وانا في درب الهلاك ظهرت لي يا ملاك

9

الهنوف :انا بسبقكم معاي المفتاح وانتم شيلوا الاغراض
شوي الا رجعت الهنوف تركض ووجهها متغير
وافي :شفيك ؟
الهنوف :البيت مفتوح وفيه اصوات
وافي :كيف مفتوح ؟ مافيه الامفتاحين واحد معاك واحد مع ابوي ...ارجعي السياره وأمنيها وانا بنزل اشوف
الهنوف :لا تروح لحالك يسوون لك شي
شوي الا جته رساله من ملاك :عمي قال لي القصه الي صارت يوم جيتم الرياض يمكن نفس العصابه يبغونك بالبيت لا تروح
وافي فتح الرساله وقال :طيب وش الحل
الهنوف :خلني اروح بشكل طبيعي كأني ما ادري بشي وافتح مكالمه تسمعون كل الي يصير بالبيت واذا تعالت الاصوات تعالوا
وافي :لا تروحين لحالك
الهنوف :طيب كيف ؟
ديم :انا بجي معاك والي يقرب بهبده
نزلت ديم مع الهنوف ووافي والبنات بالسياره متوترين ينتظرون شوي الا سمعوا صوت كسر وصراخ ثلاث بنات
ملاك :كيف كذا هم ثنتين وفيه وحده ثالثه صرخت معاهم
وافي :في شي ؟ الهنوف فيه شي
الهنوف :فيه ومافيه
وافي :كيف ؟
ديم:لازم تجون
وافي :انزلوا وبقفل السياره
نزلوا ودخلوا البيت الا خالد طايح بالارض والمزهريه مكسوره جنبه ونص المزهريه الثاني بيد ديم
ريوف يوم شافتهم انفجرت ضحك
ريم :انتم ؟
غاليه :اي احنا
وافي :ولا خبر ولا شي
غاليه :بغيناها مفاجأه
وجدان :هذي مفاجعه ولله
وافي :نهايه مفاجأتكم زوجك طايح بالارض
ديم :الحين انا ضربت خالد ؟
الهنوف :اي
الجازيه :بننتظر سوالفكم تخلص عشان تقومون الولد ؟
وافي :رشيه بالماي ويقوم
ريوف وهي تضحك :هاكم
يوم قام خالد قالت ريوف :من هو ربك ؟
خالد :هاه ؟ ربي الله ربي الله
ديم دقتها تبيها توقف بس هي كملت ووافي ماسك الضحكه يطالع فيه
ريوف :ماهو دينك ؟
خالد :ديني الاسلام
ريوف :من نبيك
خالد :نبيي محمد ﷺ
يوم خلصت ريوف وافي انفجر ضحك وخالد انتبه له وجلس وهو ماسك راسه قال :وش جاب ذا هنا حتى هو مات ؟
وافي :انا الي قتلتك وقصوا فيني
غاليه :معليك منهم مزحهم ثقيل عادك حي ترزق
الهنوف :شوفوا من يتكلم عن المزح الثقيل
ديم :منجد مالكم داعي بغيت اقتله
وافي :مالكم داعي انكسرت مزهريه امي الغاليه على راس ذا المثلث
غاليه :فوق ما ضربتوه تقولون راسه مثلث ؟ خلنا نروح بيتنا احسن
وافي :لا يختي كل شي الا زعلك نمزح نمزح والمزهريه بدالها الف
غاليه :وش يضمني انه ما جاه نزيف
وجدان :المستشفى
ريم :الحين وش جابكم الرياض هذا اهم سؤال
الهنوف :شكلها شافت سناباتنا وعجبها الوضع وتبي تجي ولحق بها خالد
غاليه :لا بنروح لندن
ريوف :رحلتكم ما كانت الفجر اليوم
خالد :تأجلت بكره
ديم :انتي وش دراك برحلتهم ؟ تعرفين كل شي صح
ريوف تضحك:انا الي عطيتهم الفكره انهم يجون البيت
ملاك :ولله اني دريت ان وراك مصيبه يوم شفتك تضحكين بالسياره
ريوف :كنت ابي اشوف كيف بتتصرفون
وافي :واضح المقالب الخايسه عرق بالعايله
خالد :شقصدك ؟
وافي : ما اقصدك انت حاله خاصه اقصد العايله كلها عمي سوا فينا مقلب والحين انتم مقلب وكلها نهايتها خايسه
الهنوف :عمي جابر ؟
وافي :اي
الجازيه :كيف وش صار ؟
وافي :لا ولله طلعنا سالمين بس جتني نوبه هلع وسيّاف بغى يذبح سطام ماجانا شي الحمدلله
وجدان :ابوي كذا من يوم عرفته يحب المقالب
الهنوف :وش رايكم الحين نرتاح واضح غاليه تعبت من السفر
زينب :واحنا نفسياتنا تعبانه
ديم :موفي نايت ؟
الهنوف صرخت:موفي نايت
خالد يطقطق :شاهي نايت ؟
وافي :شاهي نايت مشينا
...
