وانا في درب الهلاك ظهرت لي يا ملاك

32

وافي اقترب من نايف واحتضنه :نايف ولله ما سويت شي اسمعني اهدا شوي
دفعه نايف بقوه حتى ارتطم بمرآه وتكسرت :ما افتخر فيه ولا بسمعك انت انسان قذر وقليله فيك ذي الكلمه
وافي بالارض بتألم :نايف انت اخوي المفروض تسمعني مو انت قلت لي اذا كان غلط بنصلحه سوا ؟ اسمعني بس اوضح لك غلطي
نايف اقترب من وافي واخذ بياقته :انسى شخص اسمه نايف وانسى امي وابوي اعتبر انهم تبروا منك مثلي كان ودي يعرفون لكن ما ابيهم يزعلون ...
اخذ قطعه من الزجاج ورفعها بقوه وهو يبكي :بخليهم يعرفون انك مت على يد اخوك
اكمل بغصه البكاء :ومثل ما وعدتك غلطك بنصلحه سوا انت بتموت وانا بروح قصاص بس انك تعيش وانا اعيش وانت مسوي ذا مستحيله
وافي وهو ينظر للدم المتساقط من يد نايف اثر ضغطه على الزجاج وببحه قال :نايف انت كذا بتوجعهم اكثر بيفقدون عيالهم كلهم لا تسوي كذا اذا ما تبيني بهاجر بس انت حياتك واحلامك ريوف امي ابوي وش بيسون بعدك ؟
نايف أخذ نفس عميق و رمى الزجاجه جانبًا ومد يده لوافي :قوم
وافي ابتسم بحزن :اعرفك يا نايف ما تسويها
نايف :اجلس وانت ساكت تكفى ما اقدر اسمع صوتك
اخذ هاتفه واتصل بعمه :الو يا عم
ابو سطام :هلا
نايف :تقدر تجي بيتنا ؟
ابو سطام :مشغول شوي ذي الايام
نايف بغصه:ضروري يا عم
ابو سطام :وافي عندك ؟
نايف تنهد وهو ينظر لوافي :اي
ابو سطام :صار شي؟
نايف :تعال بس ونتكلم
ابو سطام :الحين جاي مسافه الطريق
جلس نايف بجانب وافي وهو يلف جرح يده وقال بغصه :كيف قدرت تسويها ؟ كيف قدرت تخون
وافي :انا ضحيه يا نايف ضحيه
نايف :طيب اقل شي كان قلت لي كنت اقدر امنعك
وافي دمع :كنت اخاف من رده فعلك اخاف اني اخيب ظنونك فيني وانت مره قلت لي اني قدوتك كنت اخاف
نايف نظر له :على اساس الحين يوم عرفت من غيرك واخر من يعرف ما خابت ظنوني ؟
وافي نظر لعينيه :تكفى قول انك تصدقني مقدر بدونك
نايف نظر له طويلًا وتنهد :مقدر اصدقك مثل ما قلت لي مره الي يكذب عليك مره يمديه يكذب ميه مره
وافي :بس انا اخوك
نايف ببحه :تكفى لا تقولها وتوجع قلبي
وافي :وانا تحسب اني ما اتأثر ؟ ست شهور كاتم على حالي موجوع قلبي بالتفكير ابي اقول لك بس عمي منعني عشان احميك واحمي الي احبهم مارح تصدقني بس اسمع من عمي بيقول لك كل شي وعمي ماقد كذب
نايف :طيب نقول انا صدقت واكتشفت انك مذنب وملاك ؟ ما تحبها ما تخاف انك تفقدها بسبب غبائك ذا ؟
وافي :الا اخاف مو امس قلت لك لو طلعت هي الي تراسلني وعرفت انه انا رح تقطعني؟ هي تعرف وتكرهني لذا السبب
نايف ابتسم بقهر :بنت عمك عرفت قبل اخوك
وافي :صدقني مو بأرادتي علمتها ما اعرف كيف عرفت ونشبت لعمي لين أكد لها على ذا الشي
نايف :تعرف بسالفه البنت وسبك للصحابه ؟
وافي :سالفه البنت تعرفها وترا ما صار شي ولا لمستها وسبي للصحابه ما كنت بوعي ولا عرفت انهم صوروني ولا شي
نايف التفتت للجهه الاخرى الممتلئه بالزجاج :طيب طيب
نظر لوافي مره اخرى :من متى ؟
وافي :سنه
نايف :سنه يا وافي اعتمرت فيها مدري كم مره ولا رق قلبك ولا قلت برجع لربي؟وكنت تقول ليه ما وفقني ربي وليه ما توظفت ليه محد قبلني من شناعه افعالك
وافي:لا عرفتهم قبل سنه بس ما عرفت بفعلهم الا اخر شهرين
نايف :شفت كيف الشهرين ذي كلفتك كثير ؟ شفت كيف اخذت من عمرك ست شهور وبعدتك عن احبابك ؟
وافي بغصه :نايف خلاص ترا اكلني تأنيب الضمير من زمان وخلصني لا تزيدني هم
نظر نايف لهاتفه :عمي شكله جا قوم خلنا نروح
وافي قام بألم
نايف ساند وافي حتى السياره
ابو سطام نزل :وش جاه وش كل هالدم على ثوبه ؟
نايف ترك وافي وصعد السياره :خذه بس
وافي :عرف
ابو سطام نظر له بصمت وسانده الى السياره واجلسه بالخلف :الحين وش صار؟
نايف :انتم المفروض تقولون وش صار
وافي :كان بيطعني
ابو سطام نظر لنايف:شطور عشان يقصون فيك ويبقى اسمك انك قاتل اخوك
نايف :ماهو اخوي
وضع وافي يديه على عينيه بضيق
ابو سطام :الا اخوك مثل ما انا عمه هو اخوك
نايف بصراخ:الي يقول عن بياعين انهم احسن من الصحابه يعتبر اخ؟ الي يشجع على اللعب ببنت صغيره لو تزوج عنده بنت بعمرها يعتبر اخ اذا انت تعتبره ولد اخوك انا ما اعتبره اخوي
ابو سطام التفت لوافي بالخلف :وش ذا ؟
وافي بضيق :فيه احد ارسل فلاشه لنايف ويوم فتحها طلع لي فيديو ...
