وانا في درب الهلاك ظهرت لي يا ملاك

12

حسابي انستا (7hid1)فيه مسابقه عن الروايه وخصوصًا ذا البارت بالستوري والجائزه تغيير حدث او اضافه شخصيه شوفوا شروط المسابقه وبعدين اقرأوا البارت وخلوا عيونكم مفتوحه ما ندري مين يفوز 🤷‍♀️

الحرامي الثاني طلع سكينه من خصره وقال وش رايك نسوي فيك خير ونخليك تموت على يد رجال احسن من انك تموت على يد حرمه
الاول قال :ولله فكره حلوه
سطام :ولله مو حلوه
المياسه جت واطلقت بالهوا وقالت :وانا بعد اقول مو حلوه قاعده واحد انتم اسرى عندي قاعده اثنين محد له حق بالقتل غيري
سطام :اول مره افرح بجيتك
المياسه طالعت فيه بطرف عين :قاعده ثلاثه محد يتكلم لين أذن له ...الحين عطوني سكاكينكم وضياعكم
سطام :ماعندي الا ذي المويا
المياسه :خلها
الحرامي :هيه حتى احنا نبي مويا
المياسه :اعطي الي يستحقها الحين مدوا يداتكم
ربطت سطام وواحد والثاني يوم جت بتربطه طلع سكينه ثانيه وجا بيطعنها بس طرحته بالارض بخفه واخذت السكين وقالت :جرب تتهور مره ثانيه
سطام :ياخي ذولا ما يتعلمون
المياسه تشير عليه بالسكين :وانت جرب تتكلم ...يلا امشوا قدامي
...
سيّاف :معد بيرجع ذا شكله قوموا ندور له
نايف :ماله ساعتين
سيّاف :ساعتين كثير بروح ادور له
نايف :رح لحالك
بدر جا من بعيد :يا عيال ياعيال
نايف :شفيك صل عالنبي
بدر وجهه غريب قال :سطام جا بس مربط مع واحد ملثم واثنين وراه
نايف يضحك :اما
سيّاف: ابو ياسر ما يربطون ولد عمي وانا حي
طلعوا وشافوا المياسه جايه من بعيد ووراها سطام والحراميه كلهم مربطين سطام يوم شافهم قال :تسمحين اتكلم ؟
المياسه :لا
سطام :ذولا عيال عمي
المياسه :قلت لك انت قلت ودوني بيت عمي ما تروح عند بيت غير بيت عمك
نايف من بعيد :وش ذا المسخره ؟
المياسه :هذا جزاء الي يسرق حلال ابوي
نايف قمط من نظرتها
بدر :ماسرع صرت حونشي ياسطام
سطام:هاه ذولا عيال عمي ولله حتى ذا قال سطام
المياسه :وجهتي بيت عمك غيره لا
سطام :لحول
المياسه وقفت :تكلم وارميك بذاك البير الي جنبك
سيّاف:ترمي مين ؟
المياسه :من انت ؟
سيّاف :ما تعرفني ؟ انا سيّاف ولد ابو سيّاف
المياسه :مو جديد اي شخص اسمه سيّاف بيكون لقب ابوه ابو سيّاف
سيّاف :ابو ياسر اول مره اقول اسمي ومحد يخاف
بدر :شكلك اول مره تقوله
سطام :هذا سيّاف ولد عمي أسأليه عن ابوه
المياسه :لا هذا بيت عمك ؟
سطام :لا هذاك الي قدام
المياسه :اجل امش عشان نوصل بسرعه
بعد ما وصلوا وافي كان برا يغسل البراد وقالت المياسه :يا ولد
وافي انتبه لها وقال:هلا ...هذا سطام وراك اشوف ؟
سطام :اي هذا انا تسوقني بنت
وافي يصحك :وش موصلك لذي الحاله
المياسه :ان كان بالبيت واحد اسمه ياسر ناده ابيه يشهد ان ذا الورع حقه
وافي :معليك فيه انا اشهد
المياسه :لا ما ابي غير ياسر
وافي :مسلسل تركي هو ؟ بيجي الحين وتقولين ما تذكرني واذا جا بيقول لا ما اذكرك وتقولين انت ابوي وتنتهي الحلقه ؟ خلاص اعتقيهه انا ولد عمه
المياسه :قلت لك ما ابي الا ياسر
ابو سطام طلع :وش ذا الازعاج
المياسه :انت ياسر ؟
ابو سطام :انا جابر
سطام :هذا ابوي
ابو سطام يضحك :وش ذا...يا ياسر تعال
سطام :عاقبه العقوق
ابو خالد :ياسر نايم
ابو سطام :صحه صحه لازم يشهد ذا المشهد
ابو وافي :اي مشهد ؟
ابو سطام :نادو ياسر بس
ابو وافي طلع قال :علامك تسوق عيالنا زي الغنم
وافي :اما ذولا عيالك ؟