نايف يرسل:عطيني رقمها تكفين بس بسألها
الهنوف :يمكن ما تبي
نايف :بس بقول لها كيف الاختبار بس
الهنوف :واذا صارت لها مشاكل وش نسوي
نايف :طيب انستا
الهنوف :بعطيك التيل حقها واسألها
نايف :سناب ؟
الهنوف :لا
نايف :طيب
الهنوف ارسلت لنايف رابط التيل وجلست تناظر بريوف تبي تشوف رده فعلها شوي وارسلت :للحين ما ارسلت
نايف :مدري وش اكتب لها
الهنوف :حبيبي انت ما بتكتب بحث للجامعه اكتب لها كيف الاختبار بس وبالاخير هي ما بتعرف انها منك
نايف :مدري احس
الهنوف :الله يرزقني على قد ما تقول مدري
نايف :خلاص طيب
ارسل لها :كيف الاختبار
ريوف رفعت الجوال وشافته اشعار ورجعت حطته وتتابع
الهنوف :مين ارسل ؟
ريوف :التيل مو لازم اشوفها
وجدان :اسكتوا ذي اللقطه حماس
الهنوف ارسلت لنايف :ان كان بترقد ارقد ما بتشوفها الحين
نايف :لو عطيتيني انستا احسن
الهنوف :بعطيك بس لا ترسل راقبها من بعيد بس
نايف :ابشري
الهنوف :سو حساب وهمي تعرف ؟
نايف :اي اعرف
الهنوف :يا ويلك ترسل لها حرف
نايف :معليك خبره
الهنوف :كم حساب وهمي سويت ؟
نايف :صفر
الهنوف :خبره ايش اجل ؟
نايف :خبره اراقب الي احبه بدون ما اكلمه
الهنوف :يا روحي انت اصبر عشان تاخذها بالحلال
نايف :ان شاء الله
وجدان :افف وش ذا الاشعارات ما تسكت
وجدان وقفت الفلم :عطوني جوالاتكم يلا
الهنوف :كيف ؟
وجدان :بسرعه موفي نايت بدون جوالات يلا
غدير :هاك
الهنوف :ياخي غريبه
ريوف : ايش
الهنوف :ولا شي بس اقصد احداث الفلم
غاليه :انا بنام وراي سفر
ريم :لا اوصيك بالهدايا
...
ام وافي :وش صار على العيال طلعوا الطايره ؟
ام خالد :رحلتهم تأجلت بكره
ام وافي :زين يرتاحون بالبيت
ام خالد :اي وصيت عليهم يروحون البيت عند البنات ويتطمنون عليهم ويرقدون لين الفجر
ام احمد :يلا انا خلصت
ام سيّاف :ما ودكم تنامون عندنا اليوم ؟ نتساكن مغير احنا ثنتين بذا البيت وانتم ثنتين بذاك البيت خلونا سوا احسن
العنود :احنا اربعه
ام سطام :انتي وداليا تنحسبون نص
ام وافي :اي ولله معد نتعنى ولا وش رايك يأم احمد
ام احمد :ايوه احسن نجلس هنا
ام سطام :اجل خلاص نيموا البنات ونطلع الحوش نشرب شاهي ونسولف
ام خالد :اوهو قلنا ننام ما نشرب شاهي احد يشرب شاهي الساعه وحده الله يهداك
ام سطام :يا شيخه عادي
ام احمد:لو البنات هنا كان اعطوك محاضره عن النظام الغذائي وانه ما يصلح ناكل بعد الساعه عشره بس دامهم مو هنا بكسر قواعدهم واشرب شاهي
ام سطام :هاه وحده بس وحده من يزيد
ام وافي :انا بموت نوم واحس اني مصدعه ما ابي الشاهي يزيدني
ام سيّاف :انا معاكم
ام سطام :هاه ثنتين من يزيد
ام خالد :اذا بنعناع معاكم
ام سطام تضحك :بنعناع اكيد
ام وافي :اجل ما غير انا بقعد معاكم ما برقد لحالي واقوم لحالي باكر
ام سطام :والصغيرونات هذولا
ام احمد :لا هم لازم ينامون وحتى اليوم سهروا كثير صح ؟
داليا :ماما ابغا اشوف الفجر زي العنود شافته
ام احمد :اذا نمتي بدري تصحين بدري وتشوفينه يلا قدامي الغرفه
العنود :تقرين لنا القصه ؟
ام احمد :ايوه بقراها
العنود :خلاص يا ماما ارتاحي ام داليا بتقرا لنا
ام وافي :بيتعبونك يأم احمد خليني اجي
ام احمد :لا معليك نومت غيداء واحمد بنفس الوقت بعرف انومهم
ام وافي :اجل خلاص انتي يوم وانا يوم
ام احمد :ان شاء الله
...
سطام :نايف
نايف :هاه
سطام :نمت ؟
نايف :ومين يكلمك الحين ؟
سطام :ليش اليوم سهران
نايف :ما جاني نوم
سطام :حتى انا اشتقت لتؤامي شكلك زيي
نايف :وافي ؟
سطام :اي ولا شكلك اشتقت لأحد ثاني
نايف :لا اشتقت لوافي مقدر انام الا على شخيره
سطام :مو مكفيك شخير مشاري
نايف :شخير وافي غير
سيّاف :حتى بالنوم تسولفون اسكتوا معد باقي الا تطلعون بحلمي
نايف قام :انا بروح اشرب ماي
سطام :جب لي معاك
نايف :اجيب لك معاي واجي امشي بالظلام واكبه على راس بدر ويقوم فوقنا يحسبه مقلب
سطام :طيب شغل الكشاف انت حمار
نايف :جوالي طافي وامس ما فكرت
سطام :اي لأنك من الظهر عليه مدري مين تكلم
نايف :اكلم وافي تبي اوريك المحادثه ؟
سطام: بجوالك الطافي
سيّاف :لحوول انتم الاثنين روحوا ناموا بالسطح
سطام :اسف خلاص
سيّاف :يلا قم السطح انت وياه بفرشكم وعفشكم
نايف :شيل فراشي معاك وانا بجيب لك ماي
سطام :يعني مافيه خيار ؟
سيّاف :مافيه خيار ولا جزر فيه سطح
سطام :طيب بنروح
بعد ما طلعوا السطح
نايف وهو منسدح : وش رايك نسهر ونشوف الشروق ؟
سطام :قدام بسوي شاهي ونجلس نتقهوى
نايف :ياخي ذي العايله بدمها يسير الشاهي
سطام :وراثه
سطام جاب الدافور وحطه وحط البراد عليه
نايف وهو ينتظر الشاهي :اي حكني وش علومك
سطام :ما عندي علوم
نايف :مره ؟
سطام :الي تشوفه قدامك كل يوم هو واقعي
نايف :ولا هموم تخبيها وتقولها لي ولا شي
سطام :لا
نايف :ولا شي
سطام :لا ولا شي
نايف :اجيب العود واغني لك ؟
سطام :الله تذكرت ايام الكشته بالرياض
نايف :تسميها كشته ؟ نشوف الشارع جنبنا ونسمع السيارات
سطام :نخاف نضيع يا ولد
نايف :وش رايك اذا رجع وافي نكشت بالديره هنا
سطام :قدام
نايف :اي واغني لكم اطلع لكم محمد عبده الي داخلي
سطام :ما تعرف مغني غيره عبادي طلال المداح خالد عبدالرحمن شي ؟
نايف :عبادي ما قد سمعت له طلال تعجبني اغانيه بس ما اسمعها لأنه ميت ولا ودي ياخذ اثم وخالد عبدالرحمن حلو بس محد ينافس فنان العرب محمد عبده
سطام :خل عنك خالد احسن
نايف :يا رجال محمد عبده لو يقول أ قفل ملفه
سطام :خالد عبد الرحمن وسيم وصوته حلو حلم كل بنت
نايف :اي طبعًا ذا حالك كل ما حشرناك قلت خالد وسيم شيب الرجال
سطام :والشتا والليل ...
