- اميرة : مالك . بعد .
- عبد المالك: منبعدش.
- اميرة ؛ بعد عليا يالزح .
- عبد المالك: هيثم كي كان لاسق فيك مقبيل و يعنق فيك نورمال و انا ماشي نورمال ؟
- اميرة : هيثم قبل مايكون وليد خالتي هو خويا فهمت . عندو الحق يبوسني . يعنقني . يضربني حياتي كومبلي معاه . مي نتا واحد عندي قريب شهر ملي عرفتو . و جاي تقارن روحك بيه ؟ و دوك بعد عليا. انا الحمارة لي خممت فيكم . شوف واش راه صاريلي . زمر .
بعد روحو عليها و هي راحت تخرج . كي كانت خارجة مالدار . عيطلها .
- عبد المالك: اميرة ..
- اميرة : واش؟
- عبد المالك: ادا راح يبات وليد خالتك تماك قولي لمريم تجي لدار .
- اميرة : متخافش مراحش يبات . أصلا كي يبات واش راح يديرلها زعما . الولد راهو مع يماه و الدار راهي معمرة ناس مايقدر يديرلها والو .
و راحت دخلت لدار و قلبها يخبط خبيط . طلعت تجري لشومبرتها غلقت الباب و قعدت فوق البونك حاطة يدها على قلبها .
- اميرة تحكي مع روحها : دوك نتا علاش راك تخبط هكا كي الحمار . باينة مالخوف . وي خفت بزاف كان قادر يغتاصبني تماك و واحد مايسمع بيا . بصح ميديرهاش مالك . بصح انا وين عمبالي بلي ميديرهاش . بصح عينيه يهبلو . اعععع اميرة خلاص انسايه .
- التحت فالصالون :
- سارة : وشبيها؟
- آية : يكون كاش ماقاللها عبد المالك . مالنهار لي جينا هنا و هيا تضارب معاه .
- مريم متفاجئة : عبد المالك ؟
- آية : ايه . علاش؟
- مريم : والو .
- شوقي : مام هيا لسانها طويل .
- هيثم: بزاف طويل .
- شوقي : ممم . ايه مريم شحال عمرك ؟
- مريم : 18 .
- شوقي: الله يبارك .
- مريم : يبارك فيك .
- هيثم : يسما عندك الباك هاد العام؟
- مريم : ايه .
هكاك و تهبط اميرة . قعدت قدام هيثم و حطت راسها على كتفو و مخدة في حجرها .
- هيثم : بس وشبيك ؟
- اميرة : والو . علاش؟
- هيثم : راكي كالم .
- اميرة : والو جيست عيانة شوية . .ايه الدراري راح تباتو هنا ؟
- شوقي : لالا. .
- آية : وين تروحو ؟
- هيثم : دارنا .
- سارة : ها .
قعدو يحكو حتى وين عيطتلهم عيشة يتعشاو . كلاو و راحت آية و سارة يغسلو الماعن و مريم و اميرة و هيثم و شوقي قاعدين معاهم فالكوزينة يڨسرو و منا . كملو راحو لصالون يحكو لحقت 11 ناض هيثم.
- هيثم : شوقي أيا نروحو .
- ناض شوقي : وي . أيا البنات . باي .
راحت اميرة معاهم للباب سلمت عليهم و عنقتهم . حتى وين نطق شوقي .
- شوقي : اميرة صحبتك مريم اونكوبل ؟
- اميرة بخبث : ايه . علاش؟
- شوقي : خلاص . والو .
- اميرة: راني نتمسخر . سيليباتار الطفلة .
- شوقي : مليح . منبعد ابعثيلي الكونت تاع انستقرام ديالها.
- هيثم : علابيها من مقبيل و نتا تخزر فيها .
- شوقي : بلع مام نتا شفتك كيفاش كنت تشوف فسارة.
تبكم هيثم و اميرة ضحكت .
- اميرة : خلاص منبعد نبعثلك. و كي تلحقو ابعثولي ميساج . اوكي .
- هيثم : اممم . أيا باي .
- اميرة : باي .
ستناتهم ركبو الطونوبيل و راحو كي جات راح تدخل شافت عبد المالك هابط من الطونوبيل . خزرت فيه . شافتو شاف فيها. دخلت و غلقت الباب . راحت لصالون لقاتها فارغة . عرفتهم ياراهم فالجاردان يا الشومبرة . راحت للجاردان كيف كيف . طلعت لشومبرة لقاتهم فالبالكون قاعدين فلرض و حاطين السقايط . شيبس . شيكولة . و منا . راحت رفدت شيبس و قعدت فوق الكرسي طلعت رجليها لعندها و حطت راسها عليهم . و تاكل .و ساكتة
- آية : اميرة وشبيك ؟
- اميرة : والو .
- سارة : راكي sur ؟
- اميرة : باينة .
- مريم : ايه واش نديرو .
- اميرة : معمباليش .
- آية : سارة عيطلك هداك الهم ؟
- سارة : معمباليش . كنت دايرة مود آفيون . باسك كان شوقي قدامي .
- مريم : عندك الحق . انا كي نريح مع خاوتي فبلاصة وحدة . تيليفون نطفيه .
- اميرة : نحمد ربي باسك معنديش خويا كبير.
- آية : عندك ختك كبيرة عليك .
- سارة : مبعثلي والو .
- مريم : اخطيك منو. كان جا يحبك كان مخدعكش ملول .
- اميرة : عندها الحق و زيد مع شكون خدعك ؟
- سارة : معامن ؟
- اميرة ؛ مع صحبة عبد المالك .
خزرت فيها مريم مشوكية .
- مريم : صحبة عبد المالك .
- اميرة: ايه . حياة . مقبيل قالي.
- مريم : واو . يسما نساها .
- اميرة : نسا شكون ؟
- مريم : والو .
- آميرة بشك: هممم . ايه سارة ابلوكيه من ڨاع ليكونت . بدلي لابيس ديالك . و نقولك واش نديرو . درتلو خطط جهنمية باش نعذبو .
- سارة : واش هيا ؟
- اميرة : افتحي فايسبوك باسم طفلة . ادخلي لڨروب عروض زواج . اكتبي مطلقة و عاملة أبحث عن شاب للزواج . و اكتبي نيميرو ديالو. هادي اللولة .
- مريم : وين جبتيها هاد الخطة ؟
- آية : ياو هادي شيطانة . دوك السيد يندم كي خدع سارة. تندمو ندمة حياتو .
- اميرة : حبسو مالهدرة و ابداو تخدمو. دوك ندمو العطاي.
فتحت سارة كونت باسم طفلة و دخلت فڨاع لي كونت تاع عروض للزواج كتبت فيهم واش قاتلها اميرة . و خزرت فيها
- سارة : ايه درت ؟ دوك واش ؟
- اميرة : الخطة الدوزيام . آية افتحي كونت
- آية: وشبيك نتي مع لي كونت .
- اميرة : ياو افتحو . بلاك نولي انا اون كوبل و يخدعني. نلقاو هاد لي كونت . المفيد افتحي كونت سميه مولعيد الڨزانة و صوري شمعة شاعلة و قدامها باسينة فيها الحنة و خرجي تصويرة من تصاورو و ديري عليهم ❌⭕❌⭕ و رمي علا تصويرة شوية تراب و صوريها و بعثيهالو فالكونت هداك و قوليلو قول ليماك تجري عليك و ابلوكيه و خليه يندب. و الله يا سارة نحلفلك ليغاڨل يجوه .
- مريم : ههههههه. اميرة واو . عقل شيطاني من المستوى الاعلى .
- اميرة : هههه عمبالي.
- آية: قلتلكم.
- سارة : بصح وين نجيب تصويرتو و شمعة و حنة فهاد الليل .
- اميرة : هدي خليها لغدوة نديروها .
- سارة : اوكي.
طلعت اميرة راسها لقات عبد المالك خارج للبالكون .شاف فيها . ناضت تجري
- اميرة : البنات انا راني عيانة . نروح نرقد . بونوي .
🎥🎥🎥🎥🎥🎥🎥🎥🎥🎥🎥🎥🎥🎥
نتمنى يعجبكم و زيد راني حطيتلكم خطط جهنمية مجربة . سيتهم انا و بنت خالتي كي خدعها صاحبها 😂😂😂😂😂. فوت و كومونتار ❤️❤️❤️❤️❤️
أنت تقرأ
كرونيك " القدر لا يسأل" 💞
Romanceهادي حكاية اميرة و عبد المالك راهو مكتوب التعريف تاع الشخصيات في الكونت لي راحلي .https://www.wattpad.com/user/SophiaMehenni?utm_source=android&utm_medium=link&utm_content=share_profile&wp_page=user_details&wp_uname=Sophia-mh&wp_originator=SMuLIfXiT...