ابو سطام :وش ؟
وافي اكمل :وانا كنت مو بوعي سبيت الصحابه
ابو سطام بذعر :وين الفلاشه والفيديو ؟
نايف :بالبيت
ابو سطام :انزل جيبها ذي لو تنتشر يمسكون اخوك بتهمه الطعن في الصحابه
نايف :مكانه
وافي ببحه :نايف والي خلقنا من اب واحد ما كنت بوعيي اكيد حفظوني الكلام معرف استاذ اسمه نوري عشان اقول كذا
نايف بحده:غلطك من البدايه انك تروح لهم
ابو سطام قاطعه:خلاص انزل جيب الفلاشه والفيديو والظرف الي جت فيه
نايف نزل :بجيبه عشان تشوف خيبه ولد اخوك
ابو سطام :وش سوا فيك؟
وافي :كنت ابي اهديه ودفني طحت على مرايا شكل ظهري تجرح منها
بلع ريقه واكمل :هو اخذ قطعه من القزاز وكان بيطعني فيها
ابو سطام :محد بالبيت ؟
وافي :لا امي والبنات ببيتكم وابوي خويه عزمه على عرس بالنعيريه وراح مافيه الا احنا
ابو سطام يبحث عن رقم عيسى:الله ستر بس
وافي :بتكلم مين ؟
ابو سطام :ابو عبدالمحسن ...اي عيسى فاضي؟
ابو عبدالمحسن بسخريه:اي فاضي تبي اغمز ظهرك يالشايب ولا اقيس ضغطك؟
ابو سطام بجديه :تعال مكاننا بنتكلم
ابو عبدالمحسن :صار شي؟
ابو سطام :تسلطوا على اهلي
ابو عبدالمحسن :جاي الحين
نايف صعد السياره :وفيه مليون فيديو غيره بس ماقدرت اشوفها
ابو سطام :مو لازم تشوفها
نايف :اي مو لازم اعرف ولا لازم اشوف
ابو سطام :نايف لا تتكلم وانت مو فاهم شي الحين بفهمك
نايف :ابي اعرف كل شي
ابو سطام وهو يصور الظرف:اخوك ضحيه يا نايف ما راح برغبته بس شهرين وعرف انه على غلط وقرر يتعالج خلاص الحين فتره علاجه خلصت ورجع طبيعي
نايف :طيب شغل الفيديو اسمع وش يقول
ابو سطام شغل الفيديو بينما بقي وافي ينظر لنافذه السياره بحزن ونايف يضغط على عينيه :خلاص طفه
ابو سطام :واضح انه محفظينه الكلام وماهو بوعيه
نايف بغصه:طيب ليش ؟
ابو سطام :لأنه انسان يخطئ ويصيب
نايف :ابي اعرف كل شي كيف ووش سالفه البنت وش سوى فيها ؟
وافي بحده :ما سويت شي
نايف :مو توك تقول جيبوها الحين وش ما سويت شي
وافي :يوم قلت جيبوها ما كنت بوعي بس يوم جابوها كنت بوعيي وما سويت شي
ابو سطام :تراه صادق يا نايف ما سوى شي وهو الي بلغ عليهم انهم جايبين البنت اخوك اذنب بس مو لذيك الدرجه
نايف :مقدر اصدقكم
ابو سطام :لازم تصدقنا لأنهم شبكه كبيره تسلطوا عليكم تدري انهم قاعدين يفبركون نتيجه التحاليل ذي الفتره ؟ وان الفلاشه ذي الي ارسلوها لك هدفها يوقعون بينك وبين اخوك لا تعطيهم مبتغاهم يا نايف وصدقنا
نايف دمع :بحاول
ابو سطام التفت لوافي :شلونك الحين ؟
وافي :مو بخير
ابو سطام:باخذكم معاي نكمل شغل
نايف :وين ؟
ابو سطام :معاك فلاشه ثانيه جديده؟
نايف :اي بالبيت
ابو سطام :جيبها ذي يمكن فيها جهاز تعقب
نايف نزل
وافي :يا ليتني ما عرفت اسم فيصل بحياتي انا كان عادي بس ليش يتسلطون على اهلي
ابو سطام :يمكن يكونون غير فيصل وجماعته واستخدموا الي عند فيصل عشان يوهمونك انه منه
وافي :الله يعين بس
نايف :هاك
ابو سطام :بس انقل هذي لذي بعدها نحرك
...
اسماء وهي تتعطر :شفيك رجعت؟
سطام :بنات عمي تحت بيسهرون هنا اليوم
اسماء :يعني نكنسل نروح؟
سطام اقترب منها :لا انتي روحي بس اول شي ...
سحبها من خصرها وقبل رقبتها
اسماء حاولت دفعه :وش تسوي
سطام ابتعد عن رقبتها وهو لا يزال يمسكها من خصرها :عشان يحسبون صار شي
اسماء ابعدت يده عن خصرها ونظرت للمرآه :مارح اخليها بخفيها
سطام اقترب منها من الخلف وفك شعرها ووضعه على كتفها :كذا اخفيها بس لازم تبان بالغلط
اسماء الفتت له :مارح اخليها تبان حتى لو بالغلط
سطام :لا تخليني احطها بمكان ما تقدرين تخفينها بشي
اسماء بتوتر :مو قلنا داخل الغرفه ما يصير شي بس نمثل عليهم برا ليش صار العكس؟
سطام :انا هنا قاعد اجهزك تمثلين عليهم
اسماء تنهدت :اصبري يا اسماء كلها شهر ونص
سطام :عميله Aما عندك رقمي صح ؟
اسماء :وش ابي فيه
سطام :عشان نشغل اشعارات سمول كبتشينو اذا حسيتي انك بالماقف المحرج ما عليك الا ترسلين لي وازعجك بالرسايل وقولي لهم اوه سطام يبيني واطلعي
اسماء :عطني اياه
سطام :سجلي عندك **********
اسماء :اي
سطام :عطيني رنه كيف
اسماء اتصلت عليه :يدق صح ؟
سطام :اي الحين سجلي اسمي عندك حبيبي ولا اي شي
اسماء :ليش؟
سطام :حبيبتي عشان نمثل عليهم
اسماء بحرج:ليه تقول حبيبتي؟
سطام :عشان اتعود اقولها قدامهم
اسماء :انا بروح طيب
سطام وقف على الباب:يا ؟
اسماء :بروح
سطام :قولي يا ايش؟
اسماء :مو لازم اقول احنا قلنا بالغرفه ما نسوي شي لا تضيقها علي
سطام ابتعد :طيب معليش
خرجت اسماء في وجه ام سطام :يلا حيها اسماء توني كنت بناديك تعالي سولفي مع البنات تحت
اسماء ابتسمت :توني فضيت قلت انزل اسلم عالبنات
ام سطام :سطام هنا ؟
اسماء :اي هنا
نزلت اسماء ودخلت ام سطام الغرفه :سطام
سطام :هلا
ام سطام :وش سويتوا ؟
سطام :وش سوينا ؟
ام سطام :البنت توها طلعت تقول توني فضيت وش سويتوا ؟
سطام :نمنا
ام سطام :نوم نوم ولا نوم
سطام :يمه فكري زي ما تبين الحين خليني ارتاح
ام سطام ابتسمت:اي ارتاح مد عظامك شوي
خرجت ام سطام وهي تضحك :يا فرحتك يا حصه الحمدلله يارب شفت ذي الايام قبل اموت عقبال العيال الصيغرونين واااه ياربي
في الاسفل
العنود جاءت راكضه
غاليه :كم مره قلت لك لا تركضين
ام وافي :خليها تركض تلعب ليه ذا التحجر عليها مسكينه
العنود:ماما فيه بنت جديده حلوه جت شفتها على الدرج
غاليه :كيف شكلها ؟
العنود:بيضا وشعرها بني حلو
وجدان :اها هذي اسماء
