قصة : ( الحب مقامات ) ل سهيلة سعيد المنجي

الحلقة ٢٣ و ٢٤

قصة : { #الحب_مقامات } 💔🕸️

الحلقة الثالثة والعشرون { ٢٣ } 🍂

ابراهيم : ماشي مفيش مشكلة ، خدي وقتك ، بس لو هتعملي كدة بجد مش مهاودة
جوري بعدم فهم : لا مش فاهمة معلش !
ابراهيم : يعني انتي عاوزة وقت عشان فعلاً تعرفيني اكتر ، ولا عاوزة تقولي لأ ومحروجة ف بتديني انا مهلة عبال م تعرفي هتقوليهالي ازاي ؟
جوري : ههههه لا ي ابراهيم مش كدة ، انا لو مش حابة الموضوع هقولك من حالاً إنك زي اخويا ودي حاجة متزعلش
ابراهيم ب ابتسامة : يعني انتي حابة الموضوع ؟
جوري ب احراج : خلاص بقاااا !
ابراهيم : بتكلم جد ، ريحيني وحياة ابوكي
جوري : انت الف بنت تتمناك ي ابراهيم
ابراهيم : وانتي ؟
جوري : اعتبرهم الف وواحد
( يبتسم ابراهيم )
ابراهيم : وانا مش عاوز غير الواحد دة والله
جوري ب ابتسامة : ماشي
ابراهيم : بس انا عاوز اقولك حاجة عشان تحطيها ف دماغك برضو وانتي بتفكري
جوري : ايه ؟
ابراهيم : دة انا ودي حياتي ، يعني مش انا بطل القصة الي هتسجن واطلع مصاحب رئيس عصابة يغنيني ويشغلني معاه ، ولا برضو الي هيورث عمه الي ف كندا ، انا دة حالي ومش هيتغير ، هتقبلي بيه ي بنت الناس هحطك فوق راسي وهعمل الي اقدر عليه عشان اسعدك واخليكي احسن الناس وملكة عليهم ، حاسة إنك مش هتقدري ع كدة ومش هتستحملي عيشة واحد زيي قولي من دلوقتي عشان متتصدميش بعدين وتندمي ، ف فكري ف دة اهم من اي حاجة تانية
جوري بفهم : انا فهماك وفاهمة انت عاوز توصلي ايه ، بس انا عاوزة اقولك إن مش عشان اهلي ظروفهم مختلفة عنك او اغنية بمعنى اوضح إن اي حد تاني ظروفه ابسط يبقا اقل منهم او مني ، دة مش صح ، انت تقدر تعلى ف نظري بحاجات تانية خالص غير الفلوس ي ابراهيم ، كفاية إني شيفاك راجل واد المسؤلية وحنين ع اهلك ، الحاجات دي عندي اهم بكتير م الفلوس صدقني
ابراهيم ب ارتياح : ربنا يريح قلبك ي شيخة
( تبتسمله )
انفال بصوت عالي : ايه ي حلوين ، نقرا الفاتحة ولا اييييه ؟
الكل : هههههه
ابراهيم : لا لسة شوية
علي : شكلنا هنقراها بجد !
ابراهيم من جوة : ادعيليييي
( داليا ع اخرها ، تقوم تقف )
داليا : انا هنزل عشان ماما
انفال : م لسة بدري !
داليا : تصبحوا ع خير
( تمشي داليا )
علي ب استغراب : هي مالها ؟!
انفال : مش عارفة !
يارا وهي بتقوم : وانا هدخل انام
( يبصلها كريم )
انفال : اقعدي انتي كمان ، البت تطلع تلاقيكوا مشيتوا ، عيب كدة !
يارا وهي بتقعد : طيب
( يدخله چوري وابراهيم )
علي : ايه ي جدعان
ابراهيم : ايه ي عم في ايه ؟
علي : لا مفيش حاجة خالص !
جوري : انا همشي بقا الوقت عدى وسرحت
انفال : طب م تباتي معانا انهاردة
جوري : لا عندي كلية الصبح ومعملتش حسابي ، مرة تانية ب اذن الله
انفال : ماشي ي قلبي هنستناكي يوم تبيتيه معانا
جوري : ب اذن الله حاضر
( تسلم عليهم )
ابراهيم : هوصلك
جوري : اوك
( تنزل چوري ووراها ابراهيم ، تسمعهم داليا نازلين ع السلم ، تجري ع البلكونة تبص منها ، تقرب چوري ع عربيتها وتقف ويقف قصادها ابراهيم )
جوري ب ابتسامة : اليوم كان جميل انهاردة ، انا مبسوطة اوي إني قعدت معاكوا
ابراهيم : يارب دايماً ، تعالي كل يوم واحنا نبسطك كدة ي عم
جوري : ياريت والله اقدر اجي كل يوم
ابراهيم : صحيح انتي عارفة إن ليا شقة ف العمارة هنا ف الدور الرابع
جوري : لا مش عارفة 
ابراهيم : لا شقتي هنا الي المفروض اتجوز فيها
جوري : اة
ابراهيم : بس لما الدنيا تمشي تمام يعني وحبيتي نبيعها وناخد اي بيت تاني برة نبيعها
