تالان

البارت السادس

أوج واليمي ما يدرون
مثل شمعة صبح روحي
مو اعمى وكمت ماشوف
بس يمكن طفت روحي
لو عدها كرامة تموت
جسمي يطرد بروحي
الجلد من يبتسم مجروح
كامت تضحك جروحي
مو بالكيف اقنع الروح
وبضحكاتي اغافلها
ترا المراية ماتختار
الوجوه التكابلها ..
.
.
.
.
.
.

كلش انغثيت من ردت فعل اهلي وانه اذا اضوج النوم يطير من عيوني عندي كعدة باجر ع وكت روحي طلعت ضليت اتكلب صفنه تجيبني وصفه توديني م اعرف شلون وشوكت نمت بس الي اعرفه كلش متأخرة بحيث بعدني توة غمضت ودك المنبه كمت وانه انعل بروحي ميته نعاس تعبانه و عقلي موتني من التفكير محتارة شلون اقنع اهلي ادري هل شغله صعبه مو بسهوله احصل موافقتهم اضافه انو م عندي وقت والايام تمشي بسرعه وانه مو اهواي متواجدة بالبيت يومي مخلص بين الدوام ودراسه والامتحانات يعني م عندي وقت اكعد الح عليهم بحيث يملون ويوافقون

استغفر الله هسه خلي اخلص اليوم والله يفرجهاا...

بدلت وطلعت حتى بدون اريوك وصلت للشركة دخلت سلمت ع الموجودين وخليت راسي ع المكتب مالتي وغمضت عيوني..

م نايمة بس مضاهرة بالنوم لان عيوني موتني وجع مو طبيعي وراسي صداع قوي م اكدر حتى ارفع راسي واشتغل بقيت بس مغمضه..

اسمع استاذ ازهر دخل
ازهر: صباح الخير
ردو علي الموضفين صباح النور استاذ تفضل

ازهر: لا شكرا بس ممكن سارة اشوي
اي استاذ تدلل هسه اجي...

راحت ورى
سارة: تفضل استاذ .
ازهر: شبيها تالان مريضه اذا تريد خلي تاخذ اجازة وترجع ...

سارة:م اعرف استاذ هي قبل شوي وصلت حتى م لحكت اسألها واشوف شنو بيها

ازهر: روحي شوفيها شبيها وتعالي كليلي اذا م تصير زحمة ...

سارة: لا رحمة استاذ

ازهر:بس يا ريت ما تعرف انه الي دزيتلج خلي هل شي بيني وبينج..

هزيت راسي ورحت التالان..

دكيت ع الطاوله الي خاله راسها عليها رفعت راسها
تالان:ها شكو
سارة:شنو انت شكو شبيج
تالان:تعبانه خيه وم نايمة وروحي طالعه

سارة:متريكة لو لا حتى بس اجيبلج كهوة تصحصحين بيها لو سالفتج يرادلها اجازة حتى اروح اخذلج وترجعين البيتكم ترتاحين..

تالان: صفنت بوجها عرفت ازهر دازها كتلها لا حبي اذا تكدرين جيبيلي شي اكله وكهوة م بيه شي ..

سارة: تمام حبي دقايق ويمج ..

تالان:مشكورة عمري راح اتعبج

سارة:انجبي تعب شنو اصلا انه جوعانه واجيت سألتج لو م جوعانه لو تموتين م احرك روحي ههههه

تالان:ابتسمت بوجها ورجعت راسي ..

سارة:رحت بلغت استاذ ازهر كال تمام روحي جيبيلها شي وعينج عليها جذابه تكابر هاي امبينه تعبانه ..