ابو وافي :لا اقصد بس سطام قلت عيالنا مبالغه كذا
المياسه فكت سطام :الحين عرفت انكم عايله لأنه الهرش فيكم عرق خذو ولدكم وفكوني منه ولعد يجي ذيك المنطقه
تركي جا وقال :وش ذا الحال ؟
المياسه يوم شافت تركي قالت :لحظه وقف لا تتحرك
تركي :وش
سطام :اشرد بتربطك
المياسه طلعت من جيبها جوال وشافت صوره وقالت :انت تركي صح ؟
تركي :اي من وين عرفتني
المياسه :قصه طويله ودني لأمك
تركي :هيي ورع وش تبي بأمي ؟
وافي :بنت تراها
تركي :اها طيب امشي
راح تركي البيت ودخل قال :السلام عليكم
ام راشد :وعليكم السلام
تركي :فيه وحده برا تنتظرك ما اعرفها بس قابلتني وقالت ابي امك
ام راشد :كيف شكلها ؟
تركي :لابسه ثوب ومتلثمه وبيدها مناكير لاهي معانا ولا معاكم
ام راشد :غريبه ولله بروح اشوفها
تركي :وقفي خلني اطلع عشان تاخذون راحتكم
راحت ام راشد عند الباب وقالت :من انتي ؟
المياسه زاحت اللثام عن وجهها وقالت :بنت اصيل
ام راشد :اصيل اخوي ؟ تفضلي تفضلي
دخلتها المجلس وراحت تجيب لها مويا وجت ترف وراها وقالت :يمه فيه رجال بالصاله
المياسه اكتفت انها تنزل الشماغ عن راسها وتفرد شعرها بصمت
ترف :بنت ؟
المياسه :الي واضح
ترف :بأي فريق انتي
المياسه :ماني فاضيه لكم نادي امك بكلمها بشي ضروري
ام راشد :هذاني جيت هذاني
المياسه :كلفتي على روحك
ام راشد :جيتي من سفر وبذي الحاله الله اعلم الي مريتي فيه اشربي وكلي وبعدين نتكلم
المياسه :ماني غبيه خذت معاي مؤونه ومويا وإن جعت صدت من الطير وكلته
ام راشد جلست جنبها وتمسح على شعرها :وش وصلك لذي الحاله يا بنيتي
المياسه :قصه طويله اولها يوم ابوي على فراش الموت
ام راشد :اخوي مات ؟ إنا لله وإنا اليه راجعون
المياسه :خليني اكمل هذا اول العذاب يا عمه
ام راشد :كملي
المياسه :يوم ابوي الله يرحمه كان بيموت ناداني قبل اخواني ...
اصيل :انتي وحيدتي بين اربع عيال ومثل ما تعرفين هل العيال مجانين وبيأذونك من بعدي ،وانا ما ارضى لبنيتي تعيش ذا العذاب عشان كذا اذا مت وأذوك ...
المياسه :الله لا يقولها يابوي نزله برد وتعدي
اصيل :لا ولله يابنيتي ذي سكرات الموت ماقد شفت زيها من المرض ،وإن كان مت خذي لك ستين من الماعز حقي وهو نصيبك بالورث وخذي الكلب والبندقيه تحمين فيها روحك ولعد ترجعين ذي الديار ابد
المياسه :وين اروح يا يبه ومالي بالكون ذا كله الا انت وبيتك ؟
اصيل :عندي اخت تعيش بالقريه الفلانيه حدود الرياض روحي عندها وما بتقصر معاك
المياسه مسكت يد ابوها :او يمكن ما احتاج لذا كله يمكن تشفى صح ؟
اصيل سكت ويده ثقلت على يدها وعرفت انه مات وصارت تصارخ :ابوي مات ابوي
دخلوا اخوانها الاربعه وهدوها واخذوه للمستشفى وخلصوا الاوراق وغسلوه ودفنوه وبدا العزا كانوا الناس يجون للمياسه يخففون عن روحها وهي اساسًا قاعده بينهم بلا روح ثلاث ايام بدون نوم او أكل بس بكاء إلى اخر يوم بالعزا بعد ما راحوا كل الناس من عندها جو اخوانها الاربعه ودار بينهم ذا الحوار
كنان :اليوم اليوم الرابع وانتهى العزا الله يرحم ابوي ويوسع قبره بالنور ومثل ما تعرفون الحياه تمشي وكلنا مصيرنا بنموت والحزن مابينفعنا عشان كذا اليوم خلونا نوزع الورث
ثامر :تستهبل انت توزع الورث اليوم ؟ توه قبر ابوي ما نشف واختي لها ثلاث ايام ما تاكل
سنان ياخذ نفس من السجاره ويضحك ويقول :مراهق ويعلمنا الحياه تشوف
كنان يضحك :اشوف اشوف
