قبل ينام
ريوف نظرت لهاتفها :شوفي الحين نسى ولا يسوق امها عليك
ديم قامت :استغفر الله بس
ريوف :اي باقي بس احنا كلهم قاموا يكلمون ازواجهم
ريم :عاد الجازيه لاحقتهم قريب
الجازيه :انا بتخطاهم بروح امريكا
ريوف :يعني بنبقى بس انا وريم عاد مدري متى انتِ تلحقينهم
الهنوف:الو سويتوا لي ميوت ؟ انا متزوجه وقاعده هنا
ريوف :انتِ ما تنحسبين نفسهم هم متزوجات جديد ولا مخطوبات انتِ خلاص ام
الهنوف :يازين الكلمه متى يكبر بطني ابي اشوفه
ريم :تعرفين فيه نظريه قريت عنها انه الزوجات اذا حملوا وكبرت بطونهم يصيرون اكثر شك بأزواجهم لأنه هي تشوف نفسها مقارنه بالبنات مو رشيقه وتحسب انها ما تعجبه وانه يدور غيرها
الهنوف :يمه كيف اتفاداها ما ابي مشاكل
ريوف :اسألي اخوه ما درس طب نفسي عبث
في الخارج
ام سطام :اسماء
اسماء :هلا
ام سطام :وين رايحه ؟
اسماء :اا...سطام برا يبي المفتاح حطه عندي عشان ما يضيعه بوديه
ام سطام :اشوى احسبك بتروحين اصبري شوي ونجيب الغدا
اسماء :ان شاء الله
خرجت للفناء وهي تبكي في كل مره تقابلها يتفطر قلبها من الحزن ملت من هذا الحال وقالت ببكاء:يارب ابي انساه ابي انساه
تعالت شهقاتها ورددت بضعف:تعبت يا الله
دخل سطام :اسماء ؟
اسماء مسحت دموعها وتوارت عنه
سطام :تعالي
اسماء :بروح
سحبها من يدها :اسماء شفتك تبكين
اسماء :مو لازم خلاص
سطام :طالعي فيني
نظرت لعينيه ودمعت ،أنت أيضًا ظلمتك لو لم يكن تركي بيننا ربما كنت أحببتك
سطام :ابي اعرف ليه تبكين؟
اسماء :مو لازم تعرف
سطام بحده :كل ما تشوفين اهلي تطلعين تبكين وتجين تبكين قالوا لك شي اذوك بكلمه ؟
اسماء :لا مو هم السبب
سطام :اجل ؟
اسماء :مو لازم تعرف
سطام :انا بتجنن كل ما قلت لك شي قلتي مو لازم تعرف وبعدين تقولين لي ليه ما تفهمني انا ابي افهمك بس انتِ ما تساعديني
اسماء بغصه :لو عرفت رح تكرهني
سطام :شي بشرفك صح ؟
اسماء بصدمه:لا ولله لا ما سويت شي
سطام:اجل ؟ وش الشي الي بيخليني اكرهك
اسماء ببكاء :صدقني ما تبي تعرف
سحبها من ذراعها بقوه :بعرف كل شي والحين
اسماء :سطام اتركني
سطام :امشي وانتِ ساكته
وضعها بالسياره وركب بجانبها :كل شي وراك يا اسماء بعرفه اليوم كل شي
اسماء ببكاء :سطام
سطام :ابي افهمك بس انتِ ما تساعدين لكن ما ينفع معاك الا ذا الاسلوب
اسماء :وين بتوديني ؟
نظر لها :البيت فاضي مافيه احد اسوي فيك الي ابي ومحد يدري
اسماء تهز رأسها :لالا سطام ما تسويها
سطام بحده :حقي كزوج من زمان ماسك نفسي عنك اقول لا تظلمها يا سطام ما تعودت عليك تعذرت لك الف عذر وعذر قلت يمكن تعاملك معاها غلط يمكن فيك مشكله لكن المشكله مو فيني المشكله فيك ما تحاولين وحتى تتراجعين اكثر
اسماء :لا تكفى سطام بقول لك كل شي
سطام :بس بالبيت
اسماء :ارجوك
دخل المنزل وهو يسحبها من ساعدها الى ان دخل غرفتهم واغلق الباب بالمفتاح :يلا قولي كل شي
اسماء جلست عند ركبتيه وهي تبكي :لا تسوي شي
سطام بصراخ :قومي وتكلمي ولا ما تشوفين خير
قامت وهي تمسح دموعها واثقه بأنه لن يفعل شيئًا لو عرف جلست على السرير وقالت بهدوء :تعال
سطام بحده :اسماء بسرعه تكلمي
اسماء :تعال اجلس وبقول كل شي وعد
تنهد وجلس بجانبها وهو ينظر أمامه :تكلمي
امسكت يده ولأول مره تفعلها عن عمد :طالع فيني عشان تعرف اني صادقه بكل كلمه اقولها
اغمض عينيه وبلع ريقه ثم نظر لها
اسماء بثبات غريب:يوم كنت صغيره كنا نلعب مسابقه بالديره انا وسحاب وعيال خالتي ترف وراشد و...
بلعت ريقها :تركي ،كنت بطيئه ودايم اخسر بس تركي كان يشيلني على ظهره عشان اسبقهم
سطام بحده :اختصري
اسماء ببكاء :ولله مو بيدي بس كنت احب تركي ولأخر لحظه حبيته...وجدان عاشت حلمي يوجعني اذا قابلتها واذا تكلمت عنه حضرت الزواج غصبًا عني وضحكت غصبًا عني وانا قلبي يبكي
بلعت ريقها :لكن الحين احاول انساه احاول ادور السعاده بغيره ...احاول ادورها فيك
نظر لها سطام و ...