طلعت لشومبرة مريم . فتحت الباب و دخلت .لقاتها متكسلة فلرض بطريقة غريبة و حاكمة تيليفون و تضحك . خزرت فيها مريم .
- مريم : متعرفيش طبطبي الباب .
- اميرة : منعرفش .علاش راكي تضحكي هكا ؟
- مريم : راني نحكي مع شوقي .
- اميرة : هاه شوقي . كيفاش راكم ؟
- مريم : انتيك . و نتي و خويا ؟
- اميرة : متحكيليش عليه . يرحم في باباك . راني حابة نقتلو .
- مريم : علاش ؟ واش صرا ؟
- اميرة : راهو يخدع فيا .
ناضت مريم تجري .
- مريم: احلفي .
- اميرة : دوك نكذب في عفسة كيما هكا ؟
- مريم: ونتي كيفاش عرفتي ؟
- اميرة : عرفت و خلاص . أصلا أخطيني منو . منيش حابة نحكي عليه . يكفيني لي راح نقابلو اليوم .
- مريم : خلاص .
بداو يحكو حتى وين لحق ميساج لأميرة من عند هيثم مكتوب فيه بلي لازم تعرف وقتاش عبد المالك راهو رايح عند هاديك الطفلة .
كملو يحكو هكاك حتى وين جا حسام خو مريم عيطلهم باش ياكلو . هبطو لتحت لقاو فاطمة و اسامة و عبد المالك و حسام و زادو جاو هوما . قعدو خزرت اميرة فعبد المالك خزرة تاع موت . و بدات تاكل و تحكي مع مريم . كلاو و راحو البنات يغسلو الماعن . مريم راحت لتوالات و بقات اميرة وحدها فالكوزينة . هكاك و يدخل عليها عبد المالك . خزرت فيه بطرف عينها .
- عبد المالك: اميرة.
- اميرة : واش؟
- عبد المالك: وشبيك ؟
- اميرة : وشبيا؟
- عبد المالك: علاش وليتي هكا ؟ متقوليليش برك مزالكي مع حكاية الطفلة هديك ؟
- اميرة : ايه . مزالني في حكاية الطفلة. . و عمبالك واش عرفت مالك . عرفت بلي هداك النهار لي كنت فيه نتا مع صحابك . كان كاين واحد يشبهلك..فوتو كوبي ديالك قاعد مع طفلة و يضحك معاها و يبوس فيها .
خزرت فيه لقاتو ساكت .
- اميرة : نزيدلك ؟
- عبد المالك: اميرة خليني نفهمك .
- اميرة ؛ راني نسمع .
- عبد المالك: شوفي هيا صح رحت معاها مي just amie . يعني مكاين والو بيناتنا . تقرى معايا
- اميرة ؛ نسقسيك . انا نخرج مع واحد يقرى و نروحو ندخلو حاكمين يدين بعضانا و كل 2 دقايق يبوسني و يبوسلي يدي . و نقولو هكا و تشوف واش تقول . تقول راهم كيف كيف. أصلا اخطيك من روحك اي واحد يشوفني مع واحد برا ندير هاد العفايس يقول هادو راهم كيف كيف .
- عبد المالك: يسمى مأمنتينيش ؟
- اميرة : باينة .
- عبد المالك: اوكي .
و خرج من الكوزينة هيا كملت تغسل هادوك الماعن حتى وين جات مريم لقاتها كملتهم . خرجت اميرة من الكوزينة طلعت لشومبرة . فالطريق سمعت صوت عبد المالك .
- عبد المالك: ايه. نتلاقاو . معمباليش وقتاش . ايه تناسبني . السبت نتلاقاو . وقتاش . ارواحي على 12 نفطرو تماك و نكملو . أوكي . باي .
و كوبا . اميرة غير قال باي راحت . دخلت لشومبرة و حكمتها البكية . حكمت التيليفون عيطت لهيثم. و
- هيثم : اميرة .
- اميرة : هيثم .
- هيثم : اميرة وشبيك ؟
- اميرة : سمعتو يحكي معاها و
- هيثم : او واش ؟
- اميرة : قاللها نتلاقاو نهار السبت و يروحو يفطرو منبعد معمباليش .
- هيثم : حكيتي معاه ؟
- اميرة : ايه حكيت .
- هيثم : منبعد نحكو على واش قالك . شوفي .دوك نجي نديك من عندهم .
- اميرة : كيفاش ؟
- هيثم : دوك تعيطلك خالتو . قوليلها ايه و خلاص .
- اميرة : اوكي .
كوبات عليه و راحت خرجت من الشومبرة عينيها حمورة و حاكمة الدموع بسيف . راحت لدوش . غسلت وجها منبعد ولات فطريق تلاقات بعبد المالك . خزرت فيه و كملت . راحت دخلت لشومبرة لقات مريم تماك .
- مريم : وين كنتي ؟
- اميرة : غسلت وجهي .
- مريم : راكي مليحة ؟ كنتي تبكي ؟
- اميرة : لالا . راني مليحة . جيست معمباليش واش صرالي .
- مريم : راكي متأكدة ؟
- اميرة : باينة . ايه احكيلي .
- مريم : علاواش ؟
- اميرة : عليك نتي و شوقي . جامي محكيتيلي عليكم . غير هوا لي يحكيلي .
- مريم : يحكيلك؟
- اميرة : واه يحكي . مي كاين عفايس مقالهمليش .
- مريم : جامي مقالي بلي يحكيلك .
- أميرة: وشبيك زعفتي ؟ و لا غرتي ؟
- مريم : لالا .
هكاك و يصوني تيليفون اميرة . رفداتو لقاتو يماها .
- اميرة: وي ماما .
- عيشة : اميرة . عيطتلي خالتك فتيحة دوك و قاتلي بلي ياسمين راهي مريضة و خصها شكون يريح معاها هاد الليلة .
- اميرة : ايه .
- عيشة : قاتلي ادا تبعثي اميرة تريح معاها ؟
- أميرة: و نتي واش قلتي ؟
- عيشة : محبيتش نحشمها قتلها ايه. قاتلي دوك نبعث هيثم يجي يديك عندها .
- اميرة : ماما راكي سيغيو ؟ ياك عمبالك راني مع مريم .
- عيشة : شوفي دوك يعيطلك هيثم تهبطي عندو تركبي و تبلعي عليا هداك الفم . و مريم كاش نهار جيبيها تبات عندنا.
- اميرة : اوكي .
و كوبات عليها .
- مريم : واش كاين ؟
- اميرة : بنت خالتي راهي مريضة و خصها وحدة تريح. معاها دوك. دونك.خالتو عيطت لماما و قاتلها ابعثي اميرة و ماما قبلت .
- مريم ؛ فهاد الليل ؟ و شكون يجي يديك ؟
- اميرة: قاتلي دوك يجي هيثم .
هكاك و صونا تيليفونها لقاتو هيثم .
- اميرة : درتها ؟
- هيثم : خسارة عليك الڨلب . المفيد شوفي دوك كاش 5 دقائق و نكون عندك . اوكي . راني جاي طيارة .
- اميرة : هههه اوكي . مي متنساش راني عند مريم .
- هيثم : اوكي الڨلب .
كوبات عليه .
🎥🎥🎥🎥🎥🎥🎥🎥🎥🎥🎥🎥🎥🎥
راني كتبت بارت و اليوم فليل نزيد نكتب و نقعد نكتب حتى وين نكملها. المفيد نحبكمممم ❤️💞
أنت تقرأ
كرونيك " القدر لا يسأل" 💞
Romanceهادي حكاية اميرة و عبد المالك راهو مكتوب التعريف تاع الشخصيات في الكونت لي راحلي .https://www.wattpad.com/user/SophiaMehenni?utm_source=android&utm_medium=link&utm_content=share_profile&wp_page=user_details&wp_uname=Sophia-mh&wp_originator=SMuLIfXiT...