نايف :اسكت بس اسكت اسمع الفن يقولك فنان العرب ليله خميس طرز بها نور القمر شط البحر
سطام :وش ابي فيها هي والبحر
نايف : وانا وش ابي بالشتا والليل
سطام :الشتا والليل احسن شي تتلحف بفروتك وتاخذ لك برادي شاهي تسري الليل عليه
نايف :الشاهي نسيته
سطام :يا ويلي
نايف :هاه كيف ؟
سطام :لا لا سلم كويس
نايف :الحمدلله
سطام :تبي نعناع ؟
نايف :لا ما احبه
سطام :تحب ملعقتين سكر
نايف :وش دخل
سطام :نسيت ؟ نسيييت يوم عند الباب عطتك حليب شاهي فيه ملعقتين سكر لأنك تحبها ...اوه اقصد تحبه
نايف ساكت
سطام :ترا واضح تكلم
نايف :الصراحه ...
سطام :ايه
نايف :احبها
سطام :اول مره احد يعترف لي انه يحب احد
نايف :وانت ما تحب ؟
سطام يصب الشاهي :ما فيه احد
نايف :ولا حتى ملاك
سطام :وش دخل ؟
نايف :يوم تبي تطلعني من فوق الشجره وشفتها
سطام :لا يا شيخ ما احسها لي واقولك الحق ...
اخذ رشفه من الكاس وكمل :احسها تصلح لوافي
نايف شرب :اي احسها جوه
سطام :اخوك ابسط كلمه توصفه مزاجي سايكو
نايف :مزاجي سايكو غريب الاطوار.
سطام :ولله غريب بس غرابته كذا حلوه تخيلك تحبه
نايف :اقولك بطفولتنا كان اول ما يقوم من النوم يوقف بالزاويه ربع ساعه مدري ليش
سطام واعوذ بالله شكله متلبسه جني
نايف :لالا بس شكل عنده انفصام
سطام :اي اذكره كان يحب وحده بالروضه عندها لحميه ولوز والمسكينه كل شوي تنغف واخوك يصفقها يقول لا تنغفين بعدين يعطيها فطوره ويعتذر ويجي يقاسمني فطوري
نايف :سايكو بس عند البنات يضعف
سطام :مو كل البنات الي على جوه كذا البنات الي تحسهم غريبين ومنغلقين على انفسهم زي ملاك وهذيك الي تنغف بالروضه
نايف :مالها اسم ؟
سطام :ولله نسيت اسأل اخوك اكيد يذكرها حبه الاول
نايف :لو اسأله يهبدني ...صب بس صب
سطام :كيف الشاهي ؟
نايف :الله حق الشاهي حقك حلو احسن من حق بدر
سطام :اعرفلك انا ضبطته على مزاجك
نايف :وانت مزاجك كيف
سطام يخلط الكاس :مو واضح ؟
نايف :وش
سطام :ازيد سكر ونعناع وتراني خبير بالشاهي لدرجه اقدر احلل شخصيتك منه
نايف حط الكاس :يلا حلل
سطام :انت تحب ملعقتين سكر وبدون نعناع متردد وخايف من التجربه الجديده ومتعلق بروتينك وما تحب تغيره
نايف :يعني جبت نص
سطام :كذاب جبت ثلاث ارباع
نايف :لا ولله نص ما تعرفني اكثر من نفسي انت
سطام :النص الثاني اجيبه من الفول كيف تحبه
نايف ضحك :تصدق ولله ذباتك حلوه
سطام :تبي كاس ؟
نايف :صب
الصباح
ابو سطام :وين نايف وسطام
سيّاف :بالسطح نايمين
ابو سطام :وش وداهم السطح
سيّاف :يسولفون اخر الليل وطردتهم ينامون فيه ازعجونا
ابو سطام يضحك :زين سويت
طلع ابو سطام فوق الا نايف وسطام نايمين وقال :ما ودكم تقومون
سطام :شوي
ابو سطام قرب :اييه شربتم شاهي اخر الليل ولا بتقومون الحين
نايف :بس خمس دقايق
ابو سطام :براحتكم بس الي بيتأخر بيجلس ذا الشهر بدون راتب
سطام قام :الحين جايين
نايف:اصلًا ما نمنا بس غمضنا شوي
ابو سطام :ربع ساعه الا انتم بالمحل وفطوركم بيجيكم
سطام :ابشر
سيّاف طلع :هاه كيف نومه السطح
نايف :زي وجهك ما نمنا الا نص ساعه
سيّاف :ليه ...اوه عشان ذا البرادي
سطام :بس طلع احسن شاهي اشربه بحياتي
سيّاف :اخوك ما بيجي اليوم ؟
نايف :الا يمكن يجون الظهر
سيّاف :زين
ابو سطام على الدرج :عشر دقايق الا انتم بالمحل
سطام :ما كانت ربع ساعه ؟
ابو سطام :اخذتم خمس دقايق تسولفون
...