جوري : مين قالك إني هحب كدة ، انا بحب العيلة واللمة ، ولما نبقا سوا انا هحب اكون وسط اهلك لإنهم اهلي ، وبعدين انت الولد الوحيد ومينفعش تبعد عن مامتك واخواتك البنات
( يبتسم ابراهيم )
ابراهيم : تعرفي احلى حاجة ف الي انتي قلتيه دة ايه ؟
جوري : ايه ؟
ابرهيم : كلمة لما نبقا سوا ، مقلتيش لو بقينا سوا
جوري : هتفرق ؟!
ابراهيم : اوي
جوري ب استغراب : ازاي بقا ؟!
ابراهيم وهو بيحط ايده ف جيبه : كلمة لو ، يعني احتمال ومش كبير كمان ، اما لما دة يعني هيحصل ب اذن الله
جوري : اديك قلت ب اذن الله ، وسيبني امشي بقا عشان انت اخرتني ي مغربي 
ابراهيم بضحك : ماشي ي عم
( تضغط ع ريموت العربية ، يفتحلها الباب ، شيفاهم داليا من فوق متغاظة )
جوري وهي بتسلم عليه : باي
ابراهيم : باي
( تمشي چوري ، يرجع ابراهيم البيت ويطلع ، يلاقي داليا ف وشه ع السلم )
ابراهيم بخضة : يخربيت اهلك !
داليا وهي بتربع ايدها : سلامتك م الخضة
ابراهيم : انتي ايه الي نزلك ، مش كنتي قاعدة معانا !
داليا بتريقة : اتخنقت م القاعدة ، وبعدين الي يسمعك كدة يقول إنك كنت قاعد معانا اصلاً ومش مستفرد بالست چوري
ابراهيم : دي تريقة بقا !
داليا : لاااا لسمح الله وانا اقدر اتريق برضو ع چوري هانم ، كنتوا بتعمله ايه بقا ف البلكونة ، كنت بتوصفلها فين شركة الكهربا من فوق ؟
ابراهيم بحدة : مالك ي بت في ايه ، م تتظبتي ع المسا بدل م اظبتك !
داليا : لا انا مظبوطة كويس ي هيما ، اتظبت انت بقا عشان دي ولا شبهنا ولا مننا ولا تنفعك م الأخر
ابراهيم بفهم : ااااه ، انتي غيرانة منها بقا !
داليا : انا مش غيرانة من حد ، انا خايفة عليك منها
ابراهيم بضحك : ليه هي البت بتعض ؟
داليا : اة بتعض ي هيما وعضتها والقبر ، اسمع مني 
ابراهيم : تعرفي المصيبة إني واقف بسمع منك فعلاً ، اطلعي اتخمدي !
داليا : ان ...........................
ابراهيم بزعيق : اطلعيييي
( تتخض داليا وتطلع بيتها ، يقف ابراهيم متضايق من كلامها ، بعد شوية ، ابراهيم ف اوضته بيتكلم ف الفون )
جوري : الو
ابراهيم : وصلتي ؟
جوري : اة لسة داخلة اهو
ابراهيم : طب يلا روحي غيري هدومك واتعشي
جوري : اوك
ابراهيم : سلام
جوري : سلام !
( تقفل چوري وهي مستغربة تلخيص ابراهيم ف الكلام ودة مش من عادته ، تخبط انفال ع اوضة ابراهيم )
انفال : هيما صاحي ؟
ابراهيم : خشي
( تدخل انفال )
انفال : قولي عملت ايه بقا ؟
ابراهيم : قلتلها
انفال : وقالت ايه ؟
ابراهيم : عاوزة فرصة ناخد ع بعض الأول
انفال : طب دي حاجة كويسة ، يعني عندها قبول للموضوع مرفضتش
ابراهيم وهو بيضير وشه : اة
انفال ب استغراب : طب وانت مالك زعلان ليه ؟!
ابراهيم : لا مش زعلان
انفال : اومال في ايه ؟!
ابراهيم : البت داليا قابلتها ع السلم لما كنت بوصل چوري وقعدت تقول كلام يسم البدن !
انفال : كلام ايه الي قالته الدبش دي ؟!
( يقولها الي قالته )
انفال : ي حبيبي انت مش فاهم ، دي غيرة بنات !
ابراهيم : طب بتغير منها ماشي بتدخلني انا بقا ف الحوار وعاوزة تبعدني عنها ليه ؟!
انفال : انت كل دة مش فاهم ي ابراهيم ، داليا عينها منك
ابراهيم بخضة : مين دي الي عينها مني انتي هبلة !
انفال : والله عينها منك ومن قبل م چوري تظهر ، بس انت الي مكنتش واخد بالك منها ودايماً بناخد تصرفاتها ع إنها هزار ، لكن هي بجد وطالعة من قلبها
ابراهيم : عمر م فكرت فيها كدة ابداً !
انفال : عشان هي مش ف بالك بس
ابراهيم : يعني الي بتعمله دة مش غيرة من چوري بقا دي غيرانة عليا انا !