غاليه :هذي زوجه عمك سطام
العنود :ليه تزوج الحين يجيب نونو ويحبه وانا ما يحبني
غاليه :انا وابوك نكفيك وش تبين بالناس
العنود بهمس :ماما شوفيها جت شعرها حلو ابغا اسوي لها تسريحات
غاليه :روحي كيف سلمي عليها وتعرفي عليها اذا عرفتي بندخلك الروضه
العنود اقتربت من اسماء ومدت يدها اليسار :انا العنود ايش اسمك ؟
غاليه :اي يد قلنا ؟
العنود مدت يدها اليمين
اسماء ابتسمت ونزلت تسلم عليها :ياروحي انا اسمي اسماء
العنود :اسمك حلو
اسماء :وانتي اسمك بعد حلو
العنود :بس شعري مو حلو زيك
غاليه :وش نقول اذا عجبنا شي؟
العنود :إن شاء الله شعرك حلو
اسماء حاولت كتم ضحكتها لكي لا تحرج العنود
الهنوف بضحك :ايش؟
العنود :ماشاء الله
غاليه :شطوره
الجازيه :تعالي اجلسي اسماء
العنود امسكت يدها :اجلسي جنبي
ام سطام جاءت :وهذي الصغيرونه بعد حبتك
غاليه بهمس :حبتها بس انها جلست جنبها عشانها تغار على سطام تقول الحين يجيبون نونو ومعد يحبني
ام وافي ضحكت :وش عرف السميه عن الغيره
الهنوف :طالعه لعمتها ريوف
العنود التفتت لأسماء :عمو سطام يحبك ؟ انا يحبني كثير
اسماء توترت من سؤالها وبلعت ريقها :ايوه يحبني
العنود :طيب انتي تحبينه ؟
اسماء :اي حتى انا احبه
العنود :متى تجيبون نونو ؟
غاليه :العنود تعالي هنا
اسماء ابتسمت :لا عادي خليها
غاليه :ضايقتك بالاسئله
العنود :متى تجيبون نونو ؟
الهنوف :اذا انا جبت نونو
العنود :لا انتي ما ابغاك
الهنوف :ولله لو انك مو سميه امي كان فعصت خدودك لين بكيتي
التفتت لأسماء واكملت :ابغا عمو سطام
اسماء :يمكن ينام الحين
العنود :ارسلي له قولي العنود تبغا تجي اذا ما نام نروح عنده
اسماء :ابشري
العنود :يلا ارسلي له وين جوالك
اسماء فتحت هاتفها :الحين ارسل له
العنود :ولا لا انا برسل له صوت
اسماء :طيب الحين بشغله وقولي
العنود :عمو سطام اذا ما بتنام بجي عندك
اسماء :خلاص
العنود :وقفي وقفي ابغا اقول له رد صوت عشان ما اعرف اقرا
اسماء :يلا سجلي
العنود :رد بصوتك ما اعرف اقرا
اسماء :خلصنا اذا رد بقول لك
ملاك :العنود تعالي عندي انا اشتقت لك
العنود :لا هذي البنت جديده حلوه
ريوف :مين احلى هي ولا ملاك؟
العنود :انا
غاليه ضحكت :ابوها معلمها كذا اذا احتارت بين حاجتين تقول انا قولي لها ماما ولا بابا بتقول انا
ريوف :ماما ولا بابا؟
العنود :انا
ريم ضحكت :تربيه خالد واضحه
العنود :اسمه بابا مو خالد
ديم :واضح مرت بمشكله مناده الاب
غاليه :اي تونا حليناها كانت تقول له خالد
ريوف :ديم بديتي تتكلمين مثل دكتوره نفسيه خطيبك مأثر عليك
ديم :شدعوه مو اي احد يتكلم بشكل مرتب دكتور نفسي
ريم :الله يرحم ايام التلعثم
ديم :تغيرت طيب خلاص
وجدان :ريوف لا تزعلين بس احس لو غيداء وزينب هنا كان اعطوا جو حلو للجلسه
ريوف :شوفي اسماء شحلاتها احسن منهم وش تبين فيهم
وجدان :مدري كان رقصوا مصري وسووا اجواء بأخر ليله انا فيها عزباء
ريوف :انا اهز لك توريك لو تبين بس ما يجون
العنود وقفت خلف اسماء وسحبت شعرها:عادي اسوي لك تسريحه ؟
اسماء امسكت شعرها من جهها :اي عادي بس ذي الجهه خليها زي ما هي لأنها تعورني طيب؟
العنود :طيب مين معاه ربطه ؟
الهنوف:وين ضيعتي حقتي؟
العنود :اعطيت غازي
الهنوف :كيف؟
العنود :يوم كنت بالحوش هو جا وشافها بشعري قال هذي حقت مين قلت حقت الهنوف قال بعطيك حلاوا واعطيني وعطيته وهرب ما عطاني حلاوا خليه يجيب لي
الهنوف :اهاا يعني عشان كذا حاقده علينا
العنود :اذا ما جبتوا حلاوا بكره بقرصكم
غاليه :وبعدين تعالي انا مو قلت اي شخص يقول لك سوي كذا وبعطيك حلاوا ولا جيبي كذا واعطيك حلاوا ما تصدقينه وتهربين ؟
الهنوف :شدعوه حبيبتي غاليه تراه زوج خالتها عادي
غاليه :الموضوع مو شخصنه حبيبتي هي وافقت على غازي بكره توافق على غيره
العنود :الناس الغريبين لا الي نعرفهم صح
غازيه :ايوه كذا شطوره
العنود سحبت شعر اسماء من جهه رقبتها وظهرت العلامه
اسماء شهقت وسحبت شعرها بسرعه وغطتها :العنود وش رايك نروح عند سطام تراه صاحي
العنود :يلا ابغا اسوي فيه مقلب
اسماء حملتها وقامت :يلا احنا بنروح
غاليه :العنود شوي وتعالي طيب ؟
ما إن قامت اسماء حتى نظرت الهنوف لريوف :ماشاء الله على سطام
ريوف :ولله ما الومه بيضاء تقل قشطه ماشاء الله ودك تاكلينها
الهنوف :بسم الله علينا لا تغير ميولنا بس
ريوف :بسم الله علي الله يثبتني
وجدان :سطام سوا كذا ؟
الهنوف :هاه اجل انا ؟
وجدان :امس وانا اسمع صراخهم بالغرفه يتهاوشون
الحازيه :والعصر نامت بحضنه واليوم مدري ايش وبكره حامل مافيه شي مستحيل حبيبتي يمكن توافقوا
في الاعلى
اسماء :يلا انتي ادخلي
العنود فتحت الباب ودخلت
سطام :جيتي بسرعه ما عجبتك جلستهم ؟
العنود :ليه النور طافي؟
سطام جلس :العنود ؟
العنود :لا انا اسماء بس رجعت نونو عمري اربع سنوات وعشره شهور
سطام :كذابه انتي العنود
العنود :ما اكذب
قام سطام وحملها في الظلام :تبغيني اكلك الحين انا احب اكل الكذابين
العنود تصرخ :لالا انا العنود
دخلت اسماء وهي مبتسمه وشغلت النور وصرخت مع العنود بوقت واحد :مقلب
سطام :مين فكر فيه اسماء الصغيره ولا اسماء الكبيره ؟
العنود :انا
سطام :عرفت ولله هذي افكارك
العنود :نزلني ابغا اتكلم معاك
سطام نزلها:اوه الوضع واضح جدي
العنود:ليه تزوجت وما علمتني؟
سطام :تزوجت ونمت توني اصحى نسيت اعلمك
العنود:طيب سامحتك السؤال الثاني