ثامر :طيب قلنا بنوزعه اليوم عادي بس المياسه وصيه ابوي ووصيه الرسول قبل ما تكون وصيه ابوي ما بتشوفون لها حل تاكل ولا تنام
سامر يضحك :عادي يمكن تسوي رجيم لزوجها
ثامر :لا صدق انتم مجانين قلنا الورث عادي بس بتزوجونها ؟ مسوين بتسعدونها وهي بعز تعاستها ؟
كنان بعصبيه: انت بتسكت ولا اسكتك بطريقتي
ثامر سكت
المياسه جالسه بينهم مثل جلستها لأيام جسد بدون روح تسمع كلامهم ولا تستوعبه
سنان يدق المياسه برجله :وانتي روحي سوي لنا قهوه
المياسه قامت بنفس هدوئها وراحت تسوي لهم القهوه شوي سمعوا صوت تكسير بالمطبخ
سامر :وش تكسرين انتي؟ لميه بسرعه قبل ما اجي اكسرك معاه تسمعين
كنان قام :ذي البنت يبي لها تأديب كيف تكسر مواعين امي الله يرحمها
دخل المطبخ الا المياسه طايحه بالارض مغمى عليها وقال :قومي بلا دلع
المياسه بطبيعه الحال مغمى عليها مارح تقوم لما تسمع
كنان صار يرفسها برجله بقوه ويقول :قومي يا بنت الكلب ذا الدلع ما بتلقينه ببيت زوجك
ثامر :الحقوا يمكن يسوي بها شي؟
سنان :ولو سوا تراها تستاهل الي يسويه
ثامر :وش سوت عشان تستاهل
سامر :انت ما تفهم لأنك مراهق بس الي سوته انها بنت عار علينا كونها بنت بكره تروح تسوي شي زي زوجه كنان وتفضحنا
ثامر :انتم مدري كيف مسلمين بالاسم
سنان قام ومسك ثامر بوجهه وصار يشد عليه ويقول :لا انت ولا هي محد يقدر يحكم كيف اسلامي انا مسلم مثل ما أمر ربي تسمع ؟
ثامر بصعوبه :فك فك ترا انا معاكم بس امثل قدامها
سنان :ايه كويس رح عاون اخوك فيها خلها تقوم
ثامر قام وراح عند المياسه وكنان مستمر يضرب فيها قال له :خلاص خل الباقي علي
كنان :انت ؟ مو توك كنت تدافع عنها
ثامر :كنت امثل قدامها عشان اقهرها اكثر
كنان يضحك ويمسك على كتفه:اثاريك مو بهين يالمراهق...انا بروح اقعد وانت صحها خلها تسوي لنا القهوه تعبت من ضربها
ثامر :معليك
ثامر جاب مويا وقوم المياسه وشربها وقال لها :ليش تعطينهم وجه ؟
المياسه ساكته
ثامر مسكها مو كتوفها :منتي مجبوره تسكتين عن حقك
وقرب منها وهمس :ترا سمعت الي صار قبل ما يموت ابوي وانا بساعدك تهربين ...خذي ذا
المياسه نطقت بعد ايام :وش ذا ؟
ثامر :منوم من حقت ابوي الله يرحمه حطيه لهم بالقهوه واذا شربوها بينامون واهربي
المياسه مسكت وجهه على اثار ضغط سنان وقالت :طيب انت تعال معاي ترتاح اكثر
ثامر :انتي تحتاجين ذا الشي انا اقدر اسايرهم لين يفرجها ربي علي
المياسه حضنته :اول ما تسمح لك الفرصه تعال طيب ؟
ثامر :معليك بجي بس انتي الحين اهم شي
سامر يصرخ من الغرفه :ما صحيت ذي المجنونه ؟
ثامر :الا صحيت الحين بتجيب القهوه
المياسه قامت من الارض وتعرج من الم خصرها
ثامر خنقته العبره وهو يقومها وقال :يا حبيبتي انتي
المياسه :خلاص بعد الحين بيشوفونك اطلع قبلي
ثامر :جهزت لك الاكل والشرب مربوط بقرن التيس حقك ووراه ستين من الغنم وارسلت لك صوره ولد عمتي اذا صادفتيه قولي له يدلك على البيت لو عندي رقم له او اي وسيله تواصل كان تواصلت معاه لكن ما عندي غير ذي الصوره
المياسه :فكر مره ثانيه بيمديك تهرب معاي
ثامر :بشرب معاهم القهوه عشان ما يشكون واذا جيت معاك بثقل عليك ...الحين امسحي دموعك وروحي لهم
المياسه وقفت تبكي :مقدر
ثامر :الا تقدرين الي رباك ابوي وانا اعرف ان ابوي يربي على القوه والشجاعه وين اختفت شجاعتك ؟
المياسه خذت نفس عميق :صح صح انا بنت اصيل مستحيل اقبل الذل ولو من اخواني