الهنوف :ريوف ريوف ما ودك تقومين ؟
ريوف :هاه ؟
الهنوف :قومي معد باقي الا انتي نايمه
ريوف :كذابه الساعه كم ؟
الهنوف :الساعه ثمانيه
ريوف :ثمانيه الصباح ليه ؟
الهنوف :بنرجع الديره اليوم
ريوف :طفي المكيف والحين بقوم
الهنوف :طيب
طلعت الهنوف الا وجدان جالسه على جوالها :انتي من الصباح على الجوال ؟
وجدان :مسلسل
الهنوف :جهزتي اغراضك ؟
وجدان :اي جاهزه
الهنوف:واختك والبنات جهزوا ؟
وجدان :ايه
الهنوف :شوي ونطلع لا تنسون شي
وجدان جتها رساله بالتيل :يا سارق القلب متى تعود ؟
وجدان :انا بس لو اعرف من ذا من البارح يرسل
الهنوف :ايش
وجدان :لا ولا شي بس تحمست
وافي يصرخ من غرفته :ربع ساعه ونطلع
الهنوف :طيب
وجدان :اجل يلا بقوم انا
الهنوف :وشوفي ريوف معاك
وجدان طيب
بعد ما طلعوا السياره
وافي :باقي احد ؟
الهنوف :لا
وافي :اجل توكلنا على الله
الهنوف :اخذت كل شي؟
وافي :اي
الهنوف :حتى ادويتك ما نسيتها
وافي :الادويه بغيت انساها عطيني المفتاح
ريوف :نسيت شاحن ملاك اذا بتجيبه
وافي :طيب
الهنوف :بالغصب لقيته هاك
وافي :شنطتك فيها كل ما هب ودب
نزل وافي واخذ ادويته وراح يدور للشاحن ما لقيه وارسل لملاك :وين شاحنك ؟
ملاك :مدري دور له
ريوف :لقيته معاي طلع
الهنوف :اجل بدق عليه يجي
وافي توه بيرسل :انتي تسوين ذا كله عشان تنتقمين مني اني حبستك بالغرفه بس ما كنت بوعيي تعرفين المخدرات انتي تأثر بالعقل وفوق ذا مستغله ضعفي
الا الهنوف دقت
وافي :الو
الهنوف :الشاحن معاها تعال
وافي :طيب
قفل المكالمه وجلس يفكر يرسلها ولا لا بس بالاخير ما ارسلها لأنه حس ان ملاك مالها ذنب وهو يستحق الي يصير وارسل لها :ما بتبلكيني ؟
ملاك :انا عند وعدي ابلكك اذا وصلنا الديره وانت بأمانتي لين ننزل عند البيت
وافي :انا جيت على اساس محرمكم وانقلبت الايه صرت امانتك
ملاك :صدقني ما اسويه من راسي عمي هو الي قال لي وش اسوي وحلفني على ذا الشي
وافي :بسبب فضولك يوم رحتي وسألتيه
ملاك :اول مره اتفق معاك بنقطه
الهنوف :هاه بعد وش عادك تسوي خلنا نمشي احسن
وافي :طيب بس اكلم واحد من الشباب
ملاك خذت نفس عميق يوم قال واحد من الشباب
الهنوف :اي ولله ذكرتني نايف بسأله عن شي افتح لي نت
وافي :خلص نتك ؟
الهنوف :اي افتح لي
وافي :فتحت
الهنوف ارسلت لنايف :شافتها ؟تراها تنزل رسايل التيل ستوري انستا
نايف رد :ايه وردت علي
الهنوف :وش ردت ؟
نايف :زي الزفت
الهنوف :يا حياتي هي
نايف :ليش ترد كذا ؟
الهنوف :لأسباب منطقيه
نايف :وش هي ؟
الهنوف :اول شي اختبارها من جد زي الزفت امس بكت وحضنتها ثلاث مرات ثاني شي ما تدري انك نايف
نايف :منجد ولله طيب وخويتها زينب كيف اختبارها
الهنوف :ليه تسأل عنها ؟
نايف يكتب
الهنوف :ولا تلعب على الحبلين انت ؟
نايف يكتب لسى
الهنوف :كنت اعرف ان الرجال كذا اساسًا انت لو تهمك ريوف كان عرفت كيف اختبارها بدون ما تسألها
نايف : يا بقره ركزي معاي ليش دايم تقلبون اي شي لسالفه لو يهمك عرفت بس اسأل عن زينب عشان ابي اتطمن ان ريوف مو لحالها ما حلت
الهنوف :اهاا زينب اخس منها
نايف :مدري ليه تحبون تكبير المواضيع
الهنوف :لا بس صدق كيف ما تعرف
نايف :وشلون اعرف بدون ما أسألك او اسألها
الهنوف :تصرفاتها
نايف :وشلوووون وشلون ما اقدر انتم بديره وانا بديره وترا ماني هكر اخترق جوالها واراقبها واعرف تصرفاتها ولا ودي اصير
الهنوف :منجد فيه ناس كذا ؟
نايف :اي منجد شوفي القصص بالعالم كيف الهوس يوصل انهم يخترقون الجوالات
الهنوف :اعوذ بالله الله لا يذوقنا ذا الهوس
وافي :جوالي بيطفى لازم اقفل البايانات
الهنوف :لا تكفى
وافي :عطيني شاحن متنقل اجل
الهنوف :ممعاي احد معاه
ديم :ملاك معاها امس عطتني
ملاك :هاك
ارسلت لوافي :اجحدها بعدين
وافي :معقوله كلكم ما عندكم الا ملاك ؟
الهنوف :شفيها ملاك ؟
وافي :لا لا مافيها شي بس اقصد انه كيف بذا الزمن ناس عايشين بدون شاحن متنقل
الهنوف :انت اولنا
وافي :شفيك اليوم شادتها ؟
الهنوف :لا بس انتم تقهرون
وافي :تبين نرجع بك عند راعي الصحون تكسرين ؟
الهنوف :لا ما ابي الا الديره
وافي :زين اجل اسكتي لين نوصل
الهنوف :اني بسكت
وافي : ردي على جوالي
الهنوف :مين ؟
وافي :امي ولا ابوي اكيد ما عندي احد
ابو وافي :الو
الهنوف :الو
ابو وافي :اذا عادك ما مشيت امش الحين فيه ناس يبون يجون يخطبون الهنوف وابيك معاي
الهنوف :ايش يبه ميين ؟ كيف ما تاخذون رأيي
ابو وافي :الهنوف ؟ بناخذ رأيك اكيد والحين هم جايين بس يكلمونا
الهنوف :مين طيب ؟من اهل الديره ما ابيه من الحين اقولك
ابو وافي :جار عمك ابو خالد القديم
الهنوف :هذاك العزابي الي يودون له اكل برمضان ؟
ابو وافي :اي عليك نور اذا خذتيه ما بيصير عزابي
الهنوف :وش عرفه فيني ؟
ابو وافي :وحده تلعب كوره بالحوش مع البزران وتسطح الكوره لبيته طبيعي يعرفك
الهنوف :سأل عني كذا هذيك الي تسطح الكوره لبيتي ؟
ابو وافي :للأسف اي
الهنوف :يبه من ايام الثانوي
ابو وافي :الحين خريجه جامعه
الهنوف :وهو كم عمره ؟
ابو وافي يمزح :لو يهمك عرفتي
الهنوف :يبهه
ابو وافي :يومتك بالثانوي كان يدرس جامعه وتخرج من اربع سنوات وتوظف وجا مع اهله يبونك
وافي :وش ذا المكالمه الطويله
الهنوف:مالك دخل افتح لي نت بسرعه
ابو وافي :اكيد بتسوين اجتماع عاجل مع السلامه
الهنوف :مع السلامه احبك
وافي :وش فيه ابوي ؟
الهنوف:قصه طويله
وافي :قوليها
الهنوف:لحظه بس
اريلت بالقروب حق البنات السالفه وكلهم شهقوا يوم شافوا الرسال
وافي :رفقًا بي فأنني في زمان غير زمانكم اعطيني العلم
الهنوف تتكلم بسرعه :جارنا اقصد جار عمي سعود هذاك العزابي الي كانوا يودونه اكل برمضان لأنه مسكين صار مو مسكين ويبي يجي يخطبني لأني كنت اسطح الكوره ببيته
وافي :على حسب ما اذكر كان كويس ما يدخن ولا شي بنوافق ونزوجك ونفتك منك
الهنوف :ابوي بياخذ رأيي انا بوافق بعد ما افكر واستخير الحين خلني اشوف التحليلات
دخلت القروب الا وجدان ارسلت :اذا بتقبلين اشرطي عليه الزواج بعد ما تتوظفين وانه ما يحرمك من حقوقك لو جيتي بتكملين دراسه او ترقيني بمدينه ثانيه او شي او بتسوقين واهم شي اشرطي عليه مؤخر لو تطلقتم وانا بصير محاميتك
ديم :كتبتي مسلسل كامل من الزواج للطلاق
ريم :كم عمره وكم فرق العمر بينكم
الهنوف :مدري بسأل وافي
غيداء :اي اسأليه عشان فرق العمر مهم مره
الهنوف :وافي
وافي :هاه يا عروستنا
الهنوف :للحين ما صار شي
وافي :وش تبين ؟
الهنوف :كم عمره
وافي :اخر مره يوم تخرج من الجامعه يعني قبل اربع سنوات كان ٢٦
الهنوف :الحين ٣٠
رجعت للقروب
الجازيه :خمس سنوات احس عادي
ريوف :لا ما احس عادي احسن فرق ثلاث سنوات
زينب :اتفق
غاليه :وش صار
غيداء :صح النوم
غاليه :اما بيخطبونك
الهنوف :وش رايك
غاليه :القرار قرارك وانا مالي بالموضوع يد
الهنوف :احس ما اعرفه زين
ريوف :انا اذكر شكله
ديم :اي منجد انتي كنتي تودينه الاكل
ريوف :يعني حليو ماهو مره بس كان يهتم بجسمه ويروح النادي مدري الحين باقي ولا لا
الهنوف :احس بفكر
وجدان :وهو لازم تفكرين يعني محد بيتزوج بدون تفكير
الهنوف صرخت :خلاص هدوء
زينب :محد يتكلم
الهنوف :بالقروب رسايل وبعقلي اصوات احس ازعاج ما يخوف صح ؟
وافي :احس ما يخوف لو جا واحد وخطبني عادي
الهنوف :لأنك ولد مستحيل تجرب ذا الشعور شخص ما اعرفه ولا اعرف حتى اسمه اقرر خلال ايام اني اعيش معاه حياه كامله
وافي :الو
الهنوف :مين تكلم ؟
وافي :عمي ...ايوه هلا
ابو خالد :هلا
وافي :كيفك ياعم ان شاء الله بخير ؟
ابو خالد :الحمدلله انت كفيك ؟
وافي :بخير دامك بخير
ابو خالد :وش بغيت
وافي :لا ولله بغيت اسألك عن جاركم القديم نسيت اسمه
ابو خالد :غازي
وافي يأشر للهنوف :اي غازي غازي ...اكتبي
الهنوف :طيب
وافي :كيف اطباعه وعاداته
ابو خالد :عاداته نص سعودي وكويتي
وافي :نص سعودي وكويتي كيف؟
ابو خالد :امه كويتيه شكلها
وافي :وش وظيفته يعني وش كان تخصصه ؟
ابو خالد :دكتور
وافي :حلو ... يدخن هو يا عم ولا ؟
ابو خالد :لا لا ما يدخن واكله وطبخه نظيف مره ارسل لنا برمضان طبخه حلو احسن من ام خالد
وافي :لا يا عم فيه اشياء ما يصلح تقولها الحين كيف انسى الي قلته
ابو خالد يضحك :هاه عادك بتسأل عن العريس ولا ؟
وافي :اتوقع خلاص ولا ؟
الهنوف تهمس:عنده خوات ؟
وافي :اي عنده خوات
ابو خالد :بتعرس عليهم ولا ايش ؟
وافي :لا بس نضمن سلامه اختي
ابو خالد :ولله مدري أسألوا جماعته وبعدين اول مره اشوف ناس يسألون قبل يجيهم المفروض يجي ويقعد مع ابوك وابوك يقول له انا سمعت عنك انك طيب بس بنسأل اكثر
وافي :وهنا المشكله يا عم ابوي ما سمع عنده الحين بعطيه ذا المخلص وبعدين نسأل جماعته عنه
ابو خالد :ان كان تبغون شي انا موجود بالخدمه
وافي :ما قصرت يلا مع السلامه
ابو خالد :مع السلامه
وافي :هاه كتبتي
الهنوف :اي كتبت اسمه غازي دكتور ويطبخ وما يدخن وما ندري عنده خوات ولالا
وافي :شرايك فيه ؟
الهنوف :صفاته حلوه بس للحين مدري عن شخصيته
وافي: بتقعدين معاه
الهنوف :ايو ما احب اقعد مع عيال
وافي :وش مقعدك معاي
الهنوف :انت اخوي بس شخص غريب بقعد معاه كيف ؟
وافي :وخالد امس كسرتي راسه
ديم :مو الهنوف انا
الهنوف :خالد ولد عمي عشنا مع بعض بالطفوله بس الحين شخص ما اعرفه وحتى نص كويتي يعني غريب عنا
وافي : وش غريب خليجنا واحد
الهنوف :خلاص يصير خير بس نوصل
...
ام وافي :هذي البشاره ولله
ام احمد :بغيت اخطب لأحمد بس شكل الهنوف بتسبقه
ام وافي :فرحتنا وحده
ام احمد :اي ولله فرحت للهنوف زي بنتي
ام سطام :وش فرحته وهي بالطريق باقي ولا تدري ويمكن ما توافق
ام سيّاف :ان شاء الله توافق ونفرح فيها
ام خالد:ما تعرفون العريس اول اسألوا عنه يمكن ماهو صاحي
ام وافي :هو جاركم ما كان كويس ؟
ام خالد :الا ولله كان كويس بس محد يدري وش صارمن يوم راح مر اربع سنوات والانسان يتغير حاله بيوم وليله
ام وافي :احنا مالنا رأي فوق رأي الهنوف وبس بنسأل عنه وعن اهله وان وافقت الله يوفقها وإن رفضت خيره من الله
ام سيّاف :اي ولله بالاخير انتي بتعطينه بنتك تعيش معاه عمر كامل
ام سطام :الحين خلونا نقعد نخلص اشغالنا الصبحيه ذي وان كان وصلوا الظهر نتغدا ونشوف بيتك اذا تبين نرتبه ونتزين ونقابلهم
ام وافي :ما قصرتم
...
نايف :ايش ؟
ابو وافي :بيخطبون الهنوف
نايف وهو يقوم:الله يوفقها
ابو سيّاف :شفيه ؟
سطام :بيروح يصيح الهنوف اقرب اخواته له
ابو سطام يضحك :حساس ذا الولد
ابو وافي :ولله انا حتى انا بتجيني الصيحه لا شفتها بالفستان الابيض ابودع اصغر بناتي
ابو سطام :هاه هاه جته الحاله
ابو خالد :شكل حتى انا بتجيني الحاله ذي المره الهنوف روحها حلوه واحبها زي بناتي
سطام :ما ودك تجيك الحاله مع القوم ؟
ابو سطام :الله حق احس اني فرحت لها بس قلبي يتقطع عليها قالت لي بابا قبل ابوها
ابو وافي ما قدر يمسك نفسه ودمع
ابو سيّاف :يا جماعه تعوذوا من ابليس مابه شي لا تزوجت وانتم تقولون ان كل جمعه الغدا عندك يابو وافي هي بتجيهم كل جمعه وبتطفشون منها من عيالها ان شاء الله بس تعوذوا من الشيطان وتراها فرحه لكم لا تبكون وتخربون فرحه البنت مسكينه
بدر :وشو فرحه باقي ما وافقت ولا شي
ابو سيّاف :هاه وبدر صادق يمكن الولد يطلع ماهو بزين ولا هي ما ترتاح له ودموعكم تروح عالفاضي
ابو سيّاف :قم شوف ولد عمك
سيّاف :ان شاء الله
قام سياف وراح الا نايف يبقي بالحوش
سيّاف :يا ولد وش ذا الحال
نايف حضنه :بسهر عند مين اخر الليل اذا هي راحت
سيّاف :هذي سنه الحياه بتتزوج هي وانت ببتزوج بعدها ان شاء الله وعيالكم يلعبون مع بعض
نايف :انت يمكن ما تعرف شعوري الهنوف اكثر وحده اسولف معاها تعرف كل شي عني
سيّاف :اعرفه اعرفه وانا بمر بأسوء منه اذا تزوجت ملاك مغير هي اختي الوحيده لو راحت ببقى وحيد بس تعوذ من الشيطان ولا تكسر فرحتها ان كان هي بتفرح
نايف :صح بكلمها
سيّاف :لا تكلمها وانت بذي الحاله
نايف :ما عليك ما بتلاحظ ...الو
الهنوف :الو
نايف وصوته متغير :جاك الخبر
الهنوف لاحظت :اي
نايف وهو رجع يبكي:بتروحين وتخليني؟
الهنوف بكت معاه :مدري
نايف يضحك وهو يبكي :اول مره تقولين مدري بالعاده انا اقولها
الهنوف تمسح دموعها وتحاول ما تبكي :حسيت فيك وبكل مره قلت فيها مدري
نايف :لا تضغطين على نفسك تمام ؟ اذا ما تبين لا توافقين
الهنوف :اكيد
نايف :يلا مع السلامه
الهنوف :مع السلامه
وافي :مين ؟
الهنوف وهي تمسح دموعها :نايف
وافي يضحك :عسى صاح ؟
الهنوف :اي
وافي انقلبت ضحكته بكيه :امس كنت امردغك كيف كبرتي بسرعه
الهنوف تمسح دموعها :خلاص لا تبكون وتبكوني معاكم تراني برفض عشانكم
وافي اشر لها بيده عشان تقرب وباس راسها :لا ترفضين عشان احد ولا توافقين عشان احد قرري عشان نفسك بس
الهنوف بعد ما سكتت رجعت تبكي
وافي :شفيك
الهنوف :غاليه
وافي :شفيها
الهنوف :ما بتكون معاي بذا اليوم
وافي رجع يبكي :لحول مو وقت سفرها عاد مو وقته
الهنوف :هي وعدتني تكون معاي بكل لحظاتي
ديم بكت معاهم وقالت :معليك احنا بنعوضك بس لا تسوين دراما خلاص امس بكيت على الفلم بما فيه الكفايه
ريم تضحك :عسى حتى انتي بكيتي ؟
ديم :وليش ما ابكي شوفي كيف يحزنون
ريم بدت تدمع :منجد يحزنون
ملاك تمسح عيونها :شكله فايروس ينتشر مو طبيعي كلنا
وجدان :لا انا بقاوم ...ما قدرت اقاوم
ريوف :انا ماسكه الصيحه من امس
زينب :انا امس بكيت بس ما يمنع اكمل
الجازيه :لا تبكون ما احب احد يبكي ولا ابكي معاه
غيداء تبكي :تخيلت نفسي مكان الهنوف كيف بفارق زينب واحمد ومشاري
وجدان مسحت دموعها :وش ذي الرحله رحله الصياح خلاص اسكتوا باقي ما صار شي اذا شفتوها وقعت عقد القران لكم الحق تبكون لين تتفجر عيونكم
الهنوف :منجد خلاص لحد يبكي عشاني خلاص وقفوا صياح كلكم ...انت خاصه امسح دموعك عشان تشوف الطريق زين
وافي :بمسحها بس اول ما ننزل بحضنك
الهنوف :غاليه تدق بنرجع نصيح
غاليه :الو ...اسفه اني ما بكون معاك دورت رحله رجعه للسعوديه اليوم ما لقيت
الهنوف وصوتها متغير :لا عادي لا تتعبين نفسك
غاليه :تبكين؟ ...خالد دور رحله مره ثانيه بأي خطوط تكفى
الهنوف :لالا ما ابكي
غاليه :الا تبكين اختي واعرفك
الهنوف :اي ابكي بس مو عشانك ...يعني عشانك بس مولازم تجين نايف الله يهديه خلاني ابكي
غاليه تبكي :ياحبيبي هو يحبك اكثر منا
الهنوف :انتي الحين لا تبكين واستمتعي بأجازتك ما بعد صار شي بس خطوبه ويمكن ما تتم
غاليه :وانتي مثل ما قلت لك رأيك اهم شي وسعادتك لا تفكرين بأحد
الهنوف :ان شاء الله
غاليه :يلا مع السلامه
خالد :هاه شفتي عادي
غاليه ساكته
خالد راح عندها:تبكين ؟
غاليه :يا روحي هي اذكرها وهي بزر كيف كبرت
خالد جته البكيه:يعني الحين العنود بتكبر بسرعه زيها وتدرس ابتدائي بعدين متوسط وثانوي وبعدين جامعه وتتخرج ويجي واحد ياخذها مني كذا بكل بساطه ؟
غاليه حطت راسه بحضنهاوهو قال :كيف نحافظ على عمرها كذا صغيره ؟
غاليه :سنه الحياه هذي
...
بعد ما وصلوا الديره نزل وافي على طول وفتح الباب للهنوف وحضنها ورجع يبكي
الهنوف بعدته عنها ومسحت دموعه وهي تقول :خلاص بتدخل عند الرجال كذا
وافي رجع حضنها :خليني اشبع منك قبل ياخذك واحد بعيد عنا
الهنوف :اكيد بزوركم بس طبعًا لو وافقت يعني يمكن ما اوافق
نايف جا ووخر وافي وحضنها على طول ووافي يطالع فيهم ويمسح دموعه
ابو وافي يمسح دموعه :خلاص وخر كتمت البنت
ابو سطام :منجد ابعد عنها خلها تاخذ نفس ولا خطتك تقتلها ومعد تتزوج
نايف بعد وجا حضنها ابو سطام :يا روحي انتي كبرتي بسرعه
ابو وافي :وخر تراها بنتي ماهي بنتك
وابو راشد وتركي يطالعون من بعيد وتركي قال :معقوله ذا كله عشان بنت بتتزوج وهي حتى ما وافقت ولا شافته ولا شي؟
ابو راشد :حتى عيال عمها لو انهم من محارمها حضنوها طالعهم كلهم يبكون حتى ياسر وولده سيّاف ما يعرفونها زين لكنه يحبها لأنه بنت اخوه ويبكي من معزته لخوه
تركي يطالع بوجدان :غريبين ولله مع اختلاف شخصياتهم ومشاكلهم بس يحبون بعض
ابو راشد :قلوبهم على بعض وانا ابوك قلوبهم على بعض مهما كبرت بينهم المشاكل يحبون بعض وانت خابرها مشكلتهم اول شكبرها واليوم نسيوها كلهم وهذي نعمه ما تلقاها بكل العوايل
...
بعد الغدا
الهنوف :خلاص قلت لك عادي ولله ولله عادي وحتى اليوم ما بتصير النظره الشرعيه بس بيكلمون ابوي والنظره الشرعيه بنخليها اذا جيتي ...اي اي معليك ... يلا مع السلامه ... يا ويلك تبكين
ام وافي :غاليه؟
الهنوف :ثالث مره تتصل تتأكد احتاجها ولا لا
ام وافي :يا روحي هي
ام سطام :هاه نمشي نشوف البيت
ام وافي :يلا
الهنوف :ارتاحوا انتم واحنا بنروح
ام احمد :لا العروسه المفروض ما تكرف لازم ترتاح
الهنوف :بعدني مو عروسه وابا ادلع امي لين اخر دقيقه اذا ما دلعتها انا مين يدلعها
ام احمد تطالع بزينب :زوجات اولادها
ام وافي :معليش يام احمد زوجات اولادي مستحيل يجون زي بناتي
الهنوف تطالع بريوف :صح محد يعرف امي كثرنا ...بس يمكن ربي يرزقها بزوجات اولاد يعرفونها وتربوا ببيتها
ام وافي فهمت :يمكن
الهنوف :خلاص زي ما قلت لك ارتاحوا واحنا بنروح
ملاك حطت جوالها :يلا
وجدان ماسكه الجوال :شوي والحقكم
...
وافي جته رساله :عطيتك رقمي ذاك اليوم لأني خفت منك للأمانه بشخصيتك فيه جزء مرعب اتوقع انه بسبب المخدرات لكن متأكده فيها جزء جميل وبيوم من الايام بيطغى وحتى اليوم شفته وركزت عليه بعلاقتك مع الهنوف ،صح غلطت بس الغلطان دايمًا يحتاج فرصه وانت ربي عطاك فرصه كبيره لا تضيعها لأنها لو ضاعت مستحيل يجي مثلها ،اتمنى اكون جزء جميل بعلاجك ولو اني ضغطت عليك بعض الشي لكنه كان من الاحتياطات ومثل ما وعدتك ببلكك اول ما نرجع وهذانا رجعنا

وافي رد عليها بعد تردد:اكيد بتكونين جزء جميل وحتى جزء غريب لأنه محد قد ضغط علي بذا الشكل بحياتي بالبدايه شفت انك غلطانه بذا الضغط بس يوم تذكرت الي سويته واني قفلت الغرفه علينا اشوف ان معاك حق واكبر حق بعد
لكن الرساله ما وصلت لها لأنها قد بلكت الرقم
وافي يكلم نفسه :غبي انا كيف كنت بريل لها ذا الكلام لو شافته تحسبني احبها الحمدلله انها بلكت الرقم

مشاري :تكلم نفسك واضح انك متأثر بزواج اختك
وافي :لا ماله دخل بس جوالي يعلق شكلي بشتري لي واحد جديد
مشاري :لا تاخذ لك ١٢ ولا ١٣ يجي بدون شاحن خذ ١١ حلو
وافي :ابشوف بعدين
مشاري :اساسًا ابل مكذبين علينا مسوين انه تطورات مافيه شي مغير كميرات زياده ويشيلون شواحن
وافي :انت تخصصك امن سيبراني صح ؟
مشاري :اي
وافي :يعني تعرف تهكر
مشاري :اعرف بس اعرف عواقب التهكير
وافي :كيف سهل التخصص يعني صرت تشوف سهل تهكر جوال
مشاري :سهل بس لو تغلط بحرف واحد يخرب كل الي سويته وتعيده من جديد ...وحتى اذا تبيني اشوف جوالك واضح المشكله مو من الشاشه او كسر مشكله بالنظام
وافي :ايي عليك نور نسيت احدثه
مشاري :كم تحديث مر عليه تحديث واحد مستحيل يعلق
وافي :خمسه
مشاري :وش حدك ؟
وافي وهو يتذكر ايام كان يتعاطى :ادور على وظايف وامور الدنيا اشغلتني ونسيته
مشاري :الله يرزقك الوظيفه الي تتمناها
وافي :آمين ويحقق لك الي تتمناه
مشاري ابتسم :امين
...
بعد العشاء
العنود :جو جو
ريوف :خلاص اسكتي لا يسمعونك خلينا ندخل داخل
الهنوف :تمشي انتي تعرفينه قولي لنا اي واحد هو
ريوف :بتسوون حركه النافذه؟
الهنوف :اي امشي بسرعه
ريوف :جيت
يوم طلعوا فوق قفلوا نور الغرفه وجلسوا يطلون من النافذه
ريوف شافت واحد ينزل من باب السايق :هذا هو
وجدان :اشوف
غاليه وهم فاتحين لها مكالمه بالسناب وتتفرج معاهم :الي نزل من قدام صح؟
ريوف :اي هو
غاليه :ولله يمشي الحال حليو
خالد :يلا انا جاهز تبين ننزل
غاليه :انا بقفل مع السلامه
الهنوف :شكله وعرفناه باقي شخصيته
ريم :يمه كم وحده نزلت من السياره
الجازيه :واضح خواته كثير
ملاك وعينها على ولد صغير :حتى اطفال معاهم
ديم :يلا ننزل بسرعه بيدخلون
ريم :منجد خذتنا السوالف امشوا نستقبلهم
ريوف :امي تقول لا تنزلون مره وحده نصكم يروحون الحين والنص الثاني بعدين والهنوف مع النص الثاني
وجدان :حركاتها خالتي ام خالد ما تبطلها
غيداء :نفس امي
نزلوا استقبلوهم وتعرفوا عليهم ثم نزلت الهنوف مع باقي البنات قالت ام وافي :هذي الهنوف بنتي
اخت غازي تطالع فيها :امم ماشاء الله تجنن
ملاك عينها على الولد الصغير من اول ذكرها بأخوها ماجد يوم لاحظوا نظراتها عليه صرفت الموضوع وقالت :تبي تلعب مع الاولاد برا ؟
امه :تبي تلعب ؟
الولد :اي
ملاك :بوديك انا
وجدان تهمس :لا تنسين وتلعبين معاهم
ملاك :معليك
اخذت الولد وودته مع الاولاد برا وقالت لهم :لا تقربون من الشعير فاهمين ؟
واحد من الاولاد :كل يوم تقولينها خلاص طفشنا
ملاك :عشان سلامتكم
...
وافي :تفضلوا اقلطوا للعشا
ابو وافي قام مع الرجال :يالله حيهم
ابو غازي :الله يحيك
بعد ما جلسوا على الاكل
ابو خالد :ما جبت الببسي يا ولد
وافي لسى ما جلس :الحين اجيبه
طلع وافي وراح لسيارته عند بيت ابو سيّاف وشاف ملاك وهي تدخل البيت بكامل زينتها واناقتها كلم نفسه على طول :اعوذ بالله وش ذا التصادف الغريب بكل مكان اشوفها ...معلينا خلاص مرحله وعدت الحين ليش جيت ؟ اي صح ببسي
توه اخذ الكرتون الا سمع الاطفال يصرخون:عقرب عقرب ...