نظرت لأسماء وقلدت وقفتها بين انظار اسماء وسطام وضحكاتهم المكتومه :مين تحب انا ولا هي؟
سطام :اووووه السؤال قوي
العنود :مين انا ولا هي ؟
سطام :عادي كلكم ؟
العنود :لا اجابه وحده صح بحرف ا
سطام :طيب كلكم حرف ا كأنك سؤال القدرات
العنود نظرت لأسماء التي حركت شعرها وقلدتها :انا ولا هي بسرعه ما عندي وقت
سطام :طيب يا سيده الاعمال العنود
العنود :خطأ الاجابه انا
سطام :طيب انا قلت العنود
العنود :لا انت تقول انا
اسماء بأبتسامه :امها تقول ابوها معلمها اذا احتارت بين حاجتين تقول انا
سطام :اهاا انا
العنود :اسماء ولله معايه فستان حلو بكره بلبسه لونه موفي
اسماء :الله نفس لون فستاني
العنود شهقت بفرح :ابغا اشوفه ابغا اشوفه
سطام ضحك وهو ينظر لأسماء :يعني الحلوين بيطقمون بكره
اسماء بحرج سحبت العنود :يلا تعالي بوريك
العنود :واوو حلو طيب ايش لون حذيانك؟
اسماء :ابيض
العنود :عادي تجربينه ؟
اسماء :امس جربته
العنود :بليز
سطام :جربيه مره ثانيه عشان العنود
اسماء :بس...
العنود :عشاني
اسماء تنهدت :طيب
العنود تكلم سطام بعد ان دخلت اسماء الحمام :اذا طلعت لازم نبوسها
سطام :ليش؟
العنود :بابا يقول لازم نبوس الحلوين ويبوسني انا وماما
سطام :طيب بابا قد قال لك مو لازم نقول كل شي في  البيت ؟
العنود :ايوه عشاني قلت لعماتي ...
سطام قفل فمها :مو لازم اعرف
العنود :جت جت
اسماء :هاه العنود وش رايك؟
العنود :سطام شيلني
حملها سطام وقربها من اسماء وقبلتها :يلا دورك الحين
اسماء :مو لازم انتي تكفين
العنود :لا لازم بابا يقول لازم نبوس الحلوين قربي خدك
اسماء نظرت لسطام وتنهدت واقتربت
العنود :يلا سطام عادي لا تستحي لازم نبوس الحلوين
سطام قبل خدها وهمس في اذنها :معليش
العنود صفقت :الله ذحين انتي بوسيه
اسماء :مو هو يكفي؟
العنود :لا لازم عشان ماما اذا بابا باسها تبوسه
سطام همس :هذي تبينا نصير امها وابوها ولا ايش
العنود :يلا
اسماء اقتربت
العنود :لحظه احضني رقبته
اسماء بلعت ريقها:كيف؟
سطام :قصدها حطي يدينك على رقبتي
اسماء :اها طيب
العنود :يلا سوسو
اسماء قبلت خده وابتعدت :خلاص ؟
العنود :لا عيدي اذا بستيه خليكي تحضنين رقبته وطالعي بعيونه وقولي احبك لازم نخلص اللعبه
اسماء :الله يستر من نهايه اللعبه بس
قبلته مره اخرى ونظرت لعينيه بتوتر :ا...احب...احبك
العنود صفقت :الله خلصنا اللعبه يلا نسوي حفله
سطام:الحفله تحت روحي شوفيها
العنود :لا احنا نسوي حفله دايم اسوي حفله اذا خلصت الالعاب
اسماء :كيف حفلتك؟
العنود مدت يدها اليمين وصافحت سطام :سرني اللعب معك كثيرًا مستر دبدب
سطام :مالقيتي الا دبدب؟
العنود تجاهلته وصافحت اسماء :سرني اللعب معك كثيرًا سيده سكر
العنود :يلا باقي انتم
سطام صافح اسماء :سرني اللعب معك كثيرًا سيده سكر
اسماء :سرني اللعب معك كثيرًا مستر دبدب
العنود تراجعت للخلف وهي تودعهم :باي
سطام :الباب انتب...
العنود صدمت رأسها بالباب :لا تقلق مستر دبدب انا بخير
سطام من خلفها:طيب كان خليتيني مستر سطلع على الاقل اسمه يشبه اسمي
اسماء انفجرت ضاحكه :لايق عليك مستر دبدب
سطام :شدعوه سوسو ماني دب
اسماء :اسمي اسماء مو سوسو
سطام :ما سمعتي العنود يوم تقول لك سوسو
اسماء :ما سمعت كنت متوتره
سطام :ايه وش صار تحت ؟
اسماء :ولا شي بس العنود فتشت رقبتي قدامهم
سطام :كويس
اسماء :وش كويس يفشل
سطام :طيب احنا نبيهم يفكرون كذا
اسماء :طيب انت وش قالت لك امك شفتها دخلت
سطام:قالت وش سويتم قلت لها نمنا قالت نوم نوم ولا نوم قلت لها فكري زي ما تبين وشكلها يوم شافت رقبتك تأكدت من تفكيرها
اسماء :مدري ليش هم اغبياء لدرجه صدقوا انه انا الي ابكي الصباح بوافق عليك واتفاهم معاك
سطام رمى نفسه على الفراش:يفكرون بعواطفهم
اسماء بحرج :امسح الروج الي على خدك
سطام مسحه بيده :راح ؟
اسماء :لا بجيب لك مزيل ميكب
سطام :جيبيه
اسماء :هاك
دعك وجهه بقوه :راح؟
اسماء اخذت المنديل من يده وبدأت تمسحه برفق :ما يروح بالقوه ولا شي اصلًا يجي بالقوه كل شي بالرفق واللين
سطام ابتسم :زواجنا جا بالقوه
اسماء بسخريه :انا اتكلم عن الاشياء الايجابيه
سطام :طبعًا انا اعطي مثال انه اي شي يجي بالغصب دايم يكون سلبي
اسماء ابتسمت :بس يمدينا نحول زواجنا ايجابي
سطام نظر لوجهها :كيف؟
اسماء :نصير اصدقاء منه نجرب الصداقه بين البنت والولد لكن بالحلال ومنه اذا تطلقنا نترك عند بعض صوره حسنه وايام حلوه
سطام :يعني اخيرًا تقبلتيني؟
اسماء :لا بأس بك كصديق
سطام :اذا على الصداقه تأكدي اني عند افضل صديق اسألي اخوياي عني كيف اضحك يا صديقتي
اسماء ذهبت الى عند التسريحه وهي تفك اكسسواراتها :ايه يا صديقي شلون نقضي ليلتنا اليوم ؟
سطام :موفي نايت؟
اسماء :وش جوك بالافلام؟
سطام :رعب كوميديا
اسماء :احب الرومنسيه القديمه
سطام :مع احترامي لذوقك يا صديقتي العزيزه بس الرومنسيه اسوء تصنيف
اسماء :مع احترامي لرأيك يا صديقي العزيز اقدر اثبت لك ان الرومنسيه افضل تصنيف واليوم بشغل لك فلم على ذوقي
سطام قام :نشوف،وش رايك اول شي نروح السوبر ماركت نشتري مفرحات ؟
اسماء :يلا بس بغير الفستان ذا الي حللته قبل موعده
سطام :انا بروح اشغل السياره وانتظرك
اسماء :بتمر من عندهم ؟
سطام ابتسم :تغارين يا صديقتي؟
اسماء :لا كيف اغار على صديقي
سطام :فيه باب ثاني ما يمر من عندهم
اسماء :ما اعرفه الباب الثاني انتظرني وننزل سوا
سطام جلس على الفراش :طيب لا تتأخرين
...