ثامر مسك على كتفها :هذي اختي الي اعرفها
كنان :سنه تسوون قهوه لو انه مفطح
ثامر يمثل انه يضحك :وش سويت فيها معد قدرت تمشي
كنان :ما شافت شي بعدها بس تتدلع
ثامر وهو يطالع فعيونها :يلا امشي يلا
عطتهم القهوه وتوها جلست سامر طيح الفنجان متعمد وقال :لا ياربي كسرت فناجين امي تعالي نظفي
جلست المياسه تحت تنظف والدموع بعيونها
سامر :بسرعه ما ابيك تقعدين عند رجولي وجيبي لي فنجان ثاني
قامت وجابت له الفنجان وكانوا يتقهوون وواضح عليهم انه المنوم بدا مفعوله كلهم ناموا الا ثامر كان اخر من ينام وقال :روحي بسرعه فرصتك ذي
المياسه جلست عنده ومسكت يده وقالت :تحمل تقدر تقاوم وتجي معاي
ثامر ما قدر يقاوم ونام على طول وهي قامت وجمعت اغراضها وقبل ما تطلع دخلت غرفه ابوها لأخر مره ولقيت ثوبه وشماغه معلقين بالبدايه شمت الشماغ الي فيه ريحه من ابوها وبعدين قررت تاخذ الثوب وتلبسه عشان محد يعرفها اذا طلعت ويحسبونها رجال ومحد يحاول يأذيها ويكون ذكراها الوحيده من ابوها طلعت من الصحراء وسافرت مثل ما كانوا يسافرون زمان على الاقدام بدون اي دابه تشيلها ولا سياره كان اصعب طريق بحياتها والاصعب منه انها ما تعرف القريه الي بتروح لها ولا تعرف مصيرها تموت بين ثنايا الصحراء ولا تعيش وتوصل لمرادها .
ام راشد تبكي :يا حبيبتي انتي مريتي بكل ذي المعاناه
المياسه تمسح دمعتها :بس خلاص من اليوم مافيه معاناه
ام راشد :ترف جهزي لها الغرفه الي جنب غرفتك وإذا تبغين ملابس خذي مع ترف وانا بجهز لك الحمام
المياسه:بروح اجيب الغنم خليتها هناك
ام راشد :معليك معليك بقول لتركي يجيبها
المياسه :معليك انا احب اخلص شغلي بنفسي
ام راشد :دامه يريحك عادي بس ...
المياسه :ايش
ام راشد :الثوب لو تخلينه وتلبسين عباه احسن
المياسه :بعدين
...
غيداء :احمد ازعجني يبي رقم ترف عادي ياخذه عندكم ؟
وجدان :مدري احنا ماقد تزوج عندنا غير غاليه وخالد ما اخذوا الارقام لين عقد القران بس بسألها اذا تبين
غيداء :ايوه تكفين واذا رفضت صوري المحادثه وارسليها لي لعله يسكت
وجدان ارسلت لترف :عادي تعطين خطيبك رقمك ؟ اذا عادي بعطي اخته وهي تعطيه
شوي انتظرت ما ردت ترف وارسلت لها مره ثانيه قالت :شفيك ما تردين بالعاده تردين على طول
ردت ترف :كنت اجهز غرفه بنت خالي تحزن وقصتها كأنها مسلسل
وجدان :وش صار ؟
ترف :تخيلي ابوها توفى وعندها اربعه اخوان ثلاثه يعنفونها والرابع مراهق ما يقدر يسوي شي ويحميها وكانت وصيه ابوها لها قبل تموت انها تاخذ ستين من الماعز وكلب الحراسه وبندقيه وتطلع مع الصحراء وتجي عندنا ما كانت تعرف القريه ولا موقعها ولا شي بس لحسن حظها صادفت تركي وساعدها والحين جت عندنا
وجدان :الله جوي النساء القويات بجيكم الحين ابي اتعرف عليها
ترف :انتظرك شخصيتها صعبه مره ممكن تتناغم معاك وتحبك
وجدان :بس قبل ما اجي بتعطين خطيبك رقمك ؟
ترف :اي عادي
ام راشد :قولي لأخوك لعد يدخل ذيك الغرفه عاد انتي تعرفينه يحب يتمشى بالبيت
ترف :اي بقول له اذا جا
تركي دخل :السلام عليكم
ترف :وعليكم السلام اتوقع سمعت امي
تركي :اي سمعت بس وش قصه البنت ؟
ترف :بنت خالي اصيل توفى وصارت لها مشاكل مع اخوانها وهربت عندنا
تركي :للأبد
ترف :لين يفرجها ربي
تركي :تاخذ راحتها البيت بيتها وانا بنام بالملحق الي بالحوش
ترف :اجل انقل اغراضك من الحين
تركي :بروح اخذها
تركي جمع اغراضه ويوم فتح الباب بيطلع الا وجدان واقفه عند الباب وكانت بتدق
وجدان :بنت خالك المحاربه هنا ؟
تركي :اي
وجدان :تمام عادي ادخل كذا ؟
تركي :عادي ...الساعه ٤:٣٠ تعالي ورا الحوش بكلمك ضروري
وجدان :بشوف
تركي :ضروري وما بياخذ منك خمس دقايق
وجدان :طيب
ترف :جيتي ؟
وجدان :اي اخوك فتح لي الباب
ترف :زين
وجدان :وينها
ترف :بالحمام الحين بتطلع
سمعت صوت باب الحمام :وحتى طلعت
وجدان مشت بسرعه تبي عندها
ترف :لا تدرعمين عليها قلت لك شخصيتها صعبه
وجدان :معليك اعرف اتعامل معاها
راحوا عند غرفتها ووجدان دقت الباب :عادي ادخل ؟
المياسه :شوي
بعد شوي قالت :تفضلي
دخلت وجدان وقالت :سلام انا المحاميه وجدان ممكن اساعدك بقضيتك
المياسه :قضيتي انتهت اخذت ورثي ستين ماعز وثوب ابوي وخلاص ما احتاج محامين
وجدان :لا حبيبتي ممكن اخوانك يلحقونك ويتعقبونك بتحتاجين محامي بذي الحاله بس نحتاج دليل ان ابوك كاتب لك الورث
المياسه :ابوي ما يكتب ولا يقرا بس قالها كذا وكانت اخر ما قاله
وجدان :الله يرحمه فيه شاهد ؟
المياسه :الحين تحقيق هذا ولا ايش ؟
وجدان:لازم اخذ المعلومات عشان اجهز ملف لو لحقوك اخوانك ...
شقت ورقه وكتبت فيها رقمها :ما عليك الا تدقين على ذا الرقم وانا موجوده
المياسه :ممكن ما احتاجها ذي القريه اول مره اجيها بحياتي ما يعرفونها
وجدان :مع ذلك خذيه
المياسه :معليش اذا جرحت مشاعرك بس ليه انتي نشبه كذا ؟
وجدان :اول قضيه بحياتي طبيعي بكون كذا متحمسه
المياسه :واو محاميه جديده على الساحه وانا اول قضاياها مستحيل
وجدان :ليش انتي كذا زعلانه من الدنيا ونفسيتك بخشمك المفروض تشكرين ربك انك وصلتي هنا
المياسه تصرخ :لأني عانيت وشفت الي محد شافه من يومتني صغيره اخدم اربعه اخوان واب اتعلم الفروسيه والرمي عشان احمي نفسي واحميهم مع انهم رجال وبالاخير يوم ربي اخذ امانته واهانوني وذلوني محد وقف معاي الا اصغرهم اربع ايام اربع ايام العزا الناس يجون ويطلعون ويدخلون وانا بمكاني ما اتحرك ما اكل ما اشرب ما انام وهم ولا واحد فيهم جا واساني الا الصغير وفوق ذا ...صرت ناكره جميل وخليته بينهم محد يدري وش يسوون فيه الحين يمكن يقتلونه او يسوون فيه الي اسوء من القتل
وجدان بنبره حزن :اس...اسفه اذا تماديت حدودي معاك اكيد عندك حق بذا الشي وانا شكلي تحمست بزياده
جلست جنبها :بس ممكن اساعدك صح باقي ما اعتبر محاميه وتوني خريجه بس بعطيك معلومات يعني كيف تقدرين تاخذين اخوك معاك لأنه لسى ما وصل السن القانوني وتبينين انك انتي الاحق فيه
المياسه وهي تبكي :ما احتاجك
وجدان مسكت يدها :فكري وانا بكون موجوده اذا بغيتيني
ترف واقفه على الباب وشهدت كل الحوار الي صار وبالاخير قالت :يلا احنا بنطلع عشان تاخذين راحتك اذا بغيتي شي لا تترددين تروحين للمطبخ تركي مارح يكون موجود وراشد مسافر ومافيه الا انا
المياسه ساكته
يوم طلعوا من الغرفه وجدان قالت :مسكينه زعلتها
ترف :لا تقول لك انها اربع ايام جالسه بدون شي اكيد كانت كاتمه بقلبها كثير زين لها انها تفضفض
وجدان :ودي اساعدها من كل قلبي اذا اخذتي منها اي معلومه ارسليها لي بس طبعًا لازم تكون راضيه وعارفه
ترف :معليك بس ذي الايام تحتاج تجلس وحدها شوي
ام راشد جت :هلا وجدان
وجدان :هلا فيك يا خاله معليش ما سلمت عليك
ام راشد تهمس :وش الصراخ الي صار قبل شوي