وافي بفرح :يعني طلعت مفبركه ؟
ابو عبدالمحسن :تقريبًا
وافي :كيف؟
ابو سطام :النسبه مثل ما قلت كان المفروض تكون واحد بالميه لكن مع الفبركه صارت عشره بالميه وهم حاطين جدول انه كل ما يجيهم تحليل بأسمك يزيدون النسبه بالحقيقه هي سبعه بالميه
وافي :كيف ولله ما سويت شي
ابو سطام :ادري انك ما سويت شي بس فيه احد يمكن حط لك وانت ما تدري
وافي:محد يعرف الا نايف توه عرف
ابو سطام :شخص ما توثق فيه فكر
وافي :راشد
ابو سطام :مين راشد؟
وافي :اخو تركي
ابو سطام بذعر :لا تركي اعرفه يعني اخوه يمكن مثله
نايف وكأنه يقصد وافي بالكلام :ياعم ماهو شرط الاخوان يجون نفس الطينه لازم واحد فيهم يجي خبيث ويسوي نفسه مسكين
ابو سطام بحده :نايف
ابو عبدالمحسن :ليه ذا الاسلوب مو تونا شرحنا لك كل شي
نايف :قلبي يوجعني اني ما عرفت
ابو سطام بسخريه :بسم الله على قلبك اشرب شاهي ويطيب
وافي :يا عم ولله راشد اليوم الي كنا بنجي فيه قبله العصر جاب لي قهوه شربت منها بس جغمه وحده وبعدين يوم طلع من عندي رميتها
ابو سطام :لا انت كذا اكدت لي انه مو هو لأنه ٧٪؜ مستحيل تجي من جغمه وحده وش اكلت الفتره الي راحت
وافي :اكلت من اكل امي ويوم بالديره ما كنت اكل الا نفس بيت عمي
ابو سطام :مين كان يجيب لك الاكل ؟
وافي :الفطور ملاك والغدا والعشا سيّاف
ابو سطام :يمكن ملا...
وافي قاطعه:لا واثق فيها
ابتسم ابو سطام وسرعان ما اختفت ابتسامته :سيّاف ؟
وافي :مابي اشك بعيال عمي
ابو سطام :قلت عيال عمي قصدك احد ثاني؟
وافي :مره بالمحل هو نفسه اليوم الي جا راشد فيه وجاب القهوه بعده جا سطام سولفنا وقلت له سم ولدك علي قال ما بسمي الا اذا انت سميت علي ولا على ابوي قلت له عمي اكيد بسمي عليه وقال اي له حق كبير عليك ويوم استوعب انه قالها توتر وحاول يصرف قال هو الي فتح لك المحل
ابو سطام سكت قليلًا وهو يحرك القلم بيده ويفكر ثم قال :سطام مره دخل غرفتي انا قلت له يجيب جوالي وكانت فيه اوراق على المكتب من ظمنها نتيجه تحليلك يمكن...
ابو عبدالمحسن قاطعه:لا تشك بولدك يا جابر
ابو سطام :لو فكرنا فيها سطام مافيه شي يخليه يحقد على وافي يعني مستحيل يكون هو انا اقصد انه ممكن يكون عرف وعشان كذا توتر
نايف ابتسم وبسخريه قال :الا فيه شي يخليه يحقد على وافي واي شي هذا
ابو سطام :ايش؟
نايف قام يمشي :بنت نفس السبب الي تقاتلوا عليه قابيل وهابيل
ابو سطام بحده :نايف تكلم زين ولا تلعب على اعصابي
نايف :مره من المرات سطام دق الباب يبي شي ببيت عمي وفتحت له ملاك ذات وجه القمر من بعدها ولدك ماهو بخير ويوم انكب مع ذيك البنت وزوجوه قال بنفسه لو انا ما اخذتها ما بخليها لوافي على الاقل ياخذها الغريب وتروح ولا القريب واصير اشوفها كل يوم ولا ؟
ابو سطام وكأنه يريد التكذيب :مستحيل يحبها من اول مره
نايف ابتسم :ولله حسب المقولات ملاك غير واسأل المجرب عندك
وافي بحده :نايف
ابو عبدالمحسن بحده :نايف اجلس واسمعوني انتم الثلاثه خاصه انت يا جابر مو تونا قلنا انهم بيوقعون بينكم ويفرقونكم وحطينا نظريه انه ممكن انتقام عشان فيصل لأنه مثل ما قلنا ابوه اكبر تاجر ممنوعات وهو كان وسيطه بين الزباين  ؟ مو قلنا انكم ما بتعطونهم الي يبغونه الحين وش سوو؟ جابو اكثر فيديو مسيء لسمعه وافي وحطوه عند اخوه الي يشوفه قدوه صالحه وحسنه وخربوا صورته بنظره عشان يتهاوشون الاخوان ويتدخل العم وتبدا الشكوك بينكم مو تونا قلنا كل هذا ؟ اذا كان سطام يعرف رح جيبه الحين وخلنا نكلمه ونوعيه ونايف نظريتك حقت قابيل وهابيل بتمحيها من بالك
جابر اخذ نفس عميق :اعوذ بالله من الشيطان الرجيم ولله ان ودي متعب يعرف لأن محد مثله بذي المواضيع لكن المشكله الكبرى ولده
وافي تنهد :ابي اعلمه
ابو عبدالمحسن :بعد ما خلصت علاج ؟
وافي :اخاف ياعم يعرف زي نايف اخاف اموت وابوي ضايق علي
ابو سطام تنهد :خلاص بس خل العرس يعدي ونعلمه كل شي
وافي التفت لنايف :انت بتكون معاي صح ؟
بقي نايف ينظر للأمام بصمت ويتجاهل وافي
مسح وافي وجهه بيديه واستند على الكرسي بضيق:يالله تعبت من حالي
همس ابو عبدالمحسن له :تراه راضي عليك بس انه مو راضي على نفسه لأنه ما لاحظ الي مريت فيه صدقني
نظر وافي لعمه وكأنه يريد منه التأكيد على ما قاله عيسى هز ابو سطام رأسه بالايجاب
رن هاتف وافي ورد عليه رغم ضيقه الذي بصوته :حي الله هالصوت
ام وافي :وافي تعال بسرعه
استعدل وافي بجلسته :وش صار ؟
نظر نايف لوافي بخوف
ام وافي :رجعت البيت لقيت المرايا الي بالمدخل مكسوره وحولها دم