ترف :بقول لك الحين بس خلينا نروح نجلس لا نوقف عند غرفه البنت ونزعجها
ام راشد :اي ولله وانتي يا وجدان تعالي تقهوي معانا
وجدان طالعت بساعتها وكانت الساعه ٤:٠٠ قالت يلا انا بطلع عندي موعد
طلعت وجدان وراحت ورا الحوش الا تركي هناك وقال:جيتي قبل الموعد
وجدان :وانت من متى هنا ؟
تركي :من الساعه ٣:٤٥
وجدان :جيت قبل الموعد بكثير مدري عادتك انك تجي قبل المواعيد ولا الحين فاضي
تركي :عادتي للناس المميزين
وجدان استغربت من كلمته وهو لاحظ استغرابها ورقعها وقال :يعني الي وضايفهم حلوه ومطلوبه برؤيه ٢٠٣٠
وجدان ضحكت وقالت :حسستني محمد بن سلمان
سكتت شوي وصار صمت ودهم يتكلمون بس فيه حاجز اخر شي وجدان مثل عادتها تشجعت وكسرت الحاجز وقالت :وش تبي تقول؟
تركي :بغيت انسى راقبت مشاري ووضعه يزيد شكي طول الوقت على الجوال
وجدان :طبيعي كلنا نمسك الجوال طول الوقت
تركي :لا هو مره يطول ويكتب بسرعه وكأنه يرسل رسايل كثيره يعني حسبت له كم مره ارسل رساله بالدقيقه كان ثلاث رسايل متخيله ثلاث
وجدان :بس انا يرسل لي رساله كل دقيقتين وبعدين كيف حسبتها ؟
تركي :هذاك الصوت الي يطلع اذا ارسلتي رساله كذا طرنق ودامه يرسل كل دقيقتين رساله اجل هو بلاير يلعب على كم بنت
وجدان :مو كأنك تكبر الموضوع ؟
تركي :لا كل شي موضع شك
وجدان جاها اشعار
تركي :هاه الساعه بالضبط ٤:٠٢ ارسل رساله
وجدان :طفشت وانا اشوف القرف حقه وتغزله
تركي :الله حق عجبتني رسالته ذاك اليوم يعني احسه فصيح لو عندي وحده احبها بسرق من كلامه
وجدان :هو حلو بس لما يجي من الشخص الصح
بعد ذي الجمله صار صمت مره ثانيه ووجدان قالت :افف مو كأنه حر انا برجع
تركي :بس ما كملنا خمس دقايق
وجدان :بس كلامنا خلص...وو الحين كملنا خمس دقايق
تركي :لا خمس دقايق بعد الساعه ٤:٣٠
وجدان :وشتبي تسولف معاي ما عندك اخويا ؟سطام خويك صح
تركي :اي نسيت اقول لك سطام جا مربط مع المياسه
وجدان بعد ما قامت رجعت جلست :كيف ؟
تركي :القصه انه اخوك الدلخ ...عادي اقول دلخ ؟
وجدان :عادي
تركي :اخوك الدلخ تهاوش مع العيال وشرد البر وقابلها بطريقها وصادف انه حنشل بيسرقون الحلال حقها واصرت انه سطام والي بيسرقون عصابه وحده ومسكتهم ومدري كيف اقنعها تجيبه هنا ويشهد عمك ابو سيّاف انه ولد اخوه ولولا الله ثم هو ما كان جت هنا
وجدان :سبحان ربي ساقه لها سوق ...انا غلطت بحقها وشفت نفسي عليها
تركي :كيف
وجدان :تحمست انه فيه قضيه تعنيف تصير حولي وجيت ابي اساعدها وهي رفضت واصريت عليها وقلت لها مدري ليش نفسيتك لخشمك وزعلانه من الدنيا وقالت انه هي عانت من طفولتها وانها اعتنت بابوها واخوانها واخر شي نكروا الجميل وعنفوها وهربت منهم وتركت اخوها الوحيد الي يساعدها وهو صغير بالعمر وممكن يعنفونه بعدها
تركي :لحظه انا ما عرفت قصتها كامله
وجدان :هي بنت خالك وتربت بين اربعه عيال كانوا ينافقون قدام ابوهم بحبهم لها ويوم بيتوفى وصى انه اذا اذوها تهرب لعمتها الي هي امك واخوها الصغير مراهق توه ما بلغ ١٨ ساعدها انها تهرب وهي تحس بالذنب انها تركته وانا لازم اساعدها ما اتحمل اوقف كذا واتفرج
تركي :توني ادري بس وش قصه الثوب
وجدان :اخذته لأنه الذكرى الوحيده من ابوها
تركي :الله يفرج عليها
وجدان :احس تضايقت بروح ادور اي شي عشان اساعدها واراجع الي تعلمته عن ذي القضايا
تركي :بس ...