اتكئ وافي على الكرسي مره اخرى وهو يضغط بين عينيه بتعب :تهاوشنا انا ونايف وانكسرت
ام وافي بخوف اكثر :والدم ؟ وش صابكم يا وافي وش صار  دم مين هذا وشلون هذي الهوشه ؟ وينكم الحين
وافي :احنا عند الشباب والهوشه ماهي قويه زي هوشاتنا دايم بس انه رمى علي حصى من الحوش وكنت واقف قدام المرايا وجت فيها الحصى وانكسرت والدم نايف كان يبي ينظف وانجرح
ام وافي :وشلون الجرح كبير ؟
وافي :لا لا صغير بس رحنا المستشفى خيطوا له ثلاث غرز خليه يا يمه بجيب عامل ينظفه
ام وافي :انتم بتقتلوني يوم من الايام لو تتذابحون ما علمتوني
ابتسم وافي من استباق امه للأحداث :ما نبي نخوفك يا بعد روحي
ام وافي :الله يهديكم بس الحين عطني نايف ابكلمه
وافي مد الهاتف لنايف :خذ
اخذ نايف الهاتف :هلا يمه
ام وافي :كم مره قلت لكم لا تتهاوشون وانا مو موجوده الا ربي ستر ما ذبحت اخوك بالحصى
ضحك نايف :حصى يذبح يا يمه؟
ام وافي :اي يذبح
نايف :الله يحفظك يا يمه تامرين على شي؟
ام وافي بضيق :لاعاد تتهاوشون ولله ان قلبي يتقطع عليكم يا نايف اخاف نهايه هواشكم الحُر بالحُر
مسح نايف عيناه وببحه قال :ما عليك يمه احنا نتهاوش بس ما توصل لذي المواصيل وانتي ما عليك الا دعواتك لنا
ام وافي :الله يصلحكم بس
اقفلت الخط ومد نايف الهاتف لوافي واقام للحمام
ابو سطام :الله يهديه
وافي قام :بلحقه
ابو عبدالمحسن :اجلس خله ياخذ راحته
وافي :اخاف عليه
ابو عبدالمحسن رفع هاتفه :عبدالمحسن اذا خلصت الملف الي اعطيتك رح البيت خواتك مدري وش يبون
ابو سطام بصدمه :عبدالمحسن هنا ؟
ابو عبدالمحسن :اي
ابو سطام :ما كان يشتغل بالسكن الي بأمريكا؟
ابو عبدالمحسن :مهمه وخلصت
ابو سطام :يشتغل معانا ؟
ابو عبدالمحسن :اي
ابو سطام :بكره القى بنتك تشتغل معانا مارح انصدم
ابو عبدالمحسن بسخريه :اذا بنتك اشتغلت معانا
ابو سطام :بنتي محاميه تعتبر بطرفنا ولا ؟
ابو عبدالمحسن :تقريبًا
...
في الساعه السادسه صباحًا وبعمق نومها رن هاتفها بحثت عنه بيدها دون ان تفتح عينيها وردت عليه :نعم
يوسف :صباح الخير
ديم بكسل :ابي انام
يوسف :بتداومين اليوم ؟
ديم :لا عندي اوف
يوسف :داومي عشاني بشتاق لك
ديم :ما اصدق على الله يجيني اوف اسفه مقدر نومي اهم خصوصًا الليله عرسنا
يوسف :عرسنا ؟
ديم :مدري وش قلت بس اني اهلوس من النوم
يوسف :امس متى نمتي؟
ديم :نمت الساعه ثلاثه الفجر ابي اصحى الساعه خمسه العصر
يوسف :حبيبتي انتي كم ساعه تنامين بالاوف
ديم:على حسب ١٣ او ١٥ اكثر شي ١٨ ساعه
يوسف :وما يبقى بيومك الا ست ساعات
ديم :يبقى بيومي ست ساعات ولا اعيش يوم ١٢ ساعه او اكثر وانا كسلانه
يوسف:انتي تبغين تنظمين نفسك ابدي من نومك وصلاتك
ديم:ولله ما علي صلاه خلوني انام
يوسف انحرج :طيب تصبحين او تظهرين على خير
رمت الهاتف واستغرقت في النوم حتى العصر
ريوف :ديم قومي
ديم :ياناس شفيكم علي اليوم
ريوف :قومي بس اهل خطيبك جو من الحين
ديم :وش اسوي لهم؟
ريوف :يا بقره قومي عشان يشوفونك زين وبعد قومي عشان تتجهزين باقي كم ساعه ويجون الضيوف
ديم :اففف طيب طفي المكيف
ريوف :الحين الهنوف عندهم بس لازم انتي تروحين بعد شوي
ديم :اعتقد احنا بنتزوج عيالهم مو بنصير خداماتهم كل ما جو نستقبلهم
ريوف :يابنتي انتي وش تعرفين بالعادات والتقاليد من الواجب انك تستقبلين اهل زوجك او خطيبك اذا جو عندكم يعني كانك تعطينهم لمحه انو انا بكون معاكم
ديم :طيب طيب الحين بغسل وجهي واحط ميكب واجي
ريوف :وشو ميكب يا بنتي بتروحين كذا
ديم :ليش؟
ريوف :انتي كذا حلوه بس نظفي اسنانك وحطي مرطب ومسكرا
ديم :طيب
ريوف :وجوالك يدق له ساعه
ديم :مين؟
ريوف :زوجك المستقبلي
ديم :جيبيه مدري وين نفحت به
ريوف :وش نفحت به
ديم :وحده تعرفت عليها جنوبيه قالتها يعني رميته او شي كذا
ريوف :هاك
ديم :الو
ريوف تهمس :مو كذا يا بنتي نعمي صوتك توك صحيتي وصوتك خايس وتردين على طول
ديم ابعدت الهاتف وتهمس :مالك دخل
يوسف :الو
ديم :ايوه هلا
يوسف :صباح الخير
ديم ابتسمت :صباح النور شلون الدوام اليوم؟
يوسف :الدوام اليوم خليها على ربك
ديم :ليش ؟
يوسف :كل كلمه تعبر عن السوء انا اقصد بها هذا اليوم لأنك ما كنتي موجوده
ديم :واثير داومت؟
يوسف :دخلت لها محاضره وحضرت اسمها ما كانت موجوده يعني غياب
ديم :لا يكون تغيب عشانك ؟
يوسف :تقريبًا
ديم :غبيه تترك مستقبلها عشان مشاعرها
يوسف :يمكن ما بتتركه بس بتغيب كم يوم
ديم :لا مستحيل هي نفسها البنت الي قالت لي الطب اذا فوتي محاضره تضيعين