وجدان :مو لازم نكمل الوقت ماهو حصه وبعدين بتجينا عجوز مخرفه بتشوفنا وتنشب لنا
تركي ضحك :تمام
وجدان :اسفه اذا هي جدتك وسبيتها
تركي :ماهي جدتي لذيك الدرجه
...
ام سطام: وين اختفت اختك ؟
الجازيه :راحت عند ترف مدري وش قالت كلام مو مفهوم قضيه مدري ايش بساعدها الحين تجي ونشوفها
وجدان :انا جيييت
الجازيه :امم هذي هي جت يلا تعالي نبي نعرف وش صار البنات متجمعين بالغرفه زي دايم
وجدان :طيب بغسل وجهي بس مت حر
الجازيه :رتبي كلامك ما ابي كلام ملخبط زي يوم بتروحين
وجدان ومعليك عرفت كل شي
زينب :جت وجدان ؟
الجازيه :اي جت
زينب :اخيرًا
الجازيه :امشي الغرفه والحين بتلحقنا
دخلت وجدان وعلمتهم القصه
ريوف :مدري الي بقوله غبي ولا لا بس العيد باقي له يومين وهي ما جت غير بثوب ابوها وملاك قالت انه نتجمع بالعيد يعني هي لازم يكون معاها لبس
الهنوف :هذا لو وافقت تطلع مع الناس
غيداء:لو وافقت عندي فستان جديد بورقته ما لبسته ولا مره بعطيها بس مقاسها مدري كيف
وجدان :لا نفس جسمك
غاليه :حطوا انفسكم بمكانها مستحيل توافق وبتشوفه مثل الصدقه
ريم :منجد مارح ترضى
غيداء :بس لو اعرض عليها تشتريه رح توافق
زينب :اتوقع ما سمعتي تقول انها بس جت بالغنم ما عندها غيرها
غيداء :عادي نتبادل هي تاخذ الفستان وانا اخذ الغنمه ممكن يكون بسعره
الهنوف :لا تسألوني
ملاك :بكم فستانك ؟
غيداء :٢٠٠
ملاك :الغنمه على قولك يجي سعرها ب١٠٠٠ ريال واكثر مستحيل تاخذ فستان بميتين وتعطيك غنم خاصه انه حق ابوها
ديم :بس فيه حل اسهل تبيع الغنمه على احد وتاخذ الفلوس يصير عندها ١٠٠٠ مدري اكثر وتشتري الفستان بميتين والباقي عندها
الهنوف :بس نسيتم اكثر شي مهم نفسيتها هل نفسيتها بتسمح تطلع وتقابل الناس ؟مستحيل اذا هي بعزا ابوها جالسه بينهم زي الميته بتتحمل تجلس معاهم بالعيد وتتزين
الجازيه :معاك حق
ام خالد :تبغون حنا ليله العيد نحسبكم معانا؟
زينب :انا لوكي مايناسب الحنا
ملاك :اي بتحنا انا عادي
وجدان :الله نفسي فيه
ريوف :معاكم
غاليه :مدري يضر الجنين ؟
الهنوف :ما بتاكلينه انتي كلها ساعه وتغسلينه من يدك انا بحط
غاليه :اجل بحط
ريوف :خلونا كلنا نحط بيطلع حلو
زينب :ما ابغا
غيداء:لا تخربين فرحتنا خلينا سوى نحط
زينب :طيب
...
ابو وافي يضحك :سحبتك البنت لين هنا ؟
سطام :بغت تقتلني ياعم انها تسحبني احسن من انها تقتلني
ابو سطام :غريبه ذا البنت اكيد وراها قصه
سطام :مو لازم نعرف اسرار الناس
نايف :ماشاء الله عليك تنقط حكمه
سطام :بعض المواقف نتعلم منها كثير
سيّاف :صح تتعلم انك اذا زعلت تاخذ معاك مويا وما تطلب من احد بالصحراء الي ماهي صحراء اصًلا والمكان جدًا قريب
وافي :كأني اشوف شكلك قدامي
ابو راشد دخل :سلام عليكم
ابو سيّاف :وعليكم السلام حياك
ابو راشد :لا ولله جيت ابقولها كلمتين وبطلع
ابو سيّاف:عسى ما شر
سيّاف يهمس للعيال :المنافسه السنويه
بدر :ايش
سيّاف :كل سنه ابوي وابو راشد يتهاوشون من يحط عشى العيد
احمد :من زود كرمهم الله يكرمهم بجنات النعيم
وافي :خطب بنتهم وفرحان
ابو راشد :عشى العيد علي ولا تدفع ريال
ابو سيّاف :لا ولله ذاك العيد كان عليك الحين علي
ابو راشد :لا يا كذاب ذاك العيد عليك انت الحين علي
ابو سيّاف:انا كذاب؟
ابو وافي :وش رايكم يصير علي ذا العيد ؟
ابو سيّاف وابو راشد بوقت واحد التفتوا على ابو وافي وقالوا :لا
ابو احمد :بسيطه خلوها قطه كل واحد يحط كم ريال وخلصنا
ابو سيّاف:انا تعرفوني ما اقط يا احط الخير كله ولا ابطل
ابو راشد :و ذي المره بتبطل
ابو سطام :انا عندي فكره احسن
ابو راشد :اذا بتقول عليك من الحين لا
ابو سطام :العيال يشتغلون بمحل مثل ما تعرفون عشى العيد من الارباح حقتهم ونعتبرها صدقه عشان ربي يبارك لهم برزقهم
ابو خالد :الشور الزين
ابو وافي :الله يبارك لهم فيه هاه انتم وش رايكم ؟
ابو سيّاف :مدري عنك وش رايك
ابو راشد :عادي
ابو سيّاف :اجل خلاص
سطام :واحنا مالنا رأي؟
ابو وافي:خلاص تم كم ارباحكم ؟
وافي :اربعه الاف
ابو سيّاف:نعمه اهل الحاره قليل
نايف:حقنا بتاخذونه
ابو سطام :لو اربعه الاف شرينا ب الفين منها بضاعه للشهر الجديد والفين قسمناها على سته كل واحد بياخذ ٣٣٣ ريال
وافي :لا الارباح كامله سته الاف الفين منها للبضاعه واربعه الباقي
ابو سطام :كل واحد ٦٦٦ ريال
سيّاف:نعمه خير وبركه
ابو سطام :اعتبروها صدقه لوجه الله وتكفّون فيها المشاكل الرجال قبل شوي بغوا يتذابحون وربي بيزيدكم ويبارك لكم إن شاء الله
بدر :منجد انا نصيبي لوجه الله
سيّاف:معك
وافي :من قبل انا راضي
نايف وانا مع اخوي
سطام :باقي الا انا وخووي تركي خلاص معاكم
ابو وافي :الله يتقبل منكم
...
بعد العشا
ابو راشد :إنا لله وإنا اليه راجعون الله يعينها ويفرج همها
ام راشد : ودي اخوك الاكل وناديها تتعشى
ترف :قلت لها قبل شوي ما تبي
ام راشد :مستحيه من ابوك يمكن؟
ترف :يمكن
ابو راشد :قولي لها تعتبرني زي ابوها ولا تستحي
ترف :قالت بتنام لها اسبوع ما تنام زين
ام راشد :اجل خلوها تاخذ غفوه وببقي لها اذا صحيت اخر الليل تاكله
ترف :يمكن ما تصحى الا الصباح ؟
ام راشد :عادي انا بحطه بالثلاجه اذا ما كلته بسخنه ونحطه على الغدا
ابو راشد :اكرموها ولا تخلونها تحس بنقص دامها وصيه عندنا من ابوها فهي امانه برقبتنا لين يوم القيامه
ام راشد :بعتبرها مثل بنتي من اليوم هي وترف واحد
ابو راشد :الله يكرمك
ترف :على طاري الكرم مين فاز ذي السنه انت ولا عمي ابو سيّاف ؟
ابو راشد :العيال
ام راشد :كيف؟
ابو راشد :مثل ما تعرفون فتحوا محل ويشتغلون فيه وعمهم قال ارباحهم الي طلعت يسوون فيها العشا ويعتبرونها صدقه لوجه الله بنيه انه يبارك لهم برزقهم
ام راشد :الله يتقبل منهم نعم الشور ولله
فجأه طلع صوت صراخ من غرفه المياسه ...