يوسف :ما علينا منها الحين تجهزي وانزلي اهلي عندكم تحت
ديم :ليش لازم انزل
يوسف:اعتبريها الجزء الثاني من الخطوبه لأنهم ما كانوا موجودين اول وما شافوك
ديم :مو تقول امك كانت تبيني بعرس غازي؟
يوسف :الا بس اختي ليلى وهي الاخت الي امي ما تسوي شي الا برأيها ما شافتك لازم تشوفك الحين
ديم بسخريه :واذا ما عجبتها ؟
يوسف :نتزوج لأن رأيها بالنسبه لي مو مهم
ديم :هي الي اقنعت امك تاخذ اثير صح؟
يوسف :تقريبًا
ديم ضحكت
يوسف :وش يضحك؟
ديم :كل ما اسألك شي عن اثير تقول تقريبًا
يوسف :ما أحب أكد اجابتي بأشياء ما احبها
ديم :طيب بسألك
يوسف:وش؟
ديم :لو ما كنت عرفتني يعني لو ما كتب ربي بيننا تعارف هل كنت رح توافق على اثير ؟
يوسف:طبعًا لا انا قلت لك قبل كنت مخطط ما تدخل انثى حياتي بس انتي كسرتي القاعده
ديم :احس شعور حلو اني اتمرد واكسر القواعد
يوسف :ماقد كسرتي قاعده بحياتك؟
ديم :ولا مره انا خوافه
يوسف:طيب حبيبتي انا بقفل لأن ليلى قاعده ترسل وتقول انك ما تحترمين المواعيد
ديم :شكلي مارح اعجبها
يوسف:حتى لو ما عجبتيها مالها دخل انا الي بتزوجك مو هي هي متزوجه وعندها ولدين وجايه تتسلط على حياتي
ديم :هي اختك الشقيقه؟
يوسف :اي
ديم بحنيه :لأنها اكبر منك تعتبر نفسها امك
يوسف:امي دلال تكفيني وهي تعرف
ديم :حتى لو تراها تحس بمسؤوليه عليك
يوسف :يلا يا قلبي بس بعدين نتناقش فيها
ديم :ذكرني بعدين اقول لك قصتي مع مسؤوليه الاخت الكبيره
يوسف:خليني اكتبها بجدول اعمالي اسمع سالفه ديم مع الاخت الكبيره
ديم ابتسمت :حطها بوقت فاضي فيه
يوسف :حتى لو ما كنت فاضي بفضي نفسي عشانك
ديم :يلا مع السلامه
يوسف :مع السلامه وغزوه مباركه
ديم :ان شاء الله
الهنوف :يلا حبيبتي امشي ليلى تنتظرك
ديم :كيف ليلى احسها تخوف ؟
الهنوف:تراها بس تسوي شخصيه كذا بالبدايه ولا بعدين مرره طيبه وحنونه
ديم :طيب هي ارسلت ليوسف تقول شكلها ما تحترم المواعيد
الهنوف :وكذبت فيها ؟ صدق انتي ما تحترمين المواعيد وتراها اول ارسلت لغازي عني تقول شكلها بتكسر قاعده الاكل الصحي وكسرتها عادي
ديم :اجل يلا بنزل
...
تركي :وين ثامر ؟
راشد:مدري وين اختفى
ثامر :يا عيال ذاك سيّاف مدري شسمه راعي النياق من الصبح وهو متلزق فيني
راشد ابتسم :له عندك طلب
ثامر :وشو ؟
راشد :بعدين بيكلمك فيه
تركي:خلك منه ذاك وين حطيت الكبك؟
ثامر :اي كبك؟
تركي :هذاك الي اسود
ثامر :اها حطيته بدولاب المطبخ
تركي :المطبخ؟
ثامر ابتسم :عاده فيني اذا ابي احتفظ بشي وما اضيعه احطه بمكان غريب عشان اتذكره
راشد ضحك :اغرب عاده سمعتها بحياتي
ثامر :بس ولله تراها مفيده منه محد يسرق الشي لأنه ما يتوقع مكانه ومنه تتذكر على طول
راشد ربت على كتف ثامر :شكل صحبتك افضل من صحبه تركي
تركي وهو يعدل شماغه :على اساس انا ميت على صحبتك انا بتزوج حب حياتي واهج مارح تشوفوني يعني انسى شي اسمه تركي
راشد :ايه وش يقول سميي؟
ثامر :الي لقى احبابه نسى اصحابه
تركي مبتسم:انا حبيبي غير مو بس بنسى اصحابي عشانه بنسى حياتي الي راحت كلها
تنهد واكمل :وش يقول فنان العرب ؟ انا حبيبي بسمته تخجل الضي
ثامر :بس ان عيونها مو ناعسه وفنان العرب على قولك يقول راعي العيون الناعسه
تركي التفت له :وش دراك بعيونها ؟
ثامر :محاميتي قابلتها كثير واعتبرها اختي الكبيره
تركي بحسره تشوف كيف؟ وانا احبها غيري قابلها اكثر مني بشنق نفسي انا
ثامر :باقي ساعتين وتصير زوجتك
تركي :يا طولها من ساعتين اطول من اختبار الرياضيات بالثانوي
راشد :الحين ليش تتجهز وانت باقي بتصلي المغرب
تركي :بروفه بس
راشد :من الصباح وانت تسوي بروفات خلاص
تركي :تعال ثامر بحضنك وانت راشد صور ابي اشوف كيف شكلي اذا حضنتها
ثامر :ذي المره الالف نعيدها كان عندي نقص حنان صار عندي فرط حنان
تركي :تعال بس
راشد :طيب وش رايك تحضني انا عندي نقص حنان
تركي :انت عملاق واطول مني وجداني رقيقه وناعمه كانها قطنه
ثامر :جرحت رجولتي وشنبي الي توه خط
تركي :لا وين ترا وجدان انعم منك بس انا احضنك عشان الطول
تركي :شلون مدرسه الديره باقي يدرس استاذ ربيع ؟
ثامر :اي يدرس فنيه حصته كلها فراغ
راشد :قوله تعرفت على مين
ثامر :تعرفت على واحد اسمه ياسين محمد
تركي :اخو مهند؟
راشد :اي رحت معاه اول يوم وديت ملفه شفته نسخه مهند
تركي :دب وعيونه كبيره؟
ثامر :بالضبط
تركي :كيف شخصيته؟
ثامر :على نياته مسكين
تركي:اخوه اخذ الشخصيه كلها كان كل يوم بالفسحه يختار واحد يبرك عليه ،كيف نظام المسارات ؟
ثامر :انا اخر دفعه ادبي
تركي :اوه يعني ثالث ثانوي انت ؟
ثامر :اي
تركي :ليه دخلت ادبي؟
ثامر :ابي علم اجتماع بجامعه سطام
تركي :بعدين اذا جيت للجامعه ان شاء الله تعال اسكن عندنا انا ومحاميتك
ثامر :ما ابي اضايقكم بشوف بعدين وين استأجر
تركي :ولله عيب عليك يا ثامر ما بتسكن الا عندنا لو اقول لوجدان الحين بتوافقني الرأي
ثامر :ياخي خلوني ابي اعتمد على نفسي واصير انسان مسؤول
تركي :طيب بس بعدين بتزورنا كل يوم ان شاء الله
ثامر :ان شاء الله
راشد :كم نسبتك بالقدرات ؟
ثامر :المره الاولى جبت ب٨٠ ورقي الحين بجرب الفرصه الثانيه بالمحوسب ان شاء الله اجيب ١٠٠٪؜
تركي :ان شاء الله
راشد :ذاكر كويس وتجيبها
ثامر :اي بديت بالتأسيس من جديد وخلصته الحين قاعد اتدرب
راشد :ولله شكلك بتفلح اكثر من تركي نسبته كانت بالثمانين
تركي :بس انه كانت تعتبر مرتفعه وقتها
ثامر :اكبر حاسد لزمانكم الواحد يجيب ٦٠ يدخل اكسفورد احنا الحين شكلهم يبغونا نجيب ١٠١
راشد :انا جايب ٣٤ تهاوشت جامعات المملكه علي كلهم يبوني
تركي :ياخي انت عليك شوفه نفس مدري من وين جايبها
ابتسم راشد وهو يحن للماضي تلك الايام التي اخذ منها صفات حياته ،في سنه الثالث عشر كان هاربًا من والده لكي لا يتلقى عقابًا لمخالفته بالمدرسه
ملاك :وش تسوي ؟
راشد برعب :بسم الله
ملاك ذات السبع اعوام:ابوك يدور عليك؟
راشد :اي بس لا تعلمينه ارجوك وبجيب لك الي تبغينه
ملاك ابتسمت حتى بانت غمازتها :ابي حليب فراوله
راشد :طيب بس دوري لي مكان اتخبى فيه
ملاك :تعال الحقني
راشد :وين بتوديني؟
ملاك :عند جدتي
راشد :بتضربني بعصاها زي ذيك المره
ملاك :لا انا قلت لها تسامحك خلاص
راشد :متأكده ؟
ملاك :اي متأكده
راشد وهو يسير بجانبها :وش تبغين تصيرين اذا كبرتي ؟
ملاك :طبيبه نفسيه
راشد :طبيبه نفسيه ؟
ملاك :يعني اساعد الناس الي زعلانين واخليهم يضحكون احب اضحك الناس الي احبهم
التفتت لراشد وهي مبتسمه :وانت وش تبي تصير ؟
راشد بتفكير :ابي اصير ،ابي اصير دكتور نفسي
ملاك ابتسمت اكثر وهي تقفز :يعني بتصير صديقي ؟
راشد ابتسم :اي
عاد لعبوسه واكمل :بس اخاف ما اصير طبيب ماني شاطر بالمدرسه
ملاك :عادي انا يوم كنت بصف اول ما كنت اعرف اكتب ودايم ابكي لأني ما اكتب بس الحين صرت اكتب واقرا وابوي جاب لي كتاب اقراه يعني احنا اذا ما كنا نعرف شي لازم نتعلم ونعرف انت شاطر اكيد وحتى الجامعات بيتهاوشون عليك كلهم يبغونك
راشد :ايش هي الجامعه ؟
ملاك :قريتها بكتاب حق ابوي وما فهمت قلت لأبوي وقال هي زي المدرسه بس للكبار ويدرسون كل شي بالانجليزي اذا كانت درجتك حلوه تختار جامعه وتكتب لهم رساله واذا عجبتهم رسالتك يدخلونك واذا ما عجبتهم يطردونك واذا كنت مره شاطر ودرجاتك حلوه هم بيكتبون لك رساله يقولون ادرس عندنا
راشد:يعني لازم ندرس الجامعه عشان نصير دكاتره ؟
ملاك هزت رأسها بنعم
راشد :اذا صرت شاطر بيتهاوشون علي ؟
ملاك :ايوه انا اقول انك مره شاطر وبيتهاوشون عليك
راشد :تدرين انتي تصلحين دكتوره نفسيه دايم تخليني اضحك
ملاك ابتسمت :لأني احبك ابيك تضحك
راشد :تحبيني؟
ملاك :اي بعد احب ابوي وامي وسيّاف وجدتي واكثر شي احب ماجد دايم اذا شافني يضحك ترا عمره صار واحد
راشد :اسمعي انا برجع البيت وانتي تعالي معاي خلي ابوي يسامحني
ملاك :يلا
راشد :امشي قدامي وادخلي البيت
ملاك دخلت :يا عم
ابو راشد بغضب :وين راشد
ملاك امسكت بيده وقبلتها ونظرت له ببراءه :سامحه ياعم عشاني هو ما بيعيدها بيصير شاطر وما...وما ... ايش سوا هو ؟
ابو راشد انفجر ضاحكًا:جايه تشفعين له ولا تدرين وش ذنبه ؟
ملاك ابتسمت :شوف خليتك تضحك جدتي تقول الي يضحك يعني خلاص انتهى زعله صح ؟
ابو راشد وهو مبتسم:صح
ملاك اشارت لراشد :تعال
دخل راشد وقبل يد والده :اسف
ابو راشد عاد للضحك :سامحناك عشان ملاك لكن ثاني مره اذا غلطت وان شاء الله ما تغلط جيب لك واحد يشفع لك بس يعرف ذنبك
ملاك :انا سامحتك مع ابوك يعني ابي هديه
ابو راشد :حقها عطها هديه
راشد :اجيب لك حليب فراوله ؟
ملاك :لا
ابو راشد :اجل نزوجك راشد اذا كبرتي موافقه ؟
راشد ابتسم
ملاك ابتسمت وهي تنظر لراشد :ابوي يقول عيب الصغار يتكلمون كذا اذا كبرنا نتكلم عادي
ابو راشد :اجل وش تبين امري عليه ويسويه راشد
ملاك :ابي اخذ من وردتكم هذي وازرعها ببيتنا
ابو راشد :اكسر لها ساق متينه تصلح للزراعه ورح معها البيت ازرعوها
التفت لملاك واكمل :بس الورده روح لازم تهتمين فيها وتسقينها كل